Acts 22

Kame apa꞉titio. Iki pa꞉ta꞉ I̱ma꞉ ame do alo pi opua꞉pe leekeme. Kutupa iki pa꞉ta꞉ ipikana꞉ma꞉ Hibulu pi laa leekeeki opuaka꞉na꞉ pi pi na leke pa haemekeme. Kutupa ipikana꞉ma꞉ iki pa꞉ta꞉ alota꞉

I̱ta꞉ Diu hali mo hande Silisia nane hala꞉ da Tasa꞉si da pa꞉ta꞉ I̱ mendiekepate do daoni tukiki pa꞉ta꞉ daeya polome. Kutupa Kamalielena꞉ sukulu da pita nika꞉ apa꞉ amedana꞉ Lo haumanu sukulu wotu peaka꞉na꞉ ikana꞉ma꞉ Koda꞉ pa꞉ta꞉ ame hone wotu witeleme tupa꞉ I̱ma꞉ make hone u halome. Kutupa do hande Hau pita꞉la꞉ ekita꞉ amba꞉ta꞉ I̱ma꞉ a꞉nda꞉ wotu litolo hata꞉ wanda꞉hali da꞉ka꞉pa꞉ minata꞉ dipula da pa꞉ta꞉ mea lopao haowa꞉me leekeme. Mo yeni peao haleme you haliwekina꞉ you halima꞉ make mo ka̱le̱sete haliwekima꞉ make handememe leekeme. Mo haliweki pa꞉ta꞉ ika꞉ Damasikasi hameke titina꞉ pasemanu meaka꞉na꞉ oli da nane Ketiso wanda꞉hali muluekema꞉ poa꞉me leekeme. Mo wanda꞉hali mea tonkao Diutuseleme da nane hatuku a꞉pa panisi peaaluekema꞉ pua꞉me leekeme.

Poloma꞉ ipika꞉ hone la꞉ka꞉la꞉ miniekeeki

Pota꞉na꞉ puaka꞉na꞉ mo Damasikasi da nane opolo poluekema꞉ pulu hano nate you tikekena꞉ haena꞉ oli ya nanema꞉ epea꞉ pa̱a̱ tiekema꞉ I̱ hapisa꞉ pea to hopa꞉liaeya꞉me leekeme. I̱ta꞉ kenkena꞉ honda꞉pa lopa wiono pi ho̱la̱꞉makema꞉ I̱ pa꞉ta꞉ dupa la꞉niaeya꞉me. Solo. Solo. Ekipeke I̱ pa꞉ta꞉ a꞉nda꞉ litelepe laa la꞉niaeya꞉me. Kutupa I̱ma꞉ alota꞉ Tekehalio. Neketa꞉ epika꞉ta꞉pe laa la꞉liaowa꞉pate ipikana꞉ma꞉ alota꞉ I̱ta꞉ Na꞉sa꞉tete hali Yesue. Nakana꞉ma꞉ I̱ pa꞉ta꞉ a꞉nda꞉ liteleke pua꞉me laa la꞉niaeya꞉me. Kutupa I̱ ame̱le̱ haeme haliwekima꞉ hande pa̱a̱ pia꞉eki handemepate oli ya nane pi la꞉niaeya꞉ halina꞉ pi ho̱la̱꞉maketa꞉ na opimime leekeme. 10 Kutupa I̱ma꞉ alota꞉ Tekehalio. Eki peonope loa꞉me. Kutupa ipikana꞉ma꞉ I̱ pa꞉ta꞉ alota꞉ Tiao. Mo Damasikasi da pa꞉ta꞉ pua pitika꞉na꞉ ma꞉nda꞉ma꞉ a꞉pa naka꞉ pulu peleeki la kilieke laa la꞉niaeya꞉me. 11 Mo hande pa̱a̱ wotu pieke handa I̱ma꞉ta꞉ handa꞉peke na yeke hano mo I̱ ame̱le̱ haeme haliwekima꞉ yaka kiki mina mo Damasikasi da pa꞉ta꞉ I̱ hatuku pememe. 12 Kutupa hali ma꞉nda꞉ A꞉na꞉naisita꞉ hande Lo Pimanu wotu opu hayeke hali make koto pa꞉ta꞉ haemeke Diu haliweki paeyaoma꞉ ipika꞉ pi lao hatiki pimiki hali I̱ pa꞉ta꞉ epoa꞉me. 13 Kutupa teke pa꞉ta꞉ hata꞉ I̱ pa꞉ta꞉ alota꞉ Ya kame Soloo. Ameta꞉ naka꞉ leke ki laa handa꞉peke laa lea꞉me. Kutupa koto kone yaka leke ki leeke handa ipiki handoa꞉me. 14 Kutupa ipikana꞉ma꞉ alota꞉ Nika꞉ apa꞉meina꞉ Koda꞉ma꞉ta꞉ neketa꞉ ipika꞉ hone pa꞉la꞉eki handoelena꞉ make ipika꞉ Tikitikina꞉ hala꞉ hali handolo hata꞉ ipika꞉ kakema꞉ la꞉niaeya꞉ pi ho̱la̱꞉make opuelena꞉yeke neke ma̱leke lila꞉me. 15 Koto ekina꞉ nakana꞉ma꞉ mo naka꞉ handeeki make opieki make wanda꞉hali paeyao pa꞉ta꞉ la hala꞉tiki pilipikie. 16 Kutupa ameta꞉ ekipeke hando halepe. Tiao pua bapitaisi hau pea ipika꞉ bikina꞉ wi alo hata꞉ naka꞉ hoke hau pi ekimanu tanda꞉pena꞉ lapeke lea꞉me leekeme.

