Philippians 1

I̱ Polo make Timodi dikana꞉ma꞉ Yesu Ketisona꞉ e pokaaso hata꞉ mo Pilipai nane haleme Koda꞉na꞉ wanda꞉hali ika꞉ siosi you haliweki pa꞉ta꞉ make ika꞉ dikoni haliweki pa꞉ta꞉ make iki Yesu Ketiso pa꞉ta꞉ haleme wanda꞉hali paeyao pa꞉ta꞉ do wape pea tapaasopa꞉me. Nika꞉ Apa꞉ Koda꞉ pita꞉ nika꞉ Tekehali Yesu Ketiso yaapoma꞉ iki pa꞉ta꞉ mo a꞉ta꞉ma꞉ homa tamba꞉ mina꞉la꞉eki make mo puki lopa꞉niaasa꞉eki make kina꞉e.

Poloma꞉ yeni peaeyekeeki

Iki hone u moneaaso pita꞉ma꞉ paeyaota꞉ I̱ma꞉ Koda꞉ pa꞉ta꞉ ikina꞉ keiyae pi la꞉tiki pu halome. Kutupa ikina꞉ Koda꞉ pa꞉ta꞉ I̱ma꞉ yeni peaaso pita꞉ma꞉ta꞉ ta꞉na꞉ pita꞉ hata꞉ peatiki pu halome. Pa ekipeke mo amba꞉ hande titi panake pa꞉ta꞉ kone kini pea a꞉pa ame do natena꞉ I̱ma꞉ mo Koda꞉na꞉ Pi Seliapo walono ikana꞉ma꞉ I̱ tamba꞉ mimi hau manuna꞉ hone witolo hata꞉ loa꞉me. Koto ekina꞉ Koda꞉ma꞉ iki pa꞉ta꞉ kini pia꞉ eta꞉ Yesu Ketiso ipilie natena꞉ poko paeyaaluekema꞉ ota꞉ pa pokolo ombu halieke hone ulume. Koto pa꞉la꞉ ekina꞉ta꞉ ya pukima꞉ iki pa꞉ta꞉ ta꞉na꞉ma꞉ homolo hata꞉ iki hone u halome. Koto ta꞉na꞉ma꞉ homolo ekita꞉ ota꞉ a꞉pa꞉la꞉me. Do Koda꞉ma꞉ ka꞉leke pokolo e seliapota꞉ iki ame̱le̱ mandakena꞉ apa꞉tao pokoloma꞉me. Ame do I̱ dipula pilu pita꞉ma꞉ make amba꞉ pa pomu haowa꞉ pita꞉ma꞉ make I̱ma꞉ mo Koda꞉na꞉ Pi Seliapota꞉ honkopu haena꞉ loluekema꞉ ya pima꞉ a꞉nda꞉ litolo hombo peao halo ekita꞉ iki ame̱le̱ apa꞉tao hata꞉ pu haloma꞉me. Yesuma꞉ wanda꞉hali pa꞉ta꞉ pukima꞉ homa꞉la꞉ tupa꞉ kone iki pa꞉ta꞉ I̱ma꞉ make mandake tupa꞉ pukima꞉ homolo hata꞉ iki ame̱le̱ a꞉pa haowee hone u halome. I̱ma꞉ do alo pita꞉ ota꞉ pi aloeki Koda꞉ma꞉ handa꞉la꞉me.

I̱ma꞉ iki pa꞉ta꞉ dupiki yeni peao halome. Mo yeni peao halo ekita꞉ ikana꞉ma꞉ ota꞉ epeke titina꞉ hau ma̱leke lia꞉peke ya꞉la꞉ ika꞉ pukima꞉ homa꞉la꞉eki make ika꞉ ota꞉eki homeke hone wita꞉la꞉eki make ika꞉ honema꞉ teli pita꞉la꞉eki make mandakena꞉ daeyolo daeyolo ombu haena꞉ I̱ma꞉ do yeni peaasome. Koto haumanu iki tukiki pa꞉ta꞉ daeya꞉ka꞉na꞉ta꞉ mo Ketiso ipilie natena꞉ ikita꞉ haumanu na pu hoeyao aleta꞉ na piki wanda꞉hali halimikie. 11 Kutu pilie ekima꞉ta꞉ ika꞉ halemeeki tukiki pa꞉ta꞉ta꞉ mo Yesu Ketiso homekema꞉ puemena꞉ lapeke ya꞉la꞉ hau manuma꞉ iki tukiki pa꞉ta꞉ tumbaalieke. Iki tumbaeya꞉ka꞉na꞉ta꞉ kota꞉ koto hauma꞉ta꞉ Koda꞉na꞉ pi lao yeiya꞉ laalieke.

