John 19

Pailat Iesu kotusane ompa osowe wisena koros osowe seupuo bolepi

Mape Pailat sorodiawa diamona Iesu tai mampe epaepabobosapu. Me diamona rua mo Iesu epaepabobosane ita ituaisisapua baiwa tai gedaragedaraua panane uwawe aneiena. Tane do garawa dubawa ewaewawa warere tauia rua wadane ampe aine mo danauwosaieno eneno wasi mampe auwadewadewasaie waiase, “Iuswa warereu, e auwadewadewaeite ionoeitana!” Mo epe waie ita sainapa epaaubasaie.

Mo Iesu epane ituaisisaieno dialeno Pailat osowe Iuswa peloo eneia au nosene alene diamone wanase, “Ne Iesu banlepe noneape manlawosapo danalawo enompo ewane ateitana ne me kotusadine mai me kadiwa da donsapona matangelawa wadepi.” Pailat epe wane sorodiawa diamono Iesu banlene nomone Iuswa danauwo ituieno enen. Me uwawe gedara anala ita garawa dubawa ampe anala do enedio Pailat diamone wanase, “Apana ema e wawusailana enedia ewana!”

Tane pirisi debamau ita me onieia apanawa me enedio ewane dabuaidasane mukantoie waie waiase,“E me koros osowe seue bosaa! Me koros osowe seue bosaa menanede!” Mo Pailat epe badowaida dieio etene me sipoamone wanase, “Ne me kotusane tane mai kadiwa da donsapona bowalepi, dia. E me bowa menalepia eba wadane kotusane koros osowe seune bosana!” Iuswa Pailat aiawa etanadabue badowaida diane waienase, “Me meba umanawa wadia me ipa God Otopa wande. Aia sa me wana mampe no anaanamba ainpundene God wakadisasan. No anaanamba wadia mida God wakadisasadia bolepi. Sa baiwa me bolepia menanede!”

Mape sorodia Iesu banlene leuntone kotu duwe odeiena. Tane me God Otopa wandia wana wawuwa Iuswa waieno Pailat etene nuawa saidaleno inta banusadia naintasapio inalepi. Sa baiwa me leulene duwe alene Iesu waitarasane wanase, “E mida, nainta wiena umanawa dianeawo etapa!” Tane Iesu me waitarawa sipoasapona dabualen, mai dima da wapona, dia. 10 Ita Pailat Iesu badowa diene wanase, “E ne mainawo gagalo dabuaitene eneiana, ba? E ne mukana atena, ba dia? Ne wapo e noe di aitaa, ba wapo e koros osowe seuepue boepu!”

11 Pailat me epe badowa diedio Iesu leusane diene wanase, “Ne osonawo e mukaa mai wineipona, dia, tane e tauma mukaa ne osonawo wadaana, ipawa God muka sa e eneen. E kotuneiana, sa ipa e kadi dewasaiana God mampe, tane apana mida ne wadanene e witaawosana me God mampe kadi debamaia dewasan, mai e ruaa.” 12 Iesu Pailat epe dieno etene Iesu epono di nosepe alepona menasan, tane Iuswa Pailat wasanasane mukantoie waiase, “Naita e apana sa matangelawa ewo di nosepi alepia e Rom warerewa ionoidoa Sisa onawa apanawa segaitaa. Apana sa meba umanawa wana me warere wande. Ita me mida epe wadia Rom warerewa ionoidoa anaanawa andipune me onawa enede.”

