Galatians 5

Ka꞉la꞉pa꞉ tapao hala꞉ hauna꞉ pi

Ota꞉ ka꞉la꞉pa꞉ tapao hamono Ketisoma꞉ niki ka꞉la꞉pa꞉ tapaala꞉me. Koto pa꞉la꞉ ekina꞉ta꞉ ka꞉la꞉pa꞉ tapaala꞉ wanda꞉hali tupa꞉ taka꞉lao hata꞉ mo pa hameke e pokaaseme wanda꞉hali tupa꞉ paa na hapa꞉peke.

Opua꞉pa꞉ I̱ta꞉ Poloma꞉ iki pa꞉ta꞉ do pi alome. Ikita꞉ ma꞉nda꞉ma꞉ sekemesaisi hau pina꞉ lemeka꞉na꞉ta꞉ kota꞉ ikana꞉ma꞉ Ketisota꞉ ota꞉ pa ale leke haena꞉ lelimikie. Hoto yaapo peao paa kinki pitolo I̱ma꞉ alota꞉ Hali ma꞉nda꞉ epima꞉ ma꞉nda꞉ma꞉ ipiki sekemesaisi hau pina꞉ lea꞉ka꞉na꞉ta꞉ kota꞉ koto halita꞉ mo hande Lo Pi ula꞉eki paeyaona꞉ oto pa꞉ta꞉ homeke hao halieke. Mo iki ame̱le̱ haleme mandane hali wekima꞉ta꞉ mo Lo Pi ula꞉eki paeyao pitolo ekima꞉ta꞉ Koda꞉ yaapo epea haluekema꞉ taapo haemeka꞉na꞉ta꞉ kutu piteme haliwekita꞉ ika꞉ Ketiso ame̱le̱ halo peleme ekita꞉ ika꞉ kone ti paleke leke la꞉ka꞉la꞉ mea baasememe. Kutu pimi ekima꞉ta꞉ ika꞉ kone Koda꞉na꞉ a꞉ta꞉ma꞉ homa tamba꞉ mina꞉la꞉eki tikene halememe. Nikana꞉ma꞉ta꞉ Koda꞉ma꞉ niki tikitiki yaena꞉ yeke ipiki pa꞉ta꞉ ti lao haloma꞉me. Do hauta꞉ Koda꞉ ipika꞉ Holi Sipitidina꞉ welema꞉ nika꞉ hone tulaasoma꞉eki pa꞉ta꞉ yama꞉ peaalieke hone wia hone bao haloma꞉me. Niki Yesu Ketiso pa꞉ta꞉ tunao haoma꞉ka꞉na꞉ta꞉ sekemesaisi hau pita꞉la꞉eki make sekemesaisi hau na pita꞉la꞉eki make koto hau telipina꞉ta꞉ pa pa alema꞉ handa꞉la꞉me. Pate hone tulaaso hata꞉ pukima꞉ homa꞉ alualu pu haemeka꞉na꞉ta꞉ kota꞉ koto hauta꞉ ota꞉ekie.

Ikita꞉ ota꞉ epeke tupa꞉ a̱i̱ya pu haemepate pa ikana꞉ma꞉ mo Koda꞉na꞉ ota꞉ pimanu opua peaama꞉na꞉ epima꞉ alekema꞉ iki ha̱la̱꞉mbe liaaso pia꞉pe. Ekipa ika꞉ hone la꞉ka꞉laeya꞉pe. Kutu piki hauta꞉ mo hande iki wi la꞉la꞉ Koda꞉ma꞉ na peaya꞉me. Mo hande palaowa pombei yaasa꞉ yisiti sikima꞉ta꞉ mo palaowa paeyao kone pombei yelieke alemepate 10 pa ya honema꞉ handolo ekita꞉ nikita꞉ mo Tekehali pa꞉ta꞉ tunao halomeke handa ikana꞉ma꞉ hone ma꞉nda꞉ na wiki pa I̱ma꞉ witolo hone kone ana꞉na꞉ wilimikie hone ulume. Kutupa mo ika꞉ hone la꞉ka꞉laasa꞉ halita꞉ epipe. Pa ipikita꞉ epi ya꞉ka꞉na꞉ make mo ipika꞉ kutu pita꞉la꞉ ekina꞉ta꞉ Koda꞉ma꞉ ipika꞉ hoke yenki ana꞉na꞉ halieke.

