Revelation of John 7

Gotikafo Isilaeli wenena iya ku gedami ka

Netawa ya fuli lotaito mika onowa fo (4) yalo enisole fo (4) ya nedi minamo geyowe. Nedi minamo we anigu yau mikalo moninami epe fo (4) ya mikalo, ido kuwo nolo, ido yá-nelalo ya fu-fu ádenaiye, loti olu kikito minamo geyomo ne. Ena fo idaidoka afimati enisole ma idaito eyomo ne. Idami ya Goti kofawa minomo wimo we ainala neta ya olu minami ne. Aya enisolewakafo Goti mika ido kuwo no ya olu kopaitenawae, loto enisole fo (4) auma gimami we ya au loto eti logimami, Linate ya alako mikati, kuwo noti, yáti ya olu kopaitámalo. Komu ya Gotite kouba-nabala wenena onobanido yalo ainala wi gedenune, loto logimaiye. Eti logimaito, Goti wenenala iya melami ainala wiyamo wenena ya Yuda wenena afo monalo-monalo muki minaguti ya wani hadeti foti-fo tauseni (144,000) wenena minae, loto lito kolomo ne.

Ido afo mona Yuda yauti tuwelu tauseni (12,0000) ya ainala wi gedamo ne.
Ido afo mona Lubeni yauti tuwelu tauseni (12,0000),
ido afo mona Gati yauti tuwelu tauseni (12,0000),
ido afo mona Aseli yauti tuwelu tauseni (12,0000),
ido afo mona Napitali yauti tuwelu tauseni (12,0000),
ido afo mona Manase yauti tuwelu tauseni (12,0000),
ido afo mona Simeyoni yauti tuwelu tauseni (12,0000),
ido afo mona Lifai yauti tuwelu tauseni (12,0000),
ido afo mona Isaka yauti tuwelu tauseni (12,0000),
ido afo mona Sebuluni yauti tuwelu tauseni (12,0000),
ido afo mona Yosefe yauti tuwelu tauseni (12,0000),
ido afo mona Benisamini yauti tuwelu tauseni (12,0000) ya
ainala etiti wi gedamo ne.

Wenena naba mau wiyamo Goti ouni-luni-kani umamo ka

Netawa ya fuli lotaito eyomo mau naba-naba minamo ya makafo katenami ya ogoufámaiye. Amo ya mikau-mikau yauti ido afo monalomonalo minaguti, koni-weni-ukani mino ailo-ailo mona mona nemo yauti, ka noni yaki ailo-ailo lamo minagu ya yauti oti ekeina folomo kolaleka Sipisipi Momola omunalo mau minae. Mau minamo ya ukanido owo feke limo witi, ya yá akawa anigu olu minoti, 10 ka naba loti eti lamo, Gotite ekeina folomolo amedoto minami we yaki ido Sipisipi Momola yate omude olu kaima ne, loti lo minae.

11 Ido enisole muki ya ekeina folomo ido we kilofo kulinigi nemo we ido netama kofawa nemo fo (4) ya olu ogona o gedeti minamo ekeina folomo kolaleka mikalo lumuti, Goti ouni-luni-kani umuti kuliya olu faka loti 12 eti lamo,

Ya onae. Gotite ya ebola, ido kuliya lamenala naba-naba, ido ka manenau nemola, ido siyane, lalole, loti lamo ka, ido kuliya akaiya dito nemola, ido kiyaba we wenaba aumala, ido netamata muki kiyaba o gedami aumala ya moda minowa-minowa oto mino edemo dinami ne. Ya onae,
loti lae.

Wenena keina naba olu mofu gedaguti amo ka

13 Ena we kilofo kulini we minaguti ma yakafo loga o nedami, Wenenawa ukanido owo feke limo wiyamo ya egaleka wenena minae? Ido egalekati ya ae? loto loga o nedaito, 14 namokafo itibito loumomo, Wenabane, kaimoka ya koli minane. Namo ya kolámowe, loto loumowe. Loumoneto, amokafo lonomami, Wenenawa ya keina naba-nabama olu mofu gedaguti amo wenena ya ukanido owo ya Sipisipi Momola wanulau noku wito olu mo feke limo ne. 15 Yamu ya,

Goti ekeina folomolalo kolaleka minoti, kamena-kamena fo limo sini dimo ya felegaga kuliyai numunala naba yau kouba-naba o edemo wae.
Ido ekeina folomolo amedoto minami we yakafo mino gedeto kiyaba o gedenaiye.
16 Kofa kadunamu kolámenawamo ne. Ido kofa nonano yamu folámenawamo ne. Ido fo ya kiyámenawamo ne. Ido fo loitami yakafo ukani olu kopaitámenami ne.
17 E'e, Sipisipi Momola ekeina folomo muliti minami ya wenenawa ya sipisipi kiyabani we ya minenami ne. Ido no kofawa minomo idami fiyalo yalo gilimito unaiye. Ido Gotikafo omuni nowala ya kilili o gedageto kufu ma kofa ámenawamo ne,
loto lonomami ne.

Copyright information for `SNP