Poloma꞉ Diendaili wanda꞉hali pa꞉ta꞉ pi laena꞉ wi leekeeki

17 Kutupa I̱ma꞉ Diutuseleme da nane paa a꞉pa hata꞉ mo tembolo da tukiki pa꞉ta꞉ yeni pitolo hata꞉ upama꞉ leke 18 Tekehali handoa꞉me. Ipikana꞉ma꞉ I̱ pa꞉ta꞉ alota꞉ Ya la halawaasa꞉eki do wanda꞉halima꞉ na opilimikie. Koto ekina꞉ a̱i̱ tiao do Diutuseleme da mina꞉pa꞉lao pua꞉peke laa lea꞉me. 19 Kutupa I̱ma꞉ hombo peaaso alota꞉ Tekehalio. Mo pi hotu haleme damanu paeyao pa꞉ta꞉ I̱ma꞉ta꞉ naka꞉ pi mimi wanda꞉hali mea yombua꞉tiki pea dipula mea lopatiki pua꞉eki mo haliwekima꞉ handememe. 20 Kutupa naka꞉ la halawaeya꞉ hali Sidipenina꞉ we lopaeme pita꞉ I̱ make koto pa꞉ta꞉ hata꞉ I̱ma꞉ make a꞉pa꞉la꞉me lipe laa ipiki limi haliwekina꞉ daumanu miniki haowa꞉me loa꞉me. 21 Koto loa꞉pate ipikana꞉ma꞉ I̱ pa꞉ta꞉ alota꞉ Pue. I̱ma꞉ta꞉ papate kone pa mo Diendaili wanda꞉hali pa꞉ta꞉ neke tapaalueke lea꞉me leekeme.

22 Hande wanda꞉halima꞉ Polona꞉ pi amba꞉ opimikipate mo koto leekeeki opuaata꞉ taka꞉lake pi la alu alu pea alota꞉ Do hali lumana꞉e. Apa꞉e. Ipikita꞉ ota꞉ homaena꞉ lapeke aleo leekeme. 23 Kutupa pi taka꞉lake pi la alu alu pitolo haena꞉ ika꞉ daumanu wankea wankea pitolo haena꞉ dokolo apolo lopaliaaso haena꞉ 24 mo a꞉nda꞉ tumiki halima꞉ Polota꞉ mo baliki da pa꞉ta꞉ hatuku mea epena꞉ laaka꞉na꞉ mo haliwekima꞉ ipiki pa꞉ta꞉ koto taka꞉lake pi la alu alu pimiki ekina꞉ teke weiluekema꞉ Polo yombina꞉ leekeme. 25 Kutu piekepate puma꞉ Polo tonkaemeke pita꞉ Poloma꞉ ipiki teke pa꞉ta꞉ hayeke ami opisa hali ma꞉nda꞉ pa꞉ta꞉ alota꞉ Loma꞉ da pamodi mea wia hala꞉ halita꞉ pi yokaalu na piki yumbolo hauta꞉ ana꞉ pa꞉la꞉pe laa leekeme.

26 Koto pi opuaata꞉ mo opisa halima꞉ hande a꞉nda꞉ tumiki hali pa꞉ta꞉ pua alota꞉ Eki puluekema꞉ pitelee laa do halita꞉ Loma꞉ pamodi wia hala꞉ halie leekeme. 27 Koto ekina꞉ mo a꞉nda꞉ tumiki halima꞉ Polo pa꞉ta꞉ a꞉pa alota꞉ I̱ pa꞉ta꞉ la kie. Neketa꞉ Loma꞉ pamodi wia hala꞉ma꞉ lea꞉ halipe leekeme. Kutupa Poloma꞉ alota꞉ Aowe leekeme. 28 Mo a꞉nda꞉ tumiki halima꞉ alota꞉ Yaka pamodi wia halo ekita꞉ mani tiekema꞉ hamboa꞉me laa leekepate Poloma꞉ hombo peaaso alota꞉ Kutu pa꞉la꞉pate I̱ mendia꞉ alena꞉ kone pamodi mea pua꞉me leekeme.

29 Hande Polona꞉ pu hayeke ekina꞉ teke weilu pimiki haliwekima꞉ koto leekeeki opuaata꞉ kuta kone yola꞉ pamba tikitiki pua꞉tiki pua haemekeme. Kutupa mo a꞉nda꞉ tumiki hali make Polota꞉ hande Loma꞉ pamodi wia hala꞉ hali mea tonkao pua꞉ka꞉ta꞉me laa paala꞉ma꞉ homeekeme.

Polota꞉ ka̱le̱sete haliwekina꞉ leke popelekena꞉ hayekeeki

30 Kutupa da kelepeeketa꞉ mo Diu haliwekima꞉ Polo ba꞉sa꞉ pimiki ekina꞉ ota꞉ teke lota꞉ pu handuluekema꞉ mo a꞉nda꞉ tumiki halima꞉ Polona꞉ tonkaemekeeki ka꞉la꞉paka꞉na꞉ta꞉ mo Diuna꞉ yeni peao haemeke you haliweki make ika꞉ ka̱le̱sete haliweki paeyao make mombelena꞉ laata꞉ Polota꞉ mo haliweki pa꞉ta꞉ hatuku mea a꞉pa haena꞉ leekeme.

Copyright information for `SSX