Matthew 25

Kiki yaapo wandikina꞉ onkoluma꞉ pi

Yesuma꞉ alota꞉ Koto nate a꞉nda꞉ opolo epea꞉ka꞉na꞉ta꞉ mo hande hepenina꞉ Kilu Tombuao Hala꞉ ekina꞉ hauta꞉ do tupa꞉ pia꞉ka꞉na꞉ handilimikie. Nate ma꞉nda꞉na꞉ kiki yaapo wandiki tonu a꞉nda꞉ma꞉ wanda꞉ mulu pieke hali epeeke manda꞉hande pea handa꞉ mea ipuluekema꞉ ika꞉ ka꞉ta꞉sini ola꞉pake mea mina pemekeme. Kutupa kiki homeke wandiki tonuma꞉ta꞉ hone wopu na wimikipate pa kiki homeke ma꞉nda꞉ haemeke wandiki tonuma꞉ta꞉ hone wopu wimiki wandiki yekeme. Hande hone wopu na wimiki wandiki tonuma꞉ta꞉ ika꞉ ola꞉pake epeke keo mina pemekepate pa wetepena꞉ hola꞉ pamba꞉peke ekita꞉ ma꞉nda꞉ na yupu miniki pemekeme. Pate hande hone wopu wimiki wandiki tonu ika꞉ ola꞉pake ta꞉pao paeyaama꞉na꞉ iki homeke homekema꞉ ika꞉ ola꞉pake tonka꞉na꞉ ka꞉ta꞉sini kanake mea miniki miniki pea pemekeme. Hande wanda꞉ mulu pieke some a̱i̱ na opolo epeeketa꞉ mo hande wandiki paeyao u tonda꞉pao u polu pitimikime.

Kutaa buta꞉hoki nane yopua paeyeketa꞉ ma꞉nda꞉ma꞉ wi tieke la alota꞉ Hande wanda꞉ mulu pa꞉la꞉ halita꞉ do ipula꞉ma꞉ a꞉pa manda꞉hande pipee leekeme. Koto leeketa꞉ mo wandiki tonu paeyao tiao ika꞉ ola꞉pake lankake honda꞉pa꞉ bepe pimikime. Koto pitolo hata꞉ mo hande hone wopu na wimiki wandiki tonuma꞉ mo ika꞉ hone wopu wimiki asi tonu nane alota꞉ Asi tonuo. Nika꞉ ola꞉pakemanu pa꞉ta꞉ ka꞉ta꞉sini paetolo hata꞉ honia꞉la꞉me. Ika꞉ ka꞉ta꞉sini ma꞉nda꞉ hoela꞉ pambaapee laa honke lemekeme. Koto lemekepate mo hone wopu wimiki wandiki tonuma꞉ hombo peaaso alota꞉ Dia꞉me. Do ka꞉ta꞉sinita꞉ ika꞉eki nika꞉eki yaapona꞉ta꞉ ana꞉ na pilieke yeke na kulumekee laata꞉ Ika꞉ ekita꞉ ika꞉ kone mo sidowa pa꞉ta꞉manu hambolo pua꞉pa꞉peke lemekeme. 10 Koto lemeketa꞉ hande hone wopu na wimiki wandiki tonuma꞉ iki mina꞉pa꞉lao mo ika꞉eki ta꞉ta꞉ hambuluekema꞉ pemekeme. Koto pemeke hoki naneta꞉ mo hande wanda꞉ mulu pieke some opolo epeekeme. Kutu pieke toma꞉na꞉ta꞉ mo hande hone wopu wia tikitiki yao haemeke yunki hata꞉ wandiki tonuta꞉ ipiki ame̱le̱ mo hande wanda꞉ mina꞉la꞉ ne noluekema꞉ mombelemeke pa꞉ta꞉ pua pota꞉ poka ne no pitulu pemekeme.

11 Kutupa wetepena꞉ mo hande ka꞉ta꞉sini mulu peme wandiki tonu la꞉ka꞉la a꞉pa pota꞉ kilikili laaso alota꞉ Tekehalio. Tekehalio. Niki a꞉pomono pota꞉ lomba꞉e laa e̱ wi lemekeme. 12 Koto lemekepate mo wanda꞉ mulu pieke halima꞉ hombo peaaso alota꞉ Dia꞉me. I̱ma꞉ iki pa꞉ta꞉ ota꞉ pi aloma꞉ ikita꞉ I̱ wopu na handoloma꞉ ekita꞉ epi amedapee laa leekeme. 13 Yesuma꞉ koto pi lo a꞉mbolo hata꞉ alota꞉ Mo ika꞉ Tekehalina꞉ epolo pa꞉la꞉ nate di yaapo iki mateleke handaa loa꞉ma꞉ wopu handeteke hao hapa꞉peke leekeme.

