a11:11Sa 12:22; Sak 94:14; Pil 3:5
b11:31Ka 19:10, 14
c11:41Ka 19:18
e11:6Gal 3:18
f11:8Nag 29:4; Ais 29:10
g11:9-10Sak 69:22-23
h11:11Apo 13:46
i11:17Epe 2:11-19
j11:22Ioa 15:2, 4
k11:26Ais 59:20-21
l11:27Ier 31:33-34
m11:33Ais 55:8-9
n11:34Ais 40:13; 1Ko 2:16
o11:35Iop 41:11
p11:361Ko 8:6

Romans 11

Simán matananu Israel, ​ái Káláu ákte ilwa pasi

a Má ngorer iau gálta gam. Ngádáh, ái Káláu ákte mata palai kán matananu? Auh, kápte sang! Ngádáh na mata pala di ngoi, má iau kápte? Kabin iau sang á kakun Israel mul, sumlahin ái Abaram má tili kabinhun si Beniamin. Auh, ái Káláu kápate mata palai kán matananu er a ilwa pasi hirá sang má ák mánán i di. Gamáte talas má suri worwor a kis i Buk Tabu er ák parai sur Elaisa i pákánbung a bálsák i matananu Israel mák ngurngurngur uri narsán ái Káláu ngoromin ngo, b “Konom, dikte up bingi kam tan tám worwor tus má dikte tarápái kam tan nián osmapak. Á iau masik sár má minái, iau ruruna i iáu, má kándi tu ser sur iau be suri da up bing iau mul.” c Má ngádáh a kos Elaisa ngoi ái Káláu? A kosoi ngo,

  • “Kápte ngo iáu masik sár á tám ruruna u kis be. Wa ahit á arip á tám ruruna di kis be má kápte di te pur dirtapul uri narsán angagur án káláu ái Bal
    11:4 Bal ái á ngisán kesi tánráu. Hirá sang, matananu di kis i balis á Kanan di lu lotu uri narsán. Má namur ngo bos Israel di han kis i balis er, te tili di di lu arsok i lotu uri narsá Káláu má dik lu lotu be uri narsá Bal. Mákái Lál 25:1-5; Tát 3:7-11, 6:25-32; 1Sa 7:3-4; 1Ka 18:17-40.
    .”
Má a ngorer mul onin. Ákte kis má simán matananu sang ái Káláu ákte ilwa pas di kabin i kán artangan bia uri narsá di. e Kápate ilwa pas di kabin suri táit di sang di longoi, kápte. Ái Káláu sang a ngoi i bál ngo na tangan di, má ngorer ák ilwa pas di ngorer i artabar bia uri narsá di kabin i kán artangan. Ngo kán ililwa a káplabin i táit di longoi, ngorer kán artangan káp na han te artabar bia uri narsá di.

A ngoromin. Matananu Israel di tungai ser sál suri da lain kis án ararguna mam Káláu, mái sár kápte di ser pasi. Má án simán sár er ái Káláu ákte ilwa pas di, dikte mák pasi á sál erei, má risán tili di a laklak i bál di. f A ngorer i Buk Tabu a parai ngo,

“Ái Káláu a abawi kándi holhol,
a apedei mát di suri kápdate mákmák,
má ák dung kári talngá di suri kápdate alongra.
Má a ngorer ák han pang onin.”
g Mái Dewit mul a parai ngoromin ngo,

“Di mákái ngo ái Káláu ákte lala asosah i di mai marán namnam
má dik hol on ngo a laes mam di ái Káláu.
Má ngorer marán namnam er da iokah mai má dák pur,
pasi á ngorer ái Káláu na asáksákna di.
10 Na kuron pagas i mát di suri da káp mákmák kuluk.
Má kápdate artálár suri da soklatán
kabin a ekesi taun pagas di i kándi tan kipkip.”

Rung tili risán​ di kipi nián Israel

11  h Má ngorer iau gálta gam mul ngo ngádáh, di tutkum má ngorer di ekesi bámrus sang? Kápte sár. Ái sár kápkabin matananu Israel di matai sál án araliu si Karisito, ngorer ák pasbat i mátán sál pas rung tili risán ding kusak má dik liu, koran má matananu Israel dák bálsák má dáng kon suri kiskis erei rung tili risán dikte otoi. 12 I pákánbung matananu Israel di matai sál án araliu er, mátán sál a pasbat pasi lain arasosah uri narsán naul matmatngan pokon. Má i pákánbung matananu Israel di pur alari kándi lain kiskis i mátán ái Káláu, ngorer lain arasosah ák han duk i rung tili risán. Má ngorer i pákánbung matananu Israel no er ái Káláu ákte ilwa pas di, ngo dikte ruruna i Karisito, wa git no gita kuluk pala sang!

13 Inái má iau worwor uri narsá gam ái rung tili risán. Iau longoi him án apostolo uri narsán rung tili risán, má a lala gasgas i balang suri talar erei ái Káláu ákte tari singing. 14 Iau ngoi ngo ina tokoi bál kak matananu Israel dák bálsák suri ngorer te tili di da tapriu kaleng, mái Káláu na aliu di. 15 Kabin i pákánbung ái Káláu a su bahin uri matananu Israel, ái Káláu a ilang suri rung tili risán mák ararguna tiklik mam di. Má ngo i pákánbung ngo di tapriu kaleng á kán matananu suri, mái Káláu na árár pas kalengna di, wa na kuluk pala sang singin matananu no. Na ngoro dikte liu kaleng alari minat.