13 Mo epe mukantoie waio Pailat etene me sorodiawa diamono Iesu kotu duwa bedewee banlene peloo nomone Iuswa danauwo ituieno enen. Me sape enedio Pailat kotu ompa wapiaubepia baiwa kotu bolawa maida winedia ebowa waia Seu ribaribalala mampe alene kotu kolaiwatawa osowe aisidene wain. Tane bola sa ebowa Ibru aiawa mampe waia Gabata. 14 Me sape wandie inta banusadia Iesu epono di nosepe alepona baiwa. Ita Iesu Iuswa danauwo enedio ewene mo diamone wanase, “Warerela sa enedia ibuwa ewana!” 15 Tane mo me dabuaidasaie mukantoie waiase, “No apana sa mai ewaewa menaneipona, wade nambesae koros osowe seue bosaa!” Mo epe waio Pailat etene waitaramone wanase, “E warerela ne bosapaa menaledio baiwa wailana, ba?” Ita pirisi debamau me gagalowa leusane waienase, “No Sisa os wareremba wandia atenten, mai warere da, dia.”

16 Ita Pailat ompa osowe mo aiau ruawalene Iesu me sorodiawa witaposana koros osowe bosapua baiwa. Tane dewa ema Pasowa odawa imaawantompaa walamawe enauto rua segalen.

Iesu koros osowe seui

(Matiu 27.32-44; Mak 15.21-32; Luk 23.26-43)

17 Pailat sorodiawa diamona ruawa Iesu meba korosiwa waneieno awaneno banlene antoie bola ebowa waia Uwa nepa mampe wimoiena. Bola sa Ibru aiawa mampe waia Golgota. 18 Sape mo Iesu koros osowe seuiena. Ita me tampe apana nata seumoiena, dea witapa on deneuwe ita sowa da witapa sen deneuwe.

19 Tane Pailat Iesu wawuwa gagalowa girumaleno sorodiawa wadane koros osowe Iesu seudiawo onape tutuntoiena. Pailat wawu gagalowa sa Iuswa aiau Ibru mampe, ita Romwa aiau Latin, ita do Girikiwa aiau mampe girumalene itun. Pailat Iesu wawuwa gagalowa ema epe girumalene wanase,“Nasaret Iesuwa, me Iuswa warereu.” Tane bola Golgota naepe Iesu koros osowe seuiena Ierusalem tampeido. Sa baiwa Iuswa uara wimoie Iesu wawuwa gagalowa sa me onape winedia wisiantoie eie antoie. 21 Tane pirisi debamau giruma sa wisiantone ewane Pailat mampe antone momoduntone waienase, “No menanedia e Iuswa warereu wae girumaitena wadaaube nambesaa. Tane wawu gagalowa meba ampesae itue girumaite waase, ‘Ne ipa Iuswa warereu.’” 22 Mo epe waio Pailat etendabue diamone wanase, “Dima ne wane girumantena ideita winakasalepi.”

23 Sorodia nataitanata Iesu koros osowe seuieno dialeno aupe me garawaida odantone oteiena. Me garawa da euda, atowe tautaulala, mai gara kepawa nambenambe auwodeasape popontopona, dia, tane gara dea os ududupa winedia baiwa mai siontope otamopona, dia. Ita mo gara sa euda ewane baiwa muba gagalontone waienase, “Gara ema euda mai siontata, no owa da dewasate somba dainea ainepia me gara ema wadepi.” Mo Iesu garawa osowe epe dewantoiena dima buka bedewe girumalena ulaipalepia baiwa. Buka ema epe wadi wadiase,

“Mo ne garana odantone oteiena ita garana da owawantone wadeiena.”
Sa ipa buka bedewe wadia ruawa sorodia dewantoiena.

25 Tane Iesu seuienawo korosiwa tampeido me inawa enedie. Ita do me inawa wamba, ita Meri Kilopas manainapa, ita do Meri Magdalin sape eneie. 26 Iesu inawa ita do me wawe alala nuawadawadaidamodia me korosiwa tampeido eneio emawa ieno mo ewamone inawa diene wanase,“Inana, mida tanawo enedia e otoaida, wade manawosaa.” 27 Ita Iesu wawe alala Meri tampe enedia ewene diene wanase,“I tanawo enedia e inaaida, wade manawosaa.” Ita wawe alala sa Iesu wana ruawalene me boleno aupe Meri wadene inawanasano do waimoie.