E pokaasa꞉ hali tepona꞉ onkoluma꞉ pi

(Luku 1911-27)

14 Yesuma꞉ alota꞉ Mo nate a꞉nda꞉ opolo epea꞉ka꞉na꞉ta꞉ mo hande hepenina꞉ Kilu Tombuao Hala꞉ ekina꞉ hauta꞉ do tupa꞉ pia꞉ka꞉na꞉ handilimikie. Mo hamoko hali homekema꞉ kenke ma꞉nda꞉ pa꞉ta꞉ puluekema꞉ tikitiki yaaso hata꞉ta꞉ ipika꞉ e pokaemeke haliwekima꞉ ipika꞉ ala꞉ta꞉ ala꞉ta꞉ handeteke hawaena꞉ wi leekeme. 15 Ikana꞉ma꞉ peaapeke ane pieke tupa꞉ kone teli peaaso hata꞉ homeke hali pa꞉ta꞉ 5 daoseni kina꞉ halo. Hali ma꞉nda꞉ pa꞉ta꞉ta꞉ 2 daoseni kina꞉ halo. Kutupa hali ma꞉nda꞉ pa꞉ta꞉ta꞉ 1 daoseni kina꞉ halo piekeme. Kutaata꞉ ipikana꞉ma꞉ iki mina꞉pa꞉lao peekeme. 16 Mo 5 daoseni kina mieke e pokaasa꞉ halima꞉ kuta kone mo manima꞉ e honkopu hao pokaata꞉ 5 daoseni ma꞉nda꞉ apa꞉tao wiekeme. 17 Koto mandake tupa꞉ kone mo 2 daoseni mieke e pokaasa꞉ halima꞉ koto manima꞉ e pokaata꞉ 2 daoseni ma꞉nda꞉ apa꞉tao wiekeme. 18 Kutupate mo hande 1 daoseni mieke e pokaasa꞉ halima꞉ta꞉ ipika꞉ you halina꞉ manita꞉ mea pua naku awa ti tieke pa꞉ta꞉ wiekeme.

19 Bapi mandaneeki hao hoki naneta꞉ mo e pokaemeke haliweki ika꞉ you halima꞉ ika꞉ pokaemeke emanu handoma꞉ tialuekema꞉ paa epeekeme. 20 Kutu pieke toma꞉na꞉ta꞉ mo hande 5 daoseni kina mieke halima꞉ a꞉pa koto 5 daosenima꞉ e poka meayeke 5 daoseni ma꞉nda꞉ halolo hata꞉ alota꞉ You halio. Nakana꞉ma꞉ I̱ pa꞉ta꞉ 5 daoseni kipateta꞉ pa I̱ma꞉ e pokaaso hata꞉ mealo 5 daoseni ma꞉nda꞉ doma꞉ mie leekeme. 21 Koto leeke mo you halima꞉ alota꞉ O neketa꞉ ota꞉ epeke somee. Nakana꞉ma꞉ ota꞉ epeke e tieke pokeka꞉ta꞉me. Do hosiki kua꞉eki kone epeke tupa꞉ handeteke haleketa꞉ ameta꞉ nakana꞉ma꞉ ya e tieke handeteke hawalena꞉ mea halueke la alota꞉ I̱ yaapo mandake pa꞉ta꞉ hata꞉ ta꞉na꞉ma꞉ homopana꞉ epoe leekeme.

22 Koto somena꞉ hoki naneta꞉ mo hande 2 daoseni kina mieke halima꞉ a꞉pa koto 2 daosenima꞉ e poka meayeke 2 daoseni ma꞉nda꞉ halolo hata꞉ alota꞉ You halio. Nakana꞉ma꞉ I̱ pa꞉ta꞉ 2 daoseni kipateta꞉ pa I̱ma꞉ e pokaaso hata꞉ mealo 2 daoseni ma꞉nda꞉ doma꞉ mie leekeme. 23 Koto leeke mo you halima꞉ alota꞉ O neketa꞉ ota꞉ epeke somee. Nakana꞉ma꞉ ota꞉ epeke e tieke pokeka꞉ta꞉me. Do hosiki kua꞉eki kone epeke tupa꞉ handeteke haleketa꞉ ameta꞉ nakana꞉ma꞉ ya e tieke handeteke hawalena꞉ mea halueke la alota꞉ I̱ yaapo mandake pa꞉ta꞉ hata꞉ ta꞉na꞉ma꞉ homopana꞉ epoe leekeme.

