a6:1Mat 23:5
b6:5Mat 23:5; Luk 18:10-14
c6:71Ka 18:26-29
d6:8Mat 6:32
e6:10Luk 22:42
f6:12Mat 6:14-15, 18:21-35
g6:13Luk 22:40; Ioa 17:15; 2Te 3:3; 2Ti 4:18; Iak 1:13
h6:14Mar 11:25-26
i6:16Ais 58:5-9
j6:19Iak 5:1-3
k6:20Mat 19:21; Luk 18:22
l6:25Pil 4:6; 1Ti 6:6-8; 1Pe 5:7
m6:26Mat 10:29-31; Luk 12:6-7
n6:291Ka 10:4-7; 2Pu 9:3-6
o6:32Mat 6:8
p6:331Ka 3:11-14; Sak 37:4,25; Rom 14:17

Matthew 6

Ái Iesu a worwor suri ​ ​ tángni kálámul a sáhár

a Ái Iesu a sopasun kán aratintin mák parai ngoromin,

  • “A kuluk gama talar mai him án lotu, mái sár koion gama longoi i mátán matananu suri da mák gam má dák para agas gam. Ngo gama longoi matngan tatalen ngorer, ái Kák gam imi naul bát kápnate supan gam suri á ngorer.
  • “A kuluk á artangan uri narsán maris án kálámul, mái sár koion á salarek mai. Tan kálámul di longoi ngorer i mátán matananu i rumán lotu má tangrai sál, di tan tám tuar. Má ngorer di salarek mai suri matananu da mákái má da árngai ngis di sár. A támin muswan ina bit gam ngo ái rung erei dikte otoi sár á kandi arsupan.
Má ngorer á iáu u nem i tángni maris án kálámul, una tangan kodongnai suri á iáu masik una mánán i táit u longoi. Má ngorer táit u long kodongnai na uri balam sár. Na mák iáu ái Kakam u long kodongnai ngorer, má na supan iáu suri.”

Ái Iesu a atintini matananu ​ ​ suri sung

Luk 11:2-4

b Mái Iesu a sopasun kán aratintin ngoromin,

  • “A kuluk gama sung uri narsán ái Káláu, mái sár koion á salarek mai. Tan kálámul di lu longoi ngorer i mátán matananu di sámtur suri sung i rumán lotu má tangrai sál, di á tan tám tuar. Má ngorer di salarek mai suri matananu da mákái má da árngai ngis di sár. A támin muswan ina bit gam ngo ái rung erei dikte otoi sár á kandi arsupan.
  • “Mái sár á iáu, i pákánbung ngo una sung, ki una kusak uri kam rum má unák áng kodongna Kakam, ái koner kápate arwat una mákái mai matam. Mái sár ái a mák iáu, má ngorer a lu mákái táit u long kodongnai, má na supan iáu suri.
c Má gam erei ngo gama sung, koion sang gama talka dolon kamu sung mai worwor bia sár. Ái rung tili risán di lu ngorer kabin di hol on ngo ái Káláu na longra di sang di utngi marán worwor i kandi sung. d Koion gama mur i kandi tatalen ái rung erei mai utngi dolon worwor kabin ái Káláu er Kák gam ákte táil i mánán sang on á táit erei gam sáhár suri. Má ngoro minái á worwor gama utngi i pákánbung ngo gama sung: Kák gim imi bát, gim nem ngo matananu no da para aposoi ngo ngisam a pilpil má dák rumrum on. 10  e Lolsit kaiam imi bát,
gim sung ngo na sangar i hut main i naul bim.
Kam nemnem a ian támin ami bát,
má gim sung ngo na ian támin mul main i naul bim.
11 Una tabar gim mai ángim balbal i bung onin.
12  f Má una hol palai kángim tan sápkin tatalen
ngorer gim lu hol palai tan sápkin di lu longoi uri narsá gim.
13  g Má una áir kalar gim gima káp pur i pákánbung án artohtoh,
ái sár una sáras pas gim tili limán ái Satan.

14  h “A támin á ngoromin. Ngo ukte hol palai sápkin dikte longoi uri narsam, ngorer ái Kakam imi bát na hol palai mul i kam tan sápkin. 15 Mái sár ngo káp una te hol palai kándi tatalen ái rung er di longoi sápkin uri narsam, ngorer sár ái Káláu Kakam kápnate hol palai kam tan sápkin á iáu.”

Aratintin suri ahal

16  i Mái Iesu a sopasun mul i kán aratintin ngoromin,

  • “A kuluk gama ahal suri holhol sur Káláu, má koion á salarek mai. Tan kálámul di lu longoi ngorer di mák sasam má ngoro di kis án tinang i mátán matananu. Di tan tám tuar, má ngorer di salarek mai suri matananu da mákái má da árngai ngis di sár. A muswan á in iau bit gam on ngo ái rung erei dikte otoi sár á kandi arsupan.
  • “Mái sár á gam koion gama mák rumrum erei ngo gam ahal ngorer i tan tám angagur er.
17 Má iáu ngo u ahal, ki una dalus sang má unák lain siki nihum 18 suri ngorer kápte kesi kálámul na mánán i iáu ngo u ahal. Ái Káláu masik na mánán, ái koner kápate arwat una mákái mai matam, mái sár a mák iáu, má ngorer a lu mákái táit u long kodongnai má na supan iáu suri.”

