Matthew 27

Yesuta꞉ Pailedi pa꞉ta꞉ hatuku pemekeeki

(Maka 151,Luku 231-2, Dioni 18꞉28-32)

Da ka꞉la꞉paaso siki hande yeni peao haemeke you haliweki pita꞉ tondiki haliweki ikana꞉ma꞉ Yesu homena꞉ loluekema꞉ pi hoti wimikime. Kutaata꞉ mo haliwekima꞉ Yesu mea senima꞉ tonkaota꞉ mo hande Loma꞉ Kapomani You hali tieke Pailedi pa꞉ta꞉ hatuku pemekeme.

Diudasina꞉ homeekeeki

(Aposolo 118-19)

Yesuta꞉ lina꞉e laa la꞉ wimiki pita꞉ mo hande a꞉nda꞉ lombeeke hali Diudasima꞉ opitolo hata꞉ta꞉ Ekipeke pua꞉pe laa ka꞉nda꞉ma꞉ homolo hata꞉ hande mieke silipa mani 30 meata꞉ mo hande yeni peao haemeke you haliweki pita꞉ tondiki haliweki ika꞉ haemeke ale pa꞉ta꞉ pua alota꞉ I̱ma꞉ mo hande hoke hau na piki some homena꞉ yeke a꞉nda꞉ lomboa꞉ ekita꞉ hoke hau poloma꞉ leekeme. Koto leeke mo haliwekima꞉ ipika꞉ pi hombo peaaso alota꞉ Kota꞉ koto pele ekita꞉ nika꞉eki dia꞉ ya꞉la꞉pate pa naka꞉eki homekee lemekeme. Koto lemekeeki Diudasima꞉ opu haota꞉ hande 30 silipa mani mo tembolo da pukuna꞉ hoelo baota꞉ opolu bao ipika꞉ kone pu naa homeekeme.

Kutu pieketa꞉ mo yeni peao haemeke you haliwekima꞉ mo mani paa pua meata꞉ Do manita꞉ pa halina꞉ we hake mani ya꞉leke handaa nika꞉ tembolo manina꞉ apa꞉taapeke ekina꞉ta꞉ pi ula꞉me leekeme. Koto ekina꞉ta꞉ ika꞉ kakena꞉ homolo hata꞉ koto manima꞉ta꞉ mo hande toopi kawasomanu wepita꞉la꞉ halina꞉ kenketa꞉ mo da ma꞉nda꞉na꞉ wanda꞉hali tokomanu hoiya꞉peke kenke wina꞉ lomana꞉e laa hambemekeme. Koto hau pimiki ekina꞉ kini pu mea a꞉pa ame make koto kenketa꞉ We Kenkee laa biki wiekeeki pa ula꞉me. Koto pimiki hauta꞉ mo amba꞉ hayeke potopede hali Dietemaiyama꞉ la꞉ wieke pimanu peneme yayekeme. Ipikana꞉ma꞉ la꞉ wieke pita꞉ dupa

Ikana꞉ma꞉ mo silipa mani 30 mimikime.
Koto manita꞉ mo Isulai wanda꞉halima꞉ hali homeke hambolo peleme yenki ana꞉ pa꞉la꞉me laa ana꞉ lao wimikime.
10 Koto manima꞉ta꞉ mo hande toopi kawasomanu wepita꞉la꞉ halina꞉ kenke hambemekeme.
Do alo pita꞉ Tekehalima꞉ I̱ pa꞉ta꞉ walea꞉eki alome laa leekeme
laa wape pa ula꞉me.

