Matthew 4

Satanikafo Yesu kepa mele edami ka

(Mk 1:12-13, Lu 4:1-13)

Ena ayaloti ya Ouna Felegagakafo Yesu ya ilimito Satanikafo kepa mele edenaiye, loto kofo mikau akaiya ilimito idaiye. Dito fo kamena foti (40), ido lumi ya foti (40) ya wela-neta moi wito minototo aiga ya kadunamu folaito, kepa mele-mele ledami we ya amo minaido oto loumami, Kamo Goti Nalafoma minotoma, kifana ama nemo ya loumageto weka-neta fedaneyo, loumaiye. Loumaito Yesukafo itibito loumami,

Wenena mino kolinawamo ya wenineta nenawamo yako minámaiye. E'e, Goti welaloti ka limo muki meyalo melenawamo ya moda mino kolinawamo ne,
loto ka mono lufuwau (Lo 8:3) ya nemo ne, loto loumaiye.

Eti loto loumaito, ya Satanikafo felegaga numuna meya Yelusalemu yau ilimito uto Isilaeli wenena felegaga kuliyai numuna naba kolalo olu nedi edeto loumami, Kamo Goti Nalafoma minotoma umaloti satomo mikalo youma wiyo. Mono lufuwau yau eti limo,

Kamomu ya enisolela ya logimageto, kiyaba o kedeti, kiyaga ya kifanakafo kofotenaiye, loti ya ani mulalo olu faka lo kedenagilae,
loto ka mono lufuwau (Sng 91:11,12) ya nemo ne, lito,
Yesukafo limo, Ido aya lufuwau yau ka ma eti limo,

Wekola Gotitina ya kepa mele umámalo,
loto ka mono lufuwau (Lo 6:16) ya nemo ne, loto loumaiye.

Loumaito, yaloti ya Satanikafo ilimito mowa naba-naba akaiyati nemo yalo ilimito dito, minoto mikau-mikau eba muki kuliyai neta-mata ilibito eti loumami, Kuba wi nedeto, kuline olu faka loto, ouga-luka-kaka nomagetoma ya netawa-matawa muki ya kumunagolowe, lito, 10 Yesukafo limo, Ka mono lufuwau eti limo,

Wekola Gotitina oudi-luti-kati umuti aimolako kiyani umola fiti kouba-naba o edalo,
loto limo (Lo 6:13) nenako, yamu Sataniyo, namodokati faiga womo! loto loumaiye.

11 Eti lito, Satani ya fulo edeito wito, ena Goti enisolela o fedeti Yesu ana olu faka lo edae.

Yesu Galili mikalo apito lonola olami ka

(Mk 1:14-15, Lu 4:14-15)

12 Ena Yoni nela numugu fulo edamo ka ya kolitoto, Yesu kawa ya kolito minami eba ya fulito, Galili mikau ya wiye. 13 Uto Nasalete numunaloti fokito uto, Kapeneyamu numuna nofuna Galili onowalo ya Sebuluni ido Napitali mikau ya onoto nedito minaiye. 14 Eti o minami ya komu adeina polofete Aisaiyakafo eti limo,

15 Wenena ya Sebuluni mikau ido Napitali mikau, ido kuwo no kanu anawalo ido Yodani no naba wela ya kuwo no filigaleka aya Galili ebau ya ailo feka wenena mikanina minamo 16 ya wenenawa sinidigu minamo ya lamena naba-naba moda eyato, ido wenena fulunagili minadoka ya lamenawa yakafo lamena o gedaiye,
loto ka mono lufuwau (Ais 9:1-2) nemo ka yama u ayalo winaiye, loto aya mikau yau uto minaiye.

17 Ena kamena yaloti Yesukafo apito eti lo oloto gimami, Seti-muludi olu eleyapa wiyalo. Kosinau nemo we wekudi wenenala kiyaba o gedami kamena moda adu otainako, yamu seti-muludi ya olu eleyapa witi melalo, loto lo oloto melemo wiye.

Yesukafo we fo (4) ya luni fiyaito ege wamo ka

(Mk 1:16-20, Lu 5:1-11)

18 Yesu ya Galili nofuna anawalo monimo uto eyami ya kunalafo-yalafo lele Saimonite kuliya ma Pita, ido Adulute laefa olami owo noku fuloti laefa olu minaito 19 Yesukafo logimami, Nege melailo. Mona api gilibinamo ya wenena olu-olu enawami we bulu gedenagolowe, lito, 20 alako ya laefa owoninama fuliti ya ege meleti waiye.

21 Ido yaloti monimo uti Sebedi nalafo lele Yemusite, Yonite ya geyaiye. Menibo Sebediki lakoina sipiku laefa owoni fukami kifiti minato, Yesukafo luni fiyaito, 22 ayalomati ya sipiki ido meniboki ya fulititi oti ege waiye.

Yesukafo kala kuwa lalo lo oloto gimami ka

(Lu 6:17-19)

23 Ido Yesu Galili mikau muki monimo uto uto, mono numunina negu-negu dito, Gotikafo mikalo wenena kiyaba o gedami kala kuwa lalo ya lo oloto gimito, ido wenena neta kilamo ido ukani ogofu imo neta muki ya olu faka lo gedemo wiye. 24 Eti imo ya kala kuwa Silia mikau upatito koliti wenena muki neta kilamo, ido ukani ogofu imo, ido Satani kimiwela ya wenena lunigu idamo wenenati, ido kulu ginami wenenati, ido ani-kiyani gali-magalidimo wenenati muki ya amo nedoka gilimiti ato, olu lalo o gedemo wiye. 25 Eti o gedemo wito, ya Galili mikauti ido Dekapolisi ebalekati ido Yelusalemu numudoti, ido Yuda mikauti, ido Yodani no wela afulalekati wenena mau naba-naba olu mau witi ege monimo wae.

Copyright information for `SNP