Acts 15

Diutuseleme da pa꞉ta꞉ pi hotimikieki

Kutupa mandane Diudia nane haemeke haliwekima꞉ koto pa꞉ta꞉ hao hola꞉pa꞉nini pea a꞉pa Ketiso wanda꞉hali pa꞉ta꞉ pi walolo alota꞉ Mo hande Mosesima꞉ waleeke sekemesaisi hau na pimika꞉na꞉ta꞉ ikita꞉ deto hala꞉ ekita꞉ na milimikie laa lemekeme. Koto lemeke ekina꞉ Polo Banabasi yaapoma꞉ mo haliweki ame̱le̱ ka꞉nda꞉piki pi tieke lepeketa꞉ hande A꞉ndioko Ketiso tapake haliwekima꞉ Polo Banabasi yaapo make mandane haliwekima꞉ mo Diutuseleme haemeke aposolo haliweki pa꞉ta꞉ make mo handeteke haemeke tondiki haliweki pa꞉ta꞉ make hande walemeke pi hotulu pena꞉yeke mimikime.

Koto ekina꞉ mo siosi tapakema꞉ tapaemeketa꞉ pua mo Pinisia nane make Sametia nane make pomu lopa mo Diendaili wanda꞉halima꞉ Koda꞉ pa꞉ta꞉ puki la꞉ka꞉laemekeeki walolo hata꞉ koto pima꞉ mo Ketiso wanda꞉hali paeyaota꞉ ta꞉na꞉ma꞉ homaemekeme. Kutupa Diutuseleme da pa꞉ta꞉ opolo pemeketa꞉ mo aposolo haliweki make tondiki haliwekima꞉ make mo siosi wanda꞉halima꞉ make ta꞉na꞉ma꞉ homolo hata꞉ iki handa꞉ mimikime. Kutupa Koda꞉ma꞉ ipiliki pa꞉ta꞉ pieke ekimanu paeyao walepekepate mandane Pa꞉tisi tapake Ketiso haliwekima꞉ tiao alota꞉ Mo wanda꞉halita꞉ sekemesaisi hau pina꞉ laata꞉ Mosesima꞉ waleeke Lo Pimanu make opina꞉ laata꞉ ana꞉ pa꞉la꞉me lemekeme.

Mo hande aposolo haliweki make tondiki haliweki ame̱le̱ mo hande lota꞉ pieke ekina꞉ mombelemekeme. Pi wotu hotu haota꞉ Pidama꞉ tiao alota꞉ Ya kametitio. Amba꞉ kone iki ame̱le̱ hano Koda꞉ma꞉ I̱ mea haena꞉ laata꞉ Diendaili wanda꞉hali pa꞉ta꞉ mo hande Pi Seliapo walonoyeke pa꞉la꞉me. Mo wanda꞉halima꞉ pi opuaka꞉na꞉ hone tulaena꞉yeke pa꞉la꞉me. Kutupa wanda꞉halina꞉ puki tukiki nane hando hala꞉ Koda꞉ma꞉ta꞉ Diendaili wanda꞉halima꞉ hone tulaasemeeki a꞉pa꞉la꞉me la walolo hata꞉ niki pa꞉ta꞉ ka꞉la꞉ tupa꞉ iki pa꞉ta꞉ make Holi Sipitidi haleekeme. Kutu pieke ekima꞉ ipikana꞉ma꞉ta꞉ niki Diu wanda꞉hali make iki Diendaili wanda꞉hali make ta꞉ta꞉ ta꞉ta꞉ pea na haloma꞉eki waleekeme. Ika꞉ hone tulaemeke ekina꞉ ipikana꞉ma꞉ ika꞉ hoke haumanu pa paeyaeyekeme. 10 Koto ekina꞉ Koda꞉ma꞉ pa꞉la꞉eki handa kone ameta꞉ pa ekipeke Koda꞉ la handuluekema꞉ hone witelemepe. Nika꞉ apa꞉meima꞉ make nikana꞉ma꞉ kone make mea꞉peke na yeke ka꞉nda꞉ pa꞉la꞉eki kone pa ekipeke mo hande hone tulaaseme wanda꞉hali pa꞉ta꞉ ka꞉nda꞉ma꞉ homena꞉ alemepe. 11 Dia꞉me laata꞉ Nikana꞉ma꞉ hone tulaasoma꞉ ekita꞉ Koda꞉ma꞉ Tekehali Yesu ipika꞉ pa a꞉ta꞉ma꞉ homa꞉la꞉ ekima꞉ niki da꞉taasa꞉me. Diendaili wanda꞉hali da꞉taaso pita꞉la꞉ tupa꞉ pita꞉la꞉me.

