Colossians 2

Ikina꞉ make mo Laodisia wanda꞉halina꞉ make mo I̱ hone na wilimi mandane wanda꞉halina꞉ make iki paeyaona꞉ I̱ma꞉ honkopu tieke hao e pokaaloeki iki la kionoe. I̱ma꞉ doeki pitolo ekita꞉ mo wanda꞉halima꞉ pukima꞉ homa꞉ alualu pitolo hata꞉ puki hana꞉ noka꞉pa꞉la꞉ ekima꞉ tumbina꞉ lena꞉ loluekema꞉ pitolome. Do pitolo ekita꞉ ikana꞉ma꞉ ota꞉ tikitiki piki hone wita꞉la꞉eki pa꞉ta꞉ yama꞉ a꞉pa꞉la꞉ hone tulaaseme honkopu muemena꞉ loa꞉me. Do hau pimika꞉na꞉ta꞉ Koda꞉na꞉ a꞉mbao ula꞉eki handilimikie. Do ekita꞉ Ketiso ipiki konee. Ipikita꞉ mo Koda꞉ pa꞉ta꞉ a꞉mbao ula꞉ hone lenkena꞉ pea wita꞉la꞉ ekimanu pita꞉ hone wopu wita꞉la꞉ ekimanu paeyao hamekena꞉ ke lao wala꞉la꞉ halie.

Koto ekina꞉ I̱ma꞉ iki la kitolo ekita꞉ ma꞉nda꞉ma꞉ yayapiki puki napeke pi manuma꞉ iki na makeaena꞉ lapa꞉peke. Koto pi manuta꞉ ota꞉ epeke nonopiki pina꞉ kone loa꞉me. I̱ta꞉ manda loketa꞉ iki ame̱le̱ na halopate kone pa sipitidi nanema꞉ta꞉ iki ame̱le̱ halome. Kutupa ika꞉ Ketiso pa꞉ta꞉ hone tulao da̱o̱la hata꞉ epeke tupa꞉ kake na̱o̱ pitelemeeki handolo hata꞉ I̱ta꞉ ta꞉na꞉ma꞉ homolome.

Ketiso pa꞉ta꞉ hala꞉eki

Yesu Ketisota꞉ ika꞉ Tekehalie laa handa꞉ meleme ekina꞉ta꞉ ipiki yaapo ta꞉ma꞉ni pea hapa꞉peke. Ika꞉ piki manuta꞉ ota꞉ onina꞉ toluma꞉ ipiki pa꞉ta꞉ pena꞉ lapa꞉peke. Ika꞉ haleme ekita꞉ ipiki manda a꞉eya꞉pa꞉peke. Kutupa mo iki walea꞉ tupa꞉ ika꞉ hone tulaaleme ekita꞉ ota꞉ honkopu wopu hapa꞉peke. Kutupa keiyae ala꞉ ekima꞉ iki pa꞉ta꞉ tumbina꞉ lapa꞉peke.

Wopu handa꞉pa꞉peke. Ma꞉nda꞉ma꞉ do kenke halina꞉ napeke na wiki makeaasa꞉ hone lenkena꞉ pea wita꞉la꞉ hau manuma꞉ iki na handeteke haena꞉ lapa꞉peke. Do hau manuta꞉ Ketiso pa꞉ta꞉ yama꞉ na a꞉pa꞉la꞉pate pa mo apa꞉meina꞉ loma꞉loma꞉ pa꞉la꞉ pimanu make do kenkena꞉ teke na wiki mana꞉ pimanu pa꞉ta꞉ yama꞉ a꞉pa꞉la꞉me.

Pa ekipeke Ketiso pa꞉ta꞉ta꞉ Koda꞉ ipika꞉ hala꞉eki paeya tapao kenke loke tupa꞉ hala꞉me. 10 Kutupa ipiki pa꞉ta꞉ ta꞉ma꞉ni peleme ekima꞉ta꞉ ikita꞉ da꞉ta꞉la꞉eki tumbao melememe. Ketisota꞉ kenke ya paeyao pa꞉ta꞉ ula꞉ welemanu paeyao make handeteke hala꞉ ekimanu paeyaona꞉ you hali hala꞉me. 11 Ketiso yaapo tunaaleme ekima꞉ta꞉ ikita꞉ sekemesaisi hau pelememe. Kenke halima꞉ peaasa꞉ sekemesaisi hauna꞉ dia꞉ya꞉la꞉pate pa Ketisoma꞉ peala꞉ sekemesaisi haue. Koto hauta꞉ mo niki tukiki pa꞉ta꞉ ula꞉ hoke hau teke yoko baasa꞉ haue. 12 Ikita꞉ bapitaisi hau pimi natena꞉ta꞉ Ketiso ame̱le̱ mandakena꞉ lapa꞉ pelememe. Kutupa make bapitaisi hau pimikita꞉ ika꞉ Koda꞉na꞉ wele wopu piki honkopu pa꞉ta꞉ hone tulaleme ekima꞉ta꞉ ikita꞉ Ketiso yaapo paa tialememe. Mo Koda꞉na꞉ wele wopu piki honkopuma꞉ Ketiso mea tiala꞉ ekima꞉ loa꞉me.

