a11:1Ese 40:3; Skr 2:1-2
b11:2Luk 21:24; Apa 13:5
c11:4Skr 4:3, 11-14
d11:52Sa 22:9; Sak 97:3
e11:6Kal 7:17-20; 1Sa 4:8; 1Ka 17:1
f11:7Dan 7:21; Apa 12:17, 13:7, 17:8
g11:8Luk 13:34
h11:11Ese 37:5, 10
i11:122Ka 2:11
j11:13Apa 6:12, 16:18
k11:14Apa 9:12
l11:15Kal 15:18; Sak 10:16; Dan 2:44, 7:14
m11:18Sak 110:5, 115:13; Rom 2:5; Apa 20:11-13
n11:19Eba 9:4; Apa 8:5, 15:5, 16:21

Revelation of John 11

Aru tám worwor tus si Káláu

a Má kes a tari singing á tintoh a ngoro buk án láklák uri toh pasi táit, má ák parai singing ngoromin,

  • “Han be, unák toh pasi dol káián rumán osmapak si Káláu má nián osmapak mul, má unák wás di ái rung di lotu iatung i rumán osmapak.
b Má koion una toh pasi dol tili pelbut i rumán osmapak kabin pokon er iakte tari singin rung tili risán, mái rung er sang da lu suka bámiai bimán rum á Ierusalem arwat mai ahat i sángul mai aru i kalang. Bos kalang erei a artálár mai kesi arip mai aru i mar mai awon i sángul (1260) á bung. Má ina dos palai kak aru tám worwor tus, má diara oboi kándiar akiláng kán mokos má diarák lu saliu mai midang i bosbos bung no erei.” c Aru tám worwor tus erei diar arwat mai aru aun lowo má aru i nián lam, má diar lu sámtur i narsán ái Káláu koner a Konom má a kátlán i naul matmatngan pokon. d Má ngo tekes na han suri na long bengta diar, ngorer kámnah na so tili ngus diar má nák up bingi kurtara er. Na ngorer sang ur singin kálámul na tohoi suri na long sáksákna diar. e Má a mon i kándiar rakrakai suri diara batbat kári bát na mák hus i ráin i arliwán pákánbung diar lu saliu mai midán ái Káláu. Má a mon mul i kándiar rakrakai suri diara pukdai dan nák uri dár. Má a mon i kándiar rakrakai mul suri diara talkai tan sápkin sasam má rangrangas uri naul bim i pákánbung diar nem on suri long sáksáknai bim turán matananu.

f Má namur ngo diaráte arbin no, kesi tilik rokoi na aptur tiladi tinkas án kamkabat má nák arup mam diar má nák up bing diar. g Má kápán páplun i diar na lu bop iatung i sál i bimán rum erei di bás páptai kándiar Konom ái. Má ngisán bimán rum erei, di kápán ababah sár mai, má dik utngi ngo Sodom má Aigipto. Má matananu tili bos mát má bos worwor má bos kabinhun no, da ialbá páksi kápán páplun i diar iatung arwat mai atul i bung má tigán, má kápdate sormángát suri ngo da tahun diar. 10 Má matananu on á naul bim da longrai ngo diaráte mat, ki dák parmat má dák lu longoi kándi tan tatalen án laes má dák lu artabar arliu i di. Da lu longoi ngorer kabin diaráte mat ái rugar erei diar talkai tilik rangrangas uri matananu.

11  h Má namur, ngo ákte rah má i atul á bung má tigán, ái Káláu a tari kihkih án liu uri nis diar má diará liu kaleng má diará aptur. Mái rung er di mák diar di lala ráuráuwas sang. 12  i Má namur aru tám worwor tus erei diar longrai kaungán kes a bin tilami bát má ák parai ngo, “Gaur lákám má ur main!” Má ngorer diará tapam urami bát i kumlán mehmeh, má kándiar tan kurtara di mák diar. 13  j Má i arliwán pákánbung erei sang, tiling kunkun a hut mák gunrai bimán rum á Ierusalem, má kesi risán a sák no, má ahit i arip á kálámul di mat. Má matananu di mákái ngorer má dik lala ráuráuwas, má dik hol kaleng alari kándi tan abulbul má dik para agasi rakrakai si Káláu imi bát.

14  k Io, áruán táit a sák ákte rah, má átuil táit a sák alatung páput má!

Arahrahi taur

15  l Má namur arahrahi angelo erei a husi kán taur, má iak longrai kaungán i di imi bát dik lala parai ngo, “Kángit Konom mái kán Mesaia diaráte sáras pasi naul matmatngan pokon tili limán ái Satan, má onin kándiar má, má diara kátlán on ekes pala sang!” 16 Má aru i sángul mai ahat á kálámul pakta di lu kis i kándi tan nián kiskis i mátán táil ái Káláu, di longrai ngorer má dik pur dirtapul i mátán ái Káláu má dik lotu uri narsán 17 má dik parai ngoromin,

“Gim ot kuluk uri narsam, Káláu Konom,
Tám Rakrakai Sorsorliu,
á iáu u mon til hirá má uk mon onin!
Gim ot kuluk uri narsam
kabin ukte him mai kam tilik rakrakai,
má ukte tangkabin suri kátlán i naul matmatngan pokon!
18  m Ái rung er kápdite lu lotu uri narsam di lala bálsák
kabin ákte arwat i pákánbung suri na hut i kam togor,
wa pákánbung sang una nagogon i rung dikte mat.
Má minái má pákánbung una tari arsupan singin kam tan toptop
ngorer i kam tan tám worwor tus,
má singin kam matananu no,
ái rung er di rumrum i iáu má dik lu lotu uri narsam.
Una tari arsupan si di no,
singin tan kálámul pakta má si rung di gengen mul.
Má inái á pákánbung sang una up sarai rung erei di lu sák mai matananu i naul bim!”
19  n Di be parai ngorer, má rumán osmapak si Káláu imi bát a pasbat má gimá mákái má i Bokis án Kamkabat iatung. Má namur gimá mákái talsán pil a soso kerem má gimá longrai kaungán pár má babaus mul, máng kunkun, mák pur mul i ais ngorer i ráin.

Copyright information for `SGZ