Acts 2

Hande Holi Sipitidi epeekeeki

Mo hande Pendikosi nate epeeke dina꞉ta꞉ mo pi mimiki wanda꞉hali paeyao homeke alena꞉ momba꞉la haemekeme. Kuta kone oli ya nanema꞉ po tilipu tieke ipula꞉ tupa꞉ u̱ tieke laa a꞉paata꞉ mo wanda꞉hali momba꞉la pitimiki da pa꞉ta꞉ pua ota꞉ tumbaeyekeme. Mo wanda꞉halima꞉ta꞉ mo ti ulekema꞉ handeke ekimanu handemekeme. Kutupa mo ti ulekema꞉ handekeeki manuma꞉ta꞉ telipeaaso hata꞉ iki paeyao pa꞉ta꞉ wataeyekeme. Kutupa mo Holi Sipitidima꞉ iki paeyao tumba pitina꞉ mo wanda꞉hali paeyaoma꞉ pi ta꞉ta꞉ ta꞉ta꞉ lena꞉ leekeme.

Yeni puluekema꞉ hone wimiki Diu haliwekita꞉ mo kenke paeyao nane hao pua mo Diutuseleme da pa꞉ta꞉ pua haemekeme. Mo hande u tieke leekeeki opuaata꞉ wanda꞉hali wopu pua handemekeme. Hande kenke paeyao nane hao epemeke Diu haliwekima꞉ do pi mimiki haliwekima꞉ ika꞉ da pi ta꞉ta꞉ ta꞉ta꞉ kone laa lemekeeki opitolo hata꞉ta꞉ ikana꞉ma꞉ wotu penkilipa꞉tia pominolo hata꞉ta꞉ ika꞉ kone alota꞉ Do pi aleme haliweki paeyaota꞉ Ka꞉lili haliwekie. Ikana꞉ma꞉ta꞉ nika꞉ da pimanu aleme ekita꞉ ekipa pa꞉la꞉pe laa alo hata꞉ alota꞉ Nikita꞉ Padia nane make Midia nane make Ilame nane make Mesopoteimia nane make Diudia nane make Ka꞉padosia nane make Pondasi nane make Eisia nane make 10 Pitikia nane make Pa꞉mbilia nane make Idiepi nane make mo Saitini teke pa꞉ta꞉ Libia nane make mandane haliweki Loma꞉ da hao epoloma꞉me laata꞉ nikita꞉ Diu haliweki make mo Diu haliwekina꞉ hau puluekema꞉ la꞉ka꞉la haloma꞉ Diendaili haliwekima꞉ make mandane ekita꞉ 11 mo Kotiti A꞉teibia yaapo nane hao epoloma꞉ haliweki haloma꞉pateta꞉ Koda꞉ma꞉ hau tieke pa꞉la꞉ ekimanu mo haliwekima꞉ aleme ekita꞉ niki paeyaoma꞉ nika꞉ da pi ta꞉ta꞉ ta꞉ta꞉ piki pimanu kone opitoloma꞉me lemekeme. 12 Ikana꞉ma꞉ hone elekeeleke witolo hata꞉ penkilipa꞉tia pomua ika꞉ ika꞉ kone lota꞉ pea꞉tiki pitolo alota꞉ Do hau tieketa꞉ ekipa pa꞉la꞉pe laa lemekepate 13 mandane haliwekima꞉ mo pi mimiki haliweki pa꞉ta꞉ kitaaso hata꞉ alota꞉ Do haliwekima꞉ta꞉ hoke ikali naa keaaso pitelememe laa lemekeme.