13 Ikita꞉ amba꞉ a꞉nda꞉ta꞉ mo Lo pi dia꞉ya꞉la꞉ Diendaili wanda꞉hali hata꞉ ika꞉ pimi hoke hauma꞉ ika꞉ temokota꞉ homeeke wanda꞉hali haememe. Pate ameta꞉ Koda꞉ma꞉ ikita꞉ Ketiso yaapo paa mea da꞉taala꞉me. Koda꞉ma꞉ta꞉ nika꞉ hokeeki paeyao paeyawala꞉me. 14 Ipikana꞉ma꞉ta꞉ mo niki li lu tumbaena꞉yeke wape pea ula꞉ lo pimanu ika꞉ tombo ula꞉ pimanu tonka꞉na꞉ ota꞉ paeyaala꞉me. Do hauta꞉ ipikana꞉ma꞉ mo a꞉ka꞉tei wape piki tina꞉ tamendiao lu paeyaala꞉me. 15 Kutupa kenke ya paeyao pa꞉ta꞉ ula꞉ welemanu make handeteke hala꞉ ekimanu make Ketisoma꞉ta꞉ ipika꞉ kone mo a꞉ka꞉tei wapepiki tina꞉ta꞉ ika꞉ honkopumanu ipila꞉mepi pa꞉la꞉me. Kutupa make ipikana꞉ma꞉ ikita꞉ bepolao wanda꞉halina꞉ leke popelekena꞉ yaala꞉ma꞉ homena꞉ dipula haliweki tupa꞉ endu yola a꞉pa꞉la꞉me.

16 Koto ekina꞉ta꞉ ika꞉ naleme ne ikalina꞉ make mo biki wiki nate tieke manuna꞉ make mo panake kaisepona꞉ ne pambeleme nate manuna꞉ make o Sa꞉bede nate manuna꞉ make ma꞉nda꞉ma꞉ tombo na wina꞉ lapa꞉peke. 17 Do haumanu paeyaota꞉ mo wetepena꞉ ekina꞉ su̱a̱ su̱a̱ tupa꞉ konee. Ota꞉ ekita꞉ Ketisoe. 18 Ma꞉nda꞉ma꞉ ipiki ta꞉ta꞉ piki upamanu pa꞉la꞉ ekima꞉ ipikita꞉ ota꞉ handa ulu somee ala꞉ ekima꞉ iki bepolaena꞉ waleke na hala꞉pa꞉peke. Mo makeaaso homupiki hau pitolo hata꞉ enisolomanu pa꞉ta꞉ yeni pu hapa꞉peke lo hala꞉ somena꞉ loa꞉me. Dupiki someta꞉ teke na wiki ekina꞉ ipika꞉ kenke hauna꞉ hone ula꞉ ekima꞉ pa hameke pombei yaala꞉me. 19 Ipikita꞉ mo lokena꞉ you hali Ketisota꞉ pa na miniki hala꞉me. Pa ekipeke Ketisona꞉ handeteke hala꞉eki oto pa꞉ta꞉ta꞉ mo loke ipika꞉ ne ana꞉na꞉ minolo hata꞉ ipika꞉ kilikadu pita꞉ honkopu manuta꞉ tuna tuna pa꞉leke loa꞉me. Kutupa Koda꞉ma꞉ hone pa꞉la꞉ tupa꞉ daeyo hala꞉me.

Ketiso yaapo homaa paa tiao hala꞉eki

20 Ikita꞉ Ketiso yaapo homaata꞉ do kenkena꞉ teke na wiki mana꞉ pimanu pa꞉ta꞉ ka꞉la꞉pa꞉ tapao halememe. Koto ekina꞉ta꞉ pa ekipeke ikita꞉ do kenkena꞉ tapake hake nono pitelemepe. 21 Ma꞉nda꞉ma꞉ pi witolo hata꞉ alota꞉ Do ale na miniki hapema. Mo koto ale na naa handa꞉pema. Mo ale ma꞉nda꞉ na wataapema laa pi ula꞉eki manuta꞉ ekipeke opua telielemepe. 22 Do tombo ula꞉ pi manuta꞉ mo alemanu ika꞉ pea꞉peke ya꞉la꞉ hau paeyaala꞉ dina꞉ta꞉ pa alema꞉ hando hala꞉ tupa꞉ ula꞉ pi manue. Ikita꞉ pa kenke halima꞉ wa꞉pa꞉la꞉ pi ula꞉ ekimanu make wala꞉la꞉eki manue. 23 Dupiki pi ula꞉eki manuta꞉ mo hone u lenkena꞉ pea wita꞉la꞉ ti lake nono pitolo hata꞉ nikana꞉ma꞉ nika꞉ hone pa꞉la꞉ tupa꞉ yeni peomono make yayapiki homu peomono make nika꞉ loke ota꞉ hoke tanda halamono make sutiao halememe. Pate dupiki tombo ula꞉ pi manuma꞉ta꞉ kenke lokena꞉ na꞉na꞉ pa꞉la꞉ ekimanu lu tumbaapeketa꞉ ana꞉ na pa꞉la꞉me.

Copyright information for `SSX