Hebrews 10

Hoteke wema꞉ta꞉ hoke hau na yokeekeeki

Mo Diu wanda꞉halina꞉ pi ula꞉eki manuta꞉ mo wetepe epolo pa꞉la꞉ ota꞉ hau seliapo tupa꞉ dia꞉me. Pa mo koto hauna꞉ su̱a̱ su̱a̱ tupa꞉ homeke ula꞉me. Wanda꞉halima꞉ mo pi ula꞉eki miniki hata꞉ bapi paeyao hotekena꞉ we hala꞉tiki hala꞉tiki pimikime. Kutu pimikipate mo hande pi ula꞉ ekima꞉ta꞉ hotekena꞉ wema꞉ mo Koda꞉ pa꞉ta꞉ yeni pulu polo peleme wanda꞉hali epeaapeke na yeekeme. Mo hande hoteke wema꞉ta꞉ mo Koda꞉ pa꞉ta꞉ yeni pita꞉la꞉ wanda꞉hali ota꞉ yako pea ya꞉ka꞉na꞉ yoluta꞉ ika꞉ hoke hauma꞉ iki yaala꞉ peatiki na pulu pia꞉me. Kutu pia꞉ka꞉na꞉ yoluta꞉ mo hoteke we hala꞉la꞉ hau amba꞉ kone paelo pia꞉me. Pate mo hali kao o nanikosi wema꞉ta꞉ hoke hau ota꞉ yokawapeke na yeke handaata꞉ mo bapi paeyao we hala꞉tiki pimiki ekima꞉ta꞉ ika꞉ pimiki hoke haumanu paa niminaa tiatiki pu halememe.

Kutu piki hau wieke ekina꞉ Ketisoma꞉ do kenkena꞉ ipuluekema꞉ hata꞉ Koda꞉ pa꞉ta꞉ alota꞉

Nakana꞉ma꞉ mo hoteke we hala꞉la꞉ hau pita꞉ pa hameke hala꞉la꞉ hau yaapota꞉ hone na ulu pelepate I̱ta꞉ ota꞉ loke hano tikitiki yawaleme.
Mo hoteke tieke tonka꞉na꞉ yanka hala꞉la꞉eki o hoke hau a꞉mbaena꞉ we hala꞉la꞉eki make nakana꞉ma꞉ ta꞉na꞉ma꞉ na homeleme laa
I̱ma꞉ alota꞉ Koda꞉o. Mo naka꞉ pi ula꞉ bukana꞉ wape pa꞉la꞉ tupa꞉ naka꞉ ekihau hone pa꞉la꞉eki pealuekema꞉ do halome alome leekeme.
Ipikana꞉ma꞉ titina꞉ amba꞉la leeke ekita꞉ dupa Hoteke lia hala꞉la꞉eki o pa hameke hala꞉la꞉eki o yanka hala꞉la꞉eki make o hoke hau a꞉mbaena꞉ we hala꞉la꞉eki kutu piki hau paeyao mo pi ula꞉ bukama꞉ pea꞉peke la꞉la꞉pate kone nakana꞉ma꞉ kota꞉ haumanu pa꞉ta꞉ ta꞉na꞉ma꞉ na homo make hone na pime leekeme. Kutaa yaapo peao alota꞉ Koda꞉o. Naka꞉ ekihau hone pa꞉la꞉eki pealuekema꞉ do halome leekeme. Koto leeke ekima꞉ta꞉ ipikana꞉ma꞉ mo amba꞉ hau yoka pa mo wetepe epolo pieke panake taka꞉lake hau mea tiaeyekeme. 10 Yesu Ketisoma꞉ ipika꞉ Atekena꞉ pi teliolo hata꞉ Atekena꞉ hone piekeeki paeyao pitolo ipika꞉ loketa꞉ paa pa hameke hala꞉la꞉ hoteke we leke pa hoto homeke homeke halaa paeyaeyekeme. Koto pa꞉la꞉ ekima꞉ta꞉ nika꞉ hoke haumanu pa paeyao yokaa yako pea hamono la꞉la꞉me.