16 A nokwan suri ái Káláu na árár pas kalengna di ngorer kabin rang támin i di sang di káián ái Káláu. A ngorer i tatalen kángim á bos kakun Israel gim lu mur on ngo mudán beret er gim mulán artabar mai, a akiláng ngo tigán beret no káián ái Káláu. Má ngo nirwán kubau káián ái Káláu, ki káián mul á tan rákán no. 17  i Áá, ái Káláu ákte mata palai marán tili matananu Israel ngorer i bos rákán lowo dikte baur kusi tili aun. Má tan lite rákán lowo tili bos, kes ákte apatap on uri aun lowo er turán te sang iatung, má dik lu sus pasi namnam tili aun lowo er má dik rakrakai. Má gam ái rung tili risán gam ngoro bos rákán lowo tili bos, má gamá lu rakrakai má bes mai liu kán tan Israel. 18 Má koion gama mák pulsi á tan rákán er dikte puh. Kápate artálár ngo gama para agas gam sang kabin á gam á tan rákán sár, má kápgamte tángni káplabin, ái sár nirwán a tángni tan rákán.

19 Má koran má tekes na parai ngo, “Má bos rákán lowo er dikte baur kusi suri ngorer á iau ina patap i aun lowo.” 20 A támin á ngorer. Ái Káláu a baur pala di kabin kápte di ruruna má, má iáu u kipi nián i di kabin u ruruna. Mái sár koion una apakta pas iáu. Auh una mátut sár, 21 kabin ái Káláu ákte baur kusi tan rákán muswan tili aun, má na baur pala iáu mul ngo kápute ruruna.

22  j Má ngorer gama lain hol tangrai ngo ái Káláu a mánán i tatalen án armámna mák mánán mul suri tari rakrakai án rangrangas. Na tari rangrangas uri narsá di ái rung di pur. Mái sár uri narsá gam, na lu mur i tatalen án armámna ngo gama kis i lolon kán armámna. Má ngo kápte gama lu kis ngorer, ki na baur pala gam alari aun lowo er. 23 Má ngo matananu Israel da tapriu alari sál erei káp di tini longoi mai ruruna, má ngo da mur i sál án ruruna sang, ngorer ái Káláu na apatap kalengna di mul uri aun lowo kabin ái Káláu sang a artálár suri longoi ngorer. 24 Kápate malmu suri rákán lowo tili bos na patap i aun lowo di soi, káp a tini ngorer. Mái sár á gam ái rung tili risán gam ngorer i rákán lowo tili bos, mái Káláu a apatap i gam uri aun lowo di soi. Má tan Israel di sang á bos rákán muswan á aun lowo er di soi, má ngorer a malmu sang suri ái Káláu na apatap kalengna di uratung i aun lowo er dikte kopkom til on tungu.

Ái Káláu na aliwi matananu Israel

25 Rang buhang, iau nem ngo gama talas suri holhol taru a tur punpunam tungu suri ngorer gama káp apakta pas gam sang. A ngoromin. Marán tili matananu Israel ákte laklak i bál di, má na ngorer pagas pang i bung ák hau kunlán i mámát i rung tili risán dikte kusak no, 26  k má erár ái Káláu na aliwi matananu Israel no. A ngorer a parai i Buk Tabu ngo,

“Tám Arasengsegeng na aptur til Saion,
má ái na sas palai alari rang kopkom i Iakop á kándi tatalen án tur kaplah alar Káláu.
27  l Má kang kamkabat mam di a ngoromin,
ngo i pákánbung erei ina pah palai kándi bos sápkin tatalen.”
28 Kabin matananu Israel di mata palai lain arbin, ái Káláu a mák di ngo di kurtara mai, má ngorer ák tangan gam ái rung tili risán. Mái sár ái Káláu kán tu mámna di be á matananu Israel kabin i kán oror a para páksi singin rang támin i di er ákte ilwa pas di ur káián. 29 Áá, ái Káláu káp a tini arkeles suri kálámul a ilwa pasi má kápate lu top kalengnai artabar er ákte tari.

30 Tungu gam á bos rung tili risán káp gam tini taram i Káláu. Mái sár onin ái Káláu ákte mámna gam kabin matananu Israel di matai sál si Káláu má kápdite taram on. Áá, kabin i abulbul káián matananu Israel, ái Káláu a mámna gam má ákte pasbat i sál pas gam. 31 Má a ngorer mul mam di. Onin káp di tini taram i Káláu. Ái sár ái Káláu na bali mámna di mul ngorer ákte mámna gam i pákánbung káp gam tini taram on be. 32 Áá, ái Káláu ákte inngasi singin boh matananu no ngo di kis án kamkabat kabin i káptábun á taram. Má kán holhol taru a ngoromin. A inngasi kándi abulbul si di ngorer suri na inngasi kán armámna narsá di no mul.

Ái Káláu a polon á hol

33  m Ai! Wa ái Káláu a konom sorsorliu mai kán arasosah!
A polon á hol taladeng má a tuan kahkahlangit á kán mánán!
Kápte kes na para tusi tan táit ái Káláu a hol on!
Kápte kes na talas suri sál a mur on ái Káláu!
34  n A ngorer a parai i Buk Tabu ngo,

“Sinih ák mánán tangrai kán hol ái Káláu?
Sinih a artálár ngo na apislai holhol si Káláu?
35  o Sinih a mon i kán tinákum i Káláu
suri ái Káláu na kos kalengnai singin?”
36  p Áá, kápte kes a longoi ngorer kabin ái Káláu
a aksimi tan táit no,
má a sodukul páksi tan táit no,
má bos táit no na ur káián masik.
Gita parpara agas uri narsán ákáklis! A támin.
Copyright information for `SGZ