Matthew 14

Matei Jon Baptis

Mk 6:14-29; Lk 9:7-9

Lokon ien, *Herod tel masiwi ti Galili hong tunahi menge *Jises. I kakane teka masiwi laha pupuas hahitakan, “Ie se Jon Baptis i moih aliawen. Aile ape i hina poh ti ailei waliko tenen lalap ti seilon kum pon.” Ti imat, Herod talo teka unauan xinoti kalabusiai Jon. Herod tel i xuina Herodias, axoi tel ukalan Pilip. Aile ape Jon Baptis lawe i to kaakane Herod, “Kumahe wanen sawisawin o uke axoam Herodias!” Herod pahan i telei Jon, tuahe i mamata teka *Ju nake laha ukek Jon i tel kuluiai kakai Haeu.

Tehu ngain ti nameniai telao Herod takah, tel nati Herodias hehin denis hani teka seilon laha apupuha ti angiain. I hamuamua hawane Herod. Aile ape Herod kak tuoha hani i, “Waliko tenen na paham, nga hani o!”

Ape i usi namili tel tinan i ukek, “Hanima nga pati Jon Baptis. Lohi hanima he tehu kapi!” Namili Herod sihikuk hawane tuahe i kak tuoha haniwen tel hehin ti puli lawe seilon ka i hani i waliko tenen na pahan. 10 I talo tel unauan nahih hani ingi kalabus ti koti xaxaweniai kinawe Jon Baptis. 11 I hana pati Jon leili tehu kapi, i kau hani tel hehin ape i hani tel tinan. 12 Imuh tesol kahikahi Jon nahima. Lato waxi mewenae tupuan ape tihini auni. Muhin lato nahih hone Jises.

Jises axi ani 5,000 seilon

Mk 6:30-44; Lk 9:10-17; Jn 6:1-15

13 Tataen ti Jises hong tunahiwa waliko ti i sohot hani Jon, i ku he tea koap ape i salili tesol ien hani tesol tahain. Teka seilon leili taon hongoa, laha nahih usi i. 14 Ti Jises mosua he tea koap, i ningahi kilan wanen seilon. I tahane hawane laha ape i haewia teka tinun.

15 Ti ape alohah, tesol *kahikahi Jises nahih hani kapin, lato hone i, “Pate ape alohah a tap toan ie. Taloa teka seilon hani toan lehe laha kahui analaha.”

16 Jises hone lato, “Kumahe, laha kum nahih salili kako. Amuto axiwa analaha.”

17 Lato hone i, “I kum pon! Toi amite tepanimawe bret ma huok xixi.”

18 Jises ukek, “Kau hanima nga.” 19 I hone teka seilon to haniai he pahoah. I waxi tepanim bret ma huok xixi. I pax hani patul, i kak kemulik hani Haeu ape i wiki. I hani tesol kahikahin ape lato sei hani teka seilon. 20 Laha hatesol ang ahoi hawane. Ape huopanim huohu po moxe an tutuen ti tesol kahikahi Jises apuhiniwa. 21 Mongohe seilon laha angiang sai 5,000, tai wexe teka hehin ma akaik.

Jises nanahih patul he kanitax

Mk 6:45-52; Jn 6:16-21

22 Muhin Jises hone tesol kahikahin langai imat tetan hani liai tepaun ti kanitax Galili he koap. Ape i talo aliake teka kilai seilon. 23 Mewenae i nahih hani patul he tehu maunten ape i lotu. Ti ape alohah, Jises mewenae i tutuen. 24 Lokon ien tea koap ape i xauwen. Laman hapa ahuahu tea koap nake aupol ah suei i.

25 Sikole letu ti teik tilokoan tutuen, Jises nahiwa patul he kanitax hani kapi tesol kahikahin. 26 Ti tesol kahikahin ningahiwa i nanahih patul he kanitax, lato mamata hawane ape lato tilol ausisini, “Tel manu!”

27 Jises hone hamatua lato, “Haxoxoa namilomuto! Se nga. Kum maamata!”

28 Pita hone i, “Tel masiwi, na salan wanen o, honema nga nahih patul he kanitax hani kapim.”

29 Jises ukek, “Nahima!”

Pita mos he tea koap ape i hutui nahih patul he kanitax hani kapi Jises.
30 Tuahe ti i ilameniwa kuiai aupol, i mamata ape lehe i taxix. I tilol ausini, “Tel masiwi, hualima nga!”

31 Kiliwan wanen Jises tuliniwa minan, i akeni Pita ape i ukek, “Nake lahan namilom wakul alia tetak?” 32 Ti lalu ku haniwa he tea koap, aupol mat.

33 Tesol kahikahin he tea koap lokuha hani Jises. Lato ukek, “Salan wanen o tel Nati Haeu!”

Jises haewia teka tinun ti texux xux Genesaret

Mk 6:53-56

34 Ti lato meiwa liai tepaun ti kanitax Galili, lato mos he tea koap hani Genesaret. 35 Ti teka seilon ti tesol ien paxai tioiwa Jises, laha sawateni kakain hani teka seilon leili lawe toan. Kilan seilon hakahita teka tinun hani kapin. 36 Laha kamei eliel i na ewi teka tinun tua soti ngixi puxuaun. Ape teka laha soti, laha ewi.

Copyright information for `SSG