bMalakai 3:1
cAisaia 40:3
d1:4Ap 13:24; 19:4
e1:62 Kin 1:8; Mt 11:8
f1:7Ap 13:25
g1:11Sng 2:7; Ais 42:1; Mt 12:18; Mk 9:7
h1:13Sng 91:11-13
i1:14Mk 6:17
j1:15Mt 3:2
k1:22Mt 7:28-29
l1:24Mk 5:7
m1:26Mk 9:26
n1:28Mt 4:24
o1:34Mk 3:10-12
p1:35Mt 14:23; Mk 6:46
q1:39Mt 4:23; 9:35
r1:43-44Wkp 14:1-32

Mark 1

Jon hulaima nokopman fak tolofalendari ma mashin saweri ri

(Mt 3:1-12; Lk 3:1-9,15-17; Jn 1:19-28)

Jisas Krais Avui Wasilakahi Jikisi indingo oria. Mashi jivi
Mashi jivi orhi oso wasmashik li mbanda gutnius. Mashi oso karem, Avui Wasilaka ma misambik fehe ol kavakavan unda ondonjik or hishihi nor holoho jikisi orhi Jisasin or mbashirik lihi farniyik or sihi kavakava ol li undarinjik maome orhin fleya hom or haha lihi farniyik hari ri. Lerawu os Jisas uri oso si urik ma misambik fehe ol orin wavu lihik ewewa ma ondo kumak avak hevenik ikwa lir.
orhi os hulaima nokopman or jivinahanda oson os amu kayenduwa.

Mas wolokop profet Aisaia mashi os Avui Wasilaka mbahandarin karem or kayeri sir.

�Avak a mbashinak ma lar mashi anhin maifuk laha sawe ikwa ria. Uhu nombo mihin hundujekwa ria.� b 
�Ma ngashi mishi ambu orok ma lar mu ushambara karem, �Wasilakahi nombon ji hundujeka. Uhu nombo oson ji unak wornak si naka.� � c 
Mashi os profet Aisaia or saweri oso omendingak nari sir. Urik Jon hulaima nokopman fak tolofalendari ma oto or taha misamtelmbamba orok ormu mashin sawera, �Ji misi, sunguwavu jihin ji tormblehehe kavakava os ji undan ji halaha ji mbanak jirin fak a tolofalekwa nir. Unak Avui Wasilaka avak kavakava jihin or laha ormbeka.� d  Urik ma amber provins Judiak fehenda nga Jerusalemik fehenda nga Jonik li raha kavakava os li undarin kormbak li sawerik fa Jordanik lirin ormu tolofalera.

Jon kowe os or falendari oso kamel kukwak li undari sir. Uhu kufulombok or ishitangrindari sir. Uhu akwa orhi os or andari oso intlavi nga hani nga andari ria. e  Uhu karem ormu mbara, �Ma lar avak anhi kumayok takwa ria. Hako kwambu orhi kwambu anhin tikrinda sir. An mbeek kumbambongon na huvuhu kuvu os kumba ari orhi orok nawan a sorngondahi ambu nir, wahau. Or kwambu orhi wasilaka mendek naha kwambu anhin tikrinda sira. f  An jirin men fambak a tolofalenda nir. Hako ma orto avak Masikome Avui Wasilakahin jirin hakwa ria.�

Jon Jisasin or fak tolofaleshiri

(Mt 3:13-17; Lk 3:21-22)

Oro wolok Jisas kuyanga Nasaret os provins Galilik nandarin or halaha fa Jordanik Jon man or fak tolofalendari mishi orok or tarik Jon mu orin fak tolofalera. 10 Jisas os fasik or layirin or halaha or usasihi or heyerik kolok lersuwu simu sutlara. Urik Masikome Avui Wasilakahi apmuma hom Jisasik ormu rakara. 11 Urik mashi las lersuwu yok simu mbara, �Ma toto jikisi indingo anhi ria. Sunguwavu anhi mende nga orin a rupshihi mbele mbele ol or uwan amu rupshinduwa.� g 

