Matthew 19

Tooli ka꞉taalu pita꞉la꞉ ekina꞉ mana꞉ pi

(Maka 101-12)

Koto piekeeki manuna꞉ pimanu la paeyeketa꞉ Yesuma꞉ mo Ka꞉lili kenke mina꞉pa꞉laota꞉ mo Diodani ikali mone tea꞉na꞉ wieke Diudia kenke nane peekeme. Wanda꞉hali wopuma꞉ ipika꞉ hoki nane teli mea pemekeme. Kutu pimikita꞉ Yesuma꞉ koto pa꞉ta꞉ ika꞉ hoke yenimanu paeyao epeawayekeme.

Mandane Pa꞉tisi haliwekima꞉ ipiki tamuluekema꞉ yeke ipiki pa꞉ta꞉ lota꞉ pita꞉la꞉ pi ma꞉nda꞉ dupa lemekeme. Hali ma꞉nda꞉ma꞉ ota꞉ pa ipika꞉ hone pa꞉la꞉ tupa꞉ ipika꞉ wanda꞉ kiaaso yoka꞉la꞉ ekita꞉ mo nika꞉ Lo Pi Ula꞉ ekima꞉ta꞉ waleke ma꞉nda꞉ wiala꞉pe laa lota꞉ pimikime.

Yesuma꞉ ika꞉ pi hombo peaaso alota꞉ Mo hande wanda꞉hali kini peao Wepieke Tekehalima꞉ta꞉ hali pita꞉ wanda꞉ yaapo wepiekeme la꞉la꞉ Baibolona꞉ wape pea ula꞉ pita꞉ ikana꞉ma꞉ na yata꞉pa alemepe. Kota꞉ koto hali wanda꞉ yaapo wepieke pita꞉ma꞉ Koda꞉ma꞉ alota꞉ I̱ma꞉ hali pita꞉ wanda꞉ yaapo wepueke handaata꞉ mo halima꞉ ipika꞉ apa꞉ ama꞉ mina꞉pa꞉lao ipika꞉ wanda꞉ yaapo ta꞉ma꞉ni peaata꞉ tooli homeke halipipikie leekeme. Koto leeke ekina꞉ta꞉ ipilikita꞉ yaapo na halo pelepepate ota꞉ homeke halipipikie. Koto pa꞉leke handaata꞉ koto hauta꞉ ota꞉ Koda꞉ma꞉ ta꞉ma꞉ni peawaasa꞉ hau yeleketa꞉ wanda꞉hali ma꞉nda꞉ma꞉ ota꞉ na ka꞉taapeke alee leekeme.

Mo Pa꞉tisi haliwekima꞉ koto Yesuna꞉ pi opuolo hombo peaaso alota꞉ Kotota꞉ ota꞉ ya꞉ka꞉na꞉ta꞉ kota꞉ mo Mosesi ipika꞉ wape pea ula꞉ pima꞉ alota꞉ Hali homeke ipika꞉ wanda꞉ kiaya꞉ka꞉na꞉ta꞉ ipikana꞉ma꞉ mo kiaasa꞉ wanda꞉ pa꞉ta꞉ Neke ota꞉ kiao tapaasome la꞉la꞉ pi wape pea halaa pena꞉ tapaapeke la꞉la꞉ ekita꞉ pa ekipeke wape pea wia pa꞉la꞉pe laa lota꞉ pimikime.

Yesuma꞉ ika꞉ pi hombo peaaso alota꞉ Mosesima꞉ koto piki wanda꞉ kiao tapaasa꞉ pi uleke wiki hauta꞉ kota꞉ ika꞉ puki ota꞉ taka꞉la pa pa꞉leke handolo hata꞉ wia pa꞉la꞉me. Koto piekepate mo hande Koda꞉ma꞉ wanda꞉hali kini peayeke toma꞉na꞉ta꞉ kutu piki hau na piekeme. Kota꞉ ameta꞉ I̱ma꞉ iki pa꞉ta꞉ dupa alome. Hali ma꞉nda꞉na꞉ wanda꞉ma꞉ta꞉ ipilika꞉ tooli halepeeki na hoeyaasa꞉pate pa mo halima꞉ ipika꞉ kone kiao tapao wanda꞉ ma꞉nda꞉ mia꞉ka꞉na꞉ta꞉ kota꞉ koto halima꞉ ipika꞉ kone mo ipilika꞉ tooli halepeeke ka꞉tao hoeyaasa꞉me leekeme.

10 Koto leekeeki opua ipika꞉ disaipolo haliwekima꞉ Yesu pa꞉ta꞉ alota꞉ Tooli pa꞉ta꞉ kutu piki hau wia꞉peke ya꞉ka꞉na꞉ta꞉ kota꞉ wanda꞉ na miki pa hata꞉ta꞉ epilieke lemekeme.

