Acts 12

Tanda wopu minelemeeki

Koto pita꞉ta꞉ hande kini hali Hetodima꞉ mandane siosi tapake haliweki da꞉ka꞉pa꞉ miniekeme. Ipikana꞉ma꞉ Dionina꞉ hameke Dia꞉mesita꞉ kepete hokuluma꞉ liekeme. Kutupa Diu wanda꞉halima꞉ ta꞉na꞉ma꞉ homemeke handa Pida make da꞉ka꞉pa꞉ miniekeme. Mo hande Na Pombei Yaake Palaowa Nemeke pita꞉ piekeme. Kutupa da꞉ka꞉pa꞉ minata꞉ dipula mea lopao ami haliweki mandane tonkopu mandane tonkopu mandane tonkopu mandane tonkopu haliwekita꞉ kade hatiki pina꞉ leekeme. Ipika꞉ honema꞉ta꞉ mo hande Lombei Pupa Yapeeke pita꞉ paeya꞉ka꞉na꞉ta꞉ wanda꞉hali pa꞉ta꞉ mea a꞉pa walueke hone wiekeme. Koto ekina꞉ Pidata꞉ dipula da pa꞉ta꞉ pa pitina꞉ leekepate mo siosi tapake wanda꞉halima꞉ Koda꞉ pa꞉ta꞉ Pida yeni wopu pea꞉tiki pimikime.

Pida dipula pao tapaeyekeeki

Hetodima꞉ Pida mea a꞉pa waluekema꞉ haena꞉ timba kone Pidata꞉ mo ami hali yaapo ame̱le̱ seni pu yaapoma꞉ endialu pea tukiki pa꞉ta꞉ peliekeme. Kutupa pota꞉ hama꞉ nane hata꞉ kade haliwekima꞉ mo dipula da handeteke hatiki ombu pimikime. Kuta kone Tekehalina꞉ enisolo homeke epeeketa꞉ mo da panda꞉ pa꞉ta꞉ pa̱a̱ tieke piekeme. Kutupa ipikana꞉ma꞉ Pida a꞉pa lu tiaaso alota꞉ A̱i̱ tiae leekeme. Kutupa hande seni pumanu ipika꞉ kiki pa꞉ta꞉ kone tunkulupa lopa꞉ lopa꞉ piekeme. Kutupa mo enisoloma꞉ ipiki pa꞉ta꞉ alota꞉ Naka꞉ hako yama anke dake pambae leekeme. Kutu piekeme. Kutupa ipikana꞉ma꞉ Pida pa꞉ta꞉ alota꞉ Naka꞉ dau mea dopua I̱ teli mea epoe leekeme. Kutupa teli mea hama peekeme. Pidama꞉ mo enisoloma꞉ pieke ekita꞉ hone na wiki upama꞉ piki nono piekeme. 10 Kutupa titina꞉ kade hayeke alena꞉ lombei pupa pua koto hoki pa꞉ta꞉eki make lombei pupa puaata꞉ mo hande daoni nane peeke ayenima꞉ wepieke pota꞉ kake tieke pa꞉ta꞉ opolo pepekeme. Kutupa mo hande pota꞉ta꞉ ipika꞉ kone lombeekeme. Kutupa ipilikita꞉ tunkulupa puaata꞉ pota꞉ homeke yola꞉ mea pepekepate mo enisolota꞉ koto kone Pida mina꞉pa꞉lao peekeme.

11 Koto pita꞉ta꞉ Pidama꞉ hone wiekeme. Ameta꞉ ota꞉ hone wia handolome leekeme. Tekehalima꞉ ipika꞉ enisolo tapao mo Hetodima꞉ I̱ mia꞉ ekita꞉ mo Diu wanda꞉halima꞉ I̱ pa꞉ta꞉ pulu pelemeeki make I̱ tamba꞉ mia꞉me leekeme.