Ketisona꞉ homa꞉la꞉ ekima꞉ta꞉ hoke hau ota꞉ paeyaala꞉me

11 Mo Diu yeni peao hala꞉ haliwekima꞉ ika꞉ eta꞉ nate paeyao pokolo ombu hao halememe. Kutupa mo hoteke we make ikana꞉ma꞉ hoto eleke eleke hala꞉tiki hala꞉tiki pu halememe. Kutu pu halemepate koto hoteke we hala꞉la꞉ ekima꞉ta꞉ hoke hau ota꞉ paeyaapeke na ya꞉la꞉me. 12 Pate Ketisoma꞉ hoke hau paeyaaluekema꞉ta꞉ hoto homeke homeke ipika꞉ da꞉ta꞉la꞉eki halaeyekeme. Koto homa꞉la꞉ ekima꞉ epe ala꞉ ekita꞉ topo na piki pa u pelia halieke. Kutu pu paeyeketa꞉ ipikana꞉ma꞉ Koda꞉na꞉ kiki popeke nanema꞉ pitiekeme. 13 Koto pa꞉ta꞉ta꞉ Ketiso ipika꞉ a꞉nda꞉ tunkuliki haliweki ipika꞉ anke oto nane Koda꞉ma꞉ mea haena꞉ lena꞉ yeke yu wia handeteke hala꞉me. 14 Ipikana꞉ma꞉ mo hoke haumanu paeyawaena꞉ la haleme wanda꞉halita꞉ ipika꞉ hoto homeke homeke homeeke ekima꞉ ikita꞉ ota꞉ wamo peayekeme. Koto ekita꞉ ota꞉ na paelieke.

15 Kotoeki kone mo Holi Sipitidima꞉ peneme yao la kitolo alota꞉

16 Mo Tekehalima꞉ mandane natemanu ipilie dina꞉ta꞉ ya pi la꞉ wita꞉la꞉ pi ma꞉nda꞉ iki pa꞉ta꞉ la꞉ ulueke laa mo pi la꞉ witolo pita꞉ dupae.
Yaka pi ula꞉eki paeyao ika꞉ puki pa꞉ta꞉ wiaota꞉ ika꞉ hone tekena꞉ wape pealueke la꞉la꞉me leekeme.
17 Pate pa pi ma꞉nda꞉ apa꞉taaso alota꞉

I̱ma꞉ ika꞉ hoke haumanu o ota꞉ pea꞉peke na yeke hoke hau pimiki ekimanu pa ame aneta꞉ hone ma꞉nda꞉ na ulueke la꞉la꞉me leekeme.
18 Koda꞉ma꞉ do koto hoke haumanu pa paeyaala꞉ hoki naneta꞉ mo hoteke lia hala꞉la꞉ hau manuta꞉ paa pea꞉peke na ya꞉la꞉me.

