Luke 21

Kosa꞉piki wanda꞉na꞉ haleekeeki

(Maka 12꞉41-44)

Yesuma꞉ handa꞉ moneayekepate mo tembolo da pa꞉ta꞉ mani pambo haemeke bokosina꞉ hamoko haliwekima꞉ ika꞉ pa hameke halemeke manimanu pamboloendi pimikieki handeekeme. Kutupa make natehali kosa꞉piki wanda꞉ sikima꞉ ipika꞉ manisiki toea yaapoma꞉ handekeeki a꞉pa lopaeyekeeki handeekeme. Kotoeki handolo Yesuma꞉ alota꞉ I̱ma꞉ iki pa꞉ta꞉ ota꞉ pi alome. Do natehali kosa꞉piki wanda꞉ sikima꞉ lopaasa꞉eki sikita꞉ ota꞉ tieke alo hata꞉ mo mandane wanda꞉halina꞉ wieke ekita꞉ lu ankulala꞉me. Pa ekipeke ikana꞉ma꞉ ika꞉ mani tieke putupu mea putupiliki wimiki ekimanu kone mea lopaemepate do wanda꞉ta꞉ natehali hata꞉ ipika꞉ wia hayekeeki paeyao mea lopaeya꞉me. Ipika꞉ ne hamba꞉pekeeki kone mea lopaeya꞉me leekeme.

Yesuma꞉ mo tembolo dana꞉ pulu pieke ekimanu la haleekeeki

(Ma꞉tiu 241-2, Maka 131-2)

Mandane disaipolo haliwekima꞉ta꞉ mo tembolo data꞉ Epekee laa ipika꞉ epeke toopimanu pita꞉ make Koda꞉ pa꞉ta꞉ pa hameke halemeke alemanu tonka꞉na꞉ Handa꞉e laa pi alo pitimikime. Koto ekina꞉ Yesuma꞉ alota꞉ Do handeleme alemanu paeyaota꞉ ika꞉ nate opolo epea꞉ka꞉na꞉ta꞉ toopi manda ma꞉nda꞉ na tapa꞉ pelia hata꞉ paeyao mea lopaalieke leekeme.

Ka꞉nda꞉manu epolo pa꞉la꞉eki

(Ma꞉tiu 243-14, Maka 133-13)

Koto leekeeki ikana꞉ma꞉ opua alota꞉ Disao. Do aleeki manuta꞉ handima꞉ ipiliepe. Kutupa ipuluekema꞉ haena꞉ta꞉ eki hau pulu pa꞉la꞉eki handuluma꞉pe laa lota꞉ pimikime. Yesuma꞉ alota꞉ Ma꞉nda꞉ma꞉ iki makeaama꞉na꞉ wotu handeteke hapa꞉peke. Hali wopuma꞉ ya biki la꞉paleke ipulu alota꞉ I̱ta꞉ ipikie alo hata꞉ hande nate a꞉pa꞉la꞉mee lolo pelemepate ikana꞉ma꞉ iki na ta꞉lia꞉pa꞉peke. Ikana꞉ma꞉ Tapake ma꞉nda꞉ma꞉ tapake ma꞉nda꞉ yaapo a꞉nda꞉ pita꞉la꞉me o Homeke tapakema꞉ kone a꞉nda꞉ pu alu alu pita꞉la꞉me pi opimika꞉na꞉ta꞉ kota꞉ ikana꞉ma꞉ paala꞉ma꞉ na homu hapa꞉peke. Dupiki haumanu amba꞉la a꞉pa꞉peke ya꞉la꞉pate pa mo hande paetolo nateta꞉ teke pa꞉ta꞉ laa na pita꞉la꞉me.

10 Yesuma꞉ pi ma꞉nda꞉ ombu alo hata꞉ alota꞉ Kenke homekena꞉ amitonu tiao pua kenke ma꞉nda꞉na꞉ ami tapu a꞉nda꞉ pilimikie. Kini hali homekena꞉ amitonu tiao kini hali ma꞉nda꞉na꞉ ami tapu a꞉nda꞉ pilimikie. 11 Kutu pilia꞉ tomona꞉ta꞉ kenke yu paeyao pa꞉ta꞉ paala꞉ piki yu momeni tiekemanu pea make tea꞉ ki pambo pea make yeni ki tieke make ipilieke. Kutupata꞉ oli ya nane na handeke haumanu make peaata꞉ ta꞉ta꞉ ta꞉ta꞉ pea paala꞉ wopupiki aneke haumanu wotu handilimikie.