Pidama꞉ pi waleekeeki

14 Kutupa Pidama꞉ mo hande 11 haliweki ame̱le̱ tiao hata꞉ wanda꞉hali pa꞉ta꞉ pi anekema꞉ alota꞉ Mo ya tapake Diu haliweki make do Diutuseleme teke da pa꞉ta꞉ hao haleme wanda꞉hali pa꞉ta꞉ make iki paeyao I̱ma꞉ lolua꞉ pita꞉ wotu opua꞉pa꞉pekee laata꞉ 15 Mandane haliweki ika꞉ honema꞉ta꞉ do haliwekita꞉ hoke ikali naa keaaso pitelememe alemepate dia꞉me. Ameta꞉ pa 9 okoloko nate minolo haena꞉ kone haloma꞉me. 16 Dia꞉me. Do hauta꞉ amba꞉ mo potopede hali Diolema꞉ leekeeki dupa

17 Koda꞉ma꞉ alota꞉ Natemanu paeluekema꞉ haena꞉ta꞉ dupulueke laa
Wanda꞉hali paeyao pa꞉ta꞉ yaka Holi Sipitidi hale hale pulueke.
Kutupa ika꞉ weki manuma꞉ make wandiki manuma꞉ make yaka pi la꞉ mea hala꞉tiki pilimikie.
Ika꞉ weki haliwekima꞉ mandane hau pita꞉la꞉ ekimanu handena꞉ lolueke.
Kutupa ika꞉ koke haliwekima꞉ make upamanu pilimikie.
18 Aowe. Koto nate manuna꞉ I̱ma꞉ yaka Holi Sipitidi hale hale pua꞉ka꞉na꞉ta꞉
yaka e pokao haleme wanda꞉halima꞉ kone yaka pi la꞉ mea hala꞉tiki pilimikie.
19 Oli ya nane make oni kenke nane make mo na hando haleme wele pita꞉la꞉ ekimanu pulueke.
Kutupa we make ti uleke make lumu tieke make handilimikie.
20 Oli nateta꞉ na teke timba꞉ lelieke. Oli sumba꞉ make we pupa pelieke.
Kutupa koto hoki naneta꞉ mo hande Tekehalina꞉ pa̱a̱ pita꞉la꞉ Nate Tieke ipilieke.
21 Koto di ipula꞉ naneta꞉ hali epima꞉ Tekehalina꞉ biki alo hata꞉ wi lea꞉ka꞉na꞉ta꞉
kota꞉ koto someta꞉ Tekehalima꞉ da꞉taena꞉ loluekema꞉ petelelieke laa leekeme.
22 Isulai haliwekio. I̱ma꞉ do alo pi opua꞉pa꞉peke. Hande Na꞉sa꞉tete hali Yesuta꞉ iki ame̱le̱ a꞉pa hata꞉ta꞉ Koda꞉ma꞉ wele peaaso haena꞉ Yesuma꞉ na hando haloma꞉ ekimanu make wele pita꞉la꞉ ekimanu make ipikana꞉ma꞉ pitolo haena꞉ Koda꞉ma꞉ ipikita꞉ I̱ma꞉ tapaalo halie laa peneme yatiki pia꞉me. Kutupa do haumanu paeyao ika꞉ hone wilimime leekeme. 23 Amba꞉ kone Koda꞉ma꞉ hone wiaata꞉ Yesuta꞉ ikana꞉ma꞉ milimikie laa pi la꞉ wiekeme. Kutupa ikana꞉ma꞉ta꞉ mo hoke hau pu haleme haliwekima꞉ Yesuta꞉ hande a꞉ka꞉tei wapepiki tina꞉ ikokoma꞉ tamendiaena꞉ lemeke ekima꞉ ikana꞉ma꞉ kone Yesu limikime. 24 Kutu pimipate Koda꞉ma꞉ mo hande toopi ka꞉ka꞉na꞉ pa꞉ta꞉ Yesu paa mea tiaeyekeme. Mo hande lapa꞉ pimiki toopima꞉ta꞉ Yesu miniki pita꞉peke ana꞉ na pitolo hata꞉ mo hande homaasa꞉ ekima꞉ Yesu tonkaeyeke ekita꞉ Koda꞉ma꞉ ka꞉la꞉pa꞉ tapawaeyekeme. 25 Deipidima꞉ ipiki pa꞉ta꞉ doeki la꞉leke handa loa꞉me.

