Matthew 14

Erod Iesu baiwa insakoaleidia gagalowa

(Mak 6.14-29; Luk 9.7-9)

Erod Galili tawowa warerewaleidia walamawe Iesu ebowa debamaleidia benemawa eten, sa baiwa me nolawa apanawa diamone wanase, “Iesu ipa Ion Babatutu, mida imumba ne sorodiana tonapundeiena bo bedewe enenwisene muka wadene ginasa pokawaau dewamodio umanawa eteitana.”

Me epe insedie, ipawa Ion wandia walamawe Erod manainapa ebowa Erodias Ion mampe nuawa kadiidalen, ipawa Ion kainokaino Erod diedie wadiase, “God emawe mai dodomana e tataa Pilip manainapa naisee nata wainilana.” Sa baiwa Erod sorodia waaubamono antone Ion wadane dibura bedewe ituiena.

Erod Ion bosapona insaisawaleidie, tane me Ius apanawa saulen, ipawa mo sumanaintoia Ion ipa peroweta. Tane Erod mulena walamawa wiseno bedewe ema epe segalen: Erodias anoopa apana nisolala danauwo bialeidio Erod ewene nuawa eudidalen. Sa baiwa me i sanaa sauaidasan dima da me iririwalepia ideita wanepi. Tane i sanaa inawa diedia me insaisawa diepi, ita inawa diena rua alene Erod diene wanase, “Ne menaidanedia taumaida ema e sorodiaa waaubamowo antopue Ion Babatutu imumba topupundepi ita me uwawa laukai bedewe itupue ne neapu!” Erod aia ema etene nuaparelen, tane apana nisolala danauwo sauaidalena baiwa me sorodiawa diamona dima Erodias anoopa iririwalena ruawantopu. 10 Ita Erod sorodiawa waaubamono antone dibura bedewe Ion imumba tonapundeiena. 11 Mo me uwawa laukai bedewe itune wadane wimone i sanaa waneiena, tane me wadene alene inawa wanen. 12 Ita Ion wawe alala wimone etepa wadane awanene antone dobontoiena. Ema aupe mo ene antone dima segalena umanawa Iesu dieieno eten.

Iesu apana 5000 nana wanamode

(Mak 6.30-44; Luk 9.10-17; Ion 6.1-14)

13 Tane Erod Iesu insakoasadia umanawa etene bola sa bedewe wandia ene waa asiasi meba alen sala dainalawo. Tane apana uaraia ema umanawa etane mo bolau emone Iesu wawe doa waiwainta antoiena. 14 Ita Iesu doa waiwa dawo wisene waa ene nosene apana uaraia wawe wimona ewamone nuapareuidalen ita bedeuwo kerolala uduudu inamon. 15 Rawi sawo wawe alala Iesu mampe wimone waienase, “Mape sala obasa, tane aitamana rawiidalena baiwa apana ema waaubamowo bola bedeuwointa antopue nanau gimarantopue napu.” 16 Iesu sipoamone wanase, “Dia, mo mai antopu, e nana wanamono napu!” 17 Mo leusane waienase, “No mainimbo bured 5 ita bouri nata winei, mai da, dia!” 18 Ita Iesu diamone wanase, “Aitane, nana sa otene winlena ne mainawo.” 19 Tane me apana uaraia diamone wanase, “Aisitane ina osowe waina.” Ita Iesu bured 5 ita bouri nata otene pisiwane uba ewene God auwasane bured ampuialene ita bouri dosane wawe alala wanamon. Ita mo nana sa wadane apana wanamoiena. 20 Tane mo uduudu nane pokamon. Ita wawe alala nana moawa eiena auwene posa uduudu 12 aimoieno nope wimon. 21 Apana mona sape nana naiena wisiawa 5000, tane ioto ita seda do nana naiena mai wisiamopona, dia.

Iesu esa osowe aleide

(Mak 6.45-52; Ion 6.15-21)

22 Nana dialeno aupe Iesu wawe alala diamone wanase, “E waa bedewe odane nawane doa waiwa dawo aitonuno ne apana ema uaraia waaubamopo bolauwo antompo walawo wimpa.” 23 Iesu apana waaubamono antoieno aupe me raupari baiwa wadiwa odene alen. Meba wandio tadinaleidio wawe alala waa asiasi doa pouwe wimoio lanunu esa tepasane waa epaaubasadie, ipawa mo lanunu iediawo antoie. 25 Tane walama iwimpa bedewe Iesu esa osowainta winine wawe alala mampoleidie. 26 Ita mo Iesu esa osowainta iedio ewane saidantone siribabantone waienase, “Sa aleu, ba dewa dainea eweitana?” 27 Tane Iesu tauwadea mo mampo wane wanase, “Mai saitana, ne iedina, siribaba ena!” 28 Ita Pita leusane wanase, “Tatamba, naita e ebaida ne dianeawo esa osowainta manawo wimpa.” 29 Pita epe wano Iesu etene diene wanase, “Winea mainawo!” Ita Pita waa ene nosene esa osowainta a uwaalene Iesu mampe aleidie. 30 Tane me lanunu ewendewae saidalene ainsudeno esa numedio ka debama wane wanase, “Tatamba, saune inanea!” 31 Tauwadea Iesu witapa aubene Pita wadendoe diene wanase, “E sumanaia keraulen! Bauta sumanaiten, tane dima baiwa eana?” 32 Mo nata waa bedewe odeieno lanunu dainalene dialen. 33 Tauma wawe alala waa bedewe wanwanlala Iesu wawa bumpe imimpu emmisimone wadaposisane waienase, “Ulaipa, e ipa God Otopaida!”

Iesu apana kerolala bola Genesaret bedewe inamode

(Mak 6.53-56)

34 Iesu wawe alala do doa nawane waiwa dawo bola Genesaretiwa wimoiena. 35 Apana sape waimoia Iesu ewane atensaiena, sa baiwa mo bola uduudu bedewe gagalo waaubasane waienase, “Kerolala banlamone Iesu mampe winlena.” 36 Tane mo kerolala banlamone wimone Iesu iririsaiena me garawa moawa os wirasape inantopona. Ita kerolala uduudu mida me garawa wirasaiena inanton.

Copyright information for `SOQ