Pailedima꞉ Yesu lota꞉ piekeeki

(Maka 152-5, Luku 233-5, Dioni 18꞉33-38)

11 Pailedima꞉ Yesu lota꞉ pitolo alota꞉ Neketa꞉ mo Diu wanda꞉halina꞉ Kini hali halepe leekeme. Kutupa Yesuma꞉ hombo peaaso alota꞉ Koto aletaa leekepate 12 pa mo mandane yeni peao haemeke haliweki pita꞉ tondiki haliweki wopuna꞉ lota꞉ pita꞉la꞉ pimanu pa꞉ta꞉ta꞉ ipikana꞉ma꞉ pi siki homeke ma꞉nda꞉ ota꞉ na hombo peayekeme. 13 Kutu pieke handaa Pailedima꞉ Yesu paa lota꞉ pitolo alota꞉ Pi ma꞉nda꞉ na lelipikipe. Naka꞉ hau pu haleeki paeyao do koto aleme handa꞉e leekeme. 14 Pate Yesuma꞉ pi ma꞉nda꞉ ota꞉ na leekeme. Koto ekina꞉ Pailedima꞉ penkili piekeme.

Pailedima꞉ Yesu homena꞉e leekeeki

(Maka 156-15, Luku 2313-25, Dioni 18꞉39—19꞉16)

15 Lombei Pupa Yapeeke Natena꞉ ne pambao haemeke pita꞉ mo Pailedi ipika꞉ pu hayeke tupa꞉ dipula pitieke hali homeke hondo da tapatiki pu hayekeme. Mo wanda꞉halima꞉ ika꞉ hone pieke honke lemeke tupa꞉ mo Loma꞉ Kapomani tumiki halima꞉ koto some tapatiki pu hayekeme. 16 Koto dina꞉ta꞉ mo biki kende wiki hali homeke ma꞉nda꞉ ipika꞉ bikita꞉ Yesu Batabasi pitiekeme. 17 Koto ekina꞉ wanda꞉hali paeyao wopuma꞉ momba꞉la haena꞉ Pailedima꞉ iki pa꞉ta꞉ alota꞉ Ika꞉ honema꞉ta꞉ hande Yesu Batabasi tapanope o mo Ketiso aleme hali Yesu tapaanope leekeme. 18 Pa ekipeke Pailedi ipika꞉ honema꞉ta꞉ mo Diu tumiki haliwekima꞉ Yesu honditi pitolo hata꞉ ipiki pa꞉ta꞉ mea halemeke ekita꞉ ipika꞉ honema꞉ amba꞉ handa꞉ witolo hata꞉ koto leekeme.

19 Pailedima꞉ ipika꞉ pi yokaalu pulu pa꞉la꞉ alena꞉ ula꞉ handeteke hala꞉ seana꞉ pa pita꞉ pelia haena꞉ ipika꞉ wetekema꞉ ipiki pa꞉ta꞉ dupiki pi tapaeyekeme. Koto hoke hau ma꞉nda꞉ na piki hali pa꞉ta꞉ta꞉ nakana꞉ma꞉ hau ma꞉nda꞉ na pea꞉peke. Pa ekipeke ame timba upama꞉ handaata꞉ I̱ma꞉ ka꞉nda꞉ tieke mua꞉me leekeme.

20 Mo yeni peao haemeke you haliweki pita꞉ tondiki haliweki ikana꞉ma꞉ wanda꞉halima꞉ Pailedi pa꞉ta꞉ honke alo hata꞉ Batabasita꞉ tapaaso hata꞉ Yesuta꞉ lina꞉e lena꞉ ika꞉ hone u tiao haemekeme. 21 Kutu pimikipate Pailedima꞉ mo wanda꞉hali pa꞉ta꞉ alota꞉ Do hali yaapota꞉ iki naneta꞉ hando hali ka꞉la꞉pa꞉ ta꞉pao epena꞉ lonope leekeme. Koto leeke iki paeyaoma꞉ alota꞉ Batabasi tapae lemekeme. 22 Koto pi opitolo hata꞉ Pailedima꞉ iki pa꞉ta꞉ alota꞉ Kota꞉ do Ketiso aleme hali Yesu pa꞉ta꞉ta꞉ eki peonope leekeme. Koto leeke iki paeyaoma꞉ alota꞉ A꞉ka꞉tei wape piki tina꞉ tamendiae lemekeme. 23 Kutupa Pailedima꞉ iki pa꞉ta꞉ alota꞉ Pa ekipeke. Eki hau pa꞉la꞉pe leekepate ikana꞉ma꞉ pi pa daeyao tanda pitolo hata꞉ alota꞉ A꞉ka꞉tei wape piki tina꞉ tamendiae laa wi alo alo haemekeme.

