Luke 10

Yesuma꞉ 72 haliweki tapaeyekeeki

Do hande haumanu peaata꞉ Tekehalima꞉ 72 haliweki mea yaapo yaapo pu mo ipiki polo pieke da pa꞉ta꞉manu tapa tapa piekeme. Kutupa ipikana꞉ma꞉ iki pa꞉ta꞉ alota꞉ Ne napeke wotu mo ena꞉ta꞉ pota꞉la꞉pate mo ne momba꞉laapeke wanda꞉halita꞉ aneke hapu dia꞉me. Koto ekina꞉ta꞉ mo e teke halima꞉ ipika꞉ ena꞉ ne mea momba꞉laalo peleme wanda꞉hali ana꞉na꞉ tapaena꞉ ikana꞉ma꞉ yeni pu hapa꞉peke. Pupa꞉e I̱ma꞉ ikita꞉ sipisipi ma꞉na꞉na꞉ ikikisunu mandane tikene kikamanu haleme ale pa꞉ta꞉manu taa tapaaso handa꞉e. Ikana꞉ma꞉ mani pausa o nu sunu o anke dake ma꞉nda꞉ na mea pua꞉pa꞉peke. Ma꞉nda꞉ ame̱le̱ pota꞉na꞉ manda꞉hande pitolo hata꞉ pi na lapa꞉peke. Ikana꞉ma꞉ da ma꞉nda꞉ pa꞉ta꞉ honda꞉ pambemeka꞉na꞉ta꞉ titina꞉ amba꞉la koto da pa꞉ta꞉ta꞉ A꞉nda꞉ peliaasa꞉eki epena꞉e lapa꞉peke. Kutupa koto da pa꞉ta꞉ a꞉nda꞉ peliaasa꞉ ekina꞉ hone wopu u hala꞉ hali ma꞉nda꞉ haya꞉ka꞉na꞉ta꞉ kota꞉ a꞉nda꞉ peliaasa꞉ pi le ekita꞉ ipiki pa꞉ta꞉ pa wina꞉ lapa꞉peke. Dia꞉ya꞉ka꞉na꞉ta꞉ kota꞉ naka꞉ hande a꞉nda꞉ peliaaso pita꞉ pao mia꞉peke.

E pokao hala꞉ hali ipika꞉ yenkita꞉ ota꞉ mea꞉peke ya꞉la꞉ ekina꞉ da lumbu na likita꞉ homeke da pa꞉ta꞉ pa hao hata꞉ ne ikali alekemanu kimika꞉na꞉ta꞉ pa napa꞉peke. Kutupa ikita꞉ da yu ma꞉nda꞉ pa꞉ta꞉ pemeka꞉na꞉ta꞉ koto pa꞉ta꞉ haleme wanda꞉halima꞉ iki pa꞉ta꞉ ta꞉na꞉ma꞉ homolo hata꞉ hatuku mea nemanu kimika꞉na꞉ta꞉ kota꞉ pa napa꞉peke. Koto da yu pa꞉ta꞉ yeni haleme wanda꞉hali wopu mea epeapa꞉peke. Kutupa koto pa꞉ta꞉ haleme wanda꞉hali pa꞉ta꞉ta꞉ Koda꞉na꞉ Kilu Tombuao Hala꞉ ekita꞉ iki teke pa꞉ta꞉ amba꞉ opolo a꞉pa꞉la꞉me lapa꞉peke. 10 Koto pa꞉la꞉pate da yu ma꞉nda꞉ pa꞉ta꞉ pemeka꞉na꞉ta꞉ mo wanda꞉halima꞉ iki ika꞉ da pa꞉ta꞉ na hatuku pemeka꞉na꞉ta꞉ kota꞉ ikana꞉ma꞉ mo pota꞉ nina꞉ pua hata꞉ alota꞉ 11 Ika꞉ daoni tukiki pa꞉ta꞉ ula꞉ dokolota꞉ nika꞉ ankena꞉ ta̱la̱꞉la̱꞉ ekita꞉ iki pa꞉ta꞉ kone koto tandela꞉neasoma꞉pate doeki homeke hone wipee laata꞉ Koda꞉na꞉ Kilu Tombuao Hala꞉ ekita꞉ iki teke siki pa꞉ta꞉ koto epea꞉me hone wotu wia꞉pa꞉peke lapa꞉peke. 12 I̱ma꞉ iki pa꞉ta꞉ ota꞉ alome. Hande pi yokaalu pulu pa꞉la꞉ nate opolo epea꞉ka꞉na꞉ta꞉ kota꞉ Koda꞉ma꞉ mo Sodomo halo pa꞉la꞉ a꞉ta꞉ma꞉ homa꞉la꞉ ekita꞉ mo hande daoni pa꞉ta꞉ halo pa꞉la꞉ ekita꞉ ota꞉ haka꞉ta꞉pao ankulao halieke alome leekeme.

