aMai 5:2
bHos 11:1
cJer 31:15

Matthew 2

Awei lo lu tamo meni eime Jisas siyenari.

Nowe ape se awei meni owane erasi a'i iyape Herot, pani tewi Judia au noweinoweiteye. Sosu Maria lai Owane Sitewi lo meni eime omo Betlehem sahe auteiye. Meni eime auteiye su, eiwariyemi erasi yaru poweiye itori siye ma'e teiteye. Sosu awei lo marepi so'oruwe wisere a'i siye lu tamo, omo pani poweiye wirai ape, ma'e fai. Lowe eiwariyemi erasi ape siyeye. Lowe apou a'i toteye. “Meni Owane erasi a'i henerai tepa'asiye.” Serai lowe pani tewi lowe lo arunatiyewe, eiwariyemi erasi ape siye umasiti. Sosu omo Jerusalem ma'e henerai. Omo Jerusalem ma'e henerai su, lowe apou te'e toweriye, “Meni eime ape ate Juda lo meni owane tutawe ne, eiwerou ma'e irosiya awere? Nomo eiwariyemi lo ape poweiye yaru itori siye ma'e siyeyewe, serene nomo meni eime ne au te'e wisereyeyei ne fai.”[Nam 24:17] Meni owane Herot peri ape wanuwe su, marepi lo erasi a'i auseriyeye. Sosu lu taune werese, omo Jerusalem sahe iroteye ape, aiwawe a'i meni eime ma'e marepi luwaru erasi a'i totenamiteye. Sosu a'i pe awei meni owane tutawe Herot lai Owane Sitewi lo wesi lu owane, Owane Sitewi lo peri so'oruwe siye lu tamo ei ta'uwe aniye. Lowe ta'uwerai su, le lowe ma'e ei toweriye, “Meni ape Krais piye omo ma'e henerairowa awere?” Sosu lowe le ma'e itiya'u eiye, “Krais nomo lo omo Betlehem pani tewi Judia sahe henerairowa. Owane Sitewi lo peri au te'e siye meni apou leseye,

‘Fene lu taune werese omo Betlehem pani tewi Judia sahe irosiya. Omo Betlehem fene iyape erasi irosiya.
Fene omo tomu ne'ese fene ma'e hi ani ararowe. Wanure! Meni ta, meni owane tutawe fene ma'e aiyerowa ape, henerairowa su, le Israel lo lu taune werese au noweinoweirowa.’” a 
Sosu meni owane lai awei lo marepi wisere a'i siye lu ma'e eiwariyemi mo'o fai ape, eresene a'i ei ta'uwe aniye. Sosu le lowe ma'e ei toweriye, “Eiwerou su eiwariyemi erasi a'i siyeye awere?” Lowe itiya'u eiye, “Tu naifa nomo eiwariyemi erasi a'i ape siyeye.” Sosu le lowe omo Betlehem ma'e eimawesawi. Sosu le lowe ma'e eiye, “Fene meni eime ape nehi etire. Fene meni eime ape siyeyei su, peri heneruwe ape ane ma'e au te'esaire. Serai ane aiwawe a'i meni eime ape au te'e wisereyeyei.

Sosu lowe meni owane lo peri wanuwe su, lowe omo

Jerusalem arunatiyewe fi. Lowe fi su, eiwariyemi erasi a'i lowe tu siyeteye ape, tame siyeye. Lowe siyeye su, lowe marepi wisere a'i teriteye. Eiwariyemi ape meni eime yaru hire ma'e teiteye.”

11 Sosu lowe wesi papu wiye su, lowe meni eime oso, mai lo, Maria, mase iroteye ape siyeye. Sosu lowe ape'i onuwe su, lowe meni eime ma'e etiri tamo neri a'i auwe. Etiri neriya'i a'i ape apou a'i ne, ma'aru gol tamo, sa'i heneri wisere a'i tamo, sosu tuwai wisere a'i tamo le ma'e auwe.[Sng 72:10-15; Ais 60:6] 12 Sosu Owane Sitewi lai lowe ma'e suwou se au te'eye. Apou au te'eye, “Fene pani tewi fene lo ma'e yo tere'e se si tame ire. Meni owane ape awera'iyenatire!” Sosu lowe omo Betlehem arunatiyewe, yo tere'e se si tame fi.

