Genesis 16

Heika pita꞉ Isima꞉elo yaapo

Eipola꞉ma꞉na꞉ weteke Sa꞉taima꞉ta꞉ weki ma꞉nda꞉ na mendiaeyekeme. Pate ipikana꞉ma꞉ta꞉ pa hameke e pokaasa꞉ Idiepi wandiki biki Heika hatuku hayekeme. Koto ekina꞉ Sa꞉taima꞉ Eipola꞉ma꞉ pa꞉ta꞉ alota꞉ Mo Tekehalima꞉ I̱ weki na mendiono ala꞉ ekina꞉ mo yaka pa hameke e pokaasa꞉ wandiki yaapo pelia꞉peke na ya꞉la꞉pe. Kutu pika꞉na꞉ta꞉ ipikana꞉ma꞉ yaka weki mendiaena꞉ loa꞉me leekeme. Koto leeke Eipola꞉ma꞉ma꞉ta꞉ Sa꞉taima꞉ leeke pina꞉ta꞉ a꞉pa꞉la꞉me leekeme. Koto ekina꞉ Heikata꞉ ipika꞉ yaapo peao wanda꞉ haena꞉ Sa꞉taima꞉ haliki haleekeme. Do hau piki hauta꞉ Eipola꞉ma꞉ta꞉ Keinani kenke pa꞉ta꞉ kiki yaapo bapi haena꞉ piekeme. Kutupa Eipola꞉ma꞉ma꞉ Heika yaapo pelia mo wandikita꞉ weki pitiekeme. Mo wandikima꞉ ipiki weki weleke hayekeeki handolota꞉ hakoko yamo baaso hata꞉ Sa꞉tai lu pambaeyekeme.

Kutu pieke Sa꞉taima꞉ Eipola꞉ma꞉ pa꞉ta꞉ alota꞉ Heikama꞉ I̱ lu pambaasa꞉ ekita꞉ naka꞉ ka꞉ta꞉ta꞉e. I̱ma꞉ kone ipiki neke pa꞉ta꞉ ku hao ipiki weki weleke haya꞉eki hando haota꞉ I̱ lu pambaasa꞉me. Koto ekina꞉ diki ma꞉nda꞉ hondo tikitiki polopa꞉me laata꞉ Koda꞉ ipika꞉ lena꞉e laa leekeme.

Eipola꞉ma꞉ma꞉ hombo peaaso alota꞉ Kota꞉ a꞉pa꞉la꞉ma꞉ mo wandikita꞉ naka꞉ pa hameke e pokaasa꞉ wandiki yalo neke oto pa꞉ta꞉ hala꞉me. Naka꞉ hone pa꞉la꞉eki pie leekeme. Koto ekina꞉ Sa꞉taima꞉ta꞉ Heika hoke tupa꞉ handeteke hayeke handaa pao pindipa peekeme.

Mo Tekehalina꞉ enisoloma꞉ta꞉ Heika oni Sia꞉e nane pula꞉ pota꞉na꞉ hapupapeke alena꞉ tunkulu pa pitieke ikali tea꞉na꞉ manda꞉hande piekeme. Kutupa alota꞉ Sa꞉taina꞉ pa hameke e pokaaso wanda꞉ Heikao. Neketa꞉ hanema꞉ a꞉pa pelepe laata꞉ hane pulipe leekeme. Heikama꞉ hombo peaaso alota꞉ Ya handeteke hala꞉ wanda꞉ kiao pindipa pulume leekeme.

Mo enisoloma꞉ alota꞉ Pao la꞉ka꞉la pua ipika꞉ pa hameke e pokaasa꞉ wanda꞉ hapeke leekeme.

10 Kutupa paa alota꞉ I̱ma꞉ta꞉ naka꞉ monduma꞉ monduma꞉ pilipi wekiwandikina꞉ wekiwandikita꞉ ma꞉nda꞉ma꞉ na yata꞉polo pa꞉la꞉ tupa꞉ wopu kulueke. 11 Neketa꞉ hali weki mendilipikima꞉ ipika꞉ bikita꞉ Isima꞉elo lapeke. Pa ekipeke mo Tekehalima꞉ta꞉ naka꞉ ka꞉nda꞉ma꞉ homolo e̱ leleeki opa꞉la꞉ ekina꞉ loa꞉me. 12 Pate naka꞉ wekita꞉ mo sayale au la꞉la꞉ donkima꞉ handaa ipikita꞉ paeyao pa꞉ta꞉ a꞉nda꞉ tunkulaa hata꞉ paeyaoma꞉ta꞉ ipiki pa꞉ta꞉ a꞉nda꞉ tunkulimikie. Kutupa ipikita꞉ yankeke paeyao ame̱le̱ na hao peliki ta꞉ta꞉ halieke leekeme.

13 Heikama꞉ ipika꞉ kone lota꞉ pitolo alota꞉ I̱ma꞉ta꞉ Koda꞉ ota꞉ handolo hata꞉ doeki la haluekema꞉ pa hao polope laa leekeme. Koto ekina꞉ mo ipiki pa꞉ta꞉ pi la halea꞉ Tekehalita꞉ Hando Hala꞉ Koda꞉e laa ipika꞉ biki kini pea taapa꞉ wiayekeme. 14 Koto ekina꞉ wanda꞉halima꞉ mo Keidese hao mo Betede tukikina꞉ ula꞉ naku ikalita꞉ Mo I̱ Handa꞉la꞉ Pa Hao Hala꞉ Halina꞉ Naku Ikalie lelememe.

15 Heikama꞉ta꞉ Eipola꞉ma꞉na꞉ weki mendiaeyeketa꞉ Isima꞉elo leekeme. 16 Koto dina꞉ta꞉ Eipola꞉ma꞉ta꞉ bapi 86 yekeme.

Copyright information for `SSX