James 4

Do kenke hauna꞉ ta꞉ma꞉ni pita꞉la꞉eki

Iki pa꞉ta꞉ a꞉nda꞉ pita꞉la꞉eki ipula꞉eki make ape ala꞉eki ipula꞉eki make koto haumanu ipula꞉eki teketa꞉ hando pa꞉ta꞉ ka꞉ta꞉pe. Ika꞉ honema꞉ tiaasa꞉ ekimanu ika꞉ loke tukiki nane kone a꞉nda꞉ leke ale lia꞉tiki pitolo hata꞉ peaasa꞉me. Ala꞉ta꞉ ala꞉ta꞉ muluekema꞉ ika꞉ hone pa꞉la꞉pateta꞉ mea꞉peke na yolo hata꞉ hali luekema꞉ taapeleme. Kutupa make ala꞉ta꞉ ala꞉ta꞉ meawee laa honema꞉ pitelemepateta꞉ mea꞉peke na yolo hata꞉ ape la a꞉nda꞉ pitelememe. Koto ekina꞉ ikana꞉ma꞉ Koda꞉ pa꞉ta꞉ honke na alemeke handa na minelememe. Kutupa Koda꞉ pa꞉ta꞉ ika꞉ honke alemeeki make ana꞉ na pa꞉la꞉me. Ika꞉ hone pa꞉la꞉ hau puluekema꞉ hone u hoeyaaso hata꞉ honke aleme ekina꞉ na minelememe. Ikita꞉ pi tunkuleleme wanda꞉halio. Do ekita꞉ ikana꞉ma꞉ hone na witelemepe. Hali epima꞉ do kenke hau puluekema꞉ hone pia꞉ka꞉na꞉ta꞉ koto halita꞉ Koda꞉ ipika꞉ a꞉nda꞉ tunkiliki hali hala꞉me. Koto tupa꞉ make hali epima꞉ do kenke hauna꞉ yankeke haluekema꞉ hone pia꞉ka꞉na꞉ta꞉ koto halita꞉ ipika꞉ kone Koda꞉na꞉ a꞉nda꞉ tunkiliki hali haluekema꞉ pita꞉la꞉me. Hande Baibolo bukana꞉ wape pa꞉la꞉ ekita꞉ paekie hone witelemepe dupae. Hande Koda꞉ma꞉ niki loke tukiki pa꞉ta꞉ pitaala꞉ temokoma꞉ta꞉ ipika꞉ hone pa꞉la꞉eki puluekema꞉ wotu taapilieke wape pa꞉la꞉me. Kutu piliepate Koda꞉ma꞉ ipika꞉ a꞉ta꞉ma꞉ homolo hata꞉ pa kita꞉la꞉ ekita꞉ wopue. Kutu pita꞉la꞉ ekima꞉ mo Baibolo bukana꞉ wape pa꞉la꞉eki doe.

Hakoko liteleme haliweki pa꞉ta꞉ta꞉ Koda꞉ma꞉ a꞉nda꞉ lia hala꞉pate
homupiki haliweki pa꞉ta꞉ ipika꞉ a꞉ta꞉ma꞉ homa꞉la꞉eki pa halo hala꞉me wape pa꞉la꞉me.
Koto ekina꞉ Koda꞉ pa꞉ta꞉ homu pea hata꞉ Sadani pa꞉ta꞉ a꞉nda꞉ lia hapa꞉peke. Kutu pimika꞉na꞉ta꞉ Sadanita꞉ iki mina꞉pa꞉lao pindipa pelieke. Ikana꞉ma꞉ Koda꞉ teke pa꞉ta꞉ a꞉pa haemeka꞉na꞉ta꞉ ipiki make iki teke pa꞉ta꞉ a꞉pa halieke. Hoke hau peleme wanda꞉halio ika꞉ kiki tanda꞉pa꞉pa꞉peke. Hone yaapo wilimi wanda꞉halio hone hokeeki ma꞉nda꞉ yoka꞉ mea bao hapa꞉peke. Ka꞉nda꞉ma꞉ homolo hata꞉ e̱ lapa꞉peke. Ika꞉ kitalemeeki topo pea e̱ lapa꞉peke. Ika꞉ ta꞉na꞉ma꞉ homelemeeki make topo pea ka꞉nda꞉ma꞉ homa꞉pa꞉peke. 10 Tekehali pa꞉ta꞉ homu pea haemeka꞉na꞉ta꞉ ipikana꞉ma꞉ iki mea a꞉meiyalieke.

