b1:2Jn 1:3
c1:3Ap 2:33-34; Kl 1:20; Hi 8:1
d1:4Fl 2:9
eBuk Song 2:7
fBuk Song 7:14
g1:52 Sml 7:14; 1 Sto 17:13; Ap 13:33
hBuk Song 97:7
i1:6Ro 8:29
jBuk Song 104:40
kBuk Song 45:6-7
lBuk Song 102:25-27
mBuk Song 110:1
n1:14Sng 34:7; 91:11

Hebrews 1

Avui Wasilaka jikisi orhi oto mashi orhin laharari ri

Mas wolo Avui Wasilaka mashi orhin profet orhi ondon or sawerik li misiri sir. Mashi oso hindi mushak nombo apsham apshamhik or sawerik li misiri sir. Urik profet ondo nga mu neloko misumu walanga nihin
Mashi kas misumu walangan li mbari, mbeek misumu nihi nembes, misumu ol yanga Israelik fehe lihin li mbari sir.
sawerik li nimu misira.
Hako ter mbele mbele am mendek si nakwak si nawak mashi orhin jikisi orhik or hari sir. Ushirik jikisi orhi oto nirin or sawerik nimu misira. Jikisi orhi otohik mbele mbele tol ni heyewa tondon or uri lir. Uhu mbele mbele ondo jikisi orhi tavak or hari lira. b  Jikisi oto ukruharanda os Avui orhik nanda nga nor naha nirin or ukruharashiwak ni linda nir. Uhu Avui orhi indingo hom er nanda ri. Ushiwak mashi orhi oso kwambu nga si naha mbele mbele tol ni heyewa tondon osmu toltambananduwa. Ma misambik fehe kavakavan li uhu kavak er nari lir. Hako or kavakava erem li undari nombon laha ermbekurik tari ria. Undari lerawu oson or larakoho ter ormu malakamak naha Avui orhi tapmama yok hevenik linduwa. c 

Ensel ondo amber Jisashi siyok sinda lir

Uwosik os nimu heyenduwa, or ensel ondon amber tikrinda ri. Hi orhi wasilaka mendek si naha hi os ensel ondohik nandan tikrinda sir. d  Erem or nandari osik Avui Wasilaka orin ormu mbara,

�Mir jikisi anhi mira, unak an Avui mihi anira.� e 
Uhu mashi las nga ormu mbara,

�An Avui orhik er a nanak, or jikisi anhik er nakwa ria.� f 
Karem ormu orin mbara. Hako mashi os jikisi orhin or mbari oso himi kas mbeek ensel ome larin or mbari ambu sir, wahau. g 

Uhu jikismaifu orhi oton or mbashirik misambik or tari wolo karem orin ormu mbara,

�Halanak ensel ondo amber mihi siyok li sihi mirin li lotu uka.� h 
Karem or mbaha ensel orhi ondon or mbashirik jikisi orhi otohi siyok li sihi orin lotu uri lir. i 

Hako ensel ondon or sawehe lirin karem ormu mbara,
�Jir avak suwa lewas si rasanda hom lerawun lakwa jir. Uhu hi wasilakak si lernanda hom lerawun lakwa jir.� j 
Hako jikisi orhi oton karem ormu mbara,
�Mir God mira. Malakamak ermba ermbak er nakwa mir. Uhu ma ol mihi siyok sinda ma ondo os li uwa uwan mi heyembakwa nombo mihi oso wornakop er nakwa sir.
Mir mbele mbele jivi nom mi rupshihi kavakavan turaha waplelenanda mir. Karem uwosik mirin a kamashinak malakamak er nakwa mir. Unak warje mende nga rupshikwa mir. Ma lal mbeek os mi rupshinda hom rupshikwa ambu lir.� k 
10 Uhu mashi las nga ormu mbara karem,
�Mir Wasilaka mira, mas araje wolok mbele mbele misambik fehe nga lersuwuk fehe nga tava mihik mi uri lir.
11 Ome sira, lersuwu nga misambi nga kumak os kowe masik si naha si frehenda hom mendek nakwa vri. Hako mir wahau, ermba ermbak er likwa mira.
12 Lersuwu nga misambi nga avak mat hom mi hevehe mi ermbekwa vri. Uhu ma os koushimblan li tlolo eweshihi kouakrin li falenda hom mir avak fririn mi tlolo eweshihi misam akri nga lersuwu akri nga frihi farniyik mi ukwa vri. Hako mir mbeek tormblehe apsham nakwa ambu mir, wahau. Mir ermba ermbak os mi nawa hom er nakwa mir.� l 
13 Uhu mashi las nga ormu mbara,
�Mir tapmama anhik lika. Ushinak wutari mihin avak a halashinak mihi siyok sikwa lira.� m 
Karem ormu mbara. Hako os jikisi orhin or mbari hom or mbeek ensel ome larin mbari ambu ri, wahau.

14 Ensel ondo masikomek li naha Avui Wasilakanjik lerawun landa lir. Uhu or mbashiwak li ihi ma misambik fehe ol kumak or lakunda ondon jelyanda lir. n 

Copyright information for `SIM