24 Kutupa koto somena꞉ hoki naneta꞉ mo hande 1 daoseni kina mieke hali a꞉pa make ipika꞉ you hali pa꞉ta꞉ alota꞉ You halio. Neketa꞉ na nokopele ale napeke no make na tande ale alena꞉ kilikimanu talopu hale somee. Koto hauma꞉ta꞉ neketa꞉ taka꞉la papeke hali haleme hone witolo 25 I̱ma꞉ neke paala꞉ma꞉ homoa꞉me. Koto ekina꞉ mo naka꞉ 1 daoseni kina꞉ kenke awa panka꞉ hoilu poa꞉me. Koto ekina꞉ mo hande naka꞉ ki eki kone doma꞉ paa mie.

26 Koto leeke mo you halima꞉ ipika꞉ pi hombo peaaso alota꞉ Neketa꞉ soka꞉la꞉ pambeke e pokaasa꞉ hoke some ya꞉ka꞉ta꞉me. I̱ta꞉ na noko polo ale manuna꞉ napeke no make na tande alo ale manuna꞉ kiliki talo halo somee hone witolo pita꞉ ota꞉ alome. 27 Kota꞉ koto ekina꞉ta꞉ I̱ paa la꞉ka꞉la ipulu hano pa hameke kitoloeki make haka꞉ta꞉pao kita꞉la꞉eki make kimika꞉na꞉ miono ya mani mo ba꞉nka꞉na꞉ wiaapeke alee leekeme. 28 Koto alo hata꞉ iki pa꞉ta꞉ alota꞉ Mo somena꞉ mani pa꞉ta꞉la꞉ meata꞉ mo 10 daoseni meala꞉ some pa꞉ta꞉ hala꞉e. 29 Pa ekipeke. Ala꞉ta꞉ ala꞉ta꞉manu amba꞉ wia hala꞉ somema꞉ta꞉ ipika꞉eki lombei pina꞉ loluekema꞉ haka꞉ta꞉pao halea꞉ka꞉na꞉ milieke. Koto pa꞉la꞉pate mo ala꞉ta꞉ ala꞉ta꞉manu wopu na wiki natehali someta꞉ ipika꞉ wia hala꞉ alesiki kone ma꞉nda꞉ma꞉ yoka꞉ mea pelieke. 30 Koto pa꞉la꞉ ekina꞉ta꞉ do ala꞉ta꞉ ma꞉nda꞉ pia꞉peke na yeke epe na piki e pokaasa꞉ halita꞉ hama mo timba꞉ la꞉papeke ala꞉ pa꞉ta꞉ yolo lopapa꞉peke. Koto pa꞉ta꞉ta꞉ ipika꞉ kake lenkene laaso e̱ tieke lo halieke laa leekeme leekeme.

Paeyaalo pa꞉la꞉ pi yokaalu pulu pa꞉la꞉ natena꞉ pimanu

31 Kutu piki onkoluma꞉ pi lo paeyaaso hata꞉ Yesuma꞉ alota꞉ Mo Kenke Wanda꞉halina꞉ Eiyeketa꞉ pa Kini Hali hata꞉ ipika꞉ enisolomanu tonka꞉na꞉ do kenkena꞉ epea꞉ka꞉na꞉ta꞉ kota꞉ ipikana꞉ma꞉ ipika꞉ pa̱a̱ tieke piki handeteke hala꞉ biki wiki sea tieke manda pitilieke. 32 Koto pa꞉ta꞉ta꞉ do kenkena꞉ hala꞉ tapake tapake paeyao ipika꞉ leke popelekena꞉ mombelena꞉ lelimikie. Kutaa ipikana꞉ma꞉ta꞉ mo hande ma꞉na꞉ handeteke hala꞉ halima꞉ ipika꞉ sipisipi pita꞉ meme yaapo putupa꞉ alu peao peliaasa꞉ tupa꞉ do kenke wanda꞉hali make mandake tupa꞉ tapake yaapo putupa꞉ alu pilieke. 33 Kutaata꞉ mo tikitiki wopu piki wanda꞉halita꞉ ipika꞉ popeke nanema꞉ kalale haena꞉ laata꞉ pa mandane wanda꞉halita꞉ ipika꞉ hoe nanema꞉ kalale mea haena꞉ lelieke. 34 Kutu pu paeya꞉ka꞉na꞉ta꞉ mo Kini Halima꞉ ipika꞉ popeke nanema꞉ halimi wanda꞉hali pa꞉ta꞉ alota꞉ Ikita꞉ Koda꞉na꞉ wamo pa꞉la꞉eki mimiki wanda꞉hali yeleme ekina꞉ ika꞉ Apa꞉ Koda꞉ma꞉ do kenke kini pea wepieke toma꞉na꞉ kone tikitiki yao wina꞉ la꞉la꞉ kilu tumbuao hala꞉ kenke a꞉pa mipee lelieke. 35 Pa ekipeke I̱ tea꞉ma꞉ homoa꞉ nate nina꞉ta꞉ ikana꞉ma꞉ I̱ epeke tupa꞉ punimime. I̱ma꞉ ikali na꞉na꞉ma꞉ homoa꞉ ekita꞉ ikali kia꞉tiki pimime. I̱ma꞉ da ma꞉nda꞉ hali haowa꞉ ekita꞉ ika꞉ da pa꞉ta꞉manu hatuku pua꞉tiki pimime. 36 I̱ aka꞉ dia꞉yeketa꞉ ikana꞉ma꞉ yamatiki pimikime. I̱ma꞉ yeni haowa꞉ ekita꞉ ikana꞉ma꞉ epeke tupa꞉ handeteke hatiki pimime. Kutupa mo dipula pitua꞉ ekita꞉ handoloendi pimime.

