Genesis 30

Pate Leisoloma꞉ta꞉ Dieikope weki ma꞉nda꞉ na mendiaaso hata꞉ta꞉ hakepiki pa꞉ta꞉ a꞉nda꞉ tunkulolo hata꞉ Dieikope pa꞉ta꞉ alota꞉ I̱ homuluekema꞉ wekiwandiki kie leekeme.

Koto leeke Dieikopeta꞉ Leisolo yaapo mineke pankolo hata꞉ alota꞉ I̱ma꞉ta꞉ Koda꞉ topo pea꞉peke na ya꞉la꞉pate pa neke weki mendiaapa꞉na꞉ yeke ipikana꞉ma꞉ sa꞉sa꞉ pitolo pia꞉ka꞉ta꞉me leekeme.

Koto ekina꞉ mo wanda꞉ma꞉ alota꞉ Yaka weki mendialo pa꞉la꞉ tupa꞉ yaka pa hameke e pokaasa꞉ wandiki doma꞉ pelia꞉peke. Kutu pilia꞉ ekima꞉ta꞉ ipiki pa꞉ta꞉ yama꞉ ama꞉ au loluekema꞉ loa꞉me leekeme. Koto ekina꞉ ipika꞉ haliki pa꞉ta꞉ Biliha haleeke handa loke apa꞉taepekeme. Kutupa Bilihata꞉ weki loke lomba Dieikopena꞉ hali weki mendiaeyekeme. Leisoloma꞉ alota꞉ Koda꞉ma꞉ telipolo hata꞉ta꞉ I̱ ma̱leke lila꞉me. Ipikana꞉ma꞉ta꞉ yaka pua꞉ yeni opua weki ka꞉la꞉me leekeme. Koto ekina꞉ta꞉ mo wekina꞉ bikita꞉ Da꞉ni leekeme. Kutupa Bilihata꞉ weki loke paa lomba ipikana꞉ma꞉ Dieikopena꞉ yaapo peao weki mondu wiayekeme. Kutu pieke handaa Leisoloma꞉ alota꞉ I̱ma꞉ yaka asi yaapo a꞉nda꞉ tieke pua꞉pate I̱ma꞉ bepolalo ekina꞉ta꞉ kota꞉ mo wekina꞉ bikita꞉ Na꞉petali leekeme.

Kutupa Liama꞉ta꞉ ipiki weki mondulu piekeeki tunkuliekeeki hando haota꞉ ipika꞉ pa hameke e pokaasa꞉ wandiki Silipata꞉ Dieikopema꞉ weteke au laena꞉ haleekeme. 10 Kutupa Silipama꞉ta꞉ Dieikopena꞉ hali weki mendiaeyekeme. 11 Kota꞉ Liama꞉ alota꞉ Epekeeki ma꞉nda꞉ I̱ pa꞉ta꞉ a꞉pa꞉la꞉me laa mo wekina꞉ bikita꞉ Ka꞉de leekeme. 12 Kutupa Silipama꞉ Dieikopena꞉ hali weki ma꞉nda꞉ mendiaeyeke ekina꞉ 13 Liama꞉ alota꞉ I̱ta꞉ ta꞉na꞉ tieke wopu pa꞉la꞉me. Ameta꞉ wanda꞉wekima꞉ I̱ta꞉ ta꞉na꞉ma꞉ homa꞉la꞉ wanda꞉e lelimikie laa ipika꞉ bikita꞉ A꞉sia leekeme.

14 Mo hande widi kina꞉ta꞉ Lubenita꞉ oni e pa꞉ta꞉manu pua mo ma꞉nda꞉teiki leke ti kiliki handa꞉ wia ipika꞉ inkiki Lia pa꞉ta꞉ a꞉pa haleekeme. Kutu pieke Leisoloma꞉ Lia pa꞉ta꞉ alota꞉ Pilisi naka꞉ wekina꞉ ti kiliki I̱ ma꞉nda꞉ kie leekeme.

15 Koto leeke Liama꞉ hombo peaaso alota꞉ Nakana꞉ma꞉ yaka haliki pake nele ekita꞉ ana꞉ na pa꞉la꞉pe. Ameta꞉ pa yaka wekina꞉ ti kiliki tonka꞉na꞉ muluekema꞉ alepe leekeme. Kota꞉ Leisoloma꞉ alota꞉ Naka꞉ wekina꞉ ti kiliki I̱ ma꞉nda꞉ kika꞉na꞉ta꞉ kota꞉ ame timbata꞉ Dieikope yaapo poluelena꞉e leekeme.

