a(Exod 3:6)
b(Deut 6:5)
c(Lev 19:18)
d(Ps 110:1)

Matthew 22

Menge tehu angiain lalap

Lk 14:15-24

*Jises uke ulei tenen meng ti i kakane teka seilon. I ukek, “Aweisal ti Haeu neini seilon masin na tel masiwi hone teka unauan apeseniai tehu angiain lalap ti salai tel natun wawan. I talo tesol unauan nahih honei teka seilon i ilowiwen ti nahih haniai tehu angiain ti sala. Tuahe laha watakai.

“Ape i talo ulei tesol unauan liai hetekie kakaian. Lato ukek, ‘An ti sala i apeasawen. Laha teleiwen hina bulmakau tenen xuxu solian ma lawe waliko i apeasawen. Nahih hanima tehu angiain lalap.’

“Tuahe teka seilon ti tel masiwi ilowiwen, laha kum hong waxi kakaialato. Laha aile waliko ti pahalaha. Teka laha nahih hani he kinelaha, teka liai nahih hani puasalaha ti hangainiai soxi. Ape teka liai akeni pohi tesol unaui tel masiwi. Laha aile halialu hawane lato ape teka laha telei. Tel masiwi leng hawane. I talo tesol unauan ti hile teleiai teka seilon laha telei tesol unauan ape i hone lato luiai tehu taon ti laha.

“I tiloi tesol unauan liai ape i hone lato, ‘Angiain ti sala i apeasawen, tuahe teka seilon ti nga ilolowi, laha kumahe solian ti i tapai laha to ti tehu angiain ti sala. Amuto nahih haniwa aweisal ti tehu taon ie ape ilowi hatapoma teka ti na amuto tunahi.’ 10 Tesol unauan nahih hani he aweisal ape lato ilowi hatapo seilon ti lato tunahi, teka seilon sawisawin ma teka seilon lialun. Lato hakahita hatesol hani leili ing ti sala ape tehu ing xuh hawane.

11 “Ti tel masiwi nahih soh paxai teka seilon lato hakahitama, i ningahi tunahi tel seilon kumahe i sosoi maia tenen ti angiain ti sala. 12 Ape i hone i, ‘Oie, o ala kumahe ie. O tap maia tenen ti angiain ti sala.’ Tuahe tel seilon kum tunah pahoan.

13 “Tel masiwi hone tesol unauan, ‘Xiotiwa minan ma aen ape towi xoini haniwa i melal he tilokoan, tetesol tonain laha kau kawatan ma tangike moloan.’”

14 Jises kak tili kakaian, “Haeu ilowi kilan seilon lehe i neini laha tuahe teka palai Haeu kilami.”

Moni hani *Sisa tel masiwi tapein ti *Rom

Mk 12:13-17; Lk 20:20-26

15 Teka *Parisi apuha ape laha sakal aweisal lehe Jises kak tunahi waliko tenen na i sului aliake i. 16 Lato talo hani kapin teka kahikahi lato ma teka tepaun ti *Herod. Lato ukek, “Tel masiwi, amite tioi o seilon sawisawin. Ti o hanau seilon saun ti Haeu, kakain tenen salan. Woum o aile hani teka masiwi ma teka seilon naun lawe tekewe. 17 O namiloi ukek ia? Ewi na kako hani Sisa moni ti pahan?”

18 Jises tioi ka lato pisi totohongi i ape i hone lato, “Lehomuto huoka. Alahan amuto kamei pisi nga? 19 Kola hanima nga tehu ti tesol puli moni lawe amuto hahani Sisa.” Lato hani i tehu. 20 I kamei lato, “Kawe aita ma axe aita he tehu puli moni?”

21 Lato ukek, “Ti Sisa.”

Ape Jises hone lato, “Ien, waliko ti Sisa haniwa Sisa, waliko ti Haeu haniwa Haeu.”

22 Ti lato hongoa pahoan tetan, lato ong hawane ape lato nahih salili i.

Na seilon mat nakon i xahat alia?