24 Pailedima꞉ ika꞉ hone topo pea꞉peke pota꞉ ma꞉nda꞉ na hande wieke ekima꞉ta꞉ pa a꞉nda꞉ pu lu alualu pia꞉pekeeki teke pa꞉ta꞉ yekeeki handaata꞉ ipikana꞉ma꞉ ikali meata꞉ ika꞉ leke popelekena꞉ ipika꞉ kiki tanda꞉pa bao hata꞉ alota꞉ Do somena꞉ homolo pa꞉la꞉ ekita꞉ I̱ma꞉ na handeteke haloma꞉ ika꞉ pitelememe leekeme. 25 Iki paeyaoma꞉ ipika꞉ pi hombo peaaso doeki lemekeme. Koto halina꞉ weta꞉ nika꞉ biki manda make nika꞉ wekiwandiki paeyao manda make lopa wina꞉e lemekeme. 26 Koto laata꞉ kota꞉ Pailedima꞉ Batabasi ka꞉la꞉pa꞉ ta꞉pao pa꞉na꞉ tapa tapaeyekepate Yesuta꞉ yombua baena꞉ laa a꞉ka꞉tei wape piki tina꞉ tamendiao homaena꞉ yeke ipiki iki pa꞉ta꞉ mea haleekeme.

Ami haliwekima꞉ Yesu ki ki taemekeeki

(Maka 1516-20, Dioni 192-3)

27 Kutu pieketa꞉ mo dolo a꞉ndeli miniki haliwekima꞉ Yesuta꞉ mo Kapomani tiekena꞉ da tukiki pa꞉ta꞉ panda꞉ tieke ma꞉nda꞉ pa꞉ta꞉ hatuku peeketa꞉ ika꞉ ami tapake mandaneeki paeyaoma꞉ ipiki a꞉pa ambulao haemekeme. 28 Mo haliwekima꞉ ipika꞉ aka꞉manu holo titipili mea baota꞉ mo we dipiti piki nono piki dau ma꞉nda꞉ meata꞉ Yesuna꞉ lokena꞉ pambaemekeme. 29 Kutupa mo tekeke hake pumanu mea panka pea you aka꞉ tupa꞉ wepia ipika꞉ youna꞉ pambao hata꞉ mo tumapu homeke make ipika꞉ popeke kiki nane mea minao pimikime. Kutaata꞉ ipika꞉ leke popelekena꞉ ika꞉ tumiki yotuao kitaaso hata꞉ alota꞉ Diu wanda꞉halina꞉ Kini halio. Neke pa hao hapekee laa la꞉tiki pimikime. 30 Koto laa paeyeketa꞉ ipiki dopi to kitao make hande tumapu pa꞉ta꞉la꞉ minolo hata꞉ kone ipika꞉ youna꞉ limikime. 31 Koto kitaasa꞉ haumanu pu paeyaaso hata꞉ ikana꞉ma꞉ mo hande we dipiti piki nono piki dau londa꞉la꞉ meata꞉ ipika꞉ dau pa pambaena꞉ laata꞉ ipiki a꞉ka꞉tei wape piki tina꞉ homena꞉ endialuekema꞉ hatuku mea pemekeme.

Yesuta꞉ mo a꞉ka꞉tei wape piki tina꞉ tamendiao limikieki

(Maka 15꞉21-32, Luku 23꞉26-43, Dioni 1917-27)

32 Pota꞉na꞉ pulu hata꞉ Saitini hali bikita꞉ Saimono manda꞉hande pimikime. Hande dolo a꞉ndeli miniki haemeke haliwekima꞉ mo hali meata꞉ Yesuna꞉ a꞉ka꞉tei wape piki ti mea tiawaena꞉ lemekeme.

