Philippians 4

Pea꞉peke ya꞉la꞉ haumanu

Ya yankeke tonuo. Ikana꞉ma꞉ I̱ma꞉ hande loa꞉ pimanu paeyao hone witolo hata꞉ ika꞉ mo Tekehali pa꞉ta꞉ haleme ekita꞉ ota꞉ taka꞉lao hao hapa꞉peke. O ya yankeke tonuo. Ikita꞉ ya puki piki wanda꞉halie. I̱ma꞉ iki ame̱le̱ mandakena꞉ haluekema꞉ hone wopu pa꞉la꞉me. Ikana꞉ma꞉ I̱ ta꞉na꞉ma꞉ homa꞉ tiao halememe. I̱ma꞉ make iki pa꞉ta꞉ paleke na hao halome.

Yuodia neke make o Sindiki neke make I̱ma꞉ alo pi opua꞉pe. Ipilikana꞉ma꞉ Ketiso hakila꞉ hata꞉ta꞉ hone homeke u hapena꞉ I̱ma꞉ ipiliki hone u tiaasome. Kutupa ya Ketiso ta꞉ma꞉ni epekeo. Neke pa꞉ta꞉ make mo wanda꞉ yaapoma꞉ hone homeke wina꞉ tamba꞉ mia꞉peke alome. Pa ekipeke mo wanda꞉ yaapo make Ka꞉lemiti make mo ya e mandake pokoloma꞉ wanda꞉hali paeyaoma꞉ tonka꞉na꞉ mo Ketisona꞉ Pi Seliapota꞉ peo lao daeyaena꞉yeke I̱ma꞉ iki ame̱le̱ weleke we wopu pea e tieke pokoma꞉me. Koto wanda꞉halina꞉ biki paeyaota꞉ mo Koda꞉na꞉ deto hala꞉ tapakena꞉ biki ula꞉ bukana꞉ wape pa ula꞉me.

Ika꞉ Tekehali pa꞉ta꞉ haleme ekina꞉ta꞉ hoto paeyao ta꞉na꞉ma꞉ homu hapa꞉peke. Paa make alome. Ta꞉na꞉ma꞉ homu hapa꞉peke.

Wanda꞉hali paeyao pa꞉ta꞉ ika꞉ pilimi hau manuma꞉ta꞉ ika꞉ homu piki hau walo hapa꞉peke. Mo Tekehalita꞉ niki teke pa꞉ta꞉ hala꞉me. Ala꞉ta꞉ ala꞉ta꞉ paeyao pa꞉ta꞉ hone witeleme ekina꞉ ka꞉nda꞉ma꞉ homolo na yoko hapa꞉peke. Kotoeki na pikita꞉ hoto ma꞉nda꞉ a꞉nda꞉ Koda꞉ pa꞉ta꞉ yeni pimika꞉na꞉ta꞉ ika꞉ mia꞉peke ya꞉la꞉ alemanu kina꞉ keiyae alo hata꞉ honke lo hapa꞉peke. Koto ekina꞉ ikana꞉ma꞉ Yesu Ketiso ame̱le̱ tunao haseme ekina꞉ta꞉ mo wanda꞉halina꞉ hone wilimieki ota꞉ lombeipiki Koda꞉na꞉ puki lopaasa꞉ ekima꞉ ika꞉ hone puki yaapo hoeyaama꞉na꞉ epeke tupa꞉ handeteke hao halieke.

Ya yankeke tonuo. Ya paeyaaso pita꞉ dupa alome. Ika꞉ honema꞉ mo epeke hau pita꞉la꞉ haumanu make mo yeiya꞉ lapeke ya꞉la꞉ haumanu make kota꞉ haumanu homeke hone u moneao hapa꞉peke. Dupiki hauna꞉ loa꞉me. Ota꞉ hau pita꞉la꞉eki leke tendepiki hau pita꞉la꞉eki tikitiki hau pita꞉la꞉eki aleta꞉ ma꞉nda꞉ na ta̱leke hau pita꞉la꞉eki hau seliapo seliapo pita꞉la꞉eki yole hau pita꞉la꞉ ekimanu make koto haumanu paeyao homeke hone u hamena꞉ alome. Mo hande I̱ma꞉ la kueke opua mimi mana꞉ pi manuta꞉ ota꞉ pu hapa꞉peke. Ya pima꞉ loeke opimi tupa꞉ make ya hauma꞉ pueke handeme tupa꞉ make ota꞉ pu hapa꞉peke. Koto ekina꞉ mo nika꞉ puki lopao hamono lo hala꞉ Koda꞉ta꞉ iki ame̱le̱ hao halieke.

