Luke 13

Iki homilimina꞉ ika꞉ hoke hau hoki wala kiaape

Koto natena꞉ta꞉ koto pa꞉ta꞉ haemeke mandane haliwekima꞉ Yesu pa꞉ta꞉ a꞉pa mo Pailedima꞉ Ka꞉lili mandane haliwekita꞉ ika꞉ hotekemanu lia Koda꞉ pa꞉ta꞉ halolo haena꞉ kone lieke ekina꞉ pi la halemekeme. Koto ekina꞉ Yesuma꞉ ika꞉ pi hombo peaaso alota꞉ Mo Ka꞉lili haliweki paeyaota꞉ hoke hau pu halemepate ika꞉ honema꞉ta꞉ mo hande limiki haliwekima꞉ hoke hau ota꞉ haka꞉ta꞉pao pimiki yeke handa liekeme hone witelemepe. Ota꞉ dia꞉me. I̱ma꞉ iki pa꞉ta꞉ ota꞉ loa꞉me. Iki make ika꞉ piteleme hoke haumanu na kiaemeka꞉na꞉ta꞉ kota꞉ iki make mo hande Ka꞉lili haliweki homemeke tupa꞉ kone homilimikie. Kutupa make mo hande Sailoa꞉me da pa꞉ta꞉ haliao a꞉emeke da hokulu tieke lombolo hata꞉ lu sesape pieke 18 wanda꞉hali pa꞉ta꞉ta꞉ eki hone witelemepe. Mo hande dama꞉ lieke ekina꞉ta꞉ ika꞉ hoke hauta꞉ mo Diutuseleme haleme wanda꞉hali paeyaona꞉ pimiki hoke hau ota꞉ lombei peake tupa꞉ pimikieki peneme yaasa꞉pe. Ota꞉ dia꞉me. I̱ma꞉ iki pa꞉ta꞉ ota꞉ loa꞉me. Iki make ika꞉ piteleme hoke haumanu na kiaemeka꞉na꞉ta꞉ kota꞉ koto tapake homemeke tupa꞉ kone homilimikie leekeme.

Nose tima꞉ kiliki na a꞉eyeke ekina꞉ onkoluma꞉ pi

Kutupa Yesuma꞉ iki pa꞉ta꞉ onkoluma꞉ pi ma꞉nda꞉ dupa leekeme. Amba꞉ hali ma꞉nda꞉ma꞉ ipika꞉ e tukikina꞉ta꞉ nose ti ma꞉nda꞉ nokopeekeeki hayekeme. Mo halima꞉ta꞉ mo nose kiliki a꞉ela꞉ patema꞉ handolo endi pu hayekepate homeke a꞉nda꞉ na a꞉eyekeme. Koto ekina꞉ta꞉ mo halima꞉ ipika꞉ e pokao hayeke hali pa꞉ta꞉ alota꞉ Handa꞉e. Bapi tepo tukiki pa꞉ta꞉ta꞉ do nose tina꞉ kiliki a꞉ela꞉pe laa handolo endi pu halopate homeke a꞉nda꞉ ota꞉ na a꞉ela꞉me. Koto pa꞉la꞉ ekina꞉ta꞉ do hoke tima꞉ mo epeke kenke pa hameke naata꞉ paama꞉na꞉ poko bae leekeme. Koto leekepate mo e pokaeyeke halima꞉ alota꞉ Yaka tiekeo. Bapi homekena꞉ pa haena꞉ lae. I̱ma꞉ do ti teke hopa꞉liao yu lia kao imanu lekeluekema꞉ loa꞉me. Yaka honema꞉ta꞉ mone mo bapina꞉ kiliki a꞉eya꞉ka꞉na꞉ta꞉ ota꞉ epolo pa꞉la꞉pate na a꞉eya꞉ka꞉na꞉ta꞉ kota꞉ pao poko baena꞉ lolena꞉e laa leekeme.

