a15:3Kal 15:1; Sak 139:14, 145:17
b15:4Sak 86:9; Ier 10:6-7
c15:5Kal 38:21
d15:81Ka 8:10‑11; 2Pu 5:13-14; Ais 6:4

Revelation of John 15

Ereran uri ahit á arabilbiling

Má namur a soura á kesi akiláng mul iamuni armongoh má iau mákái má iak pángáng. Iau mákái ahit á angelo má kándihat talar suri oboi ahit á tilik arabilbiling i naul matmatngan pokon. Má ahit á arabilbiling erei, tan arahrahi sang, a kabin rangrangas erei na arahrahi kán togor ái Káláu.

Má iau mákái mul i pokon a ngoro lontas dikte longoi mai galas a tuan pilpilpil mák mon i kámnah on. Má iau mák di ái rung dikte sorliwi rokoi, koner di longoi tantanián má ngisán di utngi mai mámát. Di sámtur iatung i risán lontas er dikte longoi mai galas, má dik top i tan gita ái Káláu ákte tari si di. a Má dik tunga saki saksak si Moses, ái koner a toptop si Káláu, má saksak si Sipsip ngoromin:

“Káláu Konom, Tám Rakrakai Sorsorliu,
tan táit u longoi a tuan malilis má a tuan rakrakai!
Kabisit káián tan mát no,
ninsim a támin má a nokwan!
b Matananu no da rumrum i iáu, Konom,
má di no da lu para agas iáu ngo á iáu á kálámul pakta,
kabin á iáu masik u pilpil sorsorliu.
Tan mát no da lákám má dák lu lotu uri narsam,
a kabin dikte mákái ngo tan táit no u longoi a nokwan má a kuluk.”
c Má namur iau mákmák má iak mákái rumán osmapak imi bát a pasbat, má ngorer iak mákmák utliu urami polgon Rum a Pilpil Sorliu erei a lu kis ái ái Káláu. Má ahit á angelo di so tili rumán osmapak. Tan angelo erei di sulu mai lusán i di a tuan bal mák tuan pilpilpil, má dik reureu mai reureu gol dikte kápti i bongbongon i di, má kándihat talar suri oboi ahit á tilik arabilbiling. Má i pákánbung er, kes tili dihat á ahat á liuán táit a han mák tari ahit á kuro gol singin tan angelo erei. Má tan kuro er a káng mai suir wain erei a tur arwat mai kán lala togor ái Káláu, koner a liu ekes pala. d Má rumán osmapak a káng mai lala sauh a so tili talsán minmáir i Káláu má tili kán rakrakai, má kápte kes a arwat suri na kusak ur on pang i pákánbung ngo na rah i ahit á tilik arabilbiling erei tan angelo da oboi.

Copyright information for `SGZ