Mark 1

Ion Babatutu gagalowa

(Matiu 3.1-12; Luk 3.1-18; Ion 1.19-28)

Ema ipa Gagalo euda bumpa Iesu Keriso God Otopa umanawa. Peroweta Aisaia girumalena wadi wadiase,

“Ne gagalona benemala apanawa bauta wapaaubepo e intaa deaitopasapio eulepie winompa e baia.”
Do me wadi wadiase,

“Apana sala makowa bedewe mukama benemaleidie wadi wadiase,‘Tatamba wimpia baiwa inta eusana, dewa uduudu inta enabodamodia otawiaitane nambemona!’”
Epe girumalena rua Ion sala makowa bedewe wisene apana babatutumodie. Ita gagalo amonaleidie wadi wadiase,“E kadi bedewe insaisala leusane God mampe dodomanaitano kadila nambemopie insadabuamopi.”

Iudia bedewe wanwanlala ita Ierusalem apanawa uduudu Ion mampe antone kadiu wawiantono ita me esa Ioadan bedewe mo babatutumon. Ion dewawa ema epe: Me gara pue kamel imba dewala taudie ita do iga pue etepa mampe dewasaiena nowe taune wandi leidie. Tane nanawa kapoi ita awanai namodi wandie.

Me ema epe benemaleidie wadi wadiase, “Mida ne wanawo wisepia ipa mukamukauaida, mai ne ruana. Me ipa debamawaida, ne mai rua me sausape me sendorowa otawiantape nambemopa, dia. Ne esa mampe babatutuledina, tane me ipa Aleu kakaiwa mampe babatutulepi.”

Iesu babatutuwa ita rubuwa

(Matiu 3.13-4.11; Luk 3.21-22; 4.1-13)

Walama sawo Iesu bola Nasaret Galili bedewe ene alene Ion mampe wisen. Ita Ion esa Ioadan bedewe Iesu babatutusan. 10 Tane babatutu dialeno Iesu esa bedewe enenwisidene pisiwane uba siolene wadenaubeno Aleu nene bunebune rua me osowe iedio ewedie. 11 Ita aia uboo segalene wanase,“E ne Otonaida nuawadawadaedina, nuana eusaiano wainedina!”

12 Tane aia sa wano dialeno aupe Aleu kakaiwa Iesu wanaubeno sala makowa bedewe alen. 13 Sape me wandie Seitan rubusadio walama 40 dialen. Me pue os bolauwo wandio ensel wimone me oniadewasasaie sausaie.

Iesu wawe alala uwaaida sonabamone apamodia warorosapu

(Matiu 4.12-22; Luk 4.14-15; 5.1-11)

14 Ion dibura bedewe ituieno wandio Iesu Galili tawowa bedewe alene God Gagalowa euda benemaleidie wane wanase,“God walama ituna tauma wisen ita me gonaawa tauma ipawanalepia baiwaleide. E kadi bedewe insaisala leusane God mampe dodomanaitane ita Gagalo euda sumanaiwaitana!”

16 Iesu doa Galili tampe aleidie bouri lawailala Saimon wamba Endru nata lawaibu esa bedewe aubamoio ewamone 17 diamone wanase,“Wine, ne waroroneana, ita ne dewalepo apana lawaimonuna.” 18 Me epe diamona rua tauwadea lawaibu emone Iesu warorosane do antoiena.

19 Ita mo Iesu do doa tampeinta mai aidantopona maida sa Iesu Sebedi obampa Iems wamba Ion nata waau bedewe lawaibu imaasaie waimoio ewamon. 20 Iesu mo ewamone tauwadea os apamon me warorosapua baiwa. Ita Iems Ion nata mo mambu Sebedi nola sosou do waau bedewe emone Iesu warorosane antoiena.

Iesu aleu kadiu tanamompaa mukawa waden

(Luk 4.31-37)

21 Iesu wawe alala do Kapeanaumwa wimon. Ita Iuswa bubuau walamawa Sabat wisena walamawe Iesu mo gagalou duwa bedewe alene waeuwa nolawa uwaalen. 22 Tane asisulala me muka do waeuwaleidio etane memesanton, ipawa me mai anaana waeuwalala ruau waeuwaleipe, dia. 23 Iesu waeuwaleidio asisula apanawa dea aleu kadiwa bedeweleidie kadisadia mukama wane wanase, 24 “Nasaret Iesuwa, e mai nolaa da no mainimbo wineipona, dia. E no kadineatuwapia baiwa wien, ba? Ne atenten e mida, e God benemalala waaubaena kakaiwaida wien!”

