Revelation of John 10

Enisolo pita꞉ pi ula꞉ buka hosikale siki

Kutupa wele wopu piki enisolo ma꞉nda꞉ oli hepeni nanema꞉ hola꞉pa꞉nialo epeeke handoa꞉me. Ipikita꞉ koama꞉ ambula bao ipika꞉ ambokena꞉ta꞉ ka꞉la꞉da꞉peiyama꞉ ambula wiekeme. Ipika꞉ leke popeleketa꞉ natema꞉ handaa ipika꞉ anketa꞉ ti talo talo hake da pinki manuma꞉ handeekeme. Ipika꞉ kikina꞉ta꞉ pi ula꞉ buka hosiki ale siki lumbu wia haya꞉me. Ipika꞉ popeke nane anketa꞉ dawala manda wia ipika꞉ hoe nane anketa꞉ kenkena꞉ wia haya꞉me. Kutupa laeono manuna꞉ aneke e̱ wi ala꞉ tupa꞉ mo halima꞉ anekema꞉ wi lea꞉me. Mo wi lea꞉ hoki naneta꞉ mo watake hata꞉ tutu manuma꞉ anekema꞉ e̱ wi laa hombo peaememe. Mo pi lea꞉ ale pa꞉ta꞉ kone I̱ta꞉ wape laanialuekema꞉ pitono oli hepeni nane pi ho̱la̱꞉makema꞉ alota꞉ Do watake hata꞉ tutu manuma꞉ lemeke ekita꞉ na laaniake a꞉mbaapeke lea꞉me.

Mo hande dawala pita꞉ kenke yaapo manda hayeke handoa꞉ enisoloma꞉ do kenke ya make dawala make koto pa꞉ta꞉manu hala꞉ ala꞉ta꞉ ala꞉ta꞉ make koto ale paeyaona꞉ wepia wina꞉ la꞉la꞉ hoto paeyao pa hao hala꞉ Koda꞉na꞉ bikina꞉ pi la꞉ witolo alota꞉ Nate yola꞉ moneapeke dia꞉ya꞉la꞉pate pa mo watake hata꞉ peao enisoloma꞉ ipika꞉ bu kanake lia꞉ka꞉na꞉ta꞉ Koda꞉ma꞉ mo hande ipika꞉ pa hameke e pokaasa꞉ potopede haliweki pa꞉ta꞉ la haleeke tupa꞉ ipikana꞉ma꞉ ipika꞉ pulueke laa a꞉mbao ula꞉ ekita꞉ ota꞉ pu paeyaalieke lea꞉me.

Kutupa oli hepeni nanema꞉ hande I̱ pa꞉ta꞉ pi laa kia꞉ pi ho̱la̱꞉make ombuma꞉ alota꞉ Mo dawala make kenke yaapo manda hala꞉ enisolona꞉ kiki pa꞉ta꞉ lumba wia hala꞉ pi ula꞉ buka pua mie lea꞉me. Koto ekina꞉ I̱ pua mo enisolo lota꞉ pitolota꞉ mo pi ula꞉ hosiki buka siki kie loa꞉me. Ipikana꞉ma꞉ I̱ pa꞉ta꞉ alota꞉ Mea nae. Neliaeka꞉na꞉ta꞉ weleke nolo pa꞉la꞉pate naka꞉ kake pa꞉ta꞉ta꞉ boi hapekema꞉ handaa tende yole pilieke lea꞉me. 10 Koto leeke I̱ma꞉ mo pi ula꞉ hosiki buka siki mea noa꞉pate boi hapekema꞉ handaa tende yole pia꞉me. Pate neliawa꞉ dina꞉ta꞉ yaka weleke nea꞉me.

11 Kutupa I̱ pa꞉ta꞉ alota꞉ Mo kapomanimanu handeteke pila꞉ kenke ta꞉ta꞉ ta꞉ta꞉ make tutu ta꞉ta꞉ ta꞉ta꞉ make pi ta꞉ta꞉ ta꞉ta꞉ make kini ta꞉ta꞉ paeyao pa꞉ta꞉ Koda꞉ ipikana꞉ma꞉ lolo pa꞉la꞉ ekina꞉ pi tapaasa꞉eki paa lawaapekee lea꞉me.

Copyright information for `SSX