Ika꞉ pa halemeke ale mea keiyae leeke pi

10 O I̱ma꞉ mo Tekehali pa꞉ta꞉ halo ekina꞉ta꞉ ta꞉na꞉ tiekema꞉ wopu homolome. Pa ekipeke. Mo nate eleke eleke wopu paeya꞉ hoki naneta꞉ ikana꞉ma꞉ I̱ pa꞉ta꞉ ika꞉ a꞉ta꞉ma꞉ homelemeeki paa waluekema꞉ pota꞉ handa꞉ wimika꞉ta꞉me. Ikana꞉ma꞉ I̱ hone yonka꞉laememe pi na alopate pa mo ika꞉ a꞉ta꞉ma꞉ homelemeeki wala꞉peke pota꞉ na handa꞉ witolo pia꞉ka꞉ta꞉me alome. 11 Kutupa I̱ma꞉ honumake hali halome hone witolo hata꞉ do pi na alome. Pa ekipeke. Mo ya halo ta꞉ta꞉ ta꞉ta꞉ piki tupa꞉ paeyaona꞉ ta꞉na꞉ma꞉ homuluekema꞉ hone ulume. 12 Mo miniki hapeke ya꞉la꞉ alemanu ota꞉ dia꞉ya꞉la꞉ hau pita꞉ mo aneke hapu haka꞉ta꞉pao miniki hapeke ya꞉la꞉ hau yaapota꞉ I̱ pa꞉ta꞉ epeeke pea handa hone ulume. I̱ma꞉ aneke hapu noluekema꞉ make tea꞉ma꞉ homuluekema꞉ make aneke hapu haka꞉ta꞉pao wia haluekema꞉ make hosikieki siki wia haluekema꞉ make nate ma꞉nda꞉ epina꞉ I̱ma꞉ hando pa꞉ta꞉ hata꞉ do hau paeyaota꞉ handa halo ekina꞉ ta꞉na꞉ma꞉ homuluekema꞉ hone witolome. 13 Do hau paeyaota꞉ Ketisoma꞉ ka꞉la꞉ welema꞉ bepolatia a꞉pa polome.

14 Koto polopateta꞉ mo ikana꞉ma꞉ ya ka꞉nda꞉ma꞉ homoa꞉ ekimanu tamba꞉ mimi ekita꞉ ota꞉ epeke hau pimime. 15 Iki Pilipai wanda꞉halima꞉ta꞉ I̱ma꞉ amba꞉ hande Ketisona꞉ Pi Seliapo waloa꞉ta꞉ mo hande Ma꞉sedonia mina꞉pa꞉lao poa꞉ dina꞉ koto pita꞉ma꞉ siosi tapake ma꞉nda꞉ma꞉ dia꞉ya꞉pate ikana꞉ma꞉ homeke I̱ tamba꞉ muma꞉me laa ota꞉ hone witolo pitememe. Siosi tapake ma꞉nda꞉ma꞉ ika꞉ manima꞉ I̱ ota꞉ na tamba꞉ mimipate ikana꞉ma꞉ homeke koto hau pimime. 16 I̱ mo Desalonaika hata꞉ hoto yaapo a꞉nda꞉ I̱ mani dia꞉ya꞉ dina꞉ta꞉ ikana꞉ma꞉ I̱ tamba꞉ muluekema꞉ tapaatiki pu haememe. 17 Ika꞉ pa hameke kiteleme alemanu muluekema꞉ pa na weitolo pateta꞉ pa mo oli hepeni nane ika꞉ epeke haumanu pitelemeeki dimina꞉la꞉eki haka꞉ta꞉pawao wiaena꞉yeke hone pa꞉leke handa iki pa꞉ta꞉ waleke kitolo alome. 18 Do wapena꞉ alo pita꞉ mo hande ikana꞉ma꞉ kimi alemanu molo ekina꞉ iki pa꞉ta꞉ keiyae pi alome I̱ma꞉ haka꞉ta꞉pao molo ekita꞉ ana꞉e alome. Ameta꞉ mo hande Epa꞉pototaitisima꞉ ika꞉ pa kiteleme alemanu paeyao mea a꞉paeyeke handa ya wia halo polo ale manuta꞉ ana꞉na꞉ molome. Koto pa keleme ale manuta꞉ Koda꞉ pa꞉ta꞉ totopo yolepiki hala꞉la꞉ alema꞉ handa꞉la꞉me. Kutupa Koda꞉ma꞉ kutupiki alemanu minolota꞉ ta꞉na꞉ma꞉ homa꞉la꞉me. 19 Ya Tekehali Koda꞉ma꞉ ipika꞉ ota꞉ aneke hapu haka꞉ta꞉pao ula꞉ ale manuma꞉ ika꞉ wia hapa꞉peke ya꞉la꞉ alemanu paeyaota꞉ Yesu Ketiso pa꞉ta꞉ yama꞉ ana꞉lao ku halieke. 20 Nate paeyao nika꞉ Apa꞉ Koda꞉ yeiya꞉ yeiya꞉ lao hamana꞉e. Kutu pina꞉e.

21 Ketiso pa꞉ta꞉ haleme Koda꞉na꞉ wanda꞉hali iki paeyao I̱ma꞉ iki hone witolo hata꞉ a꞉taloe la꞉neaasome. Do I̱ ame̱le̱ mandake haleme Ketiso yankeke tonuma꞉ make iki pa꞉ta꞉ a꞉taloe la꞉neaasememe. 22 Kutupa do haleme Koda꞉na꞉ wanda꞉hali paeyaoma꞉ make iki pa꞉ta꞉ a꞉taloe la꞉neaasemepate mo Sisana꞉ da pa꞉ta꞉ haleme Ketiso wanda꞉halima꞉ta꞉ a꞉taloe pi ota꞉ wopu la꞉neaasememe. 23 Koto ekina꞉ Tekehali Yesu Ketisona꞉ a꞉ta꞉ma꞉ homo tamba꞉ mina꞉la꞉eki iki homeke homeke ame̱le̱ nate paeyao u haena꞉e alome.

Copyright information for `SSX