Genesis 18

Eipoloha꞉ma꞉ pa꞉ta꞉ wekina꞉ pi la꞉ wiekeeki

Tekehalita꞉ mo Ma꞉motena꞉ timanu tekena꞉ Eipoloha꞉ma꞉ pa꞉ta꞉ opolo peekeme. Eipoloha꞉ma꞉ta꞉ nate ota꞉ titipu tieke pieke dina꞉ ipika꞉ palai da pota꞉ kake pa꞉ta꞉ pita꞉ handa꞉ liaeyekepate tepo hali haemekeeki handeekeme. Mo handea꞉ dina꞉ kone pototo la pua mo haliweki manda꞉hande piekeme. Kutupa ipika꞉ leke popeleketa꞉ oni yu wataena꞉ alo hata꞉ alota꞉ Haliwekio. Yaka da pa꞉ta꞉ hoto na pitiki pa na lombei pea꞉pa꞉peke. I̱ta꞉ iki tamba꞉ muluekema꞉ halome. Koto ekina꞉ ika꞉ ankemanu tanda꞉pa do ti teke pa꞉ta꞉ hoto pitomena꞉ ikali mealo ponoe.

Kutupa make mo ika꞉ pota꞉ pelimi ale pa꞉ta꞉manu honkopu hamina꞉ ne siki make mea a꞉palueke. Ikana꞉ma꞉ta꞉ yaka da pa꞉ta꞉ epeleme ekita꞉ I̱ ta꞉na꞉ homa꞉tiaasa꞉ hau pelememe. Koto ekina꞉ta꞉ I̱ma꞉ iki tamba꞉ mionoe leekeme. Kutupa ikana꞉ma꞉ hombo peaaso alota꞉ Ota꞉ a꞉pa꞉la꞉me laa keiyae lemekeme.

Koto ekina꞉ Eipoloha꞉ma꞉ta꞉ ipupula mo palai da pa꞉ta꞉ pua Seta pa꞉ta꞉ alota꞉ Naka꞉ ta꞉ta꞉ ma꞉nda꞉ wili palaowa tepo a꞉nda꞉ mea a̱i̱ betedi wepie leekeme. Koto laa ipikita꞉ oni kao banisi pa꞉ta꞉ pua loke panka wiki panake kao ikiki mea ipika꞉ e pokaasa꞉ hali ma꞉nda꞉ pa꞉ta꞉ haleekeme. Kutupa mo halima꞉ta꞉ ipupula pua yankeekeme. Kutupa yankeketa꞉ Eipoloha꞉ma꞉ mo kao andu pankeke manda wita꞉la꞉ epeke imekema꞉ handeke ale make ota꞉ kao andu pankeke make mo hande hoteke make mea pua mo haliweki pitieke alena꞉ pua wiekeme. Koto ti teke pa꞉ta꞉ta꞉ ipikana꞉ma꞉ mo haliweki ne pana꞉ peaota꞉ nena꞉ leekeme.

Kutupa mo haliwekima꞉ lota꞉ pitolo alota꞉ Naka꞉ wanda꞉ Setata꞉ hande pa꞉la꞉pe lemekeme. Eipoloha꞉ma꞉ma꞉ hombo peaaso alota꞉ Oni palai da pa꞉ta꞉ pila꞉me leekeme.

10 Hali homeke ma꞉nda꞉ma꞉ alota꞉ Ame do kini pea kaisepo kiki homekena꞉ mandane ekina꞉ tonkopuna꞉ta꞉ I̱ paa epoa꞉ka꞉na꞉ta꞉ kota꞉ naka꞉ wanda꞉ Setata꞉ weki mendilieke leekeme. Setata꞉ mo halikina꞉ hoki nane mo palai da pota꞉ kake pa꞉ta꞉ hata꞉ opiekeme. 11 Eipoloha꞉ma꞉ pita꞉ Seta yaapota꞉ ota꞉ koke yepekeme. Kutupa Setata꞉ ipika꞉ kaisepo da handeekeeki make paeyekeme.

12  Koto ekina꞉ Setama꞉ta꞉ ipika꞉ onina꞉ toluma꞉ ki talo hata꞉ alota꞉ Ameta꞉ I̱ make yaka haliki make koke yalo hata꞉ honkopu paela꞉me. Ekipa ta꞉na꞉ma꞉ homolo hata꞉ loke paa apa꞉talupa꞉pe leekeme.

