1 Corinthians 8

E dewala mampe mai sumanai sosola isiwa dewamonuno omempa!

E leta bedewe ne waitaraneale walanase, “God lagawaau sumanaibulala mo godiu kokoitaubu baibu moia pulontoia no nantaa rua, ba dia?” Dima e wailana ema epe: Isiwa e bedelawo waie waiase, “No uduudu God atemba wadate wainitana. No atentena God dea os wande, mai god da wainipona, diaida, sa baiwa no rua os moia sa pulontoia nanta.” Ulaipa, no God atemba wadate wainitana.Naita no aten insaisawa sa bedembo winompo asiasi antonta, tane nuawadawada bedembo dia, no kasawogamba debamalepio asowawaidantata. Tane naita no nuawadawada bedembo winompo asiasi wainenta, sa ipa sosomba do sumanai bedewe badoidantata. Mo mida muba insaisau wadeie waiase, “No aten insaisawa debama wadate wainitana,” sa ipa mo mampo aten kerauda winede, mai debama wadapona, dia. Tane mo mida nuawadawadantoie waimoia mo ipa God atenmon.

Tauma god lagawaau sumanaibulala mo godiu kokoitaubu baibu moia pulontoia nanawa umanawa dialepa. No atentena kokoitau uduudu diapanau, mo god lagawaau ipusiawaia baibu kokoitau di dewamoie teamoi.Ita no atentena God dea os wande, mai god da wainipona, dia. Tane apana sumanaikoantoie inseia abo uboo ita tawo osowe god uara waimoi. Ita mo godiu sa insamoie waimoia abo mo godiu ita tatatauida uara oniamompo waimompa. Mo godiu uara di sumanaibuntoi,tane no atentena God dea os wande, me ipa no Mamamba, me mampee nitu uduudu segalentuwan, ita no dewanena me baiwa wainenta. Do Tatamba dea os wande, mai da wainipona, dia, me mampe God nitu uduudu dewamontuwan ita me mampee no wainitana.

Sumanai sosomba isiwa walama daumawa god lagawaau dewawa dewasaie intawentona baiwa kokoitau diapanau mai atendewamoipona. Mo sumanaibu atemba kerauda do waimoi, sa baiwa mo daubu eteie atentoi moia god lagawaau mampe pulowantoia mai napu, dia. Ita mo muba daubu eteie dabuantoi, tane moia sa naia mampee nuau kadisaie dauwa etei. Tane ema epe: Nana naitana mampe mai euntate God mampentataa rua, diaida. Nana uduudu nantaa mampe God mai dabuanepi. Tane nana isiwa idintontaa mampe God mai unewa nenepi, dia.

Ita ema baiwa e inseilana moia pulontoia nanawa nanuna rua os. Tane ema epe: E sumanai sosola isiwa sumanaibu kerauda moia sa nanawa ingugurawantoie waimoia e nanuna mampee banlakadisamono ia waapa bagoranedio omeitana rua omepue kadi dewasapu. E moia pulontoia naipona rua os, tane sosola omepua sawa insenadewaitana. 10 Naita soa sumanaiwa kerauda e mida atena debama god lagawaa duwa bedewe nana naiana eweepie me ruaalepie moia god lagawaa mampe pulontoia napi. Me dauwa etedia mai napi, tane e eueuwaa asiasi me napia, sa ipa kadi dewasade. 11 E sumanai soa sa baiwa Keriso bolena me inalepie kadiwa epia baiwa. Tane e atena eueuwa mampe soa sumanaiwa kerauda banleiakadisaiano kadi dewasadia kadiwa bedewe alepi. 12 E eueuwala mampe sumanai sosola dima mo inseia mai dewasapua banlakadisamoilano muba kadikadintoi. Ita e eueuwala sa mampe sosola mampo kadiwa dewasaile mo sumanaibu kerauda oauaraidasailano dauwa etei, sa ipa e Keriso mampe kadiwa dewasailana. 13 Naita ne moia napina mampee sumanai sona banlepakadisapo kadiwa dewasapia sawa ne moia nanawa eidasapa.

Copyright information for `SOQ