a16:3Apo 18:2
b16:13Mar 15:21
c16:161Ko 16:20; 1Pe 5:14
d16:17Mat 7:15; Tit 3:10
e16:18Pil 3:19; 2Pe 2:3
g16:20Tgk 3:15
h16:21Apo 16:1-2, 19:22, 20:4
i16:23Apo 19:22; 1Ko 1:14
j16:25Rom 1:5; Epe 1:9, 3:5, 9; Kol 1:26

Romans 16

Ái Paulo a tarwai kán nas ​ur singin bos tám ruruna

Iau para talsa Poibe narsá gam, kesá kuk git i Karisito, ngo ái á lain wák má a tám artangan tili boh tám ruruna i malar á Senkiria. Ákte lala tangan iau má marán tili bos tám ruruna mul. Má ngorer iau sung gam ngo gama árár pasi ngorer gam lu longoi mai bos kálámul gam arabuhán i Karisito. Má dánih a sáhár suri, gama tángni mai.

a Iau tari kak lain nas narsá Pirisilá mái Akuila, aru turang gimtul him tiklik suri ngisán ái Iesu Karisito. Diar tari kándiar liu suri tangan pas iau i bungán kurtara. Iau ot kuluk uri narsá diar má ngoi mul á boh tám ruruna no di sang ái rung tili risán. Má boh tám ruruna di lu hut talum suri lotu i kándiar rum, iau nas pas di mul.

Má mulán kálámul i balis á Esiá a ruruna i Karisito, lain turang ái Epinitus, ái mul iau árár pasi.

Lain nas ur si Maria, koner ákte lala him rakrakai suri tangan gam.

Ái Adoronikus mái Iunias, gimtul no kakun Iudáiá má diar mulán ruruna i iau, má tungu gimtul kis tiklik i rumán batbat kalar. Boh tám ruruna di lala mánán i diar má rumrum i diar kabin suri kándiar him mai lain arbin. Iau tarwai kak lain nas ur si diar.

Má iau árár pas Ampiliatus, ái lain turang má giur no káián ái Konom.

Iau tarwai kak lain nas narsá Urbanus, ái giur him tiklik sur Karisito. Má kak lain nas mul uri narsán lain turang ái Sitakis.

10 Iau árár pas Apeles. Marán artohtoh ákte tohoi kán ruruna, ái sár a tur atu pagas i Karisito.

Iau nas pasi bos tám ruruna di lu kis i rum si Aristobulus.

11 Lain nas ur si Erodián giur no kakun Iudáiá.

Má lain nas mul uri narsá di di kis i rum si Narsisus má di káián ái Konom.

12 Ái Tiripina mái Tiriposa, aru wák diar lala him sur Konom, iau árár pas diar mul.

Má iau nas pasi kes mul á wák, ái Persis lain turang, ái mul a him rakrakai sur Konom.

13  b Kak lain nas uri narsá Rupus, koner a tuan lite kálámul uri him káián ái Konom, má uri narsán ái mámán mul, a ngoro mamang má a lain ololoh i iau ngoro natun muswan sang.

14 Má iau árár pas Asinkiritus mái Pelegon mái Emes mái Patrobas mái Eremas má tan boh tám ruruna mul di lu tiklik mam di.

15 Kak lain nas ur si Pilologus mái Iulia mái Nerius diar kukun mái Olimpas, má kak lain nas narsán matananu si Káláu di lu hut talum mam di.

16  c Má i pákánbung gam lu kis talum suri lotu, gama lu árár arliu i gam mai armámna.

Keskeskesá boh tám ruruna si Karisito til main i balis min, di no di nas pas gam.

Ái Paulo a worwor án inau

17  d Rang buhang, iau inau i gam ngo gama ololoh kuluk suri tan kálámul alatung di lu bit sokoi bál kálámul ák tabureng má dik lu puár gam. Kándi aratintin a arkawar palai aratintin gamáte mánán on, má ngorer gama kaplah alar di. 18  e Boh matngan kálámul ngorer, a támin ngo di bos tám toptop, ái sár kápdite kis án toptop si Karisito kángit Konom. Auh, kándi tu kis án toptop singin bál di sang. A tuan lu siror i kándi angagur án worwor, má dik amusmus pasi holhol káián kálámul a pail be i kán hol. 19  f Áá, tan kálámul dikte longrai suri kamu taram i lain pinpidan, má ngorer ák lala gasgas i balang sur gam. Ái sár iau nem i gam ngo gama bos tám mánán uri a kuluk má gama ngoro bos ngul uri sápkin. 20  g Ái Káláu Tám Tar Moloh, páput má suri na suka bámia Satan uri lalin kik gam.

Má artangan káián ái kángit Konom Iesu Karisito na lu kis tiklik mam gam.

21  h Ái Timoteo, koner giur lu him tiklik, a tarwai kán lain nas narsá gam. Mái ruktul minái ái Lusius mái Iason mái Sosipater, gimhat bos kakun Iudáiá, ditul tarwai kánditul lain nas mul.

22 Á iau ái Tetius, iau le páptai pákán ram minái, iau nas pas gam kabin git no git káián ái Konom.

23  i Má a árár pas gam ái Gaius, koner ákte bál pas iau uri kán rum er boh tám ruruna di lu kis talum ái.

Má diar tarwai kándiar lain nas mul ái Erastus, koner a tám ololoh pirán tabal tili malar minái, mái Kuatus, tuá git.

24 [Artangan tili narsá kángit Konom Iesu Karisito na bonta gam no. A támin.]

Parpara agas ur si Káláu ​suri kán apapos

25  j Tili lain arbin sur Iesu Karisito, iau tungai parai si gam ái Koner a arwat suri arakrakai i kamu ruruna. Má ái gita para agasi. Iau apapos mai lain arbin sur Iesu Karisito er a tur punpunam pasi marán á bet, 26 ái sár onin má, ákte tur talas tili worwor er tan tám worwor tus dikte le aposoi. Mái Káláu, koner káp a tini mat, a sormángát palai ngo lain arbin er na pos ur singin matananu no suri da ruruna i Karisito má taram on. 27 Má kabin i táit er a longoi mam git ái Iesu Karisito, git parpara agas ur si Káláu. Ái masik sár á Káláu má ái a polon á hol muswan! Parpara agas áklis uri narsán má kápnate wat! A támin!

Copyright information for `SGZ