16 Kutupa welealo nane Dieikopeta꞉ oni e pa꞉ta꞉manu hao epeeke handaa Lia hama opolu bao manda꞉hande pulu pua alota꞉ I̱ma꞉ yaka wekina꞉ ti kilikima꞉ nekena꞉ amba꞉ hamboa꞉ma꞉ ame timbata꞉ I̱ yaapo pelipikie leekeme. Koto ekina꞉ koto timbata꞉ Dieikopema꞉ mo wanda꞉ yaapo peliekeme.

17 Koda꞉ma꞉ Liana꞉ pieke yeni hombo peaasota꞉ weki loke lomba ipikana꞉ma꞉ Dieikopena꞉ yunki pao weki mendiaeyekeme. 18 Liama꞉ alota꞉ Yaka pa hameke e pokaasa꞉ wanda꞉ yaka haliki pa꞉ta꞉ haloeke handaa Koda꞉ma꞉ yaka yenki ka꞉la꞉mee laa mo wekina꞉ bikita꞉ Isaka leekeme. 19 Kutupa Lia weki loke paa lomba ipikana꞉ma꞉ Dieikopena꞉ yunki mindiki hata꞉ peao weki mendiaeyekeme. 20 Kutupa Liama꞉ alota꞉ Koda꞉ma꞉ I̱ pa꞉ta꞉ ota꞉ epeke pa kita꞉la꞉ ale ka꞉la꞉me. Koto ekina꞉ ameta꞉ yaka halikina꞉ yunki mindiki hata꞉ weki mendiaaso ekina꞉ I̱ pukima꞉ homa handa꞉ milieke laa mo wekina꞉ bikita꞉ Sebuloni leekeme. 21 Wetepena꞉ta꞉ Liama꞉ wandiki mondu wia bikita꞉ Daena leekeme.

22 Kutupa Koda꞉ma꞉ Leisolo hone u haota꞉ ipika꞉ pieke yeni opua weki mendina꞉ leekeme. 23 Mo wanda꞉ta꞉ weki loke lomba hali weki mondu wiekeme. Kutupa alota꞉ Koda꞉ma꞉ yaka yala꞉ pa꞉la꞉ ekita꞉ weki kitolo hata꞉ mea baala꞉me.

24 Koto ekina꞉ mo Tekehalima꞉ I̱ weki ma꞉nda꞉ paa kina꞉e alo hata꞉ koto wekina꞉ bikita꞉ Diosepe leekeme.

Dieikopema꞉ Leibeni yaapo pi lo tonkaepekeeki

25 Mo Diosepe mendia hoki naneta꞉ Dieikopema꞉ Leibeni pa꞉ta꞉ alota꞉ I̱ yaka da ponoma꞉ I̱ tapae laa alota꞉ 26 Mo I̱ma꞉ naka꞉ e pokao molo wekiwanda꞉ mea hatuku mina꞉pa꞉lao pono lae. Pa ekipeke I̱ma꞉ naka꞉ e epeke tupa꞉ pokalo ekita꞉ naka꞉ hone wilimee leekeme.

27 Koto leeke Leibenima꞉ ipiki pa꞉ta꞉ alota꞉ I̱ma꞉ doeki lono lae. Mo ale paeyao molo ekita꞉ I̱ma꞉ handeau opao handa꞉ witolo Koda꞉ma꞉ I̱ epeala꞉ ekita꞉ neke pa꞉ta꞉ yama꞉ pa꞉la꞉me laa hone ulume. 28 Koto ekina꞉ I̱ma꞉ neke hambuluekema꞉ naka꞉ yenki dupae laa lae leekeme.

29 Dieikopema꞉ hombo peaaso alota꞉ I̱ma꞉ naka꞉ e pokaaloeki make yaka kiki tukiki pa꞉ta꞉ naka꞉ sipisipi ma꞉na꞉manu sa꞉mba꞉lala꞉eki make naka꞉ handeleme. 30 Mo I̱ a̱i̱ na epeke hano hosiki siki wia hae ekita꞉ ameta꞉ tieke kiake sa꞉mba꞉la꞉pa ula꞉me. Kutupa mo Tekehalima꞉ta꞉ I̱na꞉ yeke neke epeaala꞉me. Koto ekina꞉ ameta꞉ I̱ma꞉ yaka ekimanu handeteke halo polo natee leekeme.

