2 Samuel 1

Saul kumna pasa ta David sanaig le isna

Nane Saul balenaig le kumna ait ta David nuŋe kame mbal kilmba ka Amalek mbal ndoŋ kame bumba nane bale farkina sulumba nane luka naŋgine tumbraŋ Siklak kinaig.

David nu Siklakŋge minna le ait keŋmba kinaig le Saul tuku kame taŋgo ande kumba ka Siklak prona. Nu sagkanu taŋaŋ David tugum kumba dagol tidroŋga lokina le David ndek nu kusnana: Ne aniŋge prote ŋgina le taŋgo mo ta ndek lafumba sana: Ye kame sinamŋge Israel mbal bale farkinaig le ye kua ka te prowet ŋgina. Taŋakina le David ndek nu kusnana: Kame mbolŋge ame wam prowe likinaig ta ye saya le isi ŋgina le taŋgo mo ta ndek nu sana: Sine tuku kame taŋgo nane kua ka sili-silinaig le Filistia mbalŋge sine tuku kuasmbi suŋgomba bale farniŋge likinaig. Taŋamba Saul le kiŋo nuŋe Yonatan mata balenikinaig ŋga David sana.

Kile David ndek nu kusnana: Saul le Yonatan kumnaik ta sonndo ne kaŋgerkina e ŋgina le taŋgo mo ta lafumba sakina: O suŋgo, ye Gilboa tabe mbolŋge minen sulumba Saul kaŋgeren ta nu nuŋe mbanduwaŋ ta kilke mbolŋge te-timba nuŋe ŋgaro tugunemba tiŋ minna le kaŋgeren. Kame mbal hos mbol pinderkanu karis mbol pinderkanu mata nane Saul buk te-kornaig. Taŋanaig le nu mbilmbilka ye kaŋgeryumba wikina le ye woka nu sota kan le nu ndek ye kusnayina: Ne anikok ŋgina le ye Amaleknu ŋgen. Taŋaken le nu ndek ye sayina: Ne ilmba ye tapleya. Tui fat andeŋge ye te-mayeyat le ye kumam bafuwet ŋgina. 10 Taŋaka nu buk surka ndeka kumam bafuna tukunu ye ka nu taplewen sulumba nu tuku gol hat kaikanu ta gomba tumba sagi nzar wai mban mbolŋge ta paska ten sulumba agaŋ kame ta kilmba ne tugum te prowet ŋga David sana.

11 Taŋakina le David nu ismba ŋgamuŋgal tatrukina le nuŋe tawi fetfetna le nuŋe kuasmbi mata ŋakmba maŋau ndui ta ndo kinaig. 12 Ta ndaŋam? Saul le Yonatan, Israel kame mbal suŋgomba nane Kuate tuku kuasmbi ta kame suŋgo ta mbolŋge bale farkinaig tukunu nane malmbika nyamagaŋ pinka minnaig le ka furirna.

13 Furirna le David ndek taŋgo mo ta kusnana: Ne anikok ŋgina le nu sakina: Ye Amaleknu. O buk mam nu Amalek kilke kusremba pro Israel kilke mbolŋge rawe taŋgo taŋaŋ minyokina ŋgina le 14 David ndek nu sana: Ndaŋam saka ne Suŋgoŋge gabat madina ta balena ŋgina sulumba 15 nuŋe kame taŋgo ande wika sana: Ne ilmba taŋgo te balewa le kumwa ŋgina le kame taŋgo ta kumba ka Amalek taŋgo ta kame bagimbi balena le kumna. 16 Kumna le David ndek Amalek taŋgo ta sana: Ne Suŋgoŋge gabat madina ta balewanu sakat tukunu kile lafunu naŋe miroŋ naŋe ndare kutute ŋgina.

David nu Saul le Yonatan tuku ninankina

17 Kile David nu ninanka Saul le kiŋo nuŋe Yonatan tuku ŋga mune-munekina sulumba 18 nuŋe kuasmbi wam paguniŋmba saniŋgina: Tane mune te tumba ka Yuda taŋgo pino ŋakmba tumniŋgap le tago-tagomba kila pilwaig ŋgina.

Mune mbara ta Tui Mune. Kile mune ta Yasa tuku waŋe mbolŋge minit.

19 

Tui Mune

  • Sine Israel mbal tuku gabat kame tabe mbolŋge kume likinaig.
  • Siŋgine kame gabat ŋakmba kume likinaig.
20 
  • Tane pasa te kumba ka Gat le Askelon mbal sa ndaniŋgap.
  • Saniŋgap le Filistia pino kame kasomok pino kame nane ismba gare-garekubekaig.
21 
  • Siŋgine kame gabat mbal tuku kandim kame kile ake sinaŋ Gilboa tabe mbolŋge mine likade.
  • Saul tuku kandim mata andeŋge maŋ gureŋ pisnewe nda.
  • Ta tuku sawe le mbai ŋgislu tabe ta mbolŋge nde ndakuwaik le nyamagaŋ mata tabe ta mbolŋge prowe nda.
22 
  • Yonatan nu tui wai paknu.
  • Nu kame mbolŋge agaŋ inum tui ful ndawanu.
  • Saul tuku kame bagi ake sinaŋ mine ndakina.
  • Nu nuŋe ŋgueu mbal saŋgriknu ŋakmba bale farniŋganu.
23 
  • Taŋgo pino ŋakmba nane Saul le Yonatan tuku gare tornaig.
  • Nale mara mindek kigri-kigriŋga minnaik sulumba kumu kumu ndo kumnaik.
  • Nale tuku pinder ta paŋus fumba kinit taŋaŋ.
  • Nale tuku saŋgri ta laion tuku saŋgri taŋaŋ.
24 
  • Tane Israel pino kame tane Saul tuku ninanka malmbikap.
  • Nu tane tawi gurgur magenu ndo agaŋ ndende golmbi wakeikanu ŋgarosu mindepiye mayewam tuku tiŋge likina.
25 
  • Kame gabat ar ta kame mbolŋge kumnaik.
  • Yonatan tuku mindesiŋ tabe mbol ambeŋge minit.
26 
  • O yiŋe aba Yonatan, ye ne tuku sina suŋgo ŋak.
  • Sile muŋgu kume purkikeŋ wam ta pino kame nane ye tuku ŋga kume purde wam ta lite.
27 
  • Kame gabat mbal ŋakmba kame mbolŋge kume likinaig le nane tuku kame agaŋ ndende mata ake ŋaigoŋgamŋgaig.
Copyright information for `SSD