Matthew 26

Yesu luluekema꞉ hone amba꞉ pambao wimikieki

(Maka 141-2, Luku 221-2, Dioni 11꞉45-53)

Koto waleeke mana꞉ pimanu paeyaaso hata꞉ Yesuma꞉ ipika꞉ disaipolo tonu pa꞉ta꞉ alota꞉ Ika꞉ hone wilimi tupa꞉ nate homeke hao ma꞉nda꞉na꞉ta꞉ mo hande Lombei Pupa Yapeeke Nate ipilieke. Koto natena꞉ta꞉ haliwekima꞉ mo Wanda꞉halina꞉ Eiyeketa꞉ a꞉ka꞉tei wape piki tina꞉ endiao lina꞉ halimikie leekeme.

Koto pita꞉ kone mo Pa꞉tisi haliweki pita꞉ mo you haliweki paeyaoma꞉ mo yeni peao hayeke you hali Kaiya꞉pasina꞉ da tieke pa꞉ta꞉ a꞉pa momba꞉la pitaa ikana꞉ma꞉ a꞉mbao Yesu da꞉ka꞉pa꞉ mina homena꞉ luluekema꞉ hone amba꞉ pambao wimikime. Koto pea ikana꞉ma꞉ alota꞉ Mo ne pambaaso haena꞉ta꞉ dia꞉me. Wanda꞉halima꞉ niki pa꞉ta꞉ mineke pankaapa꞉na꞉ lemekeme.

Totopo wopu piki senisita꞉ Yesuna꞉ youna꞉ holaeyekeeki

(Maka 143-9, Dioni 121-8)

Yesuma꞉ Bedani da puaata꞉ kindi yeni hayeke hali Saimonona꞉ da pa꞉ta꞉ ne nalo pitina꞉ wanda꞉ ma꞉nda꞉ma꞉ mo homima꞉ handeke a꞉la꞉ba꞉seta꞉ toopi kanake homeke mea epeekeme. Mo kanake pa꞉ta꞉ta꞉ senisi totopo pikieki seliapo pambeekeme. Koto senisita꞉ yenki tieke alee. Ipikana꞉ma꞉ mo senisita꞉ Yesuna꞉ youna꞉ holaeyekeme. Kutu piekeeki mo hande disaipolo tonuma꞉ handolo hata꞉ ika꞉ ika꞉ kone alota꞉ Ekipeke do yenki tieke aleta꞉ pa hoeyaaso pila꞉pe laa mineke pankemekeme. Koto ekina꞉ ikana꞉ma꞉ alota꞉ Do senisita꞉ wanda꞉halima꞉ hambena꞉ tapaeya꞉ka꞉na꞉ yoluta꞉ kota꞉ mani tieke mea mo natehali wanda꞉hali wopu tamba꞉ mulu puma꞉me laa lemekeme.

10 Koto leme pi Yesuma꞉ amba꞉ handaa iki pa꞉ta꞉ alota꞉ Koto wanda꞉ pa꞉ta꞉ pi na leke mina꞉pa꞉lape. Pa ekipeke ipiki ka꞉nda꞉ma꞉ homaasemepe. Ipikana꞉ma꞉ I̱ pa꞉ta꞉ epeke hau seliapo pia꞉me. 11 Natehali wanda꞉halita꞉ nate paeyao iki ame̱le̱ hao halimikie. I̱ta꞉ iki ame̱le̱ hoto paeyao na hao halueke. 12 Hande senisi ya lokena꞉ holaeya꞉ ekita꞉ I̱ hoilu pia꞉ ekina꞉ pota꞉ amba꞉la epeaeya꞉me. 13 Kutupa I̱ma꞉ iki pa꞉ta꞉ ota꞉ pi alome. Kenke paeyao pa꞉ta꞉ Pi Seliapo wala꞉tiki pimika꞉na꞉ta꞉ kota꞉ do wanda꞉ma꞉ I̱ pa꞉ta꞉ pia꞉ ekita꞉ ipiki pa꞉ta꞉ hone wina꞉yeke wala꞉tiki pilimikie alome leekeme.