12 Banabasi Polo yaapoma꞉ta꞉ Koda꞉ma꞉ ipiliki pa꞉ta꞉ wele pita꞉la꞉eki halaata꞉ mo na hando haemeke ekimanu make wele pieke ekimanu make mo Diendaili wanda꞉hali pa꞉ta꞉ pieke ekimanu walolo haena꞉ta꞉ mo mombelemeke haliwekima꞉ opitolo hata꞉ pi na leke yopu pitimikime. 13 Pi lo paeyaepeketa꞉ Dia꞉mesima꞉ ipilika꞉ pi hombo peaaso alota꞉ Ya kametitio. I̱ma꞉ alo pi opua꞉pe. 14 Koda꞉ma꞉ mo Diendaili wanda꞉hali pa꞉ta꞉ mandane ekimanu ota꞉ ipika꞉ wanda꞉hali talopu mea haena꞉ la꞉la꞉ ekima꞉ iki pa꞉ta꞉ ipika꞉ epeke hone wita꞉la꞉eki niki wala꞉la꞉me. Saimonoma꞉ koto la ka꞉la꞉me. 15 Mo hande potopede haliwekima꞉ lemeke pi manuta꞉ ota꞉ mandake pimanu la꞉la꞉me. Hande Baibolo bukama꞉ la꞉la꞉ tupa꞉

16 Tekehalima꞉ alota꞉ Doeki paeya꞉ka꞉na꞉ta꞉ kota꞉ I̱ paa a꞉pata꞉ Deipidina꞉ howa ula꞉ da I̱ma꞉ paa mea a꞉pa a꞉meiyalueke.
Koto da taake pa꞉ta꞉ kone I̱ma꞉ paa epeao mea haena꞉ lolueke.
17 Kutupa mo mandane mandane wanda꞉hali paeyaoma꞉ta꞉ Tekehali weilimikie.
Hande I̱ma꞉ wi lolo Diendaili wanda꞉halita꞉ ota꞉ yakaeki haena꞉ lolome leekeme.
18 Tekehalima꞉ amba꞉ kone dupiki pi la halaata꞉ koto ala꞉ handa꞉e leekeme.
19 Dia꞉mesima꞉ pa alo alota꞉ Yaka honema꞉ta꞉ Koda꞉ pa꞉ta꞉ la꞉ka꞉la꞉ mina haleme Diendaili wanda꞉halita꞉ nikana꞉ma꞉ ka꞉nda꞉ma꞉ homa꞉la꞉eki na halomana꞉ pea꞉pa꞉peke alee. 20 Dia꞉me. Wape ma꞉nda꞉ pea dupiki pi la halomana꞉ pea꞉pa꞉peke alee. Mo toopi tima꞉ wepia ula꞉ koda꞉manu pa꞉ta꞉ lia haleeke ma꞉na꞉ mindiki napeke na yeke suseke hau na piki make wa꞉ka꞉ta꞉pa lita꞉la꞉ ma꞉na꞉ yeti na neke we make na napa꞉peke laa lomana꞉ pea꞉pa꞉peke alee. 21 Mosesima꞉ Lo Pi manuta꞉ mo pi hotu haleme da pa꞉ta꞉manu hata꞉ta꞉ Hoto Pila꞉ Nate paeyaona꞉ kone yata꞉pa꞉tiki pu haemekeme. Kutupa make daoni paeyao pa꞉ta꞉manu ipika꞉ pimanu wala꞉tiki pu halememe laa leekeme.

Mo Diendaili Ketiso wanda꞉hali pa꞉ta꞉ wape tapaemekeeki

22 Koto pa꞉la꞉ ekina꞉ mo aposolo haliweki make mo tondiki haliweki make siosi wanda꞉hali paeyao ame̱le̱ ikana꞉ma꞉ iki pa꞉ta꞉ mandane haliweki talopu mea haena꞉ laata꞉ Polo Banabasi yaapo ame̱le̱ hata꞉ta꞉ mo A꞉ndioko da pa꞉ta꞉ tapaaluekema꞉ hone wimikime. Diudasi biki ma꞉nda꞉ Basabasi meata꞉ Sailasi make talopu mea haena꞉ lemekeme. Mo Ketiso wanda꞉halima꞉ koto hali yaapo pa꞉ta꞉ epeke hone u haemekeme. 23 Kutupa do wapeta꞉ mo haliwekima꞉ mea pena꞉ lemekeme. Koto pase tukiki pa꞉ta꞉ do pi wiekeme.

Nikita꞉ aposolo haliwekima꞉ mo siosina꞉ handeteke haloma꞉ tondiki haliwekima꞉ tonka꞉na꞉ ika꞉ kametonu hata꞉ do wapema꞉ nika꞉ oli A꞉ndioko Sitia Silisia nane haleme Diendaili kametiti pa꞉ta꞉ keiyae aloma꞉me.