12 Koto hone wiata꞉ Dionita꞉ ipika꞉ biki ma꞉nda꞉ Maka ipika꞉ inkiki Metina꞉ da pa꞉ta꞉ peekeme. Koto da pa꞉ta꞉ wanda꞉hali wopuma꞉ momba꞉la pita꞉ yeni pu pitimikime. 13 Kutupa mo pota꞉ kake pa꞉ta꞉ pua hoto laa kilikili laeyekeme. Kutupa wandiki ma꞉nda꞉ Loudama꞉ lombolo peekepate 14 Pidana꞉ pi make meata꞉ ta꞉na꞉ma꞉ wopu homolo hata꞉ pota꞉ na lombeke da tukiki pa꞉ta꞉ anke hao pua Pidata꞉ pota꞉ kake pa꞉ta꞉ a꞉pa hala꞉me leekeme. 15 Ikana꞉ma꞉ ipiki pa꞉ta꞉ alota꞉ Neketa꞉ keaaso alee lemekepate ipikana꞉ma꞉ alota꞉ Ota꞉ loa꞉me leekeme. Ikana꞉ma꞉ alota꞉ Ipika꞉ enisolo hata꞉ pa꞉la꞉me lemekepate 16 Pidama꞉ kilikili laaso haena꞉ pua pota꞉ lomba Pida handolo hata꞉ penkilipa꞉tia pomua wotu handake wimikime.

17 Kutu pimikipate Pidama꞉ kikima꞉ kone pi na lapee leekeme. Kutupa Tekehalima꞉ mo dipula da pa꞉ta꞉ hatuku epeeke pi la haleekeme. Kutupa Pidama꞉ alota꞉ Dia꞉mesi pa꞉ta꞉ make Ketiso kametiti pa꞉ta꞉ make do pi la hala꞉pa꞉peke leekeme. Kutupa mina꞉pa꞉lao pua da ma꞉nda꞉ pa꞉ta꞉ peekeme.

18 Da kelepeeketa꞉ mo hande ami haliwekima꞉ Pida na pitieke handa hone ti yokemekeme. 19 Kutupa Hetodima꞉ Pida weiyekepate na handa꞉ wiekeme. Koto ekina꞉ mo kade haemeke haliweki pa꞉ta꞉ Ekipa pa꞉la꞉pe laa lota꞉ lota꞉ peata꞉ mo haliweki homena꞉ lina꞉ leekeme. Doeki paeyeketa꞉ Hetodi Diudia mina꞉pa꞉lao nate mandaneeki Sesatia nane hayekeme.

Hetodi homeekeeki

20 Hetodima꞉ Taiya Saidoni da yaapo pa꞉ta꞉ haemeke wanda꞉hali pa꞉ta꞉ mineke tieke wopu pankeekeme. Koto ekina꞉ mo da yaapo pa꞉ta꞉ haemeke mandane haliwekima꞉ apa꞉tao Hetodi handolo pemekeme. Titina꞉ amba꞉la mo kini halina꞉ da handeteke hayeke hali Ba꞉lasitusita꞉ ika꞉ a꞉nda꞉ liaena꞉yeke ipiki ame̱le̱ pi lolo pemekeme. Mo halima꞉ ika꞉ pi opiekeme. Kotoeki pea꞉ta꞉ a꞉nda꞉ polumana꞉e laa Hetodi pa꞉ta꞉ honke lolo pemekeme. Ika꞉ wanda꞉halina꞉ neta꞉ Hetodima꞉ handeteke hayeke kenke pa꞉ta꞉ mu haemeke ekina꞉yeke lemekeme.

21 Hetodima꞉ la꞉ wieke nate ma꞉nda꞉na꞉ kini halima꞉ ipika꞉ yamo haya꞉ aka꞉manu yamaata꞉ ipika꞉ yama pitu hayeke seana꞉ pita꞉ wanda꞉hali pa꞉ta꞉ pi leekeme. 22 Wanda꞉halima꞉ opuaata꞉ anekema꞉ wi la alu alu pitolo alota꞉ Dota꞉ ota꞉ halima꞉ na ala꞉me laa koda꞉ ma꞉nda꞉ma꞉ ala꞉pate ya꞉la꞉me lemekeme. 23 Hetodima꞉ta꞉ wanda꞉halima꞉ Koda꞉na꞉ pi na laena꞉ leke pa ipika꞉ pi kone laena꞉ leeke handaata꞉ kuta kone Tekehalina꞉ enisoloma꞉ Hetodi yeni tonda꞉pa꞉ mina꞉ leekeme. Kutupa pipi manuma꞉ weleke tunkula꞉ mepi naata꞉ homeekeme.

24 Kutu pitolo haena꞉ kone Koda꞉na꞉ pi mandane mandane wanda꞉hali paeyao pa꞉ta꞉ daeyatia peekeme.

25 Banabasi Solo yaapoma꞉ mo Diutuseleme da pa꞉ta꞉ pea꞉peke ekimanu pu paeyaota꞉ pa la꞉ka꞉la Dioni Maka make hatuku mandakena꞉ pemekeme.

Copyright information for `SSX