Diudasima꞉ Yesu lina꞉ yeke a꞉nda꞉ lomba wiekeeki

(Maka 1410-11, Luku 233-6)

14 Isekatioti hali Diudasima꞉ mo hande 12 disaipolo hayeke halima꞉ kone mo yeni peao hayeke you haliweki pa꞉ta꞉ pua 15 honke alo alota꞉ Ikana꞉ma꞉ Yesu minuemena꞉yeke pota꞉ walowa꞉ka꞉na꞉ta꞉ I̱ pa꞉ta꞉ aleke kilimikipe laa leekeme. Koto leeke ikana꞉ma꞉ toopi yata꞉pa silipa mani 30 ipiki pa꞉ta꞉ halemekeme. 16 Ipikana꞉ma꞉ koto hoki naneta꞉ Yesu a̱i̱ minina꞉yeke lapeke waleke epekemanu ma꞉nda꞉ weiyekeme.

Mo Lombei Pupa Yapeeke ne nemekeeki

(Maka 1412-21, Luku 227-14,21-23, Dioni 1321-30)

17 Mo Na Pombeiyaake Palaowa Ne Pambaeya꞉ pita꞉ titina꞉ natena꞉ Yesuna꞉ hoki nane tolu haemeke haliwekima꞉ ipiki pa꞉ta꞉ alota꞉ Mo Lombei Pupa Yapeeke Nate hone uelena꞉yeke ne pambaluma꞉eki noelena꞉yeke da hando pa꞉ta꞉ pua wamo peamonope lemekeme. 18 Ipikana꞉ma꞉ ika꞉ pi hombo peaaso hata꞉ alota꞉ Ikana꞉ma꞉ handeleme daoni tukiki pa꞉ta꞉ hala꞉ some ma꞉nda꞉ pa꞉ta꞉ pua dupa lapa꞉peke Hande Wala꞉la꞉ halima꞉ alota꞉ Ya nateta꞉ teke pa꞉ta꞉ opolo a꞉pa꞉la꞉me. Ya disaipolo haliweki nikana꞉ma꞉ naka꞉ da pa꞉ta꞉ mo Lombei Pupa Yapeeke ne pambulumeke lea꞉ma꞉ lapa꞉peke leekeme. 19 Mo disaipolo haliwekima꞉ Yesuma꞉ leeke tupa꞉ mo ne pamba꞉pekeeki tikitiki yao ana꞉lao wimikime.

20 Nate pambolo peeke handaata꞉ Yesu make ipika꞉ hoki nane telimiki 12 haliweki make mo ne noluekema꞉ pua momba꞉la pitimikime. 21 Koto ne nalo pita꞉ Yesuma꞉ iki pa꞉ta꞉ do tupa꞉ leekeme. I̱ma꞉ ota꞉ pi alome. Do I̱ ame̱le̱ mandake piluma꞉ some homeke ma꞉nda꞉ ipikana꞉ma꞉ I̱ lina꞉yeke a꞉nda꞉ lombilieke laa leekeme. 22 Koto leeke handaa ikana꞉ma꞉ ka꞉nda꞉ma꞉ homolo hata꞉ ma꞉nda꞉ ma꞉nda꞉ma꞉ ipiki pa꞉ta꞉ alota꞉ Tekehalio. Nakana꞉ma꞉ koto le pita꞉ I̱ pa꞉ta꞉ na alo pima꞉e ota꞉ alome laa paeyaoma꞉ lota꞉ puma꞉ puma꞉ pimikime. 23 Yesuma꞉ ika꞉ pi hombo peaaso alota꞉ Mo palaowa tenke laasopa꞉ disi pa꞉ta꞉ dika꞉ kiki mandake witolopa꞉ somema꞉ I̱ lina꞉ a꞉nda꞉ lombilieke. 24 Koto pa꞉la꞉pate mo Wanda꞉halina꞉ Eiyeke pa꞉ta꞉ Baibolona꞉ wape pa꞉la꞉ tupa꞉ homilia꞉pate pa Wanda꞉halina꞉ Eiyeke mina꞉yeke a꞉nda꞉ lomba꞉la꞉ halita꞉ ota꞉ a꞉ta꞉ tiekee. Koto halita꞉ na mendia꞉ka꞉na꞉ yoluta꞉ epolo pia꞉me leekeme. 25 Kutupa mo a꞉nda꞉ lombeke hali Diudasima꞉ Yesu pa꞉ta꞉ alota꞉ Wala꞉la꞉ halio. Nakana꞉ma꞉ le pita꞉ I̱ pa꞉ta꞉ lepe leeke Yesuma꞉ hombo peaaso alota꞉ Koto aletaa leekeme.