24 Nika꞉ da nane haliweki mandaneeki manuma꞉ pi walolo hata꞉ iki ka꞉nda꞉ peaemeke ekita꞉ opuma꞉me. Nikana꞉ma꞉ dupa lapa꞉peke pi na loma꞉pate pa ika꞉ konema꞉ iki ka꞉nda꞉ma꞉ homaemekeme. 25 Koto ekina꞉ nikana꞉ma꞉ momba꞉la hata꞉ Mandane haliweki mumana꞉e laa koto haliweki nika꞉ epeke kame yaapo Banabasi Polo ame̱le̱ iki pa꞉ta꞉ tapaoma꞉ka꞉na꞉ta꞉ epelieke loma꞉me.

26 Hande hali yaapoma꞉ta꞉ Tekehali Yesu Ketiso pa꞉ta꞉ hone wopu witolo hata꞉ ipilika꞉ lokena꞉ hau hone wopu na wiki homeke nono pea haepekeme. 27 Koto ekina꞉ Diudasi Sailasi yaapo iki pa꞉ta꞉ tapaasoma꞉me. Kutupa ipilikana꞉ma꞉ kakema꞉ hande pi kone lelipipikie lemekeme.

28 Mo Holi Sipitidima꞉ make nika꞉ honema꞉ make iki pa꞉ta꞉ ka꞉nda꞉ma꞉ na homaake pa do pimanu siki homeke a꞉pa꞉la꞉ma꞉ opua꞉pe aloma꞉me.

29 Toopi tima꞉ wepia ula꞉ ale pa꞉ta꞉ lia halemeke hoteke ne ala꞉ta꞉ ala꞉ta꞉ na neke we make na neke mo da꞉ka꞉pe miniki hata꞉ homaasa꞉eki na neke loke hoeyaasa꞉ hau na piki kutupa koto haumanu na pimika꞉na꞉ta꞉ epeke tupa꞉ halimikie aloma꞉me. A꞉taloe laa wape pu paeya꞉me.

30 Kutupa mo tapaemeke haliweki oni A꞉ndioko da nane puaata꞉ Ketiso wanda꞉hali a꞉pa mombelena꞉ laaka꞉na꞉ hande pase halemekeme. 31 Kutupa yata꞉paka꞉na꞉ta꞉ hande mana꞉ lemekeeki opuaata꞉ ta꞉na꞉ma꞉ homemekeme. 32 Kutupa Diudasi Sailasi yaapo potopede hali yaapo hata꞉ kone pi wopu walolo hata꞉ta꞉ honkopu haena꞉ lepekeme. 33 Kutupa koto pa꞉ta꞉ hosiki hao hatiki pipikita꞉ mo Ketiso haliwekima꞉ hande titina꞉ amba꞉ kone tapaemeke haliweki pa꞉ta꞉ epeke tupa꞉ hata꞉ paa tapaemekeme. 34 [Pate Sailasina꞉ honema꞉ta꞉ do pa꞉ta꞉ pa halueke hone wiekeme.]

35 Kutu pimikipate Polo Banabasi yaapo A꞉ndioko da nane hao haota꞉ haliweki paeyao ame̱le̱ hata꞉ Tekehalina꞉ pi latiki peata꞉ wala꞉tiki pu haemekeme.

Polo Banabasi yaapo ka꞉ta꞉alu pea ta꞉ta꞉ ta꞉ta꞉ pipikieki

36 Kutupa nate mandaneeki hao Poloma꞉ Banabasi pa꞉ta꞉ alota꞉ Pana꞉e amba꞉ hande Tekehalina꞉ pi walopa꞉ da nina꞉ wanda꞉halita꞉ eki pa꞉la꞉pe laa handopana꞉ pana꞉e leekeme. 37 Kutupa Banabasima꞉ Dioni Maka hatuku poluekema꞉ hone wiekepate 38 Poloma꞉ta꞉ hone na wiekeme. Hande Pa꞉mbilia da nane hata꞉ pi walo poluekema꞉ hone na wiki ipiliki mina꞉pa꞉laeyeke handa ana꞉ na pa꞉la꞉me leekeme. 39 Kutupa ipilika꞉ pi ta꞉ta꞉ ta꞉ta꞉ pea ka꞉nda꞉ma꞉ homepeke handa pota꞉ ma꞉nda꞉na꞉ ma꞉nda꞉ pea pota꞉ ma꞉nda꞉na꞉ ma꞉nda꞉ pea pepekeme. Banabasima꞉ Maka ame̱le̱ pita palai kawasona꞉ Saipotasi nane pepekepate 40 Poloma꞉ Sailasi meaata꞉ Ketiso haliwekima꞉ Koda꞉na꞉ a꞉ta꞉ma꞉ homa꞉la꞉eki mina꞉yeke tapaemekeme. 41 Kutupa puata꞉ Sitia Silisia yaapo nane siosi wanda꞉hali honkopu haena꞉ alo hata꞉ pomu haepekeme.

Copyright information for `SSX