33 Kutaata꞉ yu eli biki ma꞉nda꞉ Kolokoda alena꞉ opolo epemekeme. Kolokoda ala꞉ bikina꞉ teketa꞉ Hali youma꞉ handeke elie laa lemekeme. 34 Koto alena꞉ ikana꞉ma꞉ waini ikali teto piki ale ma꞉nda꞉ta꞉ taapuna꞉ apa꞉tao Yesu pa꞉ta꞉ halemekepate ipikana꞉ma꞉ pende naa handaata꞉ kiaeyekeme. 35 Kutupa ikana꞉ma꞉ mo a꞉ka꞉tei wape piki tina꞉ Yesu tamendiaota꞉ ipika꞉ daumanu telipaaluekema꞉ daisi telepo laemekeme. 36 Koto telepo laa paeyeketa꞉ ikana꞉ma꞉ pa Yesu handeteke pitimikime. 37 Mo a꞉ka꞉tei wape piki ti mandaata꞉ ipika꞉ pi yokaalu pimiki ekina꞉ teke pita꞉ dupa Dota꞉ Yesue. Diu wanda꞉halina꞉ Kini halie laa wape pimikime.

38 Kutaata꞉ mo hande pake nepeke hali yaapo make Yesu ame̱le̱ a꞉ka꞉tei wape piki tina꞉ tamendiaemekeme. Ma꞉nda꞉ta꞉ Yesuna꞉ popeke nane kiki nanema꞉ ma꞉nda꞉ta꞉ ipika꞉ hoeya꞉ nane kiki nanema꞉ tamendialu pimikime. 39 Pota꞉na꞉ lombei pu pa pa pu yapemeke wanda꞉halima꞉ Yesu ki ta ta pu amboke wankeatiki pitolo hata꞉ alota꞉ 40 Aha. Neketa꞉ mo hande tembolo da hoeyao hoto tepona꞉ pa a꞉elo pi halie. Neketa꞉ Koda꞉na꞉ eiyeke ya꞉ka꞉na꞉ta꞉ kota꞉ naka꞉ kone pa꞉ta꞉la꞉pekee. Koto a꞉ka꞉tei wape piki ti mina꞉pa꞉lao naka꞉ kone hola꞉pa꞉niao epoe lemekeme. 41 Koto mandake tupa꞉ kone mo yeni peao hayeke you haliwekima꞉ make pi ula꞉eki walo haemeke haliwekima꞉ make tondiki haliwekima꞉ make Yesu ki ta ta pitolo hata꞉ ikana꞉ma꞉ alota꞉ 42 Ipikita꞉ mandane wanda꞉halita꞉ mea da꞉tatiki piekepate ipikana꞉ma꞉ta꞉ ipika꞉ kone da꞉taapeke na ya꞉leke pila꞉pe laa alota꞉ Ipikita꞉ mo hande Isulai tapakena꞉ Kini hali dia꞉ yekea. Ipikana꞉ma꞉ mo a꞉ka꞉tei wape piki ti mina꞉pa꞉lao hola꞉pa꞉niao epea꞉ka꞉na꞉ta꞉ kota꞉ ipikita꞉ ota꞉ Koda꞉na꞉ Eiyekee laa hone tulaalumeke. 43 Ipikana꞉ma꞉ Koda꞉ pa꞉ta꞉ hone tulao hata꞉ I̱ta꞉ Koda꞉na꞉ Eiyeke lo haya꞉pate kota꞉ a꞉pa꞉la꞉me Koda꞉ma꞉ ipiki da꞉taaluekema꞉ hone pa꞉la꞉pe pa ame pita꞉la꞉eki hando hamana꞉e leekeme. 44 Mo hande ipiki ame̱le̱ mandake tamendiaemeke pake nepeke hali yaapoma꞉ make homeke tupa꞉ kone Yesu ki ta ta pipikime.