31 Koto leeke Leibenima꞉ alota꞉ I̱ma꞉ta꞉ neketa꞉ ekipuma꞉ hambonope leekeme. Dieikopema꞉ hombo peaaso alota꞉ I̱ta꞉ yenki kipa꞉la꞉me. Nakana꞉ma꞉ I̱ma꞉ do alo ekina꞉ a꞉pa꞉la꞉me leka꞉na꞉ta꞉ kota꞉ naka꞉ sipisipi ma꞉na꞉manu paa handeteke hawalueke. 32 Koto ekina꞉ ameta꞉ naka꞉ sipisipi polu pa꞉ta꞉ puata꞉ mo punu pa꞉la꞉ sipisipi ikikimanu make wape wape piki o au au la꞉la꞉ nanikosi ikikimanu make yata꞉pa meono lae. Kotoeki homeketa꞉ mo yaka hone pa꞉la꞉ yenkie. 33 Koto ekina꞉ta꞉ wetepe nina꞉ta꞉ I̱ma꞉ neke na makealomee laa ana꞉na꞉ handilipikie. Pa ekipeke nakana꞉ma꞉ yaka molo yenki handulueke alo epeka꞉na꞉ta꞉ mo I̱ma꞉ au au na la꞉la꞉ o wape wape na piki nanikosi o punu na piki sipisipi ma꞉nda꞉ wia haowa꞉ka꞉na꞉ta꞉ kota꞉ pake na꞉la꞉me laa handa꞉ wilipikie leekeme.

34 Leibenima꞉ hombo peaaso alota꞉ A꞉pa꞉la꞉me. Mo nakana꞉ma꞉ aleeki ota꞉ pupana꞉e leekeme. 35 Pate koto natena꞉ kone Leibenima꞉ta꞉ mo wape da꞉peda꞉pe piki o au au leke nanikosi hali ekimanu make mo au au leke wanda꞉ ma꞉na꞉ paeyao siki make kutupa mo punu piki sipisipi paeyao make yata꞉po miekeme. Kutupa ipika꞉ weki tonu paeyaoma꞉ handeteke haena꞉ laata꞉ 36 Dieikope mina꞉pa꞉lao koto au au leke ma꞉na꞉manu mea nate tepona꞉ polo pieke tupa꞉ papate mea pemekeme. Kutupa Dieikopema꞉ta꞉ mo hande mina꞉pa꞉laeyeke au au na leke ma꞉na꞉manu handeteke hayekeme.

37 Dieikopema꞉ta꞉ mo ta꞉ta꞉ ta꞉ta꞉ piki ti palekemanu mea hake pu lopa lopa pina꞉ta꞉ mandane yonkelekemanu loka꞉la꞉ mepi piekeme. 38 Kutupa ipikana꞉ma꞉ta꞉ do ti paleke manuta꞉ mo ma꞉na꞉ manuna꞉ ikali no haemeke kawaso wieke alena꞉ pua nokopeekeme. Ipikana꞉ma꞉ koto pate wieke ekita꞉ mo ma꞉na꞉ manuma꞉ta꞉ ikali nolo a꞉pa koto pate tia꞉tiki pieke piekeme. 39 Kutupa mo nanikosi manuma꞉ mo ti palekemanu nokopeeke alena꞉ tia꞉tiki pimikita꞉ kota꞉ mo panake mendia꞉tiki pimiki ikiki sunuta꞉ au au la make wape wape piki ekimanu mondu wia꞉tiki pimikime.

40 Koto ekina꞉ Dieikopema꞉ta꞉ mo sipisipita꞉ nanikosi yaapo na apa꞉take ta꞉ta꞉ haena꞉ laata꞉ mo koto sipisipi paeyaota꞉ mo Leibenina꞉ au au leke make punu piki sipisipimanu haya꞉ nanema꞉ leke popeleke yao haena꞉ leekeme. Dupieke ekima꞉ta꞉ ipika꞉ ma꞉na꞉manu aneke hapu sa꞉mba꞉la꞉pa witolo hata꞉ mo Leibenina꞉ ma꞉na꞉manu ta꞉ta꞉ putupa haena꞉ leekeme. 41 Kutupa mo hande panka wiki wanda꞉ ma꞉na꞉ manuna꞉ puteke pambiekeeki handolota꞉ Dieikopema꞉ta꞉ mo ma꞉na꞉ manuma꞉ ikali no haemeke kawaso wieke alena꞉ tia꞉tiki pina꞉ yeketa꞉ mo ti paleke manuta꞉ koto pate noka꞉pa꞉tiki piekeme. 42 Pate mo honkopu na hake ma꞉na꞉manu haemeke alena꞉ta꞉ mo ti palekemanu na wia꞉tiki piekeme. Kutu pieketa꞉ Leibenita꞉ mo honkopu na hake ma꞉na꞉manu minolo hata꞉ Dieikopeta꞉ mo panka wiki ma꞉na꞉manu wia hayekeme. 43 Kutu pieke ekima꞉ta꞉ Dieikopeta꞉ hamoko tieke hayekeme. Ipikita꞉ sipisipi pita꞉ nanikosimanu make pa hameke e pokaasa꞉ tapake make kemelomanu make donkimanu make ota꞉ wopu wia hayekeme.

Copyright information for `SSX