Tekehali hoto paeyao I̱ yaapo hala꞉eki handolome. Ma꞉nda꞉ma꞉ I̱ la꞉ma꞉ la꞉ma꞉ peaapa꞉na꞉yeke yaka popeke kiki nane hala꞉me.
26 Koto ekina꞉ yaka pukima꞉ ta꞉na꞉ma꞉ homolo hata꞉ ya kakema꞉ make ta꞉na꞉piki pimanu lo halome.
Kutupa make I̱ta꞉ pa kenke hali halopate kone mo epekeeki muluekema꞉ handeteke halueke.
27 Pa ekipeke nakana꞉ma꞉ yaka temokota꞉ mo homemeke wanda꞉hali haleme alena꞉ na haena꞉ lelipikie.
Kutupa naka꞉ yakopiki halita꞉ oni kenke pa꞉ta꞉ na tandepena꞉ lelipikiyeke loa꞉me.
28 Mo hande da꞉ta꞉ lolo pa꞉la꞉ pota꞉ta꞉ I̱ pa꞉ta꞉ amba꞉ waleme. Kutupa nakana꞉ma꞉ I̱ yaapo hale ekina꞉ta꞉ ta꞉na꞉ma꞉ homa꞉la꞉ ekima꞉ I̱ pa꞉ta꞉ tumbaala꞉me laa la꞉la꞉me leekeme.
29 Kametitio. Iki pa꞉ta꞉ mo nika꞉ apa꞉ Deipidina꞉ do ota꞉ pimanu alome. Ipikita꞉ amba꞉ kone homeeke handa mea hoimikipate pa ame make hande hoimiki alena꞉ hando haloma꞉me. 30 Deipidima꞉ta꞉ potopede hali hata꞉ta꞉ hande Koda꞉ma꞉ ipiki pa꞉ta꞉ pi la꞉ wiekeeki piekeme. Koda꞉ma꞉ ipiki pa꞉ta꞉ pi la꞉ witolo alota꞉ Naka꞉ hoki nane halo pa꞉la꞉ hali homeketa꞉ neke kini hali hale tupa꞉ mea haena꞉ lolueke laa la꞉la꞉me. 31 Kutupa Deipidima꞉ Koda꞉ma꞉ pulu piekeeki hone witolo hata꞉ hande Ketiso paa tiaalo piekeeki pa꞉ta꞉ dupa leekeme.

Nakana꞉ma꞉ mo homemeke wanda꞉hali haleme alena꞉ yaka temoko na haena꞉ lelipikie.
Kutupa naka꞉ yakopiki halita꞉ oni kenke pa꞉ta꞉ na tandepo lo pa꞉la꞉ ekina꞉ loa꞉me la꞉la꞉me leekeme.
32 Do hande Yesuta꞉ Koda꞉ma꞉ paa mea tiaala꞉ ekita꞉ niki paeyaoma꞉ handoma꞉eki iki pa꞉ta꞉ la kitoloma꞉me. 33 Ipika꞉ Apa꞉ Koda꞉ma꞉ la꞉ wieke tupa꞉ Yesuta꞉ mea tiao ipika꞉ popeke kiki nane mea pitaota꞉ ipiki pa꞉ta꞉ Holi Sipitidi haleekeme. Kutupa nikana꞉ma꞉ ame do handoloma꞉ ekimanu make do opitoloma꞉ ekimanu tonka꞉na꞉ ipiki pa꞉ta꞉ ipula꞉me. 34 Deipidima꞉ta꞉ oli ya nane na a꞉meiyekepate pa ipikana꞉ma꞉ alota꞉

Mo Tekehalima꞉ yaka Tekehali pa꞉ta꞉ alota꞉
35 I̱ma꞉ mo naka꞉ a꞉nda꞉ tunkuliki wanda꞉halita꞉ naka꞉ anke tapa꞉pao pituelena꞉ loluekema꞉ nakana꞉ma꞉ ame do yaka popeke nane kikina꞉ pitie laa la꞉la꞉me leekeme.
36 Koto ekina꞉ Isulai wanda꞉hali paeyao do hande ikana꞉ma꞉ a꞉ka꞉tei wapepiki tina꞉ tamendiao limiki hali Yesuta꞉ Koda꞉ma꞉ ipikita꞉ Tekehali make Ketiso make mea haena꞉ la꞉la꞉ ekita꞉ ikana꞉ma꞉ hone ota꞉ wopu wia꞉pa꞉peke laa leekeme.

