a17:22Pe 1:16-18
b17:5Nag 18:15; Sak 2:7; Ais 42:1; Mat 3:17; Mar 1:11; Luk 3:22
c17:10Mal 4:5
d17:12Mat 11:14
e17:13Luk 1:17
f17:19Mat 10:1
g17:20Mat 21:21; Mar 11:23; Luk 17:6; 1Ko 13:2
h17:22Mat 16:21
i17:24Kal 30:13, 38:26

Matthew 17

A arkeles i kápán páplun ái Iesu

Mar 9:2-13; Luk 9:28-36

Má namur ngo ákte rah i awon á bung, ái Iesu a lam pas Petero mái Iakobo diar tuán ái Ioanes tiklik mai, má dihat má tapam uramuni iátin pungpung suri dihat masik. a Má ngo atul i kalik án aratintin erei ditulá mákmák, ái Iesu a arkeles. Aur a talas ngoro talsán nas, má lusán a tuan bal sang mák pilpilpil. Má namur ditul má mák Moses mái Elaisa diar worwor mam Iesu.

Má ditul má mákái ngorer, má namur ái Petero a parai si Iesu ngo, “Konom, a kuluk sang ngo git minái. Má ngo u nem on, arwat á iau ina longoi na tul i pálpálih, kes kaiam, má kes káián ái Moses, má kes káián ái Elaisa?” b Má kán tunga worwor be ái Petero, má kumlán mehmeh a talas a hut mák ámkuk di, má namur kaungán kes tilami kumlán mehmeh a para ngoromin, “Minái á kang Kalik alal, iau laes suri, má balang a kuluk mai. Gama alongra singin.”

Má ditul longrai ngorer má ditul mátut taladeng má ditulá pur dirtapul uradi bim. A han átik mul ái Iesu narsá ditul mák top i ditul mák parai si ditul ngo, “Gamtul aptur má koion gamtula mátut.” Má ditulá mákmák kalar di, mái sár káp ditul te mák tekes mul, ái Iesu masik sár má iatung dihat no.

Má ngo di lu sososih tilamuni pungpung, ái Iesu a tur kalar ditul mák parai ngo, “Koion gamtula parai singin tekes suri táit gamtul mákái nák han pang i pákánbung ngo Natun Kálámul na liu kaleng tili minat.” 10  c Má ditulá gátnai ngoromin, “Suri dáh bos tám mánán uri nagogon si Káláu di parai ngo ái Elaisa na hut táil sang, má namur ái Mesaia?” 11 Mái Iesu a parai si di ngoromin, “Támin muswan ngo ái Elaisa na hut táil suri na eran i tan táit no. 12  d Má iau parai si gam ngo ái Elaisa ákte hut má, ái sár matananu kápdite mák ilmi má dik long sáksáknai mai kándi sápkin holhol. Má da longoi ngorer mul mai á Natun Kálámul, da long sáksáknai sang.” 13  e Má ngorer ditulá talas má ngo ái Iesu kápate worwor mam ditul sur Elaisa muswan. Kápte. A para tusi si ditul ngo ái Ioanes Tám Arsiu, ái sár ái Elaisa er ákte hut má.

Kalik a gokgok, ​ ​ ái Iesu a asengsegeng pasi

Mar 9:14-29; Luk 9:37-43

14 Má ái Iesu dihat, dihat lu sososih tilamuni pungpung uratung i narsán matananu. Io, má ngorer kesi kálámul a han mák pur dirtapul i mátán táil ái Iesu 15 mák parai singin ngo, “Konom, una mámnai besang i natung, kang kalik án káláu. A lala sasam mai gokgok, má a lu pur uri kámnah mák lu pur uri dan mul i te pákán. 16 Má ngorer iakte long pasi uri narsán kam kalilik án aratintin ngo da long palai sápkin tanián erei, mái sár kápdite long arwat on.”

17 Ái Iesu a longrai worwor erei máng kokos ngoromin, “Á gam er káp kamu te ruruna má kápgamte talas uri táit a kuluk alari táit a sápkin! Na is á bet ina kis tiklik mam gam? Iak ngesmat má, na is á bet mul ina mona gam?” Ngorer mái Iesu a parai si di ngo, “Gama lam pasi kalik ur main.” 18 A mákái kalik ái Iesu má ngorer a wor uri sápkin tanián mák dos palai alari, má i pákánbung erei sang kalik er a sengsegeng má.

19  f Má namur tan kalilik án aratintin di han kodong narsá Iesu má dik gátnai ngo, “Suri dáh á gim kápgimte arwat suri long palai sápkin tanián erei?” 20  g Mái Iesu a parai si di ngoromin,

  • “Kápkabin kamu ruruna uri narsán ái Káláu a gengen sár. A muswan iau parai si gam, ngo kamu ruruna na ngorer i kotlin kali, káksiai ngo a tu gengen sár, a arwat sang ngo gama parai singin pungpung min ngo, ‘Hai! Una kakat tilatung má unák han kis mamuda!’ Má pungpung er na longra pasi má na taram i gam. Ngorer kápte kesi táit na rakrakai sorliwi kamu ruruna!
21 [Má matngan sápkin tanián minái, sung má ahal masik sár arwat suri tipar palai.]”

Ái Iesu a parai kán minat ​ ​ má kán liu kaleng

Mar 9:30-32; Luk 9:43-45

22  h Má ngo ái Iesu má kán kalilik án aratintin di hut talum á Galiláiá, ái Iesu a parai si di ngo, “Da tari Natun Kálámul uri limán bos kálámul 23 má dák up bingi. Mái sár namur ngo atul á bung ákte rah, na liu kaleng.” Má kalilik án aratintin di longrai ngorer mák tabureng i bál di.

Hul takis uri rumán osmapak

24  i Má namur ái Iesu turán kán kalilik án aratintin di hut kaleng i malar á Kapernaum, má ngorer kesi tám kip takis tili rumán osmapak a mák Petero mák gáltai ngo, “Be, Petero, ngádáh suri kam tám aratintin? Na hul takis uri rumán osmapak mul?” 25 Mái Petero a kosoi kálámul erei ngo, “Áá, mokol. Na hul takis sang.”

Má namur ngo a kusak uratung i rum ái Petero, ái Iesu a teken sáng pasi mai worwor mák gáltai ngo, “Saimon, dánih u hol on suri á matngan ngoro minái? Di lu kip takis singin tara dáh á tan pakpakta til main i naul bim? Tili narsán rang buh di sang ngo singin tan lite?”
26 Mái Petero a parai si Iesu ngo, “Di lu kip pirán tabal singin tan lite.”

Mái Iesu a parai ngoromin, “Io, ngo a ngorer, ki rang buh di káp kandi te kuir on uri hul takis. Má ngorer gitar sengsegeng á gitar suri takis er kabin gitar buhán ái Káláu.
27 Mái sár da káp sák i bál di uri gitar ái rung tilatung, ngorer una han uradi dan má unák wonwon. Mulán isu una wonoi, ái una long pasi unák tapángni ngudun, ngorer una mákái kesá pirán tabal iatung. Una top pasi pirán tabal er má unák han tari singin tám kip takis má parai singin ngo pirán tabal er kángitar no sár uri takis.”

Copyright information for `SGZ