Romans 2

Lifima meina lalo ido nosámami olunawamo ka

Etito linate ya wenena maleka monani nosámaiye, lo gede minamo, ya linanimo monatina yamu nediye lenawamo ne? Wenena mamu ya mona etiti-etiti melamo ya nosámaiye, loti lo-lo amo wenena ya linate aya mona melanako, yamu lo-lo amo kawa ya linanimo yamuki ya lo minae. Ido yaidana mona mele minamo wenena ya Gotikafo lifima ka itibito gimami, ya moda ona efe lotoko gimami ne, loto koli minone.

Ido linate ya wenena maleka nosámami mona melamo yamu lifimani ne, loti lo gedegede afa, linate ya aya mona melamo yama Gotikafo lifimate itibito olu lomámenagoliye, loti kati kiyafe? Ido Goti siya kala-kala alako ádaito, olu you loto lalo o lede minami mona aboga ya monalawa fa neta ne, loti kati kiyafe? Ake, linate eti loti kati kopa-napa kiyamo wenena ya Goti olu lalo o ledami monawa ya eyeti seti-muludi olu eleyapa wiyalo, loto monawa mele ledaiye, loti kolámafe?

Ido linate seti-muludi gedimo olu eleyapa wiyámanako, yamu kamena nabalo, Gotikafo lifima ka kula, efe lenami ka naba-naba olu oloto pi lumunami kamenalo ya ka naba-naba olunawamo ka ya linanimote olu mau wi-wi o minae. Yamu ka ma eti limo,

Amokafo ya wenena muki inanimo monanido ya itibito olu giminagoliye,
loto ka mono lufuwau (Sng 62:12, Snd 24:12) ya nemo ne.
Mona lalo melemo dinumo yakafo kulite oluto dito lamena o ledageto, kofawa minowa-minowa oto mino kolinagolone, loti koliti ya auma witi mona lalo mele minenawamo wenena ya kofawa minowa-minowa oto mino kolinawamo mona ya giminagoliye. Ido wenena mate inanimomuko koliti, ka ona kula meni umuti nosámami monalo meyalo mele minenawamo wenena ya siya kala-kala lageto, lifima ka naba-naba giminagoliye.

Koli minafe? Nosámami mona mele minamo wenena muki ya inanimo monanido ya miluma ka, keina naba-naba imo ka ya olunagilae. Etiti olunawamo, ya Yuda wenena u komu uti olato, ido yalo Giliki wenenaki wenena maleka muki yaki olunagilae. 10 Etiti olunagilafa, ido mona lalo mele minamo wenena muki ya inanimo monanido ya you amene mona, lamena mona, kulini idami mona ya olunagilae. Etiti olunawamo, ya Yuda wenena u komu uti olato, ido yalo Giliki wenenaki wenena maleka muki yaki olunagilae. 11 Moda kolafe? Goti ya wenena iya meleto eika wiyámami wema ne.

12 Goti lo melami kala olámamo wenena yate nosámami mona mele minamo yamamuko moda fuluti u kopa unagilae. Lo melami kawa yakafo ligiya lo gedámenagoliye. Ido lo melami kala olato, aya ka yakafo kiyaba o gedami wenena yate nosámami mona mele minamo yamamu lo melami kawa yakafo ligiya lo gedeto lifima ka itibito olu giminagoliye. 13 Moda kolafe? Lo melami ka ya faifa kani atuwaloko kolinawamo ya Goti onobalalo ya monatina efe limo wenena minae, loto lo gedámenagoliye. E'e, lo melami ka ya koliti meyalo melenawamo yamuko monatina efe limo wenena minae, loto lo gedenagoliye.

