1 Corinthians 2

Polokafo Yesu yá yofola yamuko lo oloto melami ka

Etito ya mono wenenane-motao, namo linatedoka omo, ya Goti yamu kolomo ka lo oloto giminae, loto ka maneneu naba nemo ya kolinawae, loto muludi dinami ka ma ádomo ne. E'e, linate minagu ya Yesu Kilisto kala kuwa ido yá yofolo folami ka yamuko kolito logiminae, loto, ido ka maleka yamu kolámenagolowe, loto auma wito kolito linatedoka womo ne. Ido linatedoka minomo, ya aumane minámaito, koli nomaito ukane ololo oto minomo, ya koli kikitenawamo ya mikaleka wenena ka manedeu nemo ka ya lituma fi kikito gedámenaiye. E'e, Goti aumala yakafoko lituma fi kikito gedenagoliye, loto ka mono lo oloto gimomo ya ka maneneu nemo ka yauti kati oluto ádomo ne. E'e, Ounaki aumalaki linatedoka oloto piyaidoti ya lomo ne.

Goti Ouna mino gedami wenena yako Goti monala kolife lenawamo ka

Ido ka mono koli gedamo wenena kiliyanigu minoto, ya ka manedeu nemo ka yauti logimigimi oba, ido kawa logimonimo, ya mika amalo wenena ka maninigu nemo ka, ido we nabanina, u kopa unawamo we ka maninigu nemo ka yaidana oto logimámone. E'e, Goti ka manenau nemo ka, momona ka, olu falukuto nemo ka ya lo oloto mele-mele o minone. Kawa ya lalimo lamenalaki oloto pito minenawae, loto Gotikafo adeina mika kosina neta-mata olu oloto piyámoto minami kamenalo, ya ka manenau nemo kawa ya ne. Kawa ya mikalo wenena we nabanina kolife ádamo ne. Kolamo neko, ya lamena aboga Wekola ya yá yofolo ofámagi ne. Yamu ya eti limo,

Neta-mata wenena omunikafo ágoti, kanikafo kolámoti, lunikafo ma kolámamo neta-mata ya Gotikafo wenena seni-muluni umamo wenena olufe lo gedami neta ya ne,
loto ka mono lufuwau (Ais 64:4) ya nemo ne.

10 Netawa-matawa ya Gotikafo Ouna mino ledami wenena ya olu oloto pi ledami ne. Moda kolafe? Ouna yakafo neta-mata muki monanina, ido Goti aimola falukami monala, muki ya koto koli fuli lo minainako, olu oloto pi ledami ne. 11 Yamu kolalo. Kemakafo wenena ma kani kiyamo ka ya kolinami ne? Kala kiyami we ouna lulau nemo yakafoko kolinagoliye. Ido ayaidana oto Goti kala kiyami mona ya wenena mate kolámenagilae. Goti Ouna yakafoko kolinagoliye. 12 Yamu lamo ya mikaleka wenena monanina yauti oude olámone. E'e, Gotikafo netala-matala faifa lomami neta ya koti kolife lenawae, loto amodokati ya Ouna ya olu minone. 13 Ido netawa-matawa ya lo oloto gimonimo ka ya wenena ka maninigu nemo ka yakafo api lomámami ne. Ounakafo api lomamima nenako, wenena Ouna mino gedami wenena ya Ouna kala ka ona kula ya logimi-gimi o minone.

14 Wenena Goti Ouna mino gedámami wenena ya Ouna monola kula ya nei ka ne, loti koliti kolámenagilae. Ido kolinune, loti lenawamo ya egaidana oti kolife lenawamo ne? Ouna mino gedami yakafoko kolife lenawamoma nenako, mino gedámami yamu ya wenenawa ogofuti kolife ádenagilae. 15 Ouna mino gedami wenena neta-mata muki koti kolife lenagilanako, yamu wenena mate ogofuti monanina iya melámenagilae. 16 Yamu ya eti limo,

Wekola kalau nemo ka ya kemakafo kolito, ya ogofuto api ilibinami ne?
loto ka mona lufuwau (Ais 40:13) ya nemo ne. Etito nemo nefa, ido Kilisto kalau nemo ka ya mino ledami ne.

Copyright information for `SNP