Matthew 2

Nate opa꞉la꞉ nane haemeke kimisu haliweki

Mo hande Hetodi kini hayeke dina꞉ta꞉ Yesu Diudia kenke pa꞉ta꞉ hayeke da Beteleha꞉ma꞉ nane mendiekeme. Hosiki hao hoki naneta꞉ hombulanka꞉ yata꞉pu haemeke mandane haliwekima꞉ nate opa꞉la꞉ nanema꞉ yama꞉ Diutuseleme da nane a꞉pa lota꞉ pitolo alota꞉ Mo hande Diu wanda꞉halina꞉ kini halo pa꞉la꞉ panake weki ma꞉nda꞉la꞉ wekita꞉ hando pa꞉ta꞉ hala꞉pe. Ipika꞉ hombulanka꞉ nate opa꞉la꞉ nanema꞉ opeeke nikana꞉ma꞉ handaa ipiki pa꞉ta꞉ panda꞉ puluekema꞉ epoma꞉me lemekeme. Kini Hetodima꞉ koto lemekeeki opuaata꞉ ipiki make mo Diutuseleme wanda꞉hali paeyaoma꞉ make penkilipa꞉tia pomimikime. Hetodima꞉ mo yeni peao haemeke you haliweki make mandane pi ula꞉eki walo hala꞉ haliweki tonka꞉na꞉ wi la꞉ mea momba꞉laa iki pa꞉ta꞉ lota꞉ pitolo alota꞉ Mo Ketisota꞉ hando pa꞉ta꞉ yama꞉ mendilia꞉pe laa iki pa꞉ta꞉ lota꞉ piekeme. Ikana꞉ma꞉ alota꞉ Mo hande Diudia kenke pa꞉ta꞉ ula꞉ daoni Beteleha꞉ma꞉ pa꞉ta꞉ mendilieke laa hombo peaaso alota꞉ Mo amba꞉ haemeke potopede haliwekima꞉ta꞉ dupa wape pa꞉la꞉me.

Diudia kenke pa꞉ta꞉ ula꞉ daoni Beteleha꞉ma꞉o. Neketa꞉ mo Diudiana꞉ biki ula꞉ daoni manuna꞉ hoki nane na haleme.
Pa ekipeke. Neke pa꞉ta꞉ta꞉ mo You hali homeke ya Isulai wanda꞉hali handeteke hawaluekema꞉ ipilieke laa wape pa꞉la꞉me leekeme.
Koto ekina꞉ta꞉ Hetodima꞉ mo hombulanka꞉ ota꞉ kini pea opeeke nate weiluekema꞉ mo hande nate opa꞉la꞉ nanema꞉ epemeke kimisu haliweki a꞉mbao wi la꞉ mea pi hotimikime. Ika꞉ pimanu opuaata꞉ ipikana꞉ma꞉ iki pa꞉ta꞉ alota꞉ Mo hande weki yopu siki weilu pupe la alota꞉ Mo weki handa꞉ wimika꞉na꞉ta꞉ kota꞉ I̱ make ipiki pa꞉ta꞉ panda꞉ pulu puluekema꞉ a꞉pa la kia꞉pa꞉peke leekeme.

Ikana꞉ma꞉ ipika꞉ pi opuaa Diutuseleme mina꞉pa꞉lao pulu hata꞉ mo amba꞉ hande handemeke hombulanka꞉ kone paa handemekeme. Koto hande hombulanka꞉ paa handolo hata꞉ta꞉ ika꞉ pukima꞉ta꞉ ta꞉na꞉ wopu homemekeme. Mo hombulanka꞉ta꞉ ika꞉ leke popeleke nanema꞉ a̱i̱ puaata꞉ mo weki wia pitieke da holu manda handa꞉niao hayekeme. 11 Kutu pieke handa ikana꞉ma꞉ mo da tukiki pa꞉ta꞉ honda꞉ pamba pua mo wekita꞉ ipika꞉ inkiki Metima꞉ wia pitiekeeki handaata꞉ ika꞉ tumiki yotuao panda꞉ puniao pita꞉ ipika꞉ biki yeiya꞉ laemekeme. Kutu polo hata꞉ta꞉ ika꞉ nu pa꞉ta꞉ mendimiki yenki tieke alemanu kolo make mo lanka꞉ yankea꞉ka꞉na꞉ totopopiki lumu opa꞉la꞉ lanka꞉ siki make mo totopo yolepiki ti pankeke ale make toku mea ipiki pa꞉ta꞉ halemekeme. 12 Kutaata꞉ Koda꞉ma꞉ iki pa꞉ta꞉ alota꞉ Hetodi pa꞉ta꞉ paa na pua꞉pa꞉peke laa leeke handata꞉ pota꞉ ma꞉nda꞉ nanema꞉ paka꞉lao ika꞉ da yu nane la꞉ka꞉la pemeekeme.