Mo Polona꞉ dipula pitieke ekima꞉ta꞉ Koda꞉na꞉ Pi Seliapo kende tupa꞉ wina꞉ leekeeki

12 Ya Ketiso yankeke tonuo I̱ma꞉ ya hone pa꞉la꞉ ekita꞉ iki paeyaoma꞉ mo hande I̱ pa꞉ta꞉ a꞉pa pia꞉ ekimanu hone uemena꞉e. Koto hande hau manuma꞉ta꞉ mo Koda꞉na꞉ Pi Seliapo sa꞉sa꞉ na pita꞉la꞉pate ota꞉ kende tupa꞉ wina꞉ ala꞉me. 13 Koto ekima꞉ta꞉ mo hande Sisana꞉ da handeteke haleme a꞉ndeli miniki haliweki paeyaoma꞉ make pa do haleme wanda꞉halima꞉ make I̱ma꞉ Ketisona꞉ e pokaaso hali halo ekina꞉ dipula mea pitalemeke handelememe. 14 Koto mo Ketiso yankeke tonu anekema꞉ta꞉ mo Tekehali hone wotu tulaena꞉ ya dipula pilu ekima꞉ta꞉ iki wele peaala꞉me. Koto ekima꞉ta꞉ ikana꞉ma꞉ hoto paeyao paala꞉ma꞉ na homeke pipita꞉ pa pua hata꞉ pi wala꞉tiki pu halememe.

15 Koto pa꞉la꞉pate mo mandane ape ape lo haleme haliwekima꞉ta꞉ I̱ pa꞉ta꞉ honditi pitolo hata꞉ Ketisona꞉ pi walo halememe. Pateta꞉ pa mo mandane haliweki ma꞉nda꞉ma꞉ta꞉ epeke hone witolo hata꞉ walo halememe. 16 Ame do loa꞉ haliwekima꞉ta꞉ mo Pi Seliapota꞉ honkopu haena꞉ loluekema꞉ mo pima꞉ a꞉nda꞉ litolo hombo peao hala꞉ hauta꞉ Koda꞉ma꞉ I̱ pa꞉ta꞉ ka꞉la꞉me hone wilimime. Koto ekina꞉ I̱ pa꞉ta꞉ pukima꞉ homolo hata꞉ mo pi walo halememe. 17 Mo hande amba꞉ titina꞉ loa꞉ haliwekima꞉ta꞉ Ketisona꞉ bikina꞉ epeke hone na wiki pa ika꞉ biki homeke daeyaluekema꞉ yeke pi walo halememe. Ika꞉ honema꞉ta꞉ I̱ma꞉ do dipula pita꞉ ka꞉nda꞉ mandaneeki mina꞉e laa pi walo halememe. 18 Koto pa꞉la꞉pateta꞉ Ketisona꞉ pita꞉ pia꞉peke ya꞉la꞉ pota꞉ ula꞉ tupa꞉ waleme ekina꞉ta꞉ I̱ma꞉ ta꞉na꞉ma꞉ homolome. Epeke hone witolo pia꞉ka꞉na꞉ make o epeke hone na witolo pia꞉ka꞉na꞉ make a꞉pa꞉la꞉me. Pina꞉e. Kutupa I̱ma꞉ ta꞉na꞉ma꞉ homolo ombu halueke.

