Colossians 3

Ikita꞉ Ketiso yaapo paa mea tiaala꞉ ekina꞉ta꞉ oli hepeni ula꞉ ale manuna꞉ ika꞉ hone wopu ti la꞉ pelia haena꞉ lapa꞉peke. Ketiso ipika꞉ handeteke hala꞉ seana꞉ Koda꞉na꞉ popeke nane kikina꞉ pila꞉ alena꞉ loa꞉me. Ika꞉ hone manuta꞉ koto pate ula꞉ ale manuna꞉ hone tulaa paleke hata꞉ do kenkena꞉ ula꞉ ale manuna꞉ hone na tulaapa꞉peke. Ikita꞉ homelememe. Kutupa ika꞉ da꞉ta꞉la꞉ ekita꞉ Ketiso yaapo Koda꞉ pa꞉ta꞉ a꞉mbao ula꞉me. Ika꞉ ota꞉ da꞉ta꞉la꞉ ekita꞉ Ketiso yaalo ipiki opolo epea꞉ka꞉na꞉ta꞉ kota꞉ iki make ipiki ame̱le̱ mandakena꞉ opolo a꞉pa ipika꞉ pa̱a̱ pa꞉la꞉eki telipilimikie.

Amba꞉ hau pita꞉ panake hau yaapo

Koto ekina꞉ta꞉ do kenkena꞉ ekina꞉ hone pa꞉la꞉eki manuta꞉ yola꞉la꞉ hau make ha̱i̱piki hau pita꞉la꞉eki make we pamba꞉la꞉eki make hoke hauna꞉ hone tulaa pelia hala꞉eki make pasa꞉tei pita꞉la꞉ hauta꞉ mo toopi ti wepia ula꞉ ale pa꞉ta꞉ honke honke ala꞉ pasa꞉tei pita꞉la꞉ hauma꞉ handekeeki make doeki paeyaota꞉ ota꞉ homena꞉ lapa꞉peke. Pa ekipeke do haumanu piteleme ekina꞉ yeke Koda꞉na꞉ mineke panka꞉la꞉ ekita꞉ ipika꞉ pi na opua pita꞉la꞉ wanda꞉hali pa꞉ta꞉ ipilieke. Amba꞉ a꞉nda꞉ta꞉ ika꞉ haeme ekita꞉ doeki manuma꞉ handeteke haya꞉eki yaalo dupikieki manuna꞉ hone pa꞉la꞉ ekina꞉ hao polu haememe.

Kutu pu haemepate ameta꞉ dupiki haumanu paeyao mea baapa꞉peke. Mineke panka꞉la꞉eki make titipu a꞉meinolo mineke panka꞉la꞉eki make honema꞉ yawa꞉la꞉eki make loa꞉me. Kutupa yala꞉ peake pimanu make kake na miniki pimanu make ika꞉ kake pa꞉ta꞉ ota꞉ na lapa꞉peke. Ma꞉nda꞉ pa꞉ta꞉ yayapiki pi na lapa꞉peke. Pa ekipeke ika꞉ amba꞉ hau pita꞉ ipika꞉ hande lu wiayeke pu haeme ekita꞉ amba꞉ holo baaso hata꞉ 10 mo panake hau mea yamelememe. Kutupa panake hau wa꞉pa꞉la꞉ hali Koda꞉ma꞉ta꞉ do panake ekita꞉ ipikima꞉ handeke nono pina꞉yeke hoto paeyao panakeeki au laatiki pita꞉la꞉me. Dupita꞉la꞉ ekita꞉ ikana꞉ma꞉ ipiki hone wopu uemena꞉yeke pita꞉la꞉me.

11 Kotoeki tekena꞉ta꞉ mo Diendaili pita꞉ Diu yaapota꞉ ameta꞉ tukikina꞉ tekili pea꞉peke na ya꞉la꞉me. Sekemesaisi na pa꞉la꞉ wanda꞉hali make sekemesaisi pa꞉la꞉ wanda꞉hali make mo Kitiki pi na opimiki wanda꞉hali make mo yeti sayalema꞉ handeke wanda꞉hali make ka꞉la꞉pa꞉ tapao haleme wanda꞉hali make pa hameke e pokaaseme wanda꞉hali make iki paeyao pa na tekili pea꞉peke ya꞉la꞉me. Pate Ketisota꞉ do hauna꞉ teke make ipikita꞉ paeyao pa꞉ta꞉ hala꞉me.