25 Tane Iesu aleu kadiwa badowa diene wanase,“Dainaite me ee di noe nambeitaa!”

26 Aleu kadiwa apana sa bedewe wandia aia ema etene me dewasano etepa uwauwaboboleidie ita rasa debama wane apana ene nosen. 27 Apana uduudu sape asisuntoia dima eweiena mampe memesantone muba eda waitarantoie waiase, “Ema dewa dainea eweitana?Waeuwa sanaa muka do segaleide! Apana ema muka wadene aleu kadiu diamodia ruawantoi.”

28 Tane Iesu benemawa tauwadea Galili bolawa uduudu bedewainta alentuwano atentoiena.

Iesu kerolala uara inamode

(Matiu 8.14-17; Luk 4.38-41)

29 Iesu ita Iems Ion nata, do wawe alala isiwa gagalo duwa ene Saimon Endru nata duwo antoiena. 30 Sape mo Saimon nemonapa polapola wadene ituleidia benemawa Iesu dieiena. 31 Iesu me umanawa etene i sa ituwa bolawe ituleidio mampe alene witapa wadene sausano enenwisiden. Ita polapola i eno inalene mo baibu simbialen.

32 Rawileidio omo pameno apana sosou kerolala ita apana bedeuwo aleu kadiu wanwanlala uduudu banlamone Iesu mampe wimoiena. 33 Tane bola sa bedewe wanwanlala uduudu Saimon duwa moape auweiena, 34 ita sape kero daitada wadawadalala uara Iesu inamon. Do aleu kadiu uara apana bedeuwo waimoia me tanamono nomon. Mo apana emone nomoio Iesu anaanamona mai dima da wapu, ipawa mo atenidanton Iesu me mida.

Iesu Galili bedewainta Gagalo euda amonaleide

(Luk 4.42-44)

35 Imonemba walama pundedio Iesu enene nosene sala dainala bedewe alene rauparileidie. 36 Tane Saimon sosowa do nomone antone me banusaie. 37 Ita mo Iesu donsane diane waienase, “Kapeanaum apanawa uduudu e wabanua wai!”

38 Tane Iesu sipoamone wanase,“No mai mape os wainenta, dia. Ne menanede bola dawo ane sape do Gagalo euda amonanteapa. Ne nolana sa dewasapina baiwa winen.”

39 Ita Iesu Galili bolawa uduudu bedeuwointa alene gagalou dubu bedewe Gagalo euda amonaleidie do aleu kadiu apana bedeuwo waimoia tanamodie.

Iesu apana kero kito wadawadalala inasade

(Matiu 8.1-4; Luk 5.12-16)

40 Apana kito wadawadalala Iesu mampe wisene imimpa emmisilene iririsane wanase, “E naita meneempa e rua os ne inanea!”

41 Iesu kerolala sa nuaparewalene ibuwa wadene wanase,“Ne sauepaa menanede, inaitaa!” 42 Me epe wano tauwadea kito dialeno inalen. 43 Me inaleno Iesu badowa anaanasane wanase, “Dima manawo segalena umanawa mai apana da diamoa, diaida! Tane tauwadea pirisi mampe aitee etea inalena euwasawo ewepi. Muriwa Moses anaanawa wana rua e inaitena pulowa ituno apana ewapue atentopu e inaitene euitena God duwe aitaa rua.”

45 Me Iesu diena mai ruawalepona, dia, tane alene bola uduudu bedeuwointa Iesu me inasana benemawaleidie. Apana uduudu me umanawa etane atentoiena baiwa Galili bedewe bola debamauwo Iesu mai odapona rua, dia. Me bola obasau kerakera bedeuwo wandi leidie. Tane bola uduudu apanawa mai Iesu epona, me baiwaidantoie ieie.

Copyright information for `SOQ