12 Dupiki haumanu puluekema꞉ haena꞉ta꞉ niki amba꞉la mina꞉ yombuata꞉ oni pi hotu haleme da pa꞉ta꞉ niki pi yokaalu puemena꞉ hala꞉ moneaota꞉ dipula mea pitalimikie. Kutupa ikita꞉ yaka bikina꞉ kone mo kini haliwekimanu make handeteke pilimi haliwekina꞉ leke popelekena꞉ hatuku ipilimikie. 13 Koto nateta꞉ ikana꞉ma꞉ mo hande Pi Seliapo la halo peleme ekina꞉ waleke wita꞉la꞉me. 14 Mo nate a̱i̱ na miki haena꞉ kone titina꞉ amba꞉la ika꞉ lolo polome pina꞉ hone ti na yokulueke laa a̱i̱ telipea꞉peke. 15 Pa ekipeke I̱ma꞉ iki pa꞉ta꞉ kutupiki pimanu make epeke hone make kua꞉ka꞉na꞉ta꞉ ika꞉ a꞉nda꞉ tunkuliki haliweki homeke a꞉nda꞉ma꞉ make na tumbalimikie. Kutupa ika꞉ pi na yoko baalimikie. 16 Ika꞉ apa꞉ ama꞉ma꞉ make ika꞉ kame tonuma꞉ make ika꞉ tapake tonuma꞉ make ika꞉ yankeke tonuma꞉ make iki hala꞉ moneaya꞉ka꞉na꞉ta꞉ mandaneta꞉ ota꞉ homomena꞉ limikie. 17 Yaka biki melemeke handaa wanda꞉hali paeyaoma꞉ iki ota꞉ kiaalimikie. 18 Kutu pulu pelemepate ika꞉ amboke itiki homeke kone na alupilieke. 19 Honkopu hao hapa꞉peke. Pa ekipeke dupiteleme hau manuma꞉ta꞉ ika꞉ kone petelimikie leekeme.

Mo Diutuseleme hoeyaaso pulu piekeeki

(Ma꞉tiu 2415-21, Maka 1314-19)

20 Ikana꞉ma꞉ mo Diutuseleme da a꞉nda꞉ ami titima꞉ dupasa꞉eki handemeka꞉na꞉ta꞉ kota꞉ ikana꞉ma꞉ta꞉ teke pa꞉ta꞉ ipiki hoeyaalieke hone wilipikie. 21 Koto dina꞉ta꞉ mo Diudia nane halo peleme wanda꞉halita꞉ mo potemanu pa꞉ta꞉ pindipa pena꞉e. Ma꞉nda꞉ epi mo daonimanu pa꞉ta꞉ haya꞉ka꞉na꞉ta꞉ mina꞉pa꞉laena꞉e. Kutupa ma꞉nda꞉ epi mo da kenke tea꞉na꞉ haya꞉ka꞉na꞉ta꞉ pa mo daoni pa꞉ta꞉ ota꞉ na pena꞉e. 22 Pa ekipeke do hau paeyaota꞉ hande Baiboloma꞉ la꞉la꞉ tupa꞉ Mo tanda mia꞉peke natemanu la꞉la꞉ nate peneme yaaluekema꞉ pilieke. 23 Koto nate nina꞉ta꞉ mo weki weleke haleme wanda꞉weki o weki panake hopulu wia haleme wanda꞉weki ika꞉ mulu peleme tandana꞉ paala꞉e. Ota꞉ hoke paala꞉ piki haumanu make do kenkena꞉ ipilieke. Kutupa Koda꞉na꞉ tanda peaasa꞉ ekita꞉ do wanda꞉hali pa꞉ta꞉ ipilieke. 24 Mandane wanda꞉halita꞉ kepete dolo manuma꞉ lu homao mandaneta꞉ mandane kenke yu ma꞉nda꞉ nane dipula leke mea pua kutupa mo Diendaili wanda꞉halima꞉ta꞉ Diutuseleme tumbuatia pua ika꞉ nate mulu epea꞉ka꞉na꞉ mina꞉pa꞉lalimikie.