Idiepi nane pindipa pemekeeki

13 Mo hande kimisu haliweki pemeke hoki naneta꞉ mo Tekehalina꞉ enisoloma꞉ Diosepe pa꞉ta꞉ upana꞉ walolo alota꞉ Hetodima꞉ mo wekisiki luluekema꞉ weilieke. Koto ekina꞉ta꞉ tiao mo weki ankula꞉ hatuku mea Idiepi nane pindipa pua I̱ma꞉ paa la꞉ka꞉la pua꞉pa꞉peke lolo poloeki handeteke hapa꞉peke. 14 Koto leekeeki opuaata꞉ Diosepema꞉ tiao ipika꞉ weki ankula꞉ hatuku mea koto timba kone mo da mina꞉pa꞉lao Idiepi nane pemekeme. 15 Koto pa꞉ta꞉ puaata꞉ Hetodi homena꞉ yeke yu wia haemekeme. Kutu pimiki ekima꞉ta꞉ mo hande Tekehalima꞉ ipika꞉ potopede hali pa꞉ta꞉ yama꞉ pi la꞉ witolo alota꞉ Ya wekio. Idiepi kenke mina꞉pa꞉lao epoe laa la꞉ ua꞉ pi yaaluekema꞉ piekeme.

Wekiwandiki lia꞉peke pi

16 Hetodima꞉ta꞉ mo hande nate opa꞉la꞉ nane hao epemeke kimisu hali wekima꞉ta꞉ ipiki makeao pemekeeki handaata꞉ ipikana꞉ma꞉ mineke tieke pankeekeme. Koto ekina꞉ta꞉ ipikana꞉ma꞉ mo Beteleha꞉ma꞉ da teke pa꞉ta꞉ make nepoko nepoko haemeke damanu pa꞉ta꞉ make ika꞉ bapi yaapo lombei na piki wekitonu paeyao homena꞉ lu paeyaapa꞉peke laa la꞉ wiekeme. Mo hande kimisu haliwekima꞉ hande titina꞉ hombulanka꞉ opeeke nate ipiki pa꞉ta꞉ la halemekeeki Hetodima꞉ hone puaata꞉ dupiki wekitonu homeke lia꞉peke ya꞉la꞉me leekeme. 17 Do hau paeyao pieke ekita꞉ mo hande amba꞉ potopede Dietemaiyama꞉ la꞉ wiekeeki yaeyekeme. Koto ipikana꞉ma꞉ leeke pita꞉ dupa

18 Mo Lama kenke naneta꞉ pi ho̱la̱꞉make ma꞉nda꞉ opitelememe.
Wanda꞉ homeke ma꞉nda꞉ma꞉ ka꞉nda꞉ tiekema꞉ homolo hata꞉ e̱ tieke ala꞉me.
Leisoloma꞉ ipika꞉ wekiwandikina꞉ e̱ tieke ala꞉me.
Ipika꞉ wekiwandiki paeyao homemeke handaa wanda꞉weki ma꞉nda꞉ma꞉ ipiki ta꞉na꞉ma꞉ homa꞉tiao tamba꞉ mina꞉ lapeketa꞉ kiaasa꞉me laa leekeme.

Idiepi mina꞉pa꞉lao paa epemekeeki

19 Mo hande Kini Hetodi homeekeeki hoki naneta꞉ Diosepeta꞉ Idiepi kenke pa꞉ta꞉ pa haena꞉ mo enisolo homekema꞉ ipika꞉ upa pa꞉ta꞉ opolo a꞉pa alota꞉ 20 Mo hande weki luluekema꞉ taapeme haliwekita꞉ homememe. Koto ekina꞉ neketa꞉ tiao mo weki ankula꞉ hatuku Idiepi mina꞉pa꞉lao Isulai kenke nane paa pua꞉pa꞉peke leekeme. 21 Koto leeke Diosepema꞉ tiao mo weki ankula꞉ hatuku mea mina꞉ Isulai kenke nane pemekeme.

22 Pate Akelosima꞉ ipika꞉ ateke Hetodi mo Diudia kenke Kini halina꞉ anketeke ma꞉la꞉me pi Diosepema꞉ opuaata꞉ koto kenke nane pua꞉peke paala꞉ma꞉ homeekeme. Kutu pieketa꞉ Koda꞉ma꞉ Diosepena꞉ upa pa꞉ta꞉ pea꞉pekeeki mandaneeki ma꞉nda꞉ paa waleekeme. Koto ekina꞉ta꞉ Diosepema꞉ Ka꞉lili kenke nane hayeke da ma꞉nda꞉ 23 Na꞉sa꞉tete halo pemekeme. Koto halo pemeke ekita꞉ mo potopede haliwekima꞉ la꞉ wiekeeki yaeyekeme. Koto ikana꞉ma꞉ la꞉ wiekeeki dupa Ipikita꞉ Na꞉sa꞉tete hali hala꞉me lelieke leekeme.

Copyright information for `SSX