Revelation of John 15

Paki *Moses ma tok *sipsip uluha

Imuh tenen waliko pate lalap ma tuah wanen sohotuma tesol *tone Haeu. Nga ningahi tepanim hua *engel ti axiai tepanim huohu kawatan tiliai lengei Haeu. Muhin nga ningahi tenen waliko paxaian hanowi kanitax tenen masin kalas i talepalep hanowi xekei ah. Hina seilon tutu ngixi kanitax ien. Lato tetesol lato waxainiwen tok manihuh tumun kalimen i ahutama itax ma tok hosaun ma lato tai uke kikilam tetan. Lato akekeni tesol harp ti Haeu haniwen lato wexoiai tangiai pak. Ape lato papakui tenen paki Moses tel unaui Haeu ma tok sipsip uluha i ukek,

“Tel Masiwi Haeu tel pohen tapein,
soliai lalape pupuasam.
Tel Masiwi ti hatesol seilon,
woum, kakaiam ma pupuasam
lawe sawisawin ma salan.
Lehe aita tel na tap lon tetam?
Lehe aita tel na kum haxawa axam?
Mewenae o tetel sawisawin tapein.
Hatesol seilon lotu sameni o
nake laha ningahiwen sawisawiai pupuasam.”

Tepanim huohu kapi hetekie tepanim huohu kawatan

Muhin *Ingi Haeu ti tesol tonan i hea ape nga ningahi tesol Pate Tuah ti Haeu. Tesol tepanim hua engel ti axiai tepanim huohu kawatan lato sohotuma leili Ingi Haeu. Puxuaulato papaxaxun ma i talehaleh. Patanawalato tahaian teik tah ani gol. Kakanua, tel ti tetesol hinalo seilon ien hani tesol tepanim huhua engel tepanim huohu kapi ani gol. Waliko ti leilon i kikilami lengei Haeu, tel tap tahi matean. Ape axuan i xuh tesol Pate Tuah ti leili Ingi Haeu. I kola ka Haeu tel pate pohen ma axan lalap. Tap tel i soh uke hani ien atengi tataen tepanim huhua engel axi hatapoa tesol tepanim huohu kawatan.

Copyright information for `SSG