Wanda꞉halina꞉ Eiyeke epolo pa꞉la꞉eki

(Ma꞉tiu 24꞉29-31, Maka 13꞉24-27)

25 Oli ya naneta꞉ oli natena꞉ kaisepona꞉ hombulanka꞉ paeyaona꞉ pate haumanu pilieke. Do kenke naneta꞉ mandane da kenke paeyaoma꞉ta꞉ Eki pumana꞉pe laa hone mataaso hata꞉ mo dawalana꞉ ho tiekema꞉ e̱ lelieke make dawala telia꞉ ekina꞉ make paala꞉ma꞉ homo halimikie. 26 Wanda꞉hali paala꞉ma꞉ homolo hata꞉ mo kenke paeyao pa꞉ta꞉ eki hau opolo ipula꞉pe laa la꞉ma꞉ lulu pitolo hata꞉ homilimikie. Mo ya nane hala꞉ ale manuta꞉ ika꞉ hao haleme tupa꞉ na hake pa nane wato baalieke. 27 Koto tomona꞉ kone Wanda꞉halina꞉ Eiyeketa꞉ oli koa pa꞉ta꞉ honkopu tieke make pa̱a̱ peaasa꞉eki ame̱le̱ opolo ipilieke. 28 Kutupiki haumanu a꞉nda꞉ kini pea pia꞉ka꞉na꞉ta꞉ kota꞉ ikana꞉ma꞉ tiao hata꞉ ika꞉ ambokemanu mina꞉liapa꞉peke. Pa ekipeke ika꞉ deto hao hamena꞉ pa꞉ta꞉la꞉la꞉ ekita꞉ teke pa꞉ta꞉ ya꞉leke loa꞉me leekeme.

Nose manda꞉ mu onkoluma꞉ pi ala꞉eki

(Ma꞉tiu 24꞉32-35, Maka 13꞉28-31)

29 Kutupa Yesuma꞉ dupiki onkoluma꞉ pi ma꞉nda꞉ leekeme. Mo hande nose ti pita꞉ mandane timanu make hone wotu wia꞉pa꞉peke. 30 Mo hande ika꞉ katakemanu kini pea tindiki lia꞉ka꞉na꞉ta꞉ kota꞉ hatuhama ti tala꞉ nate ipuluekema꞉ pita꞉la꞉me hone u halememe. 31 Kota꞉ koto tupa꞉ kone hande loa꞉ alemanu ipula꞉eki kini pea handemeka꞉na꞉ta꞉ teke pa꞉ta꞉ Koda꞉na꞉ Kilu Tombuao Hala꞉ Ekita꞉ ipuluekema꞉ hala꞉me hone wilimikie.

32 Iki pa꞉ta꞉ ota꞉ pi alome. Do haleme tapake paeyao a̱i̱ na homeke halimi pita꞉ta꞉ I̱ma꞉ loa꞉ alemanu paeyao amba꞉ ipilieke. 33 Oli ya do kenke yaapota꞉ paelo pa꞉la꞉pate yaka pi lo haloeki manuta꞉ na paelieke leekeme.

Wopu handeteke hapa꞉peke leekeeki

34 Ika꞉ kone wopu handeteke hapa꞉peke. Ne tieke pamba make honkopu hake hoke ikali wopu na make do kenkena꞉ hone pa꞉la꞉ ekina꞉ we pamba꞉la꞉ ekima꞉ iki ota꞉ na tumbaena꞉ lapa꞉peke. Pa ekipeke mo Tekehalina꞉ Natema꞉ ikita꞉ wisakema꞉ pita꞉la꞉ tupa꞉ koto kone 35 tamilieke la loa꞉me. Koto Nateta꞉ do kenke honiki paeyao pa꞉ta꞉ haleme wanda꞉hali pa꞉ta꞉ ipilieke. 36 Koto ekina꞉ leke leke lo hata꞉ hoto paeyao yeni pu hapa꞉peke. Pa ekipeke ikana꞉ma꞉ dupiki haumanu tukiki pa꞉ta꞉ kone honkopu hau epeke tupa꞉ opolo pua mo Wanda꞉halina꞉ Eiyekena꞉ leke popelekena꞉ hamena꞉yeke loa꞉me leekeme.

37 Yesuma꞉ koto nate manuta꞉ mo tembolo da pa꞉ta꞉ pi walaata꞉ welealo nane nina꞉ta꞉ mo Olipi Potena꞉ pua pitu timba꞉ latiki pu hayekeme. 38 Kutupa wanda꞉hali paeyaota꞉ ipika꞉ pi opulueke alo timba tiao da ka꞉la꞉paaso mo tembolo da pa꞉ta꞉ pua꞉tiki pimikime.

Copyright information for `SSX