Mk 12:18-27; Lk 20:27-40

23 Ngain tin tetehu teka *Sadusi nahih hani kapi Jises. Lato soh ka seilon maten kum moih alia. 24 Lato ukek, “Tel masiwi, *Moses tai hanawen na masin tel wawan i mat a i tap natun, tel ukalan kewa axoan tel hehin ien lehe lalu tan natulalu ape tesol akaik nati tel i matewen. 25 Hongoa mengomite. Telao hatotalin lato tepanim hua. Tel pamu i sal ape i mat, tap natun. Tel ukalan usian waxi axoan tel hehin. 26 Tel usiai tel pamu tin i mat tap natulalu ape tel usialalu uke axoan tel hehin. Waliko tin tetenen sohot hani lato hatesol. 27 Tapeinan ape tel hehin mat. 28 Taen Haeu xahateni hatapo seilon maten, tel hehin ape axoi aita? Nake ati lato ukewen tel hehin ien.”

29 Jises kak pahoi lato, “Namilomuto kumahe salan ka seilon maten kum moih alia nake amuto kum tioi kakai Haeu ma pohe Haeu. 30 Taen teka maten moih alia, ape tapein tenen hahunatun. Ti tone Haeu, seilon kum sal masin teka *engel. 31 Nga kaxi haxewa hani amuto sale xahatai seilon maten. Amuto tioi waliko ti pepai Haeu kakak. I kakaxi waliko ti Haeu kakak muhin ti *Abraham, Aisak ma *Jekop matewa. I ukek, 32 ‘Nga Haeu tetel ti Abraham, Aisak ma Jekop lolotui.’” a  Ape Jises ukek, “I Haeu ti teka seilon moihin nake teka seilon tetan laha matewen, laha kumahe salan maten.”

33 Ti teka kilai seilon hongoa kakai Jises, laha ongaini hawane sale hanauan tetan.

Nauna tuah tapein ti Haeu

Mk 12:28-34; Lk 10:25-28

34 Ti tesol Parisi hongoa ka Jises kak hatahunosoen tesol Sadusi, lato apuha ape lato nahih hani kapin. 35 Leilolato, tel ti hanaui nauna ti Moses i kamei pisi Jises. I ukek, 36 “Tel masiwi, ti lawe *nauna ti Moses lahe nauna tuah tapein?”

37 Jises kak pahoi i, “‘Waheni hawanewa Haeu tel Masiwi ti amuto, xoiniwa ti amuto waheni teka seilon liai. Amukewa Haeu ti leili tiamuto, namiloi eliel hawanewa i ma aile hatapoa puasan ti hatesol kuimuto.’ b  38 I se nauna tenen tuah tapein i xoini lawe nauna. 39 Tenen nauna usian i masin, ‘Waheniwa seilon liai hanowi ti amuto waheni aliake puki amuto.’ c  40 Huonen nauna ien se salangawe lawe nauna ti Moses ma hatesol waliko ti *teka kuluiai kakai Haeu hanauen.”

Kahi nati aita tel *Krais?

Mk 12:35-37; Lk 20:41-44

41 Ti tesol Parisi tutuen ien, Jises kamei lato, 42 “Kaie amuto namiloi ukek ia? Krais, tel seilon Haeu taloma, i kahi nati aita?”

Lato hone i, “Kahi nati *David.”

43 Jises kamei lato, “Na masin ien, alahan David axai i tel Masiwi tetan? Puki *Holi Spirit hanamiloa David kak kewak,

44 “‘Haeu kakane tel Masiwi tetak,
toma papak tepaun manau ti neiniai seilon
atengi tataen nga hanawa teka seilon
laha pahoxai o hani hahitakam.’ d 
45 Na masin David axai Krais tel Masiwi tetan, i kumahe tuahe tel ti kahi natun.” 46 Tap tel ti lato kak pahoi uke i. Muhin ape laha mamata kamei pisiai Jises.

Copyright information for `SSG