Tekehalina꞉ ne ikali teli peayekeeki

(Maka 14꞉22-26, Luku 2214-20, 1 Kotindi 11꞉23-25)

26 Ne nalo pitina꞉ Yesuma꞉ Palaowa mea Koda꞉ pa꞉ta꞉ Keiyae laa pindi pindi pea iki pa꞉ta꞉ hale hale pitolo alota꞉ Mea nape. Dota꞉ ya loke mindikie leekeme. 27 Kutupa kapo homeke mea Keiyae laaka꞉na꞉ iki pa꞉ta꞉ hale hale piekeme. Iki paeyaoma꞉ do kapona꞉ napee laata꞉ 28 ipikana꞉ma꞉ iki pa꞉ta꞉ alota꞉ Panake pi la꞉ uluekema꞉ yaka we doe. Wanda꞉halina꞉ hoke hau paeyaena꞉ loluekema꞉ yaka we lopilieke laa 29 iki pa꞉ta꞉ ota꞉ pi alome. Do naloma꞉ waini ikali I̱ta꞉ paata꞉ na neke hao wetepena꞉ ya Apa꞉na꞉ Kilu Tombuao Hala꞉eki pa꞉ta꞉ iki ame̱le̱ hata꞉ panakeeki nolumeke leekeme.

30 Kutaata꞉ ikana꞉ma꞉ emeli ma꞉nda꞉ laata꞉ mo Olipi Pote pa꞉ta꞉ pemekeme.

Pidama꞉ Yesu na handolome lolo piekeeki

(Maka 14꞉27-31, Luku 22꞉31-34, Dioni 13꞉36-38)

31 Kutupa Yesuma꞉ iki pa꞉ta꞉ alota꞉ Ame do timba kone iki paeyaoma꞉ I̱ mina꞉pa꞉lao pindipa pelimikie. Pa ekipeke mo Baibolo bukana꞉ wape pa꞉la꞉ pita꞉ do tupa꞉ la꞉la꞉me.

I̱ma꞉ mo sipisipi handeteke hao hala꞉ halita꞉ lulueke. Kutu pua꞉ka꞉na꞉ta꞉ mo sipisipi paeyaota꞉ mandane mandane pindipa pomo keaalimikie
laa wape pa꞉la꞉me.
32 Kutu pilimipate I̱ paa mea tiaowa꞉ka꞉na꞉ta꞉ I̱ amba꞉la mo Ka꞉lili nane polueke. Ikita꞉ wetepena꞉ a꞉pa꞉pa꞉peke leekeme. 33 Koto leeke Pidama꞉ Yesu pa꞉ta꞉ alota꞉ Wanda꞉hali paeyaoma꞉ neke mina꞉pa꞉laena꞉ kone I̱ma꞉ta꞉ neke ota꞉ na mina꞉pa꞉lalueke leekeme. 34 Yesuma꞉ ipiki pa꞉ta꞉ alota꞉ I̱ma꞉ neke pa꞉ta꞉ ota꞉ pi alome. Ame timba kone koka꞉la꞉ e̱ a̱i̱ na leke haena꞉ nakana꞉ma꞉ hoto tepo yaka biki amba꞉la hoeyaalipikie leekeme. 35 Koto leekepate Pidama꞉ alota꞉ Diki mandakena꞉ homopono lea꞉ka꞉na꞉ kone naka꞉ biki I̱ma꞉ na hoeyaalueke leekeme. Kutupa mo haliweki paeyaoma꞉ make koto tupa꞉ lemekeme.