Hone na tulaemeke daonimanu

(Ma꞉tiu 1120-24)

13 A꞉ta꞉ tieke Kotaasini daonio. A꞉ta꞉ tieke Betesaida daonio. I̱ma꞉ mo ipiliki pa꞉ta꞉ na handeke haumanu paeyao a꞉nda꞉ mo hande daoni yaapo Taiya Saidoni pa꞉ta꞉ pua꞉ka꞉na꞉ yoluta꞉ kota꞉ koto da yaapo pa꞉ta꞉ haleme wanda꞉hali ika꞉ puki lekelemeka꞉ta꞉me laa Koda꞉ma꞉ handena꞉ta꞉ busa꞉ pitikimanu wepia yamaata꞉ lanka꞉ apolo kitulu pimime. I̱ma꞉ ipiliki pa꞉ta꞉ta꞉ ota꞉ pi alome. Mo pi yokaalu pulu pa꞉la꞉ nate opolo epea꞉ka꞉na꞉ta꞉ kota꞉ 14 Koda꞉ma꞉ mo Taiya Saidoni yaapo pa꞉ta꞉ halo pa꞉la꞉ a꞉ta꞉ma꞉ homa꞉la꞉ ekita꞉ mo ipiliki Kotaasini Betesaida yaapo pa꞉ta꞉ kulu pa꞉la꞉eki ota꞉ haka꞉ta꞉pao ankulao halieke. 15 Kutupa Kapeneamio. Neketa꞉ naka꞉ homeke oli ya nane mea a꞉meiyalueke hone wipe. Neketa꞉ oni ti to hala꞉ pa꞉ta꞉ mea lopaalieke leekeme.

16 Yesuma꞉ ipika꞉ disaipolo haliweki pa꞉ta꞉ alota꞉ Ma꞉nda꞉ epima꞉ ika꞉ pi opia꞉ka꞉na꞉ta꞉ kota꞉ yaka pi kone opita꞉la꞉me. Ma꞉nda꞉ epima꞉ iki kiaeya꞉ka꞉na꞉ta꞉ ota꞉ I̱ kone kiaasa꞉me. Kutupa make hali epima꞉ I̱ kiaeya꞉ka꞉na꞉ta꞉ mo I̱ tapaeya꞉ hali kone kiaasa꞉me leekeme.

Mo 72 haliweki paa la꞉ka꞉la epemekeeki

17 Mo hande 72 haliwekita꞉ ta꞉na꞉ tiekema꞉ homolo hata꞉ paa opolo epemekeme. Tekehalio. Nikana꞉ma꞉ naka꞉ biki laaso hata꞉ teliolo hamono kone mo hoke temoko manuma꞉ nika꞉ pi ota꞉ opimime lemekeme. 18 Yesuma꞉ ika꞉ pi hombo peaaso alota꞉ I̱ma꞉ Sadani oli ya nane yama꞉ ti tekele manda꞉na꞉ do kenkena꞉ lopea꞉ ekita꞉ handoa꞉me. 19 Opua꞉pe. Ikana꞉ma꞉ mo ketomanu make tei halimanu make da꞉ka꞉pa꞉ tombuamena꞉ make mo a꞉nda꞉ tunkuliki hoke temokona꞉ honkopu paeyao lu tombuao bepolamina꞉ta꞉ ya bikina꞉ welema꞉ iki handeteke halieke. Koto ekina꞉ta꞉ ikita꞉ ala꞉ta꞉ ma꞉nda꞉ma꞉ na hoeyaalieke. 20 Koto pa꞉la꞉ma꞉ mo hoke temoko manuma꞉ ika꞉ pi opua pilia꞉eki pa꞉ta꞉ ta꞉na꞉ma꞉ na homa꞉pa꞉peke. Pate ika꞉ bikita꞉ amba꞉ hepeni nane wape pea ula꞉ma꞉ ta꞉na꞉ma꞉ homa꞉pa꞉peke leekeme.