Iesu bowa gagalowa

(Matiu 27.45-56; Mak 15.33-41; Luk 23.44-49)

28 Iesu mo nata epe diamono dialeno aupe me nuawa bedewe insene atenlen nolawa uduudu God ituna ruawa dewamontue ompa osowe wisenauben. Ita buka bedewe girumalena winedia ulaipalepia baiwa me wane wanase,“Ne gadompana makoidaleide.” 29 Me epe wadio sorodia esa sigasigaua dugiwa enedia mampe alene koina wadene newa osowe gara kepawa taune esa sa sigasigaua bedewe noaneno butalen. Ita gara sa butasana wadenposie Iesu mampesane me moape itudia napona baiwa. 30 Ita me esa sa sigasigaua nane aupe wane wanase,“Uduudu dewamonatue ompa osowe winenaaubena.” Me epe wane imumba epente ita bolen.

Sorodia Iesu tebipa enei

31 Iesu boleno aupe Iuswa eiau Pailat mampe antone wimone diane waienase, “Mo mida koros osowe seumoana bo baiwantoi. E sorodiaa waaubamowo antopue mo wau epateiantopuo tauwadea bontopuo ita etepu wadaaubamopu.” Mo Pasowa odawa teadewasaa walamawe Pailat epe iririsaie, ipawa imonemba Sabat walamawa debama Pasowa odawa uwaalepi. Ita Iuswa mai menamoipona mo mida koros osowe bontone wineia Sabat walamawe seukasantopu. 32 Pailat mo iririu ruawalene me sorodiawa waaubamono antone mo nata mida Iesu tampe korosiu osowe seumoiena wau epateianton. 33 Ema aupe mo Iesu mampeido antone wawa epateiantopua baiwantone tane me boidalena ewane eiena, mai wawa epateiantopona, dia. 34 Tane sorodia sou dea ona ewa wadene Iesu tebipa eino osina ita esa memenauben.

35 Me mida dewa ema sorodia sa Iesu mampe dewasaieno ewena benemawaleidia e do ateitana baiwa.Apana dewa ema ewena me sumanaiwalaida, dima me benemawalena, sa ipa ulaipaida. Me ema epe benemalena e do sumanaitana baiwa. 36 Sorodia Iesu wawa epateiawa ene tebipa os eneiena dima buka bedewe girumalena ulaipalepia baiwa. Buka ema umanawa wadi wadiase,

“Mo me etepa nepa mai da epaputewapi, dia.”
37 Ita buka bedewe do naepe wadi wadiase,

“Mo pisiwapue mida mo tebipa eneiena ewapu.”

Iesu etepa bo nagawa bedewe itui

(Matiu 27.57-61; Mak 15.42-47; Luk 23.50-56)

38 Iesu warorowa dea Iosep, me Arimatia apanawa, Iuswa eiau sauleidie dainadainaua me wawe leidia apanawa. Me Iesu bolena atenlene Pailat mampe alene iririsane wanase, “Rua ba dia, ne Iesu etepa wadape bo nagawa imaalawo itupe weregasapa?” Ita Pailat me iririwa etene oaleno me ene leulene Golgotawo alene Iesu etepa winedia wadenaubene awanene anton. 39 Ita me sowa Nikodimas mida bauta tadino Iesu mampe gagalolepia awa wisena me sausan. Nikodimas ia asiwa esapa bonabonaua gadantoieno makolena saiwa debamaia awanene do wisen. 40 Mo nata Iuswa bo itumpe dewantompaa rua ia esapa gadantoieno makolena gara osowe weisane do Iesu etepa lomantone awanene bo nagawa mampe antoiena.

41 Bo nagawa sa Iesu koros osowe seuiena tampeido irai da bedewe imaala winedie. Ita bo nagawa sa bedewe mai bauta bo da itupona, dia. 42 Tane Sabat rawi sawo uwaalepia baiwaleidio mo diniwantone Iesu etepa bo nagawa maida winedia bedewe ituiena.

Copyright information for `SOQ