Hoto Pila꞉ Natena꞉ kone wanda꞉ ma꞉nda꞉ epeaeyekeeki

10 Mo hoto pila꞉ nate ma꞉nda꞉na꞉ Yesuta꞉ mo pi hotu haemeke da ma꞉nda꞉ pa꞉ta꞉ pi walo hayekeme. 11 Koto pa꞉ta꞉ta꞉ hoke temoko pitieke wanda꞉ ma꞉nda꞉ pitiekeme. Kutu pieke ekima꞉ kone mo wanda꞉ta꞉ 18 bapina꞉ yeni mea hao hayeke ekima꞉ mo wanda꞉na꞉ hoki hoi peaota꞉ tindipapeke na yeekeme. 12 Yesuma꞉ mo wanda꞉ hando hao wi la꞉moneaso alota꞉ Wanda꞉o. Neketa꞉ naka꞉ yeni ta paetolo hata꞉ neketa꞉ walekena꞉ ta hale handa꞉e. 13 Koto laa Yesuma꞉ ipika꞉ kiki mo wanda꞉na꞉ loke manda wieke dina꞉ koto kone ipikana꞉ma꞉ ipika꞉ hoki tindi paeyekeme. Koto ekina꞉ta꞉ Koda꞉na꞉ biki mea miniliaeyekeme. 14 Kutu pieke handaa mo pi hotu haemeke da handeteke hayeke halima꞉ta꞉ Yesuma꞉ mo wanda꞉ta꞉ mo Hoto Pila꞉ Natena꞉ kone epeaeyeke handa Yesu yaapo mineke pankeekeme. Koto ekina꞉ ipikana꞉ma꞉ mo wanda꞉hali pa꞉ta꞉ alota꞉ E poka꞉peke nate manuta꞉ yunki mindiki hata꞉ taama꞉ ika꞉ yenimanu epeaena꞉ hone wimika꞉na꞉ta꞉ kota꞉ koto nate nina꞉ a꞉pa꞉peke ya꞉la꞉pate pa do Hoto Pila꞉ Natena꞉ta꞉ ota꞉ dia꞉me leekeme. 15 Mo Tekehalima꞉ ipika꞉ pi hombo peaaso alota꞉ Makeaasa꞉ hau pu haleme haliwekio. Iki ma꞉nda꞉ hondoma꞉ mo Hoto Pila꞉ Natena꞉ ika꞉ kao o donki ma꞉na꞉ make mo ho̱linda꞉ pa꞉ta꞉ mea hama lomba꞉ ta꞉pao ikali na꞉na꞉yeke mea pelimikie. 16 Koto tupa꞉ kone do Eipoloha꞉ma꞉na꞉ tapake wanda꞉ta꞉ hoke temokoma꞉ 18 bapina꞉ tonkao ula꞉ puta꞉ mo Hoto Pila꞉ Natena꞉ta꞉ na ka꞉la꞉pa꞉ tapaena꞉pe laa lota꞉ piekeme. 17 Koto hombo peayeke ekima꞉ta꞉ Yesu ipika꞉ a꞉nda꞉ tunkuliki haliwekima꞉ yaala꞉ma꞉ homolo haena꞉ta꞉ mo wanda꞉halima꞉ta꞉ mo epeke haumanu piekeeki handolo hata꞉ ta꞉na꞉ma꞉ wotu homemekeme.

Masidadi waena꞉ onkoluma꞉ pi

(Ma꞉tiu 13꞉31-32, Maka 4꞉30-32)

18 Yesuma꞉ alota꞉ Koda꞉na꞉ Kilu Tombuao Hala꞉ ekita꞉ alekema꞉ handa꞉la꞉pe laa manda꞉ meanope. 19 Mo Kilu Tombuao Hala꞉ ekita꞉ mo (ki̱mi̱le̱ma꞉ handeke) masidadi wae ale sikita꞉ hali ma꞉nda꞉ma꞉ mea ipika꞉ ena꞉ tande leekeeki opaata꞉ ota꞉ aneke ti hombeleke hao paleke palekena꞉ ba titima꞉ dake hapeke ya꞉la꞉me leekeme.

Palaowa pombei yaasa꞉ yisitina꞉ onkoluma꞉ pi

(Ma꞉tiu 13꞉33)

20 Kutupa Yesuma꞉ paa make lota꞉ pitolo alota꞉ Koda꞉na꞉ Kilu Tombuao Hala꞉ ekita꞉ alekema꞉ manda꞉ mealua꞉pe. 21 Dupa manda꞉ meanoe. Wanda꞉ ma꞉nda꞉ma꞉ mo palaowa pombei yaasa꞉ yisitisiki mea palaowa nu homeke mea apa꞉tao kawasona꞉ dakole dakole pealieke. Kutu pilia꞉ hoki naneta꞉ koto palaowa paeyao pombei ya halieke leekeme.

Dekepeke pota꞉siki

(Ma꞉tiu 713-14, 21-23)