Kesema꞉ni e nane Koda꞉ pa꞉ta꞉ Yesuma꞉ yeni piekeeki

(Maka 14꞉32-42, Luku 22꞉39-46)

36 Yesuma꞉ ipika꞉ hoki nane tolu haemeke haliweki ame̱le̱ e ma꞉nda꞉ pa꞉ta꞉ opolo pemekeme. Mo ena꞉ bikita꞉ Kesema꞉nie. Koto pa꞉ta꞉ hata꞉ iki pa꞉ta꞉ alota꞉ I̱ta꞉ yeni puluekema꞉ mo pate leke puluma꞉ ikita꞉ do pa꞉ta꞉ hando pita꞉pa꞉peke leekeme. 37 Koto laata꞉ ipikana꞉ma꞉ Pida make Sepedina꞉ eiyeke yaapo iki tepo hoeya꞉ nane hatuku peekeme. Kutu polo hata꞉ta꞉ ipika꞉ pukima꞉ tanda tieke minolo hata꞉ ka꞉nda꞉ tiekema꞉ homeekeme. 38 Kutupa ipikana꞉ma꞉ iki pa꞉ta꞉ alota꞉ I̱ta꞉ yaka pukima꞉ ka꞉nda꞉ma꞉ wopu homolo ekima꞉ homeke nonopea halome. Koto ekina꞉ ikita꞉ do pa꞉ta꞉ I̱ ame̱le̱ mandakena꞉ hata꞉ yu wia handeteke hapa꞉peke leekeme. 39 Hosiki mo pate leke puaata꞉ kenkena꞉ puki yama peliniaaso dupiki yeni piekeme. Ya Apa꞉o. Nakana꞉ma꞉ pea꞉peke ya꞉ka꞉na꞉ta꞉ kota꞉ do ipula꞉ ka꞉nda꞉ tieke wopu tumbiki kapota꞉ I̱ pa꞉ta꞉ na epena꞉ leke yoka꞉ muelena꞉e laa hone pa꞉la꞉pate ya hone pa꞉la꞉eki dia꞉me. Pa naka꞉ hone pa꞉la꞉eki homekee leekeme. 40 Kutupata꞉ Yesuma꞉ paa la꞉ka꞉la ipulu handeekepate mo hali tepoma꞉ u pelimikieki handolo hata꞉ mo Saimono pa꞉ta꞉ alota꞉ Pa ekipeke handaa iki tepoma꞉ do nate leke homeke pa꞉ta꞉ I̱ ame̱le̱ mandakena꞉ yu wia handeteke hapa꞉peke na yea꞉pe. 41 Handeteke hata꞉ yeni pu hapa꞉peke. La handa꞉la꞉eki a꞉paama꞉na꞉ loa꞉me. Ika꞉ pukima꞉ hone pa꞉la꞉pate ika꞉ loke mindikima꞉ta꞉ soka꞉la꞉ma꞉ homaa ada꞉ ada꞉ pea witelememe leekeme. 42 Koto laata꞉ Yesuma꞉ hoto yaapo peao paa pua yeni pitolo hata꞉ alota꞉ Ya Apa꞉o. Do ka꞉nda꞉ma꞉ tumbiki kapo ipula꞉eki a꞉nda꞉ na yoka꞉ mea baeka꞉na꞉ ota꞉ nono lea꞉ka꞉na꞉ta꞉ kota꞉ a꞉pa꞉la꞉ma꞉ naka꞉ hone peleeki pea꞉peke leekeme. 43 Koto yeni pu paeyeke paa la꞉ka꞉la ipulu hata꞉ mo haliweki handeekepate pa u̱ pelimikieki handeekeme. Kutu piki hauta꞉ ota꞉ ika꞉ leke pa꞉ta꞉ u̱ pambolo hata꞉ piekeme. 44 Kutupa Yesuma꞉ paa pua hoto tepo peao yeni pua pitolo hata꞉ta꞉ mo hande amba꞉ yeni pitolo leeke pimanu kone leekeme. 45 Kutupiki yeni pea paeyeke ipika꞉ disaipolo haliweki pa꞉ta꞉ paa la꞉ka꞉la a꞉pa alota꞉ Ikita꞉ hoto pita꞉ u̱ polu pita꞉ pimipe. A꞉e handepe. A꞉nda꞉ lomba꞉la꞉ halima꞉ Wanda꞉halina꞉ Eiyeketa꞉ mo hoke hau pu haleme haliwekima꞉ minina꞉ ala꞉me. 46 Pomana꞉ tiaape. Hande I̱ minina꞉ a꞉nda꞉ lomba꞉la꞉ halita꞉ koto ipula꞉ handa꞉e leekeme.