Koda꞉ pa꞉ta꞉ keiyae leekeeki

(Ma꞉tiu 1125-27, 1316-17)

21 Koto natena꞉ta꞉ mo Holi Sipitidima꞉ Yesu pa꞉ta꞉ epeke ta꞉na꞉ pita꞉la꞉ ekima꞉ tumbieketa꞉ Yesuma꞉ alota꞉ Apa꞉o. Oli ya do kenke yaapona꞉ Tekehalio. I̱ma꞉ neke pa꞉ta꞉ Ta꞉na꞉e alome. Ekipeke nakana꞉ma꞉ mo hande hone wotu u tekele peleme wanda꞉hali make mo sukulu wotu peleme wanda꞉hali ameda pa꞉ta꞉ a꞉mbao wina꞉ le hau manuta꞉ pa mo panake wekiwandiki sunu pa꞉ta꞉ wala꞉leke handa alome. Aowe Apa꞉o. Koto ekita꞉ naka꞉ hone pieke yekeeki yaena꞉yeke pina꞉ aleme leekeme. 22 Yaka Apa꞉ma꞉ta꞉ ala꞉ta꞉ ala꞉ta꞉ paeyao sikita꞉ I̱ pa꞉ta꞉ ka꞉la꞉me. Mo Eiyeketa꞉ ma꞉nda꞉ma꞉ hone na ula꞉pate ipika꞉ Atekema꞉ homeke hone ula꞉me. Kutupa Ateketa꞉ ma꞉nda꞉ma꞉ hone na ula꞉pate ipika꞉ Eiyekema꞉ homeke hone ula꞉me. Kutupa make mo Eiyekema꞉ ipika꞉ hone pilia꞉ wanda꞉hali pa꞉ta꞉ta꞉ ipika꞉ Ateke walea꞉ka꞉na꞉ta꞉ kota꞉ ikana꞉ma꞉ homeke Ateke hone wilimikie leekeme. 23 Kutupa Yesuma꞉ ika꞉ honumake siki hata꞉ ipika꞉ disaipolo haliweki pa꞉ta꞉ la꞉ka꞉la꞉ moneaaso alota꞉ Ikita꞉ ta꞉na꞉ma꞉ homa꞉pa꞉peke. Ikana꞉ma꞉ handeleme ale handolo peleme ekina꞉ loa꞉me. 24 I̱ma꞉ iki pa꞉ta꞉ loa꞉ma꞉ mo amba꞉ potopede haliweki wopu make kini haliweki make ikana꞉ma꞉ handeleme alemanu handuluekema꞉ taapemekepate handa꞉peke na yaalo make ikana꞉ma꞉ opitelemeeki opuluekema꞉ pimikipate opua꞉peke ana꞉ na piekeme leekeme.