Koda꞉ teke pa꞉ta꞉ hamana꞉e

19 Kame tonuo. Koto pa꞉la꞉ ekima꞉ta꞉ Yesuna꞉ wema꞉ nika꞉ pota꞉ wiawaleke handaa nikana꞉ma꞉ mo Ota꞉ Yako Piki Da Panda꞉ tukiki pa꞉ta꞉ ale ma꞉nda꞉ hone na wiki pa pua꞉peke ya꞉la꞉me. 20 Nikana꞉ma꞉ mo Ota꞉ Yako Piki Da Panda꞉ pa꞉ta꞉ honda꞉ pambomonota꞉ Ketisoma꞉ mo deto hala꞉ panake pota꞉ homeketa꞉ mo tupele dau ponda꞉pa꞉ lia wiaeyekeme. Koto tupele dauta꞉ ipika꞉ lokee. 21 Nika꞉ yeni peao hala꞉ hali tiekema꞉ Koda꞉na꞉ wanda꞉hali handeteke hala꞉me. 22 Koto pa꞉la꞉ ekima꞉ta꞉ nikana꞉ma꞉ nika꞉ puki pa꞉ta꞉ ota꞉ hau homeke miniki halomeke handa make Koda꞉ pa꞉ta꞉ ota꞉ hone tulaomeke handa make Ketisona꞉ wema꞉ mo nika꞉ hoke hone tekena꞉ tande laaleke halomeke handa make mo kila wiki ikalima꞉ nika꞉ loke tanda꞉paleke handa make koto haloma꞉ ekina꞉ta꞉ ota꞉ Koda꞉ teke pa꞉ta꞉ a꞉pa hamana꞉e. 23 Koda꞉ma꞉ ipika꞉ pi la꞉ ula꞉eki manuta꞉ ota꞉ na tunkulieke hone witoloma꞉ ekina꞉ta꞉ kota꞉ nika꞉ hone tulaasome aloma꞉ ekita꞉ ota꞉ wopu miniki hamana꞉ pia꞉pa꞉peke. 24 Niki paeyaoma꞉ nika꞉ nika꞉ kone pukima꞉ homa꞉ alualu pita꞉la꞉eki puluekema꞉ make epeke tamba꞉ mina꞉la꞉ hau pu alualu puluekema꞉ make ekipa sa꞉tia alualu pea hata꞉ pea꞉peke ya꞉la꞉pe hone umana꞉e. 25 Mo nika꞉ Ketiso kametonu ame̱le̱ mombolo haloma꞉eki manuta꞉ mandane wanda꞉halima꞉ mina꞉pa꞉lao haleme tupa꞉ nikana꞉ma꞉ na mina꞉pa꞉lamana꞉e. Kotoeki na pikita꞉ mo Tekehalina꞉ epolo pa꞉la꞉ nate teke pa꞉ta꞉ yoma꞉ a꞉pa꞉la꞉ ekina꞉ta꞉ nikana꞉ma꞉ nika꞉ nika꞉ kone hone utia alualu pumana꞉e.

Koda꞉na꞉ Eiyeke hoki na walamana꞉e

26 Nikana꞉ma꞉ mo Koda꞉na꞉ ota꞉ pi opua hone witolo hata꞉ kone hoke hau pa pua꞉tiki pu haoma꞉ka꞉na꞉ta꞉ kota꞉ koto hoke hau paeyawaena꞉ hala꞉peke we ma꞉nda꞉ dia꞉ ya꞉la꞉pate 27 pa paala꞉ma꞉ homolo handeteke hapeke hau yaapo homeketa꞉ ula꞉me. Hau ma꞉nda꞉ta꞉ Koda꞉na꞉ pi yokaalu pulu pa꞉la꞉eki epolo pa꞉la꞉ekie. Ma꞉nda꞉ta꞉ mo Koda꞉ pa꞉ta꞉ a꞉nda꞉ liteme wanda꞉hali tolo pa꞉la꞉ wele wopu piki ti tala꞉eki epolo pa꞉la꞉ekie. 28 Mo Diu hali homeke ma꞉nda꞉ma꞉ Mosesina꞉ pi ula꞉eki yambieke handaa mo handa꞉la꞉ hali yaapo tepo manuna꞉ pima꞉ ota꞉ pie lemeketa꞉ kota꞉ koto hali pa꞉ta꞉ a꞉ta꞉ma꞉ na homeke homena꞉ lia꞉tiki pimikime. 29 Kutu piekeeki hone witolo hata꞉ nikana꞉ma꞉ mo hali homeke ma꞉nda꞉ma꞉ mo a꞉ta꞉ma꞉ homa tamba꞉ mina꞉la꞉ Sipitidi laasa꞉ pi alo make mo ipika꞉ hoke hau paeyaeyeke pi la꞉ ula꞉ weta꞉ pa ekie hone witolo hata꞉ make mo Koda꞉na꞉ Eiyeke hoki walaa paa pa alema꞉ handa ya꞉ka꞉na꞉ta꞉ kota꞉ koto hali pa꞉ta꞉ta꞉ eki hau opolo ipiliekee hone witemepe. Kutu pilie someta꞉ kota꞉ mo lita꞉la꞉eki ota꞉ lombei piki hoke yenki milieke hone wia꞉pa꞉peke. 30 Mo yenki meake hauta꞉ I̱ma꞉ pealueke. Hoke yenkita꞉ I̱ma꞉ kone pa halueke laa pi leeke halita꞉ niki hone witoloma꞉me. Ipika꞉ leekeeki ma꞉nda꞉ dupae. Tekehalima꞉ ipika꞉ wanda꞉hali pa꞉ta꞉ pi yokaalu pilieke leekeme. 31 Mo deto hala꞉ Koda꞉na꞉ hoke yenki tukiki pa꞉ta꞉ taapolo talo pea꞉ka꞉na꞉ta꞉ ota꞉ paala꞉ piki haue.