Yesu da꞉ka꞉pa꞉ minimikieki

(Maka 14꞉43-50, Luku 22꞉47-53, Dioni 183-12)

47 Yesuma꞉ koto pimanu alo haena꞉ kone mo hande 12 haliweki ame̱le̱ hayeke hali Diudasita꞉ ipiki pa꞉ta꞉ epeekeme. Mo yeni peao haemeke you haliweki pita꞉ tondiki haliweki yaapoma꞉ tapaemeke haliweki wopuma꞉ Diudasi ame̱le̱ kepete tieke make dolo tieke make mea miniki epemekeme. 48 Mo Yesu minina꞉ a꞉nda꞉ lombeeke halima꞉ mo haliweki pa꞉ta꞉ lomba꞉ witolo alota꞉ I̱ma꞉ pua nunu pulua꞉ someta꞉ kota꞉ koto some mina꞉pa꞉peke leekeme. 49 Amba꞉ koto laa wieke tupa꞉ ipikana꞉ma꞉ tikitiki a̱i̱ koto kone Yesu teke pa꞉ta꞉ opolo ipulu alota꞉ Wala꞉la꞉ halio. Neketa꞉ epeke timba nane laata꞉ ipiki hopula꞉ mea nunu piekeme. 50 Kutupa Yesuma꞉ ipika꞉ pi hombo peaaso alota꞉ Someo. Mo naka꞉ puluekema꞉ epele hauta꞉ a̱i̱ koto kone pie leekeme. Koto leeketa꞉ mo Yesu minuluekema꞉ epemeke haliwekima꞉ a꞉pa ipiki da̱o̱la miniki haemekeme. 51 Kutu pimiki handaata꞉ mo Yesu ame̱le̱ haemeke hali homekema꞉ ipika꞉ a꞉nda꞉ kepete poneke hokulu yola꞉ mea mo yeni peao hayeke you halina꞉ pa hameke e pokao hayeke hali pokeekepate pa ipika꞉ katake homeke tunkula꞉ poka lopaeyekeme. 52 Kutu pieke ekina꞉ Yesuma꞉ ipiki pa꞉ta꞉ alota꞉ Mo naka꞉ a꞉nda꞉ kepete hokuluta꞉ pao mea dake pa꞉ta꞉ panka꞉niae. Pa ekipeke. Kepetema꞉ iki tamba꞉ mina꞉e laa wia hao haleme wanda꞉halita꞉ ika꞉ kone mo kepetema꞉ lia homaalieke. 53 Ya Apa꞉ma꞉ tamba꞉ mina꞉ wi lolo polo ekita꞉ hone na witelepe. Koto hau a꞉nda꞉ pua꞉ka꞉na꞉ta꞉ kota꞉ ipikana꞉ma꞉ I̱ tamba꞉ muluekema꞉ ipika꞉ a꞉nda꞉ peaasa꞉ enisolo ami tapake 12 haka꞉ta꞉pao koto kone tapalo pa꞉la꞉me. 54 Wi lolo pua꞉peke ya꞉la꞉pate kutu pua꞉ka꞉na꞉ta꞉ kota꞉ pa mo amba꞉ Baiboloma꞉ pilieke laa la꞉ ula꞉ haumanu ekipa yaaliepe leekeme.

