Revelation of John 19

Kokore marina gubai

Moḡa murinai tu noḡa moḡo tarimarima asisebo-asisebo garori gururi gubai ḡekoḡoto-ḡoi aseḡaḡirito, ḡekirato,

“Haleluia!
Vevaḡa-maḡuri, e mareva baregona,
ema seḡuka tu ḡita ḡera Barau ḡena.
Korana ḡia tu dabara roroḡotonai evevaḡa-kotani ema rakava voiri evinini.
Ḡia na veḡura-vanaḡi vavinena baregona vei-rakava voina meto lelevaḡina bevinia.
Mai veḡura-vanaḡi vavinena na mai tanobara mabarana ḡena veḡura-vanaḡi veiḡana na bevaḡa-rakava kwaikwaia.
Barau na ḡena vetuḡunaḡi tarimari rarari evaḡa-riḡorito ḡaramanai,
rakava voina meto lelevaḡina bevinia.”
Ma ḡekoḡo-ḡenoḡoito, ḡekirato,

“Haleluia!
Vanuḡa baregona ḡenana eraḡeni goḡuna tu asi bedokoni,
mo goḡu tu beraḡe-vanaḡi vanaḡini.”
Benamo mo veḡitaḡau tarimari gabanana ruarua ma vasivasi (24) ema mo maḡuri dagarari vasivasi ḡevetui-tarito, benamo Barau ḡena teronai tanutaḡo ḡetoma-rakariḡo viniato-ḡoi, maiḡesi ḡekirato, “Amen, Haleluia!”

Mamoe Natuna ḡena veḡaraḡo verekona

Benamo mo terona na garo ta eiaḡomato, ekirato,

“Barau ḡena vetuḡunaḡi
tarimami mabarami,
e Barau garina ḡogarini tarimami,
misina na beiaḡo mo baregona,
ḡera Barau ḡovaḡa-raḡea!”
Benamo au na guru ta noḡa moḡo ḡutuma-bara gururi kavana aseḡaḡiato, noḡa ḡaruka ḡutuma ḡeḡaru-gwadani gururi kavana, ema noḡa guba eguruani guruna baregona kavana, ḡekoḡoto-ḡoi, ḡekirato,

“Haleluia!
Ḡita ḡera Iaru-korokoro Barauna tu roḡo Vere baregona etanuni.
Mabarara si-iaku, siverere, ema sivaḡa-raḡea,
korana tu Mamoe Natuna ḡena
veḡaraḡo ḡarona varau bema raḡasi,
ema ḡaraḡona maki beḡe ḡabi-torea.
Dabuḡa kurokurori gwaḡiḡiri namori, namoka-namokana, miro misina ta maki asiḡina ḡinavaḡi na ḡevaḡa-dabuḡaiato.”
Mo dabuḡa kurokurori gwaḡiḡiri namori tu Barau ḡena veaḡa tarimari ḡeri vei-iobukaiobuka ekiraḡirini.

Benamo mo aneru na au ekiraguto, ekirato, “Maiḡesi notorea: ‘Mamoe Natuna ḡena veḡaraḡo ḡani-vegogona uranai ḡekea-kaurito tarimari tu beḡene iaku!’” Ma ekiraguto, ekirato, “Mai tu Barau ḡena guruḡa moḡoniri!” 10 Benamo au mo aneru kwakuna koranai avetui-tarito, natoma-rakariḡo vinia ḡana. Senaḡi ḡia na ekira-ḡoiguto, ekirato, “Maniḡesi tu asi novei! Au maki vetuḡunaḡi tarimagu ḡoi kavana, ema ḡoi tarikakamu Iesu varina guruḡari ḡevaḡa-moḡonirini tarimari kavana. Barau moḡo notoma-rakariḡoa! Korana Iesu ḡena vevarifiu guruḡari na tu tarimarima elaunaḡirini, peroveta guruḡari beḡene kiraḡi-foforiri.”

