2 Corinthians 9

Ne atenten e nuala uduudu mampe amona ituna menalede. E asola ne sumanailala Masedonia bolawa bedeuwointa wanwanlala mampo wane wanase, “No sumanai sosomba Akaia bolawa bedeuwo waimoia imana enawa bedewe amonau dewasapua baiwa imaasaie waimoie.” E nuala uduudu mampe menaidaleno amona itulana umanawa mo etane bedeuwo apana uara nuau enidasan. Sa baiwa ambi ne leta girumanteape dialepo sumanai sosomba abolala baibu amona ituna, ipawa e aitamana insaisa sa wadale dewasailana. Tauma ne sumanai sosomba natadea waaubamodina mo saulepue amona nolawa e dewasailana diasapu. Ema bedewee no e segarala waitana ipawanalepi, mai di wapona, dia. Mo e manlawo wimopue e amonala imaasane wanlempo ewapu, ne diamona rua. Ne sosomba ema natadea bauta e manlawo waaubamodina e saulepua baiwa. Ne mai menaneipona sumanai sosomba Masedoniawo wanwanlala ne do muriwa winete e amonala imaasiawaia ewapu. Epe segalepia no ando malaidantata, ipawa no e di sumanailantene asola watakoanten. Ne mai mala e manlawo wisepia umanawa waipona, dia. Naita epe segalepia, sa ipa mala debamaia e baila. Dewa ema baiwa ne inseno mai ruawalepona. Sa baiwa Taitus ita sumanai sosomba nata do waninamona bauta e manlawo wimopue amona ituna sauawa walana nolawantopue diasapua baiwa. Muriwa ne Korintiwa wineape amona sa imaalepie winompo ewapa. Epe segalepia, sa ipa e nuala uduudu mampe amona menaleno itulana, no mai menaneipona e amonala nuala anatempo do ituna.

Kerisolala nuamba uduudu mampe amonantonta!

E sumanai sosola saumonune aia ema apana waia insena:E mida lawuru naumba uara iraitaa ando ipawa uara uwauwaitaa. Tane e mida lawuru nata os iraitaa e ando ipawa nata os uwauwaitaa. E deadea nuala bedeweido insedia ruawaitane amonala ituna, mai amona walamawa wisena baiwa di itunarebaitana, ba sosola itumpo e bedeuwo di waina sawaitane ituna.Epe dewaitonuna, ipawa God me mida nuaeu debama do amonawa itudia nuawadawadasade. Tane God me ipa rua os me nuawadawadawa amonawa debamaia manlawosampo e dewa uduudu bedewe dima menalempaa mampe e rua os wanlempa, mai walama da dima abolawaitana, diaida. Tane mai sa os, do me dewalepio amonala uduudu bedewe euda os dewasanuna. Ema epe dewaitonuna, sa ipa dima buka bedewe girumalena rua, wadi wadiase,

“Apana euda abolala mampo debama amonaleidie di wanamode. Me walama uduudu dewawa dodomana os dewasade, ando mai dialepi.”
10 God me ipa lawuru naumba irai apanawa wanedio iraileide, do me nana wanedio bopawa nade. Deawaa, God e lawuru naumba enalepio iraitano ipawa uara naumopi, ita e nuala uduudu mampe amonala itulana maurawa uwauwaitana.E dewa uduudu bedewe me e enalempo mauraitonuna ita ema mampe e abolala saumonuna rua. Ema epe inta e amonala itulana sumanai sosomba abolala wanamonto mo God auwaidasapu. Sa ipa e amonala ipawaida! 12 E nolala ema ipa God baiwa dewasailana me apanawaida abolala saumonuna baiwa. Tane mai sa os, amona ema apana uara dewamopio God auwasampe waimompa. 13 E nuawadawadala nolawa ema dewasailana mampe sabamosailana e sumanaila Keriso bedewe ituilana ipa ulaipaida ipuipua, mai aia os waipona, dia. E Gagalo euda sumanaiwaitile Keriso ebowa wasabamosaile wainilana. Tane do e dima sumanaiwaitilana eueuwa osowe ituile sosola nuaparelala Iudia bedewe wanwanlala ita sosola isiwa do saumoilana. Ipawa ema baiwa apana uara God ebowa wadaposisampe sapasampa. 14 Mo nuau uduudu e manlawo winompo ita baila rauparintompa, God me nuawadawada debama mampe amona insaisawa ema e bedelawosana baiwa. 15 No God auwaidasata me nuawadawadawa amonawa bopawa nenena baiwa. Me Otopaida di wanauben me bedewe no inaida sanaa donsataa baiwa. God amonawa ema baiwa no mai dima da wataa rua!

Copyright information for `SOQ