Pa ekia꞉nda꞉ epea꞉ka꞉na꞉ta꞉ Ketisona꞉ e poka꞉peke ekina꞉ waleke wilieke

19 Pa ekipeke mo ikana꞉ma꞉ yeni peao halemeke mo Yesu Ketisona꞉ temokoma꞉ I̱ tamba꞉ mina꞉la꞉ ekina꞉ make I̱ta꞉ dipula da mina꞉pa꞉lao pomu halueke hone ulume. 20 Ya peawee laa hone tieke pa꞉la꞉ ekita꞉ mo I̱ma꞉ pokono Koda꞉ma꞉ ka꞉la꞉ eta꞉ ota꞉ na mina꞉pa꞉laake nate paeyao make ota꞉ ame do dipula pilu pita꞉ make ota꞉ pipita꞉ pa pua hapeke yelieke la alome. Kutaata꞉ I̱ homoa꞉ka꞉na꞉ make o pa hao haoa꞉ka꞉na꞉ make ya halo hau paeyaoma꞉ mo Ketiso yeiya꞉ lao halueke. 21 Pa hao haoa꞉ka꞉na꞉ta꞉ Ketisona꞉ e pokaapeke ekina꞉ waleke wiliepate homono lemeka꞉na꞉ta꞉ pa mo haka꞉ta꞉pao wiala꞉eki mulueke. 22 Koto pa꞉la꞉pate pa ya hao halue ekima꞉ta꞉ mo epeke e mandaneeki pia꞉peke ya꞉ka꞉na꞉ta꞉ kota꞉ I̱ma꞉ta꞉ handoeki ma̱leke lua꞉pe mone mata꞉la꞉me. 23 Ale yaapoma꞉ yola꞉ alu pita꞉la꞉me. Do kenkena꞉ haloeki mina꞉pa꞉lao Ketiso yaapo pua hapeketa꞉ hone wotu pa꞉la꞉me. Kutupa make do polueke alo ekita꞉ I̱ pa꞉ta꞉ta꞉ ota꞉ epekeeki ya꞉la꞉pate 24 I̱ma꞉ iki tamba꞉ muluekema꞉ pa hao halo ekita꞉ ota꞉ tumiki haue. 25 I̱ma꞉ ota꞉ koto hone witolo hata꞉ pa hao halueke hone witolome. Ika꞉ Koda꞉ pa꞉ta꞉ ta꞉na꞉ma꞉ homo hone tulaalemeeki daeyao honkopu hao hamena꞉ tamba꞉ muluekema꞉ I̱ta꞉ iki ame̱le̱ paa halueke. 26 Koto ekina꞉ I̱ mo iki ame̱le̱ a꞉pa haluma꞉ ekima꞉ta꞉ ikana꞉ma꞉ Ketisona꞉ biki yeiya꞉ laasemeeki daeyaena꞉ lelieke.

A꞉nda꞉ tunkuliki wanda꞉hali pa꞉ta꞉ paala꞉ma꞉ na homa꞉pa꞉pekeeki

27 Ketisona꞉ Pi Seliapoma꞉ puemena꞉ wala꞉la꞉ tupa꞉ pu haleme hauta꞉ ota꞉ tumiki haue. Kutu pilimipate I̱ epoa꞉ka꞉na꞉ make o pa ika꞉ pilimi hauna꞉ pi lalimieki opua꞉ka꞉na꞉ make kota꞉ ikita꞉ taka꞉lao haemeka꞉ta꞉me hone ulueke. Kutupa mo wanda꞉halima꞉ Ketisona꞉ Pi Seliapo pa꞉ta꞉ hone tulaena꞉ ikana꞉ma꞉ ota꞉ homeke hone wia hata꞉ tamba꞉ mualualu pu haemeka꞉ta꞉me hone ulueke. 28 Ikana꞉ma꞉ ika꞉ a꞉nda꞉ tunkuliki wanda꞉halita꞉ paala꞉ma꞉ na homeke hoto paeyao aela꞉ bao hapa꞉peke. Ika꞉ aela꞉ baalo peleme ekita꞉ mo a꞉nda꞉ tunkuliki wanda꞉hali pa꞉ta꞉ pate hauma꞉ wala꞉la꞉eki yelieke. Koto pate hau handolota꞉ ikana꞉ma꞉ mo iki Ketiso wanda꞉halima꞉ iki ota꞉ bepolaalimikie hone wilimikie. Koda꞉ma꞉ ka꞉la꞉ wele homekema꞉ bepolao halimikie. 29 Ikana꞉ma꞉ Ketisona꞉ e pokawamena꞉ yeke Koda꞉ma꞉ iki pa꞉ta꞉ epeke waleke ka꞉la꞉me. Do e pokawaluekema꞉ pa ika꞉ hone tulaaso ombu halo peleme ekima꞉ dia꞉ ya꞉la꞉pate pa Ketiso ipika꞉ hauna꞉ ka꞉nda꞉ make meawaso ombu halimi ekima꞉ tonka꞉na꞉ ipika꞉ e pokalimikie. 30 Ameta꞉ ikana꞉ma꞉ I̱ ame̱le̱ mandakena꞉ ta꞉ma꞉ni pea mo a꞉nda꞉ lita꞉la꞉ ekina꞉ tunao hapa꞉peke ya꞉la꞉me. Mo amba꞉ hande pueke handeme a꞉nda꞉ kone alome. Kutupa ikana꞉ma꞉ ame mo opiteleme a꞉nda꞉ta꞉ koto mandake a꞉nda꞉ kone pa pu halome.

Copyright information for `SSX