11 Yesuma꞉ mo pi hombo peaaso alota꞉ Do walolo pita꞉ pa paeyaoma꞉ opua miniki hapeke na ya꞉la꞉pate pa mandaali epi Koda꞉ma꞉ kutu pina꞉ la꞉la꞉ haliwekima꞉ homeke opua miniki halimikie. 12 Yesuma꞉ iki pa꞉ta꞉ opua꞉pe laata꞉ Ta꞉ta꞉ ta꞉ta꞉ piki haliweki halememe. Mandane haliwekita꞉ ika꞉ ama꞉na꞉ weleke pa꞉ta꞉ kone hali atua ma꞉nda꞉la꞉ ekima꞉ pu make mandane haliwekita꞉ wanda꞉halima꞉ ki̱a̱yeke ekima꞉ pu make kutupa mandane haliwekima꞉ta꞉ Koda꞉na꞉ Kilu Tombuao Hala꞉eki pa꞉ta꞉ hone u pitolo hata꞉ wanda꞉ mina꞉la꞉ hauta꞉ kiao halememe. Do pi opua miniki hapeke ya꞉la꞉ somema꞉ miniki haena꞉e leekeme.

Yesuma꞉ weki wandiki sunu wamo puma꞉ puma꞉ piekeeki

(Maka 1013-16, Luku 1815-17)

13 Mandane wanda꞉halima꞉ weki wandiki sunu Yesu ipika꞉ kikima꞉ wataaso hata꞉ yeni pina꞉yeke hatuku epemekeme. Kutu pimieki handolo mo ipika꞉ disaipolo haliwekima꞉ iki hando alo hata꞉ tolu limikime. 14 Kutu pimikipate Yesuma꞉ alota꞉ Weki wandikisunu make I̱ pa꞉ta꞉ epena꞉ma꞉ sa꞉sa꞉ na pea꞉pa꞉peke. Pa ekipeke do weki wandikima꞉ handeke wanda꞉halita꞉ mo hepenina꞉ Kilu Tombuao Hala꞉eki ana꞉na꞉ handilimikie. 15 Koto laata꞉ ipikana꞉ma꞉ mo weki wandiki manda ipika꞉ kiki wiaata꞉ koto pa꞉ta꞉ mina꞉pa꞉lao peekeme.

Hamoko hayeke panake hali

(Maka 10꞉17-31, Luku 1818-30)

16 Nate homeke ma꞉nda꞉na꞉ta꞉ hali homeke Yesu pa꞉ta꞉ a꞉pa alota꞉ Disao. I̱ma꞉ deto hala꞉eki muluekema꞉ta꞉ epeke hau ma꞉nda꞉ handoeki peonope laa lota꞉ piekeme.

17 Yesuma꞉ ipika꞉ pi hombo peaaso alota꞉ Mo epeke hau pea꞉peke ekita꞉ I̱ pa꞉ta꞉ pa ekipeke lota꞉ pitelepe. Mo ota꞉ a꞉pa꞉la꞉ halita꞉ homeke homeke hala꞉me. Koto ekina꞉ nakana꞉ma꞉ mo deto hala꞉eki muluekema꞉ hone pia꞉ka꞉na꞉ta꞉ kota꞉ mo hande Lo Pi Ula꞉eki paeyao wopu telia pu hapeke leekeme.

18 Mo halima꞉ta꞉ Handoeki pionope leeketa꞉ Yesuma꞉ alota꞉ Hali ma꞉nda꞉ ota꞉ homena꞉ na lia꞉peke. Kutupa hali ma꞉nda꞉na꞉ wanda꞉na꞉ hakopu na tunkula꞉peke. Pake na napeke. Yayapiki pi na lapeke. Makeaaso kone ma꞉nda꞉ ma̱leke na lia꞉peke. 19 Naka꞉ ama꞉ apa꞉ yaapona꞉ pi opua꞉peke. Nakana꞉ma꞉ neke naka꞉ kone pukima꞉ homa꞉ handeteke hale tupa꞉ mo mandane mandane wanda꞉hali pa꞉ta꞉ make koto tupa꞉ kone pea꞉peke leekeme.

20 Mo panake halima꞉ hombo peaaso alota꞉ Koto ale pi ula꞉eki paeyaota꞉ telia pu halome. Handoeki ma꞉nda꞉ make peonope leekeme.