22 Yesuma꞉ mo Diutuseleme da nane opolo poluekema꞉ yeke handaa hosiki da sunu make daoni pa꞉ta꞉manu amba꞉la pominolo hata꞉ pi wala꞉tiki pomiekeme. 23 Kutupieke ma꞉nda꞉ma꞉ Yesu pa꞉ta꞉ lota꞉ pitolo hata꞉ alota꞉ Tekehalio. Koda꞉ma꞉ta꞉ pa tepo tepo wanda꞉hali homeke detena꞉ yeke petelia꞉pe laa leekeme. Yesuma꞉ mo pi hombo peaaso alota꞉ 24 Ikana꞉ma꞉ mo dekepeke pota꞉ kake pa꞉ta꞉ honda꞉ pambuluekema꞉ honkopu hapa꞉peke. Pa ekipeke. Wanda꞉hali wotuma꞉ honda꞉ pambuluekema꞉ taapolo pelemepate honda꞉ pambolo pua꞉pa꞉peke na ya꞉lieke. 25 Mo da teke halima꞉ta꞉ tiao pota꞉ pokilieke. Kutu pia꞉ka꞉na꞉ta꞉ iki hama hata꞉ta꞉ pota꞉ kake kilikili laaso alota꞉ Tiekeo. Niki epomono pota꞉ lomba꞉e lelimipate ipikana꞉ma꞉ hombo peaaso alota꞉ Ikita꞉ I̱ na handoloma꞉ Ikita꞉ hanema꞉ epelemepe laa lelieke. 26 Koto leliepate ikana꞉ma꞉ ipika꞉ pi hombo peaaso dupa lelimikie. Nikita꞉ neke ame̱le̱ mandakena꞉ pita꞉ ne ikali noma꞉ hande make nakana꞉ma꞉ta꞉ mo nika꞉ da sunu pa꞉ta꞉ pimanu wala꞉tiki pomime laa lelimikie. 27 Koto lemekena꞉ ipikana꞉ma꞉ pa do tupa꞉ lelieke. Ikita꞉ hane wanda꞉halipa꞉ I̱ mina꞉pa꞉lao pupa꞉e. Ikita꞉ hoke hau pu haleme wanda꞉halie lelieke. 28 Kutupa ikana꞉ma꞉ta꞉ mo Eipoloha꞉ma꞉ Aisa꞉ke Dieikope make mo potopede haliweki paeyao make mo Koda꞉na꞉ Kilu Tombuao Hala꞉ eki pa꞉ta꞉ halimieki handolo hata꞉ ikita꞉ hama tolu lia꞉ka꞉na꞉ta꞉ kota꞉ ikita꞉ e̱ tieke alo hata꞉ kake lenkene lo halimikie. 29 Wanda꞉halita꞉ mo nate pamba꞉la꞉ nane make nate opa꞉la꞉ nane make mo nepoko yaapo nane make opolo endi peaata꞉ Koda꞉na꞉ Kilu Tombuao Hala꞉ alena꞉ ne pamba꞉la꞉ ekina꞉ a꞉pa pitilimikie. 30 Koto ekina꞉ta꞉ ame do wetepena꞉ haleme wanda꞉hali mandaneta꞉ titina꞉ halimikie. Kutupa titina꞉ haleme wanda꞉halita꞉ wetepena꞉ halimikie leekeme.

Yesuma꞉ mo Diutuseleme dana꞉ a꞉ta꞉ma꞉ homeekeeki

(Ma꞉tiu 23꞉37-39)

31 Koto dina꞉ kone mandane Pa꞉tisi haliwekima꞉ Yesu pa꞉ta꞉ a꞉pa alota꞉ Kini Hetodima꞉ neke luekema꞉ taapa꞉la꞉me. Neketa꞉ do da yu mina꞉pa꞉lao ota꞉ ame do kone pua꞉peke lemekeme.

32 Yesuma꞉ ika꞉ pi hombo peaaso alota꞉ Iki puata꞉ koto hande tikene kika pa꞉ta꞉ dupa lapa꞉peke. I̱ma꞉ta꞉ ameta꞉ mo hoke temokomanu tolu lia make yenimanu epeaasoma꞉ laata꞉ belia make kutupata꞉ tuneketa꞉ ya e paeyaalueke laa lapa꞉peke. 33 Koto pa꞉la꞉pate ame belia tuneketa꞉ ya pota꞉na꞉ pa yopu pitulueke. Pa ekipeke. Mo Koda꞉na꞉ potopede halita꞉ da ma꞉nda꞉ pa꞉ta꞉manu lita꞉la꞉ta꞉ ana꞉ na pa꞉la꞉pate pa Diutuseleme da tukiki pa꞉ta꞉ homeke ana꞉ pa꞉la꞉me leekeme.

34 Diutuseleme Diutuselemeo. A꞉ta꞉ tiekee. Nakana꞉ma꞉ta꞉ mo potopede haliwekita꞉ liki hau ombu peaata꞉ toopima꞉ lu homao haleme. I̱ma꞉ta꞉ ikita꞉ mo hande wanda꞉ koka꞉la꞉ma꞉ ipika꞉ ikiki sunu ipika꞉ popake itiki oto pa꞉ta꞉ mea momba꞉lao hala꞉ tupa꞉ I̱ma꞉ make koto tupa꞉ kone naka꞉ wekiwandiki ya kikima꞉ hapisa꞉ pu halopate nakana꞉ma꞉ kiao haleme. 35 Koto ekina꞉ta꞉ naka꞉ yeni pu haleme data꞉ mina꞉pa꞉laemeka꞉na꞉ta꞉ pa taake halieke. I̱ma꞉ neke pa꞉ta꞉ ota꞉ pi do la kitolo handa꞉e. Ame do ane kini pea pua nakana꞉ma꞉ I̱ pa꞉ta꞉ta꞉ Tekehalina꞉ biki mea ipula꞉ hali pa꞉ta꞉ Ta꞉na꞉e pi loluekema꞉ tiki tiki yao a̱i̱ na haeka꞉na꞉ta꞉ kota꞉ I̱ a̱i̱ na handilimikie alome leekeme.

Copyright information for `SSX