Yankeke pa꞉ta꞉ hoke hau peleme pi a̱i̱ na lapa꞉pekeeki

11  Ya kametitio. Ikana꞉ma꞉ ika꞉ kame ma꞉nda꞉ pa꞉ta꞉ hoke hone witolo hata꞉ la la pita꞉la꞉ pi na lapa꞉peke. Hali epima꞉ ipika꞉ kame pa꞉ta꞉ hoke hone witolo hata꞉ pi lao pi yokaalu pita꞉la꞉ halima꞉ handa haya꞉ka꞉na꞉ta꞉ mo hali homeke pa꞉ta꞉ na pita꞉la꞉pate mo hande Lo pimanu pa꞉ta꞉ kone pita꞉la꞉me. Nakana꞉ma꞉ kutu pika꞉na꞉ta꞉ mo hande Lo Pimanu hone na wiki neketa꞉ mo Lo Pi manuna꞉ pi yokaalu pitele hali halipikie. 12 Mo hande Lo pimanu ula꞉ Hali Koda꞉ homekema꞉ kone pi yokaalu pita꞉la꞉eki make pita꞉la꞉me. Kutupa ipikana꞉ma꞉ta꞉ da꞉taasa꞉eki make hoeyaasa꞉eki make ana꞉na꞉ pea꞉peke ya꞉la꞉me. Koto ekina꞉ nakana꞉ma꞉ hali ma꞉nda꞉ pa꞉ta꞉ laake hauta꞉ neketa꞉ aleke pa꞉ta꞉ hone wia hata꞉ alepe. Koto ekina꞉ nakana꞉ma꞉ hali ma꞉nda꞉na꞉ pita꞉la꞉ ekina꞉ pi yokaalu piki hauta꞉ neketa꞉ aleke pa꞉ta꞉ hone wia hata꞉ pitelepe.

Hakoko liaama꞉na꞉ kinki pita꞉la꞉ pimanu

13 Iki pa꞉ta꞉ mandane haliwekima꞉ doeki lo halememe. Amepe o beliape daoni teke ma꞉nda꞉ pa꞉ta꞉ puaka꞉na꞉ta꞉ bapi homekemanu tupa꞉ koto pa꞉ta꞉ hata꞉ bisinisi pitolo hata꞉ yenki wotu mulumeke la alemepate I̱ma꞉ta꞉ iki pa꞉ta꞉ doeki alome. 14 Belia a꞉nda꞉ epolo pa꞉la꞉ hauta꞉ iki hone na wilimime. Ika꞉ da꞉ta꞉la꞉ ekita꞉ ekipape. Ika꞉ haleme ekita꞉ mo hande koa a꞉pa pamba hosiki hao kila꞉pa pula꞉ tupa꞉ halememe. 15 Dupa lapa꞉peke alee. Tekehalima꞉ hone pia꞉ka꞉na꞉ta꞉ niki da꞉ta hata꞉ nikana꞉ma꞉ doeki peata꞉ moeki pulumeke la lapa꞉peke alee alopate ameta꞉ ikana꞉ma꞉ hakoko litolo hata꞉ pi wotu hapa꞉leleme. Kutu piki pi hapa꞉leleme ekita꞉ hokeekie. 17 Koto ekina꞉ hali epima꞉ tikitiki hau pea꞉pekeeki hone wia hata꞉ kone ota꞉ na pia꞉ka꞉na꞉ta꞉ koto halima꞉ta꞉ hoke hau pita꞉la꞉me.

Copyright information for `SSX