Omobop ami bát

Luk 12:33-34

19  j Mái Iesu a sopasun kán aratintin mul ngoromin,

  • “Koion una tiling konom main i naul bim mai matngan minsik erei na long bengtai i koropos má na lu morot má da tarápái kam rum i tan tám siksikip suri sipki táit iatung i niam.
20  k Mái sár una lu him suri una tiling konom ami bát mai matngan minsik erei koropos kápte na long bengtai má kápte na morot, iatung i pokon er tan tám siksikip kápdite arwat suri da tarápái rum má dák sipki. 21 Kabin kam omobop na kis i pokon erei, ki kam lala nemnem má balam na kis ái mul.”

Mátán kálámul, ​ ​ ái á talas uri kápán páplun

Luk 11:34-36

22 Mái Iesu a parai mul ngo,

  • “Matam ái a ngoro lam uri páplun i iáu. Pákánbung ngo matam a talas, bos kalkuir no i iáu a talas.
23 Mái sár ngo pákánbung matam a sák, bos kalkuir no i iáu a kuron. U hol on ngo talas er i iáu a támin. Mái sár ngo kápte, má ngo talas er i iáu a kuron, ki á iáu una káng mai kuron mul.”

Kápate arwat suri ​ ​ una bes mai minsik ​ ​ má toptop si Káláu mul

Luk 16:13, 12:22-31

24 Mái Iesu a sopasun kán aratintin ngoromin,

  • “Kápte kesá kálámul a arwat ngo na lu toptop singin aru konom no sár. Ngo na longoi ngorer, ki na mámnai kes sár, má na mikmikwai kesi tur diar. Na lu muswan ur singin kes, má kes na lu hol agengen on. Má ngorer ái koner a lala bes mai pirán tabal, kápate arwat ngo na toptop si Káláu mul.
25 
  • l “Má ngorer ina parai si gam, koion gama konngek suri namnam er a top i kamu liu ngo suri dan gama ngin on. Kabin ngo kamu liu a pakta taladeng alari namnam, má namnam kesi táit sár uri tángni kamu liu. Koion gama konngek suri mermer uri merei kápán páplun i gam, kabin ngo kápán páplun a pakta taladeng alari mermer, má mermer kesi táit sár uri merei kápán páplun.
26  m Gama hol pasi tan man kápte di lu himhimna ngo da obop talmi balbal ákte matuk, má káp kándi te rumán balbal mul, mái Kák gam imi bát a tabar di sár. Má gam sang gam tuan kuluk pala i mátán ái Kák gam alari tan man. 27 Be, ngo gama lala konngek suri kamu liu, ngádáh? A arwat suri gama bontai kamu liu mam te bet mul uramunang? Auh, kápate arwat. 28 
  • Má koion gama konngek suri mermer uri merei kápán páplun i gam. Gama hol pasi aun senal ngádáh di liu ngoi. Kápdite himhimna ngo bauti lusán i di.
29  n Mái sár a muswan á minái iau parai si gam. Tan purpur ngorer i aun senal, sián a tuan kuluk taladeng sorliwi mermer si Solomon er kabisit. 30 Git mánán ngo ái Káláu a ololoh i tan purpur er a kopkom onin má latiu a bokoh sár, ngorer di tár sarai mák marang ki dik osoi i kámnah. Tan tu táit bia sár, mái sár ái Káláu a ololoh i di mai lain mermer. Má ngo ái Káláu a ololoh i tan táit bia ngorer, ngádáh, ái Káláu kápnate ololoh i gam mul? Suri dáh a gengen á kamu ruruna? Ái Káláu a ololoh i gam sár mul mai lusán i gam. 31 Má ngorer koion gama konngek suri táit gama ani má ngo dánih gama nginmi, ngo suri sulu gama oboi. 32  o Áá, koion gama ngorer i di ái rung tili risán, ái rung er kápdite ruruna i Káláu má dik lala konngek suri ser pasi á tan táit erei. Mái sár á gam, a mon i Kák gam imi bát a mánán i tan táit gam sáhár suri. 33  p Io, ngorer gama mulán atri besang i kamu hol i lolsit si Kák gam má suri gama tám nokwan, má ngorer ái Káláu na tapálsi limán ur si gam má na long arwat i kamu tan sáhár no. 34 
  • “Koion á konngek onin suri táit na tapam hut latiu. Tan somsom kus a tapam hut onin uri bung onin sang, má taun ur latiu uri bung latiu sár. Má koion una taun pápta iáu sang mai konngek suri aru bung i kesá bung sár. Koion una hol talmi táit tili lite bung mul uri turán til onin na mák taun pápta iáu.”
Copyright information for `SGZ