Epeke Sametia halina꞉ onkoluma꞉ leekeeki

25 Mo Lo Pi walo hayeke hali homekema꞉ Yesu tamuluekema꞉ la handolo alota꞉ Disao. Deto hala꞉eki muluekema꞉ eki pionope laa lota꞉ piekeme. 26 Koto leeke Yesuma꞉ ipika꞉ pi hombo peaaso alota꞉ Mo hande Baibolo pi manuma꞉ta꞉ eki ala꞉pe. Nakana꞉ma꞉ta꞉ ekipa hone wilipe leekeme. 27 Kutupa mo halima꞉ Yesuna꞉ pi hombo peaaso alota꞉ Baiboloma꞉ dupa la꞉la꞉me. Naka꞉ Tekehali Koda꞉ pa꞉ta꞉ pukima꞉ homolo hata꞉ naka꞉ puki paeyaoma꞉ make naka꞉ temoko paeyaoma꞉ make naka꞉ honkopu paeyaoma꞉ make naka꞉ hone paeyaoma꞉ make ipiki pa꞉ta꞉ pukima꞉ homo hapeke la꞉la꞉me laa make Nakana꞉ma꞉ naka꞉ kone pukima꞉ homele tupa꞉ ma꞉nda꞉ pa꞉ta꞉ make koto tupa꞉ kone pukima꞉ homo hapeke la꞉la꞉me leekeme. 28 Koto leeke Yesuma꞉ ipiki pa꞉ta꞉ alota꞉ Naka꞉ ale pita꞉ epeke aleme. Koto ale ekita꞉ ota꞉ pika꞉na꞉ta꞉ deto hala꞉eki milipikie laa leekeme. 29 Koto leekepate hande Lo Pi walo hayeke halima꞉ ipika꞉ biki kone epeaaluekema꞉ Yesu paa lota꞉ pitolo alota꞉ Koto hali ma꞉nda꞉e la꞉la꞉ ekita꞉ epipe laa lota꞉ piekeme. 30 Yesuma꞉ ipika꞉ pi hombo peaaso alota꞉ Hali ma꞉nda꞉ta꞉ Diutuseleme da mina꞉pa꞉lao oni Dietiko da nane pulu haena꞉ mo pota꞉na꞉ mandane pake naleme haliwekima꞉ mina ipika꞉ dau titipila꞉ mina꞉ bepie yombua bao homuluekema꞉ taapolo pitina꞉ pemekeme. 31 Kutupa koto natena꞉ kone mo yeni peao hayeke hali homeke ma꞉nda꞉ koto pota꞉na꞉ peekepate hande yombua bao wina꞉ lemeke some handeekepate pa wina꞉ kone paka꞉lao pota꞉ tea꞉ nane peekeme. 32 Koto hoki naneta꞉ Lipae tapake hali ma꞉nda꞉ make koto tupa꞉ peekepate mo hande yombua bao wina꞉ lemeke hali pua handa kone pao paka꞉lao pota꞉ tea꞉na꞉ peekeme. 33 Pate Sametia hali ma꞉nda꞉ koto pota꞉na꞉ a꞉paata꞉ mo hali hando haota꞉ ipika꞉ pukima꞉ a꞉ta꞉ma꞉ homeekeme. 34 Kutupa mo hali wieke alena꞉ puaata꞉ mo limiki ale nina꞉ ipikana꞉ma꞉ honku make waini ikali make holaota꞉ banisima꞉ tonkawayekeme. Kutupa mo halima꞉ hande someta꞉ ipika꞉ donki ma꞉na꞉na꞉ hoki manda mea wiaata꞉ hatuku pua hande kimisu haliwekima꞉ hamba polu haemeke da ma꞉nda꞉ pa꞉ta꞉ opolo puaata꞉ koto da pa꞉ta꞉ mo hali handeteke hayekeme. 35 Kutupa da kelepeeketa꞉ mo Sametia halima꞉ hande da teke hali pa꞉ta꞉ 2 kina halaa alota꞉ Do hali wotu handeteke hapeke. I̱ doane la꞉ka꞉la ipulua꞉ dina꞉ta꞉ mo hali handeteke halena꞉ kitolo 2 kina ana꞉ na pia꞉ka꞉na꞉ta꞉ kota꞉ yenkita꞉ haka꞉ta꞉pao a꞉pa kulueke leekeme. 36 Koto laa Yesuma꞉ mo hali pa꞉ta꞉ pi paeyaaso hata꞉ alota꞉ Do tepo hali aloma꞉pate mo pake nala꞉ haliwekima꞉ limiki some teke pa꞉ta꞉ta꞉ epima꞉ puki halea꞉pe laa lota꞉ piekeme. 37 Hande Lo Pi walo hayeke halima꞉ Yesuna꞉ pi hombo peaaso alota꞉ Hande a꞉ta꞉ma꞉ homeeke halie laa leekeme. Koto leeke Yesuma꞉ ipiki pa꞉ta꞉ alota꞉ Kota꞉ nakana꞉ma꞉ make kutu piki hau pu hapeke laa leekeme.

Yesuma꞉ Mada Meti yaapo handolo peekeeki

38 Yesuta꞉ ipika꞉ disaipolo haliweki ame̱le̱ pota꞉na꞉ pulu hata꞉ da yu siki ma꞉nda꞉ pa꞉ta꞉ opolo pemekeme. Koto da yu pa꞉ta꞉ta꞉ wanda꞉ ma꞉nda꞉ hayekeme. Ipika꞉ bikita꞉ Mada. Koto wanda꞉ma꞉ Yesu ipika꞉ da pa꞉ta꞉ epena꞉ta꞉ ta꞉na꞉ma꞉ homeekeme. 39 Mada ipika꞉ hakepiki homeke Meti hayekeme. Metima꞉ta꞉ mo Tekehalina꞉ anke lopao pitieke alena꞉ a꞉pa pita꞉ ipika꞉ pi waleekeeki opu pitiekeme. 40 Kutu piekepate Madata꞉ ne aneke hapu wamo pieke ekima꞉ ipika꞉ hone ka꞉nda꞉ wotu pieke a꞉pa alota꞉ Tekehalio. Yaka asima꞉ I̱ma꞉ mo emanu paeyao yaka honumake piono ala꞉ ekita꞉ nakana꞉ma꞉ta꞉ hone na witelepe. Ipikana꞉ma꞉ I̱ tamba꞉ mulu epena꞉ lae leekeme. 41 Koto leeke Tekehalima꞉ Madana꞉ pi hombo peaaso alota꞉ Madao. Madao. Nakana꞉ma꞉ ala꞉ta꞉ ala꞉ta꞉ wotu pa꞉ta꞉ hone u taapo make hone ka꞉nda꞉ma꞉ homelepate 42 pa ota꞉ pea꞉peke hau homeke homeke na peleme. Metima꞉ta꞉ hone wia ota꞉ hau ma꞉la꞉ ekita꞉ ma꞉nda꞉ma꞉ pendilao mea꞉peke na ya꞉lieke leekeme.

Copyright information for `SSX