Yesuna꞉ homolo piekeeki

(Maka 15꞉33-41, Luku 23꞉44-49, Dioni 19꞉28-30)

45 Nate you tikekena꞉ haena꞉ mo kenke paeyao timba꞉ la꞉ pambaa puaata꞉ nate leke tepo minolo hata꞉ nate lekelo yopula꞉ dina꞉ta꞉ nateta꞉ paa pa̱a̱ piekeme. 46 Koto nate leka꞉na꞉ta꞉ Yesuma꞉ wi aneke hapu alo alota꞉ Ilai Ilai lema sa꞉ba꞉kadani leekeme. Koto pita꞉ do la leekeme Ya Koda꞉o. Ya Koda꞉o. Pa ekipeke nakana꞉ma꞉ I̱ mina꞉pa꞉laasepe laa leekeme. 47 Ipiki teke pa꞉ta꞉ haemeke mandane wanda꞉halima꞉ koto leekeeki opua alota꞉ Opua꞉pee. Elaidia wi ala꞉me lemekeme. 48 Kutupa hali ma꞉nda꞉ma꞉ anke hao pua wa꞉la꞉mbima꞉ handeke ale ma꞉nda꞉ meata꞉ kake liki neke waini ikali tenke lao tumba pitina꞉ laa tumapuna꞉ hapulao Yesuma꞉ dodopo lena꞉ hala꞉liayekeme. 49 Kutu piekepate mandane wanda꞉halima꞉ alota꞉ Hando hapa꞉e. Elaidiama꞉ ipiki a꞉pa pa꞉ta꞉lia꞉pe handomana꞉e lemekeme. 50 Yesuma꞉ paa yaapo peao wi anekehapu laata꞉ ipika꞉ temoko tapaaliao homeekeme.

51 Ipiki homeeketa꞉ mo hande tembolo da tukiki pa꞉ta꞉ tupele pieke dauta꞉ oli holu nanema꞉ sinkipa꞉alu puniaota꞉ ta꞉ta꞉ ualu piekeme. Kutaa make yu momeni tiekema꞉ mo yu la꞉ma꞉ peayeke la꞉ma꞉ pitolota꞉ toopi tiekemanu make peila꞉ alualu piekeme. 52 Kutu pieketa꞉ mandane hali lapa꞉ nakumanu make lumba꞉ pa pa pu yapeeketa꞉ amba꞉ homemeke mandane Koda꞉na꞉ wanda꞉hali paa da꞉taa tiaemekeme. 53 Koto wanda꞉halima꞉ ika꞉ lapa꞉ nakumanu mina꞉pa꞉lao pa haota꞉ Yesu tiaeyeke hoki naneta꞉ iki paeyao mo hande yako piki daoni pa꞉ta꞉ pemekeme. Koto pa꞉ta꞉ta꞉ ikita꞉ wanda꞉hali wopuma꞉ handemekeme.

54 Mo hande Yesuma꞉ pita꞉la꞉eki handuluekema꞉ handeteke hayeke ami you hali make ipiki ame̱le̱ haemeke ami haliwekima꞉ make mo hande yumomeni make mo pieke mandane hau tonka꞉na꞉ handaata꞉ ikana꞉ma꞉ paala꞉ tiekema꞉ homolo hata꞉ alota꞉ Ipikita꞉ ota꞉ Koda꞉na꞉ Eiyeke ya꞉ka꞉ta꞉me lemekeme.

55 Kutupa mandane wanda꞉wekima꞉ make hosiki yola꞉ ta꞉pao hata꞉ handeteke haemekeme. Koto wanda꞉wekita꞉ Yesu Ka꞉lili nane hayeke pita꞉ma꞉ta꞉ ipiki teli mea pominolo hata꞉ tamba꞉ mua꞉tiki pomu haemekeme. 56 Koto wanda꞉weki ame̱le̱ta꞉ hande Ma꞉kadala wanda꞉ Meti make Dia꞉mesi Diosepe yaapona꞉ inkiki Meti make Sepedina꞉ weteke make haemekeme.