Laulaka Jisasin or oweioweiheyeri

(Mt 4:1-11; Lk 4:1-13)

12 Urik Masikome Avui Wasilakahi Jisasin or laha irik or ihi misamtelmbamba orok ormu lira. 13 Niri os orok or liri 40-pelak nari lira. Urik Laulaka or taha Jisas kavakavan or ukmbaha ormu oweioweiheyera. Hako or mbeek or mbari hom uri ambu ri. Uhu fle avi sembengalak fehenda ondo nga ormu lira. Urik ensel ondo li taha orin limu jelyara. h 

Jisas ol orin tiyandari man or ushari

(Mt 4:18-22; Lk 5:1-11)

14 King Herot Jonin krawuk or eweshirik Jisas provins Galilik or taha mashi Avui Wasilakahin ormu karem sawera, i  15 �Mas li mbahandari oso ter osmu omendingak nanduwa. Avui Wasilaka os jirin or arangoshinak jip ji likwa oso am si talakwak osmu nanduwa. Karem uwosik kavakava os ji undan ji halaha sunguwavu jihin ji tormblehe mashi orhin ji misihi toltambanaha ji sika.� j  16 Karem or mbashihi leuku Galilik or ihi ma frijip ormu heyera. Ma ovro mahasanje vria, hi frihi Saimon fre Andru. Frir foomen londari ma vria. Jisas or ihi or heyeri, frir foom kowen fri laha foomen kruwukurik frimu ormbera. 17 Urik fririn ormu mbara, �Shi ra! Anin shi tiyanak nombo os hulaima nokopman landa nombon a mukunak shi heye.� 18 Karem or mbarik kolok lerawu frihin fri halaha Jisasin frimu tiya ira. 19 Hovok kandakar nga or ihi ma frijip ormu heyera. Ma ovro mahasanje vria, hi frihi Jems fre Jon, Sebedihi jikisi vria. Frir bot akomek fri lihi foom kowe os korori oson frimu indik nara. 20 Urik Jisas orin fri tiyaha fri ikmbaha ormu ushara. Urik kolok avoko frihi nga ol avoko frihinjik lerawun landari ma ondo nga bot akomek fri halaha Jisasin frimu tiya ira.

Jisas or mbarik wasimalengamba tolondari ma lar jivik nari ri

(Lk 4:31-37)

21 Jisas nga ma ol orin tiyandari ondo nga yanga Kaperneamik li taha orok limu wara. Urik am Sabat wolok si narik Jisas Judama lotu undari akak or ihi mashi Avui Wasilakahin ormu sawera. 22 Mashin or sawerik li misihi wavu lihi musha mushak limu hishira. Or mbeek ma ol mashi Moseshin sawendari ondo hom saweri ambu ri, wahau. Or malakama hom kwambu nga saweri ria. k  23 Urik wasimalengamba tolondari ma lar lotu undari aka orok or taha Jisasin or heyehe ormu ushambara, 24 �Jisas, yanga Nasaretik fehenda mirin, mir mberem mi ukmbaha mi raw? Wa, nirin mi unak kavak ni nakmbaha tawa om? Mir ma jivi Avui Wasilakahik tahandak a heyewa mir te.� l  25 Karem or mbarik Jisas wasimalengamba orton mainkwambuk ormu mbara, �Mir maimbawa hala! Kolok ma oton halaha tala ika!� 26 Karem or mbarik wasimalengamba orto ma oton or urik or kwarnguarnarik wasilaka mendek or tashihi ma oton or halaha ormu tala ira. m  27 Urik ma ol orok liri ondo oson li heyehe li lishnyafaha lihi ambek limu mbara, �Mberemhi tos ter nandua? Ma roto Avui Wasilakahi mashin kwambu nga or sawewak ni misiw te. Uhu wasimalengamba roton or mbawak ma roton or halaha or tulu iwa re.� 28 Karem li mbaha mbele mbele Jisas urik li heyeri ondon limu haisau handasawe ira. Urik mashi oso simbalesik provins Galilik si irik ma amber limu mistakora. n 