37 Kutupa mo tikitiki piki wanda꞉hali ikana꞉ma꞉ ipika꞉ pi hombo peaasota꞉ dupa lelimikie. Tekehalio. Hando natena꞉ neke tea꞉ma꞉ homeke ne kuma꞉pe o ikali na꞉na꞉ma꞉ homeke ikali kuma꞉pe 38 o hando natena꞉ neke da ma꞉nda꞉ hali leke nika꞉ da pa꞉ta꞉manu hatuku muma꞉pe o aka꞉manu yamama꞉pe. 39 Kutaa make mo neke yeni hao o dipula pitu piki handaata꞉ hando natena꞉ handolo epoma꞉pe laa lelimikie.

40 Koto lemeka꞉na꞉ta꞉ mo hande Kini Halima꞉ ika꞉ pita꞉ do tupa꞉ hombo pealieke. I̱ma꞉ iki pa꞉ta꞉ ota꞉ ota꞉ pi alome. Ikana꞉ma꞉ mo hande ya biki na wiki kame homeke ma꞉nda꞉ siki pa꞉ta꞉ pimiki epeke hau paeyaota꞉ kota꞉ ota꞉ paeyao pa I̱ pa꞉ta꞉ kone pimime laa lelieke.

41 Kota꞉ mo ipika꞉ hoe nanema꞉ halimi wanda꞉hali iki pa꞉ta꞉ta꞉ dupa lelieke. Ikita꞉ Koda꞉na꞉ hoeyaalo pa꞉la꞉ wanda꞉hali yeleme ekina꞉ I̱ ame̱le̱ na hake mina꞉pa꞉lao pupe laa Ikita꞉ mo Sadani ipika꞉ enisolo tonka꞉na꞉ mina꞉yeke Koda꞉ma꞉ wepia ula꞉ na paelo pa꞉la꞉ ti to hala꞉ ale pa꞉ta꞉ pupe laa lelieke. 42 Pa ekipeke I̱ tea꞉ma꞉ homoa꞉ nate nina꞉ta꞉ ikana꞉ma꞉ I̱ na punimime. I̱ma꞉ ikali na꞉na꞉ma꞉ homoa꞉ ekita꞉ ikali na kimime. 43 I̱ma꞉ da ma꞉nda꞉ hali hao ekita꞉ ika꞉ da pa꞉ta꞉manu na hatuku mimime. I̱ aka꞉ dia꞉yeketa꞉ aka꞉ ma꞉nda꞉ na yamaemekeme. I̱ma꞉ yeni hao make dipula pitu pueketa꞉ I̱ na handeteke haememe laa lelieke.

44 Kota꞉ mo tapakema꞉ ipika꞉ pi hombo peaasota꞉ dupa lelimikie. Tekehalio. Hando natena꞉ neke tea꞉ma꞉ homo o ikali na꞉na꞉ma꞉ homo o da ma꞉nda꞉ hali hao o aka꞉ dia꞉ yo o yeni hao o dipula pitu koto haumanu piki handaata꞉ nikana꞉ma꞉ neke na tamba꞉ muma꞉me laa lota꞉ pimika꞉na꞉ 45 kota꞉ ika꞉ pita꞉ mo Kini Halima꞉ do tupa꞉ hombo pealieke. I̱ma꞉ iki pa꞉ta꞉ ota꞉ ota꞉ pi alome. Ikana꞉ma꞉ do biki na wiki kame homeke ma꞉nda꞉ siki tamba꞉ muluekema꞉ kiaemeketa꞉ kota꞉ I̱ kone tamba꞉ na miki kiaememe laa lelieke. 46 Koto wanda꞉halita꞉ honiki na paeyo hala꞉ hoke yenki mu hala꞉ pa꞉ta꞉ tapaalieke. Pate mo tikitiki wopu piki wanda꞉hali ikita꞉ honiki na paeyo deto hala꞉ pa꞉ta꞉ pelimikie leekeme.

Copyright information for `SSX