12 Ikita꞉ Koda꞉na꞉ wanda꞉halie. Iki pa꞉ta꞉ pukima꞉ homolo hata꞉ ipika꞉eki hamina꞉ ma̱leke lila꞉me. Koto ekina꞉ta꞉ ikana꞉ma꞉ta꞉ dupiki hau manuta꞉ dau leke yama꞉pa꞉peke. Pukima꞉ a꞉ta꞉ma꞉ homa꞉la꞉eki make yankeke pa꞉ta꞉ a꞉ta꞉ma꞉ homolo tamba꞉ mina꞉la꞉eki make kimelema꞉ homa꞉la꞉eki make homu pea hala꞉eki make homu pea yu wia hala꞉eki paeyaoma꞉ loa꞉me. 13 Ma꞉nda꞉ ma꞉nda꞉ pa꞉ta꞉ homu pu alualu peaata꞉ iki tukiki pa꞉ta꞉ pi yokaalu pita꞉la꞉eki wia꞉ka꞉na꞉ta꞉ pa paeya alualu pia꞉pa꞉peke. Koda꞉ma꞉ ika꞉ hoke hau pa paeyawala꞉ tupa꞉ ikana꞉ma꞉ make ika꞉ ika꞉ kone pa paeya alualu pia꞉pa꞉peke. 14 Kutupa ota꞉ do epeke haumanu paeyao pa꞉ta꞉ta꞉ pukima꞉ homa꞉la꞉eki apa꞉taapa꞉peke. Do pukima꞉ homa꞉la꞉ hauma꞉ta꞉ mo hau pita꞉la꞉eki paeyao ota꞉ epeke tupa꞉ siki apa꞉taasa꞉me.

15 Kutupa Ketisoma꞉ kita꞉la꞉ puki lopa꞉niaasa꞉ ekima꞉ta꞉ ika꞉ wepilimi pimanu handeteke haena꞉ pita꞉la꞉me. Do puki lopa꞉niaasa꞉eki muemena꞉ yeke Koda꞉ma꞉ iki homeke loke apa꞉taemena꞉ wi la꞉la꞉me. Kutupa keiyae lo hapa꞉peke. 16 Ketisona꞉ pi ipika꞉ ota꞉ epeke ta꞉ta꞉ ma꞉nda꞉ piki pi paeyaota꞉ ika꞉ puki pa꞉ta꞉ wina꞉ lapa꞉peke. Ika꞉ ika꞉ kone hone lenkene pea wita꞉la꞉eki paeyaoma꞉ walolo make tikitiki yatiki pu alualu pu hapa꞉peke. Mo Baibolona꞉ emelimanu make Tekehali yeiya꞉ laasa꞉ emelimanu make Sipitidima꞉ wala꞉la꞉ emelimanu make paeyaota꞉ ika꞉ puki nane Koda꞉ pa꞉ta꞉ keiyae alo lo hapa꞉peke. 17 Ika꞉ piteleme haumanu make aleme pimanu make paeyaota꞉ mo Tekehali Yesuna꞉ bikina꞉ pitolo hata꞉ ipiki pa꞉ta꞉ yama꞉ Apa꞉ Koda꞉ pa꞉ta꞉ keiyae pi lo hapa꞉peke.

Ketiso pa꞉ta꞉ hapeke mana꞉ pimanu

18 Wanda꞉wekio. Hande Ketiso wanda꞉weki hata꞉ pea꞉peke ekita꞉ ika꞉ haliki tonu pa꞉ta꞉ homu pea hapa꞉peke. 19 Haliwekio. Ika꞉ wanda꞉weki pukima꞉ homolo hata꞉ tetopiki pi na lapa꞉peke. 20 Weki wandikio. Ika꞉ Ketiso hau pia꞉peke ekita꞉ ika꞉ apa꞉ ama꞉ yaapona꞉ pi na tunkuliki opua꞉tiki pea꞉pa꞉peke. Kutu pimika꞉na꞉ta꞉ Koda꞉ ta꞉na꞉ma꞉ homo tialimikie. 21 Ateke inkikima꞉ make ika꞉ weki wandiki puki teto na peapa꞉peke. Pa ekipeke mo weki wandiki ka꞉nda꞉ma꞉ homaapa꞉na꞉ loa꞉me.

22 Pa hameke e pokaaseme haliwekio. Ika꞉ piteleme hau paeyao pa꞉ta꞉ta꞉ ika꞉ do kenkena꞉ handeteke haleme haliwekina꞉ pi opua pia꞉pa꞉peke. Mo haliwekina꞉ leke popelekena꞉ hata꞉ iki ta꞉na꞉ma꞉ homaaluekema꞉ homeke na pikita꞉ ota꞉ hau pitolo hata꞉ pia꞉pa꞉peke. Pa ekipeke mo ika꞉ Tekehali pa꞉ta꞉ paala꞉ma꞉ homeleme ekina꞉ loa꞉me. 23 Ika꞉ piteleme haumanu paeyaota꞉ hone wopu witolo hata꞉ pea꞉pa꞉peke. Kenke halina꞉ e na pokaasemepate Koda꞉na꞉ e pokake nono pitelememe hone wia꞉pa꞉peke. 24 Hone wipe. Tekehalima꞉ta꞉ ipika꞉ wanda꞉halina꞉ wiala꞉ yenki iki pa꞉ta꞉ kilieke. Pa ekipeke Ketisota꞉ ika꞉ hande yeni pu haleme ota꞉ handeteke hala꞉ halie. 25 Kutupa hoke hau pu haleme wanda꞉halita꞉ ika꞉ piteleme hoke ekina꞉ yenki halieke. Pa ekipeke Koda꞉ma꞉ta꞉ wanda꞉hali paeyao homeke tupa꞉ kone pi yokaalu pu hala꞉me.

Copyright information for `SSX