13 Sosu a'i pe meni owane Herot lai meni eime oso a'i ape aine tera'eyei ne toteye. Serene Owane Sitewi lai ipari wisere a'i (ensel) lo ta meni Josep ma'e eimawe arosai. Le Josep ma'e suwou se apou au te'eye, “Josep, Ne sinere! Tani no, meni eime oso a'i aiwawe a'i pani tewi Isip ma'e hene iterotire. Fene pani tewi ape saro ahe irote. Nowe me'iye su, etiri fara'u a'i heneraiyei su, ane si tame itoraiyei fene ma'e au te'esairowa. Sosu fene pani tewi Judia ma'e fara'u si tame aiyerowa.”

14 Sosu nowe pasi a'i se le meni eime mai lo aiwawe a'i pani tewi Isip ma'e hene iteroti. 15 Tu naifa weriyei Owane Sitewi lo peri au te'e areiyeyei siye meni apou leseye,

“Ane meni eime ano pani tewi Isip ma'e si ei aniyei.” b 
Sosu Josep, Maria, meni eime oso lowesi lo, lowe pani tewi Isip sahe iroteye. Nowe me'iye su meni Owane Herot temeniyeye su, lowe pani tewi Judia si tame fai. Sosu lowe pani tewi Isip arunatiyewe, pani tewi Judia ma'e si tame fi su, Owane Sitewi lo peri ape, Owane Sitewi lo peri au te'e siye meni au te'eye ape, wiyeme a'i henerai.

Herot mitaru eimane oso omo Betlehem sahe aine tera'eteye.

16 Sosu a'i pe awei lo marepi wisere a'i siye lu ape, Jisas ma'e au te'e wisereyeye ape, lowe meni owane Herot awera'iyenati. Sosu Herot lu ape le ne areareye ape, wanuwe su, le ai marepi erasi a'i toteye. Le apou toteye, “Marepi wisere a'i siye lu, lowe eiwariyemi erasi tu iyu menei hesi a'i siyeteye. Serai mitaru eimane oso a'i ape mo iyu menei hesi a'i irosiya.” Le ai atu siye lu tamo omo Betlehem ma'e lu wenei eimane oso werese aine tera'eyei ne eimawesawi. Le lowe ma'e eiye, “Fene omo Betlehem, omo tere'e tere'e atahe a'i sahe lu wenei mitaru eimane oso iyu menei hesi a'i irosiya ape, sosu mitaru eimane he'i a'i auteiye ape mo, aiwawe a'i aine tera'ere.”

17 Tu naifa weriyei Owane Sitewi lo au te'e siye meni tere'e iyape Jeremaia apou leseye,

18 “Peri ahi ta omo Rama sahe wanuwe. Mai tomu ne'ese luwei erasi irowei. Resel lo lu tewi eimane lo ne urunoruwei erasi iroteye. Lu taune tamo le ne marepi fetane a'i au irowei ne toteyei su, ahowa. Le urunoruwei erasi a'i ironamiteyei. Piyene awere? Eimane werese lowe lo temeniyeye.” c 
19 Nowe me'iye su, meni owane Herot temeniyeye. Sosu Owane Sitewi lo ipari wisere a'i Josep ma'e suwou se au te'eye. Le apou te'eye, 20 “Josep, ne sinere! Meni eime no tani no aiwawe a'i omo pani tewi

Israel ma'e si tame henetire. Meni owane Herot meni eime ape aine tera'eyei ne toteye ape, temeniye tepa'asiye.”
21 Sosu Josep, meni eime lo, mai mase omo pani Israel ma'e si tame heneti.

22 Herot temeniyeye su, meni eime lo iyape Arkelaus, Herot lo yaru aniyewe, awei meni owane tutawe henerai. Le meni luwaru a'i ne. Sosu Josep peri heneruwe ape wanuwe su, le atoweiye marepi tote henerai. Serai Owane Sitewi Josep ma'e suwou se apou au te'eye. Fene pani tewi Judia awera'iyenatire. Pani tewi Galili ma'e henetire. 23 Lowe pani tewi Galili ma'e henerai su, lowe omo Nasaret sahe iroteye. Tu naifa weriyei Owane Sitewi lo au te'e siye meni ta apou leseye, “Lowe le ne apou te'eyei, ‘Le omo Nasaret lo meni pefine a'i ne’.” Serai Owane Sitewi lo peri ape pefine wiyeme a'i henerai.[Lu 2:39; Ais 11:1; 53:2; Jo 1:45]

Copyright information for `SNY