11 Ya kame tonuo. Mandane haliwekima꞉ I̱ pa꞉ta꞉ aleme pita꞉ I̱ma꞉ mo sekemesaisi hau pumana꞉ pipe laa pa wala꞉tia pu haowa꞉ka꞉na꞉ta꞉ kota꞉ pa ekipeke ikana꞉ma꞉ I̱ pa ka꞉nda꞉ peao halemepe. Koto aleme pita꞉ ota꞉ pi ya꞉ka꞉na꞉ yoluta꞉ kota꞉ mo ya Ketisona꞉ a꞉ka꞉tei wape piki tina꞉ pi walaaso ekima꞉ta꞉ iki hoke hone na u tialo pia꞉me. 12 Ya hone pa꞉la꞉ ekita꞉ mo ika꞉ hone la꞉ka꞉la tiaaseme haliweki ikana꞉ma꞉ ika꞉ kone sekemesaisi pimika꞉na꞉ta꞉ pa koto hau homeke na piki pa ika꞉ tukiliki tonka꞉na꞉ mina꞉e.

13 Ya kame tonuo. Ameta꞉ ikina꞉ do tupa꞉ alome. Ikita꞉ ka꞉la꞉pa꞉ tapao haleme haliweki hamena꞉ Koda꞉ma꞉ wi la꞉la꞉me. Koto pa꞉la꞉pate ika꞉ honema꞉ nikita꞉ ka꞉la꞉pa꞉ tapao haloma꞉me hone witolo pa mo hande lokena꞉ hone pa꞉la꞉ amba꞉ hau manuma꞉ neke na handeteke haena꞉ lapa꞉peke. Kotoeki na pikita꞉ pa ika꞉ kametonu ame̱le̱ pukima꞉ homeleme ekima꞉ ika꞉ ika꞉ kone tamba꞉ mu alualu puemena꞉ lena꞉ lapa꞉peke. 14 Mo hande Lo Pi ula꞉eki paeyao apa꞉tao hone wiomonota꞉ kota꞉ pa pa uluma꞉ pi homeke homeke ula꞉me. Dupa. Naka꞉ kone pukima꞉ homele tupa꞉ kota꞉ naka꞉ yankeketonu pa꞉ta꞉ make pukima꞉ homa꞉pa꞉peke laa la ula꞉me. 15 Koto la ula꞉pate ikana꞉ma꞉ ika꞉ ika꞉ kone ape a꞉nda꞉ leke yokaalu alu pu haemeka꞉na꞉ta꞉ ya some hombo koto pimika꞉na꞉ta꞉ kota꞉ ota꞉ wopu handeteke hapa꞉peke. Ika꞉ tapake ame̱le̱ kone epeke tupa꞉ pata꞉ pea na hake ota꞉ tekili tekili pu hoeyaalimikie.

Holi Sipitidina꞉ hau lokena꞉ hau yaapo

16 I̱ma꞉ta꞉ dupiki pi alome. Mo Sipitidima꞉ ika꞉ pu haleme haumanu kilu tombuao handeteke hata꞉ tikitiki yawaena꞉ lapa꞉peke. Kutu pimika꞉na꞉ta꞉ kota꞉ ikana꞉ma꞉ mo ika꞉ lokema꞉ na꞉na꞉ pa꞉la꞉ hau manuta꞉ na telia pilimikie. 17 Pa ekipeke alo mo lokena꞉ hauma꞉ta꞉ mo Holi Sipitidi bepolaluekema꞉ taapo hala꞉me. Kutupa make mo Holi Sipitidima꞉ta꞉ mo lokena꞉ haumanu bepolaluekema꞉ taapo pu hala꞉me. Koto hau yaapoma꞉ta꞉ a꞉nda꞉ lu alu pu halepeme. Koto pitepe ekima꞉ta꞉ ikana꞉ma꞉ mo puluekema꞉ hone pa꞉la꞉ hau pia꞉peke ekita꞉ ota꞉ pea꞉peke na ya꞉la꞉me. 18 Koto pa꞉la꞉pate kota꞉ mo Sipitidima꞉ iki hatuku pu haya꞉ka꞉na꞉ta꞉ kota꞉ mo Lo Pi ula꞉ ekima꞉ta꞉ iki na tombuao hala꞉me.