Jisas or mbarik Saimon arjava orhi jivik si nari

(Mt 8:14-15; Lk 4:38-39)

29 Urik Jisas nga ma ol orin tiyandari ma ondo nga Judama lotu undari aka oson li halaha Andru fre Saimonhi akak limu ira. Urik Jems fre Jon er nga frimu ira. 30 Akak li irik ma lal Jisasin limu sawera, �Saimon arjava orhi kavamisihi maome sihi hikop lawuwak os akak wandua.� 31 Karem li sawerik Jisas or ihi tava sihin or tolorik jivik si naha si usaha lirnjik akwan simu ura.

Jisas or urik ma ol kavamisindari jivik nari lir

(Mt 8:16-17; Lk 4:40-41)

32 Am si homirik ta nor layirik kuyanga orok fehendari ma amber hom akayanga sumbu Saimon fre Andruhi aka os Jisas liri mishi orok limu talandirsara. Uhu ma ol kavamisindari nga wasimalengamba tolondari nga Jisasik limu laharara. 34 Urik or mbarik jivik limu nara. Uhu wasimalengamba ol ma ondon tolondari ondon or mbarik limu tulu ira. Wasimalengamba ondo angop li heyeri ri, Jisas Avui Wasilakahi jikisi indingo oria. Karem urik or mbashirik mbeek maimbari ambu lir. o 

Jisas yanga Kaperneamin or halari

(Lk 4:42-44)

35 Nirsumbu mendek Jisas aka os or wari oson or halaha Avui orhin or sawekurik ma ngashi mishi ambu orok ormu ira. p  36 Am si hararik Saimon nga ma lal nga Jisasin limu lasa ira. 37 Am li lasa ihi li heyehe limu mbara, �Ma amber hom olmu mirin lasanduwa.� 38 Urik ormu mbara, �Ka ni i yanga oson ni halaha yanga anandik ni ika. An mbeek torokop Avuihi mashin a sawekurik a rari ambu nir, wahau. Kuyanga ome lal nga Avuihi mashin a sawekurik a rari nira.� 39 Karem or sawe lafakaha provins Galilik or ihi Judama lotu undari akak or layihi mashi os Avui Wasilaka lirin or arangoshinak jip li likuri mashi oson or sawehe wasimalengamba ol man tolondari ondon ormu mbru ermbera. q 

Jisas ma or okmbale lepra tolondari ma orton or urik jivik or nari

(Mt 8:1-4; Lk 5:12-16)

40 Urik ma lar okmbale lepra tolondari orto Jisasik or taha kumbambongon or huvuhu ormu mbara, �Os mi rupshi nahi, mi mbanak jivik avai naka.�

41 Urik Jisas ornjik or holoho tava orhin ma ortohik or hauowehe ormu mbara, �A hishiwa mir avak jivik nakwa mira.� 42 Karem or mbarik okmbale lepra mendek si narik jivik ormu nara. 43 Uhu Jisas ormu mbara, �Avak pris ondon i heyehe maome mihin mukunak li heyehe li mbaka, os mi kavamisindari mihi oso angop mendek nawa sir. Uhu avak mirnjik ofan li uka, os lo Moses si mbahandari hom. Unak ma amber li heyehe li mbaka, os mi kavamisindari mihi angop mendek nari sir.� Karem or mbaha mainkwambu las ormu mbara, �Ai ai, avak mashi las ma lal sawewa hala, os mirik talawa oson.� r  45 Hako ma orto or ihi Jisas orin or urik jivik or nari mashi oson yanga yangak or laha saweyarik ma amber mistakori lir. Erem or saweri osik Jisas mbeek kolaka ol orok nandari orok kormbak layiri ambu ria. Or misamtelmbamba orok liyari ri. Hako yanga yangak fehenda ma amber orhik tari lir.

Copyright information for `SIM