21 Yesuma꞉ ipiki pa꞉ta꞉ alota꞉ Naka꞉ honema꞉ I̱ta꞉ ota꞉ epeke haupiki some halueke hone wika꞉na꞉ta꞉ kota꞉ mo naka꞉ wia hale ala꞉ta꞉ ala꞉ta꞉ paeyao mandane wanda꞉halima꞉ hambena꞉ laata꞉ mo milipi manita꞉ mandane natehali wanda꞉hali pa꞉ta꞉ halehale pea꞉peke. Kutu pika꞉na꞉ta꞉ kota꞉ nakana꞉ma꞉ mo hepeni tukiki pa꞉ta꞉ta꞉ ale epeke epeke wopu mu halipikie. Koto ekina꞉ta꞉ ya hoki telia꞉peke leekeme.

22 Mo panake halima꞉ koto pi opitolota꞉ ipikita꞉ hamoko hali tieke hayeke ekima꞉ pukima꞉ ka꞉nda꞉ma꞉ homa꞉ paleke peekeme.

23 Kutu pieke Yesuma꞉ ipika꞉ disaipolo haliweki pa꞉ta꞉ alota꞉ I̱ma꞉ iki pa꞉ta꞉ ota꞉ pi alome. Hamoko wanda꞉halima꞉ mo hepenina꞉ Kilu Tombuao Hala꞉ pa꞉ta꞉ pua꞉peketa꞉ ota꞉ ana꞉ siki na pilieke. 24 Iki pa꞉ta꞉ paa taa alo handa꞉e. Mo kemolo ma꞉na꞉ma꞉ mo no̱i̱ ka꞉ka꞉na꞉ pa꞉ta꞉ ana꞉na꞉ honda꞉ pamba yopua꞉peke ekina꞉ ka꞉nda꞉ta꞉ pa mo hamoko halima꞉ Koda꞉na꞉ Kilu Tombuao Hala꞉ tukiki pa꞉ta꞉ pua꞉peke ekina꞉ mia꞉peke ka꞉nda꞉ tupa꞉ na milieke alome leekeme.

25 Ipika꞉ disaipolo haliwekima꞉ koto pi opitolo iki ota꞉ wopu tola꞉tia pominolo hata꞉ alota꞉ Koto pa꞉la꞉ ekina꞉ta꞉ kota꞉ epima꞉ ota꞉ da꞉ta꞉la꞉eki mia꞉peke ya꞉la꞉pe lemekeme.

26 Yesuma꞉ iki handa꞉ hake witolo alota꞉ Koto hauta꞉ wanda꞉halima꞉ ika꞉ kone koto pea꞉peke na ya꞉la꞉pate Koda꞉ma꞉ homeke ana꞉ pa꞉la꞉me. Koda꞉ma꞉ta꞉ hau paeyao pea꞉peke ya꞉la꞉me leekeme. 27 Pidama꞉ Yesu pa꞉ta꞉ pi alo alota꞉ Opi. Nikana꞉ma꞉ ala꞉ta꞉ ala꞉ta꞉ paeyao mina꞉pa꞉lao naka꞉ hoki nane telioloma꞉me. Koto ekina꞉ta꞉ nikana꞉ma꞉ta꞉ aleke muluma꞉pe leekeme.

28 Yesuma꞉ hombo peaaso alota꞉ I̱ma꞉ ota꞉ pi alome. Mo paa kini pilia꞉ panake di kini pia꞉ka꞉na꞉ta꞉ kota꞉ mo wanda꞉halina꞉ Eiyekema꞉ ipika꞉ ota꞉ seliapo piki pa̱a̱ tiekema꞉ hopiliaasa꞉ you halina꞉ sea manda pitia꞉ka꞉na꞉ta꞉ kota꞉ koto toma꞉na꞉ta꞉ iki yaka 12 disaipolo haliweki make mo Isulaina꞉ 12 tapake handeteke haluekema꞉ ikana꞉ma꞉ mo iki handeteke hala꞉ sea manda pitilimikie. 29 Kutaa make mo mandaali epi a꞉nda꞉ma꞉ I̱ teliolo hata꞉ ika꞉ da o ika꞉ hameketiti o ana꞉titi o apa꞉ ama꞉ o weki wandiki sunu o kenkemanu make mina꞉pa꞉laemeka꞉na꞉ta꞉ kota꞉ do kenkena꞉ hata꞉ kone mo ika꞉ mina꞉pa꞉laleme ale manuta꞉ paa 100 tupa꞉ lombei peao meata꞉ deto hala꞉eki make milimikie. 30 Koto pa꞉la꞉pate ame do biki tieke ula꞉ mandane wanda꞉hali woputa꞉ wetepe haena꞉ laata꞉ mo ame do biki na ula꞉ mandane wanda꞉hali woputa꞉ titina꞉ halo yapilimikie.

Copyright information for `SSX