13 Koto ekina꞉ mo Tekehalima꞉ Eipoloha꞉ma꞉ pa꞉ta꞉ lota꞉ pitolo alota꞉ Ekipeke Setama꞉ ki talo hata꞉ ipikita꞉ ota꞉ koke yolome ekipa weki mondulua꞉pe ala꞉pe. 14 Koto mo Tekehalima꞉ na pea꞉peke ya꞉la꞉ hau ma꞉nda꞉ ula꞉pe. Amba꞉ mo loa꞉ handa꞉e. Ame do kini pea kaisepo kiki homekena꞉ mandane ekina꞉ tonkopuna꞉ta꞉ I̱ paa epoa꞉ka꞉na꞉ta꞉ Setama꞉ weki mendilieke laa loa꞉me leekeme.

15 Kotoeki leeke Seta ipikita꞉ paala꞉ pieke handa honiolo hata꞉ alota꞉ Ki na toa꞉me leekepate Tekehalima꞉ hombo peaaso alota꞉ Dia꞉me. Nakana꞉ma꞉ ki temee leekeme.

Eipoloha꞉ma꞉ma꞉ Sodomo da hoeyaapa꞉na꞉ honke laeyekeeki

16 Kutupa mo hali wekita꞉ mina꞉pa꞉lao mo Sodomo da handa꞉nialo pimiki alena꞉ pemeke handaa Eipoloha꞉ma꞉ta꞉ mo pota꞉na꞉ a꞉talo lo tapaaluekema꞉ mandakena꞉ pemekeme.

17 Kutupa mo Tekehalima꞉ ipika꞉ onina꞉ toluma꞉ alota꞉ I̱ma꞉ pulu polo ekita꞉ Eipoloha꞉ma꞉ pa꞉ta꞉ na a꞉mbalueke. 18 Ipika꞉ monduma꞉ monduma꞉ pilia꞉ wekiwandikina꞉ wekiwandikita꞉ honkopu wopu hake tutu tieke halieke. Kutupa make ipiki pa꞉ta꞉ yama꞉ta꞉ mo tutu paeyao epealueke. 19 I̱ma꞉ta꞉ ipikana꞉ma꞉ ipika꞉ weki titi make ipika꞉ monduma꞉ monduma꞉ pilia꞉ wekiwandikina꞉ wekiwandiki pa꞉ta꞉ make I̱ pa꞉ta꞉ homu pea tikitiki hau make ota꞉ hau make ota꞉ pia꞉pa꞉peke laa la halena꞉yeke ipiki ma̱leke lulume. Ikana꞉ma꞉ kutu pimika꞉na꞉ta꞉ kota꞉ I̱ma꞉ mo ipiki pa꞉ta꞉ pi la꞉ ua꞉ tupa꞉ hau paeyao peawalueke leekeme.

20 Koto hone wia mo Tekehalima꞉ Eipoloha꞉ma꞉ pa꞉ta꞉ alota꞉ Mo Sodomo Komoto da yaapona꞉ pi laasa꞉eki manuta꞉ ota꞉ hokeeki laaloendi pita꞉la꞉me. Kutupa ipilika꞉ hoke hauta꞉ ota꞉ tiekee. 21 Koto ekina꞉ mo loloendi piteleme laasa꞉eki opolo ekita꞉ ota꞉pe laa handolo holopulueke leekeme.

22 Kutupa mo hali yaapota꞉ Sodomo nane pepekepate mo Tekehalita꞉ Eipoloha꞉ma꞉ yaapo pa hayekeme.

23 Kutupa Eipoloha꞉ma꞉ma꞉ Tekehali handolo hata꞉ alota꞉ Nakana꞉ma꞉ta꞉ mo hoke hau pa꞉la꞉ tapake hoeyaaso hata꞉ta꞉ mo tikitiki piki tapake make ota꞉ mandakena꞉ hoeyalo pele ekina꞉ alepe. 24 Oni daoni pa꞉ta꞉ hoke hau na pu haleme wanda꞉hali 50 haya꞉ka꞉na꞉ta꞉ kota꞉ pa hoeyalipikipe. Nakana꞉ma꞉ta꞉ koto 50 wanda꞉hali homaama꞉na꞉ ya honema꞉ta꞉ na hoeyalena꞉e hone witolome. 25 Ota꞉ mo tikitiki piki tapaketa꞉ mo hoke hau pa꞉la꞉ wanda꞉hali ame̱le̱ na lu homalipikipema. Kotota꞉ ota꞉ pea꞉peke na ya꞉la꞉ haue. Nakana꞉ma꞉ta꞉ kutupiki hau pea꞉peke na ya꞉la꞉me. Nakana꞉ma꞉ mo da hoeyaeka꞉na꞉ta꞉ kota꞉ mo tikitiki piki tapaketa꞉ mo hoke hau pa꞉la꞉ tapake ame̱le̱ ka꞉nda꞉ pealipikie. Koto ekina꞉ kotota꞉ ota꞉ ana꞉ na pa꞉la꞉ haue. Do kenke paeyaona꞉ pi yokaalu pitele halima꞉ta꞉ ota꞉ tikitiki yao kone pea꞉peke ya꞉la꞉me laa leekeme.