19 Mo lokena꞉ hone pa꞉la꞉ hauna꞉ hone pa꞉la꞉ hauta꞉ ikana꞉ma꞉ handa hone wilimime. Koto hau manuta꞉ doe. Tooli ka꞉taasa꞉ hau o yola꞉la꞉ hau o suseke suseke haasa꞉ hau 20 o toopi ti wepia ula꞉ ale pa꞉ta꞉ yeni pita꞉la꞉ hau o peteke peteke hau o a꞉nda꞉ tunkula꞉la꞉ hau o mineke panka꞉la꞉ hau o ma꞉nda꞉ tombualuekema꞉ hoke hone wita꞉la꞉eki make o ma꞉nda꞉na꞉ ale pa꞉ta꞉ we pamba꞉la꞉eki make o ti teke yoka꞉la꞉ hau o ape ape lo tapake tekili pita꞉la꞉ hau 21 o ma꞉nda꞉na꞉ epeke hauna꞉ mineke panka꞉la꞉eki make o ikali naa keaasa꞉eki make o kima꞉ na homeke hoke ikali nala꞉ haumanu make kutupiki mandane hau ma꞉nda꞉manu make hone wilimime. Amba꞉ iki kinki pua꞉ tupa꞉ ame make paa kinki pitolome. Do alo haumanu pu haleme wanda꞉hali ikita꞉ Koda꞉na꞉ Kilu Tombuao Hala꞉eki pa꞉ta꞉ pua꞉peke na yelieke.

22 Koto pa꞉la꞉pate mo Holi Sipitidima꞉ta꞉ epeke haumanu dupa peawaasa꞉me. Pukima꞉ homa꞉la꞉ hau make puki tukiki nane ota꞉ ta꞉na꞉ma꞉ homa꞉la꞉ hau make puki lopaasa꞉ hau make homu pea yu wia hala꞉ hau make a꞉ta꞉ma꞉ homolo epeke pita꞉la꞉ ekima꞉ ma꞉nda꞉ tamba꞉ mina꞉la꞉ hau make hone tulao hata꞉ e poka꞉la꞉ hau make 23 kimelema꞉ hala꞉ hau make naka꞉ kone naka꞉ loke hone yaapo lu tombuao hala꞉ hau make ipikana꞉ma꞉ta꞉ koto hau paeyao peawaasa꞉me. Dupiki haumanu sa꞉sa꞉ puluekema꞉ Lo Pi ma꞉nda꞉ ota꞉ na ula꞉me. 24 Mo Yesu Ketisona꞉ wanda꞉halima꞉ta꞉ ika꞉ lokena꞉ hau make koto loke ipika꞉ namonamo hata꞉ na꞉na꞉ na꞉na꞉ pitolo loke tiaasa꞉eki make koto hau paeyaota꞉ Ketiso yaapo apa꞉tao mo a꞉ka꞉tei wape piki tina꞉ lia endialememe.

25 Mo Holi Sipitidima꞉ta꞉ nika꞉ da꞉ta haloma꞉ ekina꞉ teke haleke handaata꞉ kota꞉ mo do haloma꞉eki make Holi Sipitidima꞉ kone tombuao haena꞉ lomana꞉ pea꞉peke alee. 26 Nikana꞉ma꞉ hakoko lita꞉la꞉ hau na pu make ma꞉nda꞉ soka꞉la꞉ homena꞉ loluekema꞉ toya꞉ toya꞉ piki haumanu na pu make I̱ mia꞉peke alee laa honema꞉ honditi pu alualu pila꞉ hau make paeyao na pumana꞉e.

Copyright information for `SSX