55 Kutaata꞉ Yesuma꞉ mo ipiki minuluekema꞉ epemeke haliweki pa꞉ta꞉ alota꞉ Ika꞉ honema꞉ I̱ta꞉ pi ula꞉eki na opiki nono pea a꞉nda꞉ lita꞉la꞉ hali patema꞉ do kepete tieke dolo make miniki a꞉pa pimipe. Nate wopu I̱ma꞉ta꞉ tembolo da tukiki pa꞉ta꞉ iki ame̱le̱ pi walo haowa꞉pate ikana꞉ma꞉ I̱ na da꞉ka꞉pa꞉ minimime. 56 Pate do ikana꞉ma꞉ piteme hau manuta꞉ mo hande amba꞉ potopede haliweki ikana꞉ma꞉ mo Baibolo tukiki pa꞉ta꞉ wape pea ula꞉ pimanu peneme yaaluekema꞉ pitememe leekeme.

Koto toma꞉na꞉ta꞉ ipika꞉ disaipolo haliweki paeyaoma꞉ Yesu mina꞉pa꞉lao kilipa pemekeme.

Yesuta꞉ pi yokaaluna꞉ mea pemekeeki

(Maka 14꞉53-65, Luku 22꞉54-55,63-71, Dioni 1813-14,19-24)

57 Mo Yesu da꞉ka꞉pa꞉ miniki haemeke haliwekima꞉ hande yeni peao hayeke you hali Kaiya꞉pasina꞉ da nane hatuku pemekeme. Koto pa꞉ta꞉ta꞉ mo hande pi ula꞉eki walolo haemeke haliweki pita꞉ tondiki haliweki peaata꞉ mo da pa꞉ta꞉ amba꞉ mombela pitimikime. 58 Pidama꞉ Yesu telimea peekepateta꞉ ipika꞉ teke pa꞉ta꞉ na peketa꞉ pa mo hande yeni peao hayeke you halina꞉ da hankepe nane honda꞉pa꞉ lopa Yesu pa꞉ta꞉ta꞉ eki haumanu pilimipe laa handuluekema꞉ mo hande pota꞉ kake handeteke haemeke haliweki ame̱le̱ pitiekeme. 59 Mo hande yeni peao hayeke you hali make tondiki haliweki paeyaoma꞉ make Yesu lu homaaluekema꞉ ipika꞉ pa꞉la꞉ hau doe laa makeaaso hata꞉ ma̱leke lulu peleme haliweki weimikime. 60 Kutu pitolo hata꞉ mandane haliwekima꞉ makeaasa꞉ pimanu wopu a꞉pa lemekepate ipiki lia꞉peke pota꞉ ma꞉nda꞉ na handemekeme. Pate wetepena꞉ yaapo hali ma꞉nda꞉ tiaaso 61 hata꞉ alota꞉ Do somema꞉ta꞉ I̱ma꞉ Koda꞉na꞉ Tembolo da londa꞉la꞉ mina wiaata꞉ nate tepona꞉ paa a꞉eya꞉peke ya꞉la꞉me lea꞉ somee lepekeme. 62 Kutupa mo hande yeni peao hayeke you halima꞉ tiao Yesu pa꞉ta꞉ lota꞉ pitolo hata꞉ alota꞉ Do haliwekima꞉ koto neke laaseme ekina꞉ta꞉ nakana꞉ma꞉ pi ma꞉nda꞉ na lelipikipe laa leekeme. 63 Koto leekepate Yesuma꞉ pi na honda꞉ mea leke pa hayekeme. Koto ekina꞉ta꞉ mo yeni peao hayeke you halima꞉ ipiki pa꞉ta꞉ alota꞉ Mo deto hala꞉ Koda꞉na꞉ bikina꞉ hali keke pi alo hata꞉ nakana꞉ma꞉ niki pa꞉ta꞉ ota꞉ pi lapeke la alota꞉ Neketa꞉ mo hande Koda꞉na꞉ Eiyeke Ketisope a̱i̱ lakie leekeme. 64 Yesuma꞉ hombo peaaso alota꞉ Koto aletaa leekeme. I̱ma꞉ iki paeyao pa꞉ta꞉ alome. Wetepena꞉ta꞉ mo Wanda꞉halina꞉ Eiyeketa꞉ mo wele pita꞉la꞉ Koda꞉na꞉ popeke nane kikina꞉ pitilia꞉eki make hando ya nane koa tukiki pa꞉ta꞉ hola꞉pa꞉niao ipilia꞉eki make ikana꞉ma꞉ hando pilimikie leekeme. 65 Koto pi opitolo hata꞉ta꞉ mo yeni peao hayeke you halima꞉ ipika꞉ dau sinkipolo hata꞉ alota꞉ Koda꞉ laasa꞉ pi ala꞉me. Ekipeke mo la kita꞉la꞉ haliweki ma꞉nda꞉ paa muluma꞉pe. Koda꞉ laasa꞉ pimanu opuma꞉me. 66 Koto ekina꞉ta꞉ eki hau pulumeke hone witelemepe leekeme. Mo haliweki paeyaoma꞉ alota꞉ Ota꞉ hau tieke pu hoeyaala꞉ma꞉ lu homaena꞉ lape lemekeme. 67 Koto laata꞉ ikana꞉ma꞉ ipika꞉ leke popeleke pa꞉ta꞉ dopi talo hata꞉ ipiki yombimikime. Mo ipiki yombimiki haliwekima꞉ 68 alota꞉ Neke Ketiso ya꞉leke handaa do neke lita꞉la꞉ some hombona꞉ bikimanu lae lemekeme.