Hosi kurokuronai eraḡeto tarimana

11  Ma au aboḡeto, guba evekeoto, benamo ḡoiragu ai hosi kurokurona ta aḡitaiato. Mo hosi iatanai eraḡeto tarimana arana tu “Vetuḡamaḡikau” ema “Moḡoni” ḡetato. Ḡia tu veiḡa iobukaiobukanai evevaḡa-maoroni ema evetarini. 12 Ḡia matana tu karava moreri kavana, ema debanai korona tu asisebo. Ḡia ḡenai ara ta evetoreto, mo ara tu ta asi ribana, ḡia ḡereḡana moḡo ribana. 13 Ḡia tu rara na evonuto dabuḡana na evedabuḡato, ema arana tu “Barau ḡena Guruḡa”. 14 Guba vanuḡana ḡena vetari doḡorona tu ḡia murina na ḡeraka-naḡi-rakanaḡito-ḡoi. Ḡia mabarari tu dabuḡa gwaḡiḡiri namori, kurokurori ema namoka-namokari na ḡevedabuḡato, ma hosi kurokurori ai ḡeraḡeto. 15 Ḡia bokana na tu vetari baḡana raga-rakavarakava ema raka-rosito. Tanobara irauirau beseri tu mai vetari baḡana ma ragana mainana bebasirini. Ḡia na auri togoina na beḡori-kaurini ma seḡukana baregona ḡesi. Ma vine ḡwaḡwari ḡefanarini kavana bea fana-taririni. Moḡa mo tu Iaru-korokoro Barauna ḡena baru baregona bevaḡa-raka-rosiani gabuna. 16 Dabuḡa maukana eriḡoato ḡenai ema manininai tu mai ara maiḡa etoreato, “Kini mabarari ḡeri Kini ema vere mabarari ḡeri Vere.”

17  Benamo au na aneru ta ḡaro nuḡanai eruḡa-taḡoto-ḡoi aḡitaiato. Mo aneru na guba fakana ḡerovoni manuri ekea-farara vinirito, ekirato, “Ḡoiaḡoma, Barau ḡena ḡanivegogo baregonai ḡoma rovo-vegogo. 18 Be tanobara vereri barari viriḡori, e vetari doḡorori ḡeri veḡorikau tauri baregori viriḡori, e kokore lelevaḡi tarimari viriḡori, ema hosi viriḡori e hosi ai ḡeraḡeni tarimari viriḡori, ema tarimarima mabarari, tuḡu-rakaorakao tarimari e fakai ḡetanuni tarimari, tarima keiri e baregori, mabarari viriḡori boḡonoma ḡaniri!”

19  Benamo au na vevaḡa-rakava dagarana ema tanobara vereri baregori ma ḡeri vetari doḡorori ḡesi vegogotaḡo aḡitarito. Ḡia tu hosi kurokuronai eraḡeto tarimana ma ḡena vetari doḡorori ḡesi beḡene vetari-viniri ḡana ḡevegogoto. 20 Senaḡi mo vevaḡa-rakava dagarana ḡeḡabi-tariato, ema peroveta tarimana ḡofaḡofana maki, mai tu nuḡa-farevaḡi vetoḡari boruri vevaḡa-rakava dagarana aranai eveirito-ḡoi tarimana. Mai vetoḡa boruri maiḡeri na vevaḡa-rakava dagarana ḡena maka ḡeḡabiato tarimari ema ḡia vetoḡana o laulauna dagarana ḡetoma-rakariḡoani tarimari eḡofa-darererini. Ḡia tauri ruarua tu kou karavana morena asikeikeinai e salfa nuḡanai ḡefiu-ḡurarito. 21 Ma kotari tu hosi ai eraḡeto tarimana bokana na vetari baḡana eraka-rosito monana evaḡi-masemaserito, ma manu mabarari ḡeiaḡoto, ḡia viriḡori ḡeḡani-ḡosiḡosirito.

Copyright information for `SNC