37 Mo wanda꞉halima꞉ koto pi opuaata꞉ ika꞉ puki pa꞉ta꞉ aweeke handaa Pida pa꞉ta꞉ make mandane aposolo haliweki pa꞉ta꞉ make alota꞉ Kametitio. Nikana꞉ma꞉ eki peomonope laa lemekeme. 38 Koto lemeke handaa Pidama꞉ iki pa꞉ta꞉ alota꞉ Koda꞉ma꞉ ika꞉ hoke hau peleme ekimanu pa paeyaena꞉yeke hone ma꞉nda꞉ la꞉ka꞉la꞉ mina wiaata꞉ Yesu Ketisona꞉ bikina꞉ bapitaisi hau pea꞉pa꞉peke. Kutu pimika꞉na꞉ta꞉ Koda꞉ma꞉ kilie aleta꞉ mo Holi Sipitidi kilieke. 39 Pa ekipeke mo hande Koda꞉ma꞉ pi la꞉ wieke ekita꞉ iki pa꞉ta꞉ make ika꞉ weki wandiki pa꞉ta꞉ make mo papate haleme wanda꞉hali pa꞉ta꞉ make pa mo Tekehalima꞉ ipiki pa꞉ta꞉ kone epena꞉ wi ala꞉ wanda꞉hali paeyao pa꞉ta꞉ta꞉ make ipikana꞉ma꞉ pi la꞉ wiekeme laa leekeme.

40 Pidama꞉ koto tupa꞉ pi walaata꞉ pa mandane pimanu make mea a꞉meiyao alota꞉ Do hoke wanda꞉hali hoeyaaluekema꞉ ipilie panisima꞉ iki tonka꞉na꞉ hoeyaapa꞉na꞉ ota꞉ paapa꞉peke. 41 Koto leeke handa wanda꞉hali wopuma꞉ Pidama꞉ waleeke pi opuaata꞉ bapitaisi hau pimikime. Paeyaota꞉ 3 daoseni wanda꞉hali tupa꞉ koto natena꞉ mo hande pi minolo hata꞉ mo Ketiso wanda꞉hali ame̱le̱ apa꞉tao hao haemekeme. 42 Mo wanda꞉halima꞉ta꞉ hande aposolo haliwekima꞉ waleme pimanu opua꞉tiki peaata꞉ Ketiso wanda꞉hali ame̱le̱ momba꞉la꞉tiki peaata꞉ yeni pea ne na꞉tiki pimikime.

Ketiso wanda꞉halina꞉ haemeke hau

43 Kutupa Koda꞉ma꞉ wele peaaso haena꞉ mo aposolo haliwekima꞉ na hando haemeke ekimanu wotu pimiki handaa wanda꞉hali paeyaoma꞉ paala꞉ma꞉ homemekeme. 44 Mo hande pi mimiki wanda꞉hali paeyaoma꞉ wotu ta꞉ma꞉ni pea hata꞉ ika꞉ wia haemeke alemanu paeyao telipea pimikime. 45 Ika꞉ kenkemanu o damanu make ika꞉ ala꞉ta꞉ ala꞉ta꞉ make ma꞉nda꞉ma꞉ hambena꞉ laata꞉ mani meata꞉ mo iki ame̱le̱ mani dia꞉yeke wanda꞉halimanu pa꞉ta꞉ telipaemekeme. 46 Nate paeyao mo tembolo da tukiki pa꞉ta꞉ homeke alena꞉ momba꞉la꞉tiki peaata꞉ ika꞉ da pa꞉ta꞉manu make mandake pa꞉ta꞉ pita꞉ ne na꞉tiki pimikime. Homu pea hata꞉ 47 Koda꞉na꞉ pi laaso hata꞉ kutu pimikime. Kutupa wanda꞉hali paeyaoma꞉ make iki pa꞉ta꞉ ta꞉na꞉ma꞉ homa꞉tiki pimikime. Koto ekina꞉ nate paeyao Tekehalima꞉ mo da꞉taena꞉yeke pi mimiki wanda꞉hali iki ame̱le̱ haena꞉yeke mea ta꞉ma꞉ni peao haena꞉ la꞉tiki piekeme.

Copyright information for `SSX