26 Koto leeke mo Tekehalima꞉ hombo peaaso alota꞉ I̱ma꞉ mo Sodomo daoni pa꞉ta꞉ tikitiki pea hala꞉ tapake 50 handoa꞉ka꞉na꞉ta꞉ kota꞉ koto wanda꞉halina꞉ hauna꞉ kone mo daoni na hoeyalueke leekeme.

27 Eipoloha꞉ma꞉ma꞉ pi paa alo alota꞉ Tekehalio. Pilisi I̱ma꞉ paala꞉ma꞉ na homeke pi paa alo ekina꞉ hone na wia꞉peke. I̱ta꞉ pa kenke hali yalo pi ma꞉nda꞉ lapeketa꞉ na ya꞉la꞉pate pa 28 mo daoni pa꞉ta꞉ 50 dia꞉ ya꞉lia꞉pate pa 45 tikitiki piki tapake homeke haya꞉ka꞉na꞉ta꞉ kota꞉ 5 ma꞉nda꞉ dia꞉ya꞉la꞉ ekina꞉ mo daoni paeyao hoeyalipikipe leekeme. Mo Tekehalima꞉ paa hombo peaaso alota꞉ I̱ma꞉ mo daoni pa꞉ta꞉ hoke hau na pu hala꞉ wanda꞉hali 45 handa꞉ ua꞉ka꞉na꞉ta꞉ na hoeyalueke leekeme.

29 Eipoloha꞉ma꞉ma꞉ paa ombu alota꞉ Pa 40 tapake homeke haya꞉ka꞉na꞉ta꞉ eki pilipikipe leekeme. Ipikana꞉ma꞉ hombo peaaso alota꞉ Kota꞉ 40 tapake haya꞉ka꞉na꞉ make ota꞉ na hoeyalueke leekeme.

30 Eipoloha꞉ma꞉ma꞉ alota꞉ Pilisi Tekehalio. I̱ma꞉ pi paa lapeke ya꞉la꞉ma꞉ mineke na panka꞉peke. Mo tapake 30 homeke haya꞉ka꞉na꞉ta꞉ eki pilipikipe leekeme. Tekehalima꞉ hombo peaaso alota꞉ 30 tapake handa꞉ ua꞉ka꞉na꞉ maketa꞉ na hoeyalueke leekeme.

31 Eipoloha꞉ma꞉ma꞉ alota꞉ Tekehalio. Pilisi I̱ma꞉ paala꞉ma꞉ na homeke neke pa꞉ta꞉ pi pa la꞉tia pulu ekina꞉ hone na wia꞉peke. Mo pa꞉ta꞉ pa 20 homeke handa꞉ wika꞉na꞉ta꞉ eki pilipipe leekeme. Ipikana꞉ma꞉ alota꞉ 20 handa꞉ ua꞉ka꞉na꞉ make na hoeyalueke leekeme.

32 Eipoloha꞉ma꞉ma꞉ alota꞉ Tekehalio. Pilisi ota꞉ hoto homeke lota꞉ puluekema꞉ mineke na panka꞉peke. Kiki yaapo homeke handa꞉ wika꞉na꞉ta꞉ eki pilipikipe leekeme. Ipikana꞉ma꞉ alota꞉ Kiki yaapo handa꞉ ua꞉ka꞉na꞉ make na hoeyalueke leekeme.

33 Kutupa Eipoloha꞉ma꞉ yaapo pi lo paeyao mo Tekehali pu moneayeketa꞉ Eipoloha꞉ma꞉ta꞉ da la꞉ka꞉la peekeme.

Copyright information for `SSX