b7:2Mar 4:24
c7:7Mar 11:24; Ioa 14:13, 15:7, 16:23-24
d7:81Io 3:22, 5:14-15
e7:11Iak 1:17
f7:12Mat 22:39-40; Luk 6:31; Rom 13:8-10
g7:15Mat 24:24; Apo 20:29; 2Pe 2:1
h7:16Gal 5:19-22; Iak 3:12
i7:19Mat 3:10; Luk 3:9; Ioa 15:6
j7:21Luk 6:46; Iak 1:25
k7:29Mar 1:22; Luk 4:32

Matthew 7

Koion á parai uri tekes ​ ​ ngo a longoi sápkin

Luk 6:37-38, 6:41-42

a Mái Iesu a sopasun kán aratintin mul má ák parai ngoromin,

  • “Koion una lu parai ngo turam a longoi sápkin, na káp parai ngorer uri iáu ái Káláu,
b kabin matngan nagogon erei u longoi uri turam, ái Káláu na longoi uri iáu mul namur.
  • “Suri dáh u lala mákái pektol erei i mátán ái tuam, mái sár kápute áslai má sepen kubau er i matam sang?
Iáu nem i parai si tuam ngo, ‘Tuang, inak long palai be pektol er i matam.’ Ái sár koion una parai ngorer si tuam ngo lala sepen kubau a kis i matam sang á iáu. U tám tuar sang! Una long pala táilnai besang i lala sepen kubau tili matam, má namur ngo una lain mákmák sang, ki erei má unák long palai pektol tili mátán ái tuam.
  • “Táit a pilpil káián ái Káláu koion una tari singin pap, na mák aririu kaleng i pap má nák ngas iáu. Táit a tuan kuluk koion una sápkai ur singin tan bor. Ngo una longoi ngorer, tan bor da suka tahni má nák sák.”

Ái koner a sung ​ ​ na atur páptai táit a sung suri

Luk 11:9-13

c Mái Iesu a sopasun kán aratintin ngoromin,

  • “Gama sung Káláu suri táit gam sáhár suri má na tari si gam. Gama ser suri táit gam sáhár suri má gama ser pasi. Má ngo gama pinpidir i mátán sál, ái Káláu na pasbat pas gam má nák tangan gam.
d Kabin ái rung di sung, da kebeptai; mái koner a ser, na ser pasi; mái koner a pinpidir, ái Káláu na pasbat i mátán sál pasi.
  • “Suri aratámán mul, ngo natum na sung iáu suri balbal, káp una te tabar natum mai hat, kápte sang. Una támri mai balbal sang.
10 Ngo natum na sung iáu suri isu, ngádáh? Káp una te támri mai kanih. 11  e Á gam tan sápkin kálámul, mái sár gam mánán suri támri rang nat gam mai lain táit. Mái Kák gam imi bát a lala sorliu sang i kán mánán suri artabar, má ngorer ák lu tari tan lain táit si rung erei di sungi. 12 
  • f “Gama lu longoi mai matananu á matngan tatalen erei gam nem on ngo da longoi mam gam. Erei á sálán muswan á nagogon si Moses má aratintin káián tan tám worwor tus.”

Mátán kas a kidut

Luk 13:24

13 Mái Iesu a sopasun mul i kán aratintin ngoromin,

  • “Koion gama kusak i mátán kas a tápál, ái sár gama kusak sang i mátán kas a kidut. Kabin mátán kas a tápál a han uri pokon án hiru áklis, má marán kálámul dikte mur on kabin ngo sál erei a malmu sár.
14 Ngorer iau parai si gam ngo gama kusak i mátán kas a kidut. A támin ngo gama láklák i sál a marán i somsom kus on má kápte di marán ái rung di lu mur on, ái sár na lam gam uri liu áklis.”

Ololoh kuluk suri tan angagur án tám worwor tus

Luk 6:43-44

15  g Mái Iesu a parai mul ngo,

  • “Gama ololoh kuluk i gam sang suri tan angagur án tám worwor tus. Ngo gama mák di di han sur gam, ki di han suri araturán ngoro tan sipsip, mái sár imi bál di di ngorer i pap rokoi sang.
16  h Má gama mánán ilmi ninsin i di muswan tili matngan tatalen di longoi. A ngorer i kaulbek kápate artálár suri na oboi wán wain ngo wán tawan. 17 Kubau a oboi sápkin wán, kápte ngo ái á lain kubau. Lain kubau a lu oboi lain wán, má káp a tini oboi sápkin wán. Má ngorer mul sápkin kubau a lu oboi sápkin wán, má káp a tini oboi lain wán. 19  i Kubau erei kápate oboi lain wán, da tár palai má dák sápkai uri kámnah. 20  7:20 Mat 12:33 Má ngorer una mánán ilam di á tan angagur án tám worwor tus suri tatalen di longoi.”

Ái sinih na kusak i lolsit si Káláu?

Luk 13:25-27

21  j Mái Iesu a sopasun kán aratintin mák parai ngo,

  • “Marán kálámul alatung di mur i iau mai ngus di sár ngorer di lu utung iau mai Konom, mái sár kápdite nem suri ina kátlán i di. Á di ái rung erei kápdate sol uri lolsit tilami bát. Mái sár ái rung di mur muswan i nemnem si Kang imi bát, ki á di sang da kusak uri lolsit tilami bát.
22 Má i bung ái Káláu na nagogon i tan kálámul no, marán kálámul da tur má dák parai singing ngo, ‘Konom, kang Káláu, á gim á minái rang tárim. Gim lu arbin mai ngisam uri narsán matananu, má gimá lu tipar palai sápkin tanián mai ngisam, má gimá lu longoi marán akiláng mul mai.’ 23  7:23 Sak 6:8; 2Ti 2:19 Io, má iau ina parai si di ái rung erei ngo, ‘Auh, wa kápte iau mánán i gam má kápte ngo gam rang táring. Á gam á tan tám abulbul, má ngorer gama kaplah alar iau!’”

Aru tám long rum

Luk 6:47-49

24 Mái Iesu a arahi kán aratintin mák parai ngoromin,

  • “Ái koner a han sur iau má a longra pasi kak worwor má a mur on, ái ina para talsai si gam. Ái a ngoro kálámul a tám mánán erei a longoi kán rum máng kakas mai toros uradi sang i iátin hat er i pálkibán bim.
25 Io, namur a hus i ráin má a tibin i dan má lala kihkih a hut, má atul i táit er ditul tohoi suri suhi rum erei suri na musuh. Mái sár ngo káp sang, kabin ngo rum erei a longoi i iátin hat má ák tur rakrakai. 26 Mái sár ái koner a longrai kak worwor má kápate mur on, ái a ngoro kálámul a ngul erei a longoi kán rum i lol kon má kápate lala kakas mai toros uradi lal. 27 Má namur i pákánbung ngo a hus i ráin má a tibin i dan má lala kihkih a hut mák gunrai rum erei, ki ák musuh má ák lala sák taladeng!” 28 Má ngorer a arahi kán aratintin ái Iesu, má ngo di longrai kán aratintin, di pánsálngát on, 29  k a kabin ngo kán aratintin kápate ngoro aratintin káián bos tám mánán uri nagogon. Kápte. Di longra ilmi ngo kán aratintin a mon i rakrakai on ngorer i kálámul a tarwai ái Káláu.

Copyright information for `SGZ