14 Yamu kolalo. Ailo feka wenena ya lo melami ka olámafa, ido inanimo lunikafo koliti kawalo golodenawamo, ya kawa olámamo wenenawa ya moda inanimo kani kiyadoti ya moda lo melami kawa kolamoidana oti minae. 15 Eti o minamo wenenawa lunigu ya lo melami kawa mino gedeto ya lonowa olami mona olu oloto pi minae. Etito kamena nabalo, ya falukuto melonimo mona ido lute-kateu falukuto kolonimo ka muki ya Gotikafo iya meleto, lifima ka itibito lumunami kamenalo, ya wenena yate mona ma melonimo ya moda lalo nefa, ido ma ya nosámainako, lifimate ne, loti kani kiti ouniluni-kanigu kolamo mona yakafo olu oloto pi gedenagoliye. Yamu ya kawa kuwa lalo lo oloto melomo, ya Gotikafo lifima kawa itibito lumunami, ya Yesu Kilisto anau melageto, amokafo iya meleto lumunami ne, loto lo oloto melowe.

Yuda wenena yate lo melami ka meyalo melamo aumanina ma mino gedámami ka

17 Ido linate ma ya Yuda wenena minone, loti, ido lo melami ka ya litumate ne, loti, ido Goti ya lalimo Gotite ne, loti linanimo kulitina olu faka lo minoti, 18 ido lalo kolami mona ya kolife loti koliti, ido lo melami kakafo api gilibitaima nenako, mona-ana lalo lema ya eye lalo meleti, 19 ido lo melami ka yau kolife lonimo ka monala ona kula moda olu minone, loti kolamo yamu ya ouni omuna likami wenena ya kanu lalo gilibinumo wenena minone, loti, ido sinidigu moinamo wenena ya olu lamena o gedenumo wenena minone, loti, ido kolife ádamo wenena ya kolife lenawamo mona gilibinumo wenena minone, loti, ido ge ádamo wenena ya api gilibinumo wenena minone, loti auma witi koliti, 21 linate api gilibi-gilibi amo yamaidana oti linanimo luti-kati ya api ilibámafe? Ugele ámalo, loti lo-lo amoma nefa linanimotina ya ugele mona mele minafe? 22 Ido kume-ugele ánalo, loti lo-lo amoma nefa linanimotina ya kumeugele no minafe? Ido suki goti yaidana-amaidana ya eleka naba ginaima nefa, linanimotina ya wenena mate netawalo ya kifana-konuma-kobina melagu yati ma ugele olu minafe? 23 Ido lo melami ka ya lamo olonimo ne, loti linanimo kulitina olu faka lo-lo amoma nefa linate ya aya kawa koliti kolámoti amo monatina yakafo Goti kuliya oluti lomafe? 24 Aya mona melamo wenena yamu eti limo,

Ailo feka wenena yate linanimo monatina yamu Goti kuliya kamana ki minae,
loto ka mono lufuwau (Ais 52:5, Ese 36:22,23) ya nemo ne.

Goti ainala ukanigu fukamo ka

25 Goti ainala ukanigu fukamo, ya lo melami kawa meyalo melenawamo yako moda kulawa minenami nefa, ido lo melami ka koliti kolámoti enawamo, ya aya monatina yakafo Goti ainala ukanigu nemo ya u minámamidana enami ne. 26 Ido Goti ainala ukanigu fukámamo wenena yate lo melami kawa meyalo melenawamo, ya aya mona yakafo ainala ukanigu minámami ya u mino gedamidana enami ne, loto geyenagoliye.

27 Etito ya ukanigu ainala fukámamo wenena lo melami kawa meyalo melenawamo mona yakafo linate mono lufuwa oluti ainawa ukanigu mino gedaifa, lo melami kawa koliti kolámoti o minamo wenena, linate lifimatina olu oloto pi giminagoliye.

28 Koli minafe? Yuda wenena monanina atuwaloko melamo ya Yuda wenena ona kula minámae. Ido ukani atuwaloko Goti ainala fukamo ya ainala ona kula mino gedámaiye. 29 E'e, Yuda wenena ona kula ya ouni-luni-kanigu ya Goti wenenala minae. Ido ainala ona kula ya ouni-luni-kanigu ya ne. Lo melami ka lufuwa wiyamo ya meyalo meleti fukamo neta ya minámaiye. E'e, Ounakafo lunigu mele gedami neta ya ne. Etiti minenawamo yamu wenena yate gebonina ádenawamo nefa, Goti yakafo gebonina lenami ne.

Copyright information for `SNP