Yesuna꞉ toko hoimikieki

(Maka 15꞉42-47, Luku 23꞉50-56, Dioni 19꞉38-42)

57 Wele wele alo haena꞉ta꞉ A꞉ta꞉matia hali homeke hamoko hali ipika꞉ bikita꞉ Diosepe opolo epeekeme. Ipikita꞉ Yesuna꞉ disaipolo hayeke some yekeme. 58 Kutupa ipikana꞉ma꞉ Yesuna꞉ toko honke laa muluekema꞉ mo hande Pailedi pitieke pa꞉ta꞉ pua honke leekeme. Kutu pieketa꞉ Pailedima꞉ ipika꞉ ami haliweki pa꞉ta꞉ Yesuna꞉ toko koto some mina꞉ lapee leeke handaa 59 ipikana꞉ma꞉ mo hali toko honda꞉ meata꞉ panake dauma꞉ hopa꞉liao tonkao 60 ipika꞉ panake awa wieke tikene dama꞉ handeke lapa꞉ pa꞉ta꞉ mea pua wiekeme. Koto lapa꞉ data꞉ Diosepema꞉ manda꞉ piki toopi manda tomba꞉la awa wieke ekie. Mo hali toko wina꞉ laata꞉ Diosepema꞉ toopi homeke ma꞉nda꞉ mea pete pete peatiki pua mo toopi ka꞉ka꞉na꞉ a꞉mbaata꞉ peekeme. 61 Koto some peeke naneta꞉ wanda꞉ yaapo hande Ma꞉kadala wanda꞉ Meti make Meti ma꞉nda꞉ peaata꞉ mo hande lapa꞉ kake nanema꞉ handa꞉ moneao pitipikime.

Eki a꞉nda꞉ peaama꞉na꞉ lapa꞉ handeteke haemekeeki

62 Koto da ka꞉la꞉peeketa꞉ mo hande Diu wanda꞉halina꞉ hoto pila꞉ natena꞉ta꞉ mo hande yeni peao hayeke you haliweki pita꞉ Pa꞉tisi tapake yaapoma꞉ Pailedi pa꞉ta꞉ pi loluekema꞉ momba꞉lolo hata꞉ ipiki pa꞉ta꞉ alota꞉ 63 Hande ya pi lo haya꞉ somema꞉ pa hande haya꞉ dina꞉ ipikana꞉ma꞉ alota꞉ Hoto tepo natena꞉ wiaata꞉ I̱ta꞉ paa mea tialieke leekeeki niminaasoma꞉me. 64 Koto ekina꞉ta꞉ naka꞉ ami haliwekima꞉ ipika꞉ lapa꞉ta꞉ hoto tepo natena꞉ sembepela handeteke hapa꞉peke laa lae. Do aloma꞉ ekina꞉ teketa꞉ wetepe ipika꞉ disaipolo haliwekima꞉ pua ipika꞉ toko pake mea wanda꞉hali pa꞉ta꞉ alota꞉ Ipikita꞉ da꞉taa tiao pa꞉la꞉me laapa꞉na꞉ yeke aloma꞉me. Do koto tupa꞉ lelimi ya pita꞉ mo hande amba꞉ titina꞉ lea꞉ ya pi ota꞉ lombei pikieki laapa꞉na꞉ aloma꞉me lemekeme. 65 Koto lemekeeki opuaata꞉ Pailedima꞉ iki pa꞉ta꞉ alota꞉ A꞉pa꞉la꞉me. Sa꞉sa꞉ pita꞉la꞉ tapake ma꞉nda꞉ hatuku puaata꞉ mo hali lapa꞉na꞉ pota꞉ kaketa꞉ epeke tupa꞉ katolapa꞉peke leekeme. 66 Koto leeketa꞉ ikana꞉ma꞉ Pailedi mina꞉pa꞉lao mo hali lapa꞉ pa꞉ta꞉ pua mo lapa꞉ kake a꞉mbeeke toopi ka꞉ka꞉na꞉ manuta꞉ domama꞉ a꞉mbo hopa꞉liao paeyeketa꞉ mo hande sa꞉sa꞉ pita꞉la꞉ tapakema꞉ handeteke haena꞉ laa pemekeme.

Copyright information for `SSX