Wopu taka꞉lao hone tulao hapa꞉peke ya꞉la꞉eki

32 Mo hande iki amba꞉ haeme ekimanu niminaapa꞉peke. Koto pita꞉ma꞉ta꞉ mo Koda꞉na꞉ pa̱a̱ma꞉ ika꞉ puki pa꞉ta꞉ pa̱a̱ peaya꞉ hoki naneta꞉ ka꞉nda꞉manu wopu mimipate pa koto hau manuma꞉ iki bepolaena꞉ na leke ota꞉ honkopu hao haememe. 33 Ma꞉nda꞉ pita꞉ma꞉ ikita꞉ wanda꞉halina꞉ leke popelekena꞉ mea hao hata꞉ hoke keke pimanu alo hata꞉ iki yombua baememe. Kutaa make mo mandane Ketiso yankeke tonu koto tupa꞉ lia꞉tiki pimikieki handaata꞉ iki tamba꞉ muluekema꞉ niki make mandake lina꞉ pomana꞉e laa pememe. 34 Ikana꞉ma꞉ mo dipula pitimi wanda꞉hali pa꞉ta꞉ make a꞉ta꞉ma꞉ homememe. Kutupa make mandane haliwekima꞉ ika꞉ wia haeme ala꞉ta꞉ ala꞉ta꞉ paeyao pake muluekema꞉ pa꞉ta꞉la꞉ pemekeeki handemeketa꞉ kota꞉ ta꞉na꞉ma꞉ homolo hata꞉ ika꞉ honema꞉ta꞉ pa ota꞉ paeyaapeke na yeke epeke alemanu pa wia haloma꞉me hone witolo hata꞉ pa epeke tupa꞉ hao haememe.

35 Ika꞉ aela꞉ baasa꞉ hau na mina꞉pa꞉lapa꞉peke. Pa ekipeke. Ika꞉ koto epeke hauna꞉ epeke yenki tieke milimikie. 36 Koto ekina꞉ta꞉ mo Koda꞉na꞉ hone pa꞉la꞉eki amba꞉la pealuekema꞉ make mo ipika꞉ la꞉ ula꞉ alemanu muluekema꞉ make ikana꞉ma꞉ yopu yu wia hapa꞉peke ya꞉la꞉me. 37 Kutu pea꞉peke ekina꞉ta꞉ mo Baiboloma꞉ alota꞉

Pa hosiki siki yu wia hao wetepena꞉ta꞉ mo epolo pa꞉la꞉ hali opolo ipuluekema꞉ta꞉ hoi hoi na piki opolo ipilieke.
38 Koto yu wia halo pita꞉ma꞉ta꞉ ma꞉nda꞉ epi ota꞉ tikitiki yao hala꞉ halita꞉ ipika꞉ hone tulaala꞉ ekima꞉ pa hao haena꞉ lelieke.
Kutu pilia꞉pate pa hali homeke ma꞉nda꞉ma꞉ yola꞉ pambea꞉ka꞉na꞉ta꞉ kota꞉ ipiki pa꞉ta꞉ ta꞉na꞉ma꞉ na homolueke la꞉la꞉me.
39 Nikita꞉ mo nika꞉ da꞉ta꞉pekeeki alu pina꞉ yola꞉ pamba hapeke wanda꞉hali na haloma꞉me. Kotoeki na pikita꞉ nikita꞉ hone ti laaso hata꞉ da꞉ta꞉la꞉eki mea haloma꞉me.

Copyright information for `SSX