Hoto tepo Pidama꞉ Yesu na handoloe leekeeki

(Maka 14꞉66-72, Luku 22꞉56-62, Dioni 1815-18,25-27)

69 Pida mo hande da hankepe pa꞉ta꞉ pa pitolo haena꞉ mo yeni peao hayeke you halina꞉ e pokao hayeke wandiki homekema꞉ ipiki pa꞉ta꞉ a꞉pa alota꞉ Neke make koto Ka꞉lili hali Yesu ame̱le̱ pomu haeme hali ya꞉ka꞉ta꞉taa leekeme. 70 Koto leeke Pidama꞉ iki paeyaona꞉ leke popelekena꞉ alota꞉ Naka꞉ ale pita꞉ I̱ mata꞉la꞉me. Alekena꞉ alepe leekeme. 71 Koto laata꞉ ipikana꞉ma꞉ mo pota꞉ kake pa꞉ta꞉ peekepate wandiki ma꞉nda꞉ma꞉ ipiki handaa mo haemeke haliweki pa꞉ta꞉ alota꞉ Do halita꞉ mo hande Na꞉sa꞉tete halina꞉ ta꞉ma꞉ni halie laa leekeme. 72 Pidama꞉ a꞉mbaaso hata꞉ ipika꞉ pima꞉ Ota꞉ dia꞉me la alota꞉ I̱ta꞉ koto some ota꞉ na handolome leekeme. 73 Hosiki hao hoki nanema꞉ mo pa꞉ta꞉ haemeke haliwekima꞉ Pida pa꞉ta꞉ alota꞉ Neketa꞉ ota꞉ ipika꞉ tapake halie. Ota꞉ alome. Mo naka꞉ ale pi makema꞉ kone niki pa꞉ta꞉ peneme yaasa꞉me lemekeme. 74 Koto lemekepate Pidama꞉ alota꞉ Do alo pita꞉ Koda꞉ma꞉ opitolo haena꞉ alome. Ya pi loa꞉ka꞉na꞉ta꞉ ipikana꞉ma꞉ I̱ hoeyaena꞉e. Koto aleme halita꞉ I̱ ota꞉ na handolome leekeme. Koto pi alo haena꞉ta꞉ koto kone koka꞉la꞉ tiaeyekeme. 75 Kutu pieke toma꞉na꞉ta꞉ Pidama꞉ta꞉ Yesuma꞉ amba꞉ ipiki pa꞉ta꞉ la꞉ witolo Koka꞉la꞉ a̱i̱ na tiake haena꞉ nakana꞉ma꞉ hoto tepo ya biki a꞉mbao lo hoeyaalipikie leekeeki Pidama꞉ niminaeyekeme. Koto ekima꞉ta꞉ ipiki hama opolu bao tikene pua hata꞉ ipika꞉ pukima꞉ ka꞉nda꞉ tieke minolo hata꞉ e̱ tieke leekeme.

Copyright information for `SSX