Revelation of John 21

Panake hepeni pita꞉ panake kenke yaapo

Koto hoki naneta꞉ I̱ma꞉ panake hepeni pita꞉ panake kenke yaapo handoa꞉me. Titina꞉ hepeni pita꞉ kenke yaapota꞉ alupaeya꞉me. Kutupa mo dawala make loa꞉me. Mo hande Yakopiki Daoni hande panake Diutuselemeta꞉ wanda꞉ma꞉ ipika꞉ haliki ma̱landi puluekema꞉ amu pea tikitiki yao ipulu pita꞉la꞉ tupa꞉ oli hepeni nanema꞉ Koda꞉ pa꞉ta꞉ yama꞉ opolo epea꞉eki handoa꞉me. Oli kini sea nanema꞉ pi ho̱la̱꞉make tiekema꞉ dupa lea꞉eki opua꞉me. Ameta꞉ Koda꞉na꞉ data꞉ wanda꞉hali ame̱le̱ hala꞉me. Ipikita꞉ iki ame̱le̱ hata꞉ mo wanda꞉halita꞉ ipika꞉ wanda꞉hali au lalieke. Koda꞉ ipikita꞉ mo wanda꞉hali ame̱le̱ halieke. Ipikita꞉ ika꞉ Koda꞉ halieke. Ipikana꞉ma꞉ta꞉ ika꞉ e̱ pankekemanu honialieke. Koto pa꞉ta꞉ta꞉ homa꞉la꞉eki pa na handilimikie. Kutupa puki tanda pitolo a꞉ta꞉ma꞉ homa꞉la꞉eki make e̱ ala꞉eki make tanda mina꞉la꞉eki make ota꞉ dia꞉ya꞉lieke. Mo amba꞉ haumanu paeyaota꞉ alu paeya꞉me laa lea꞉me.

Kutupa mo kini seana꞉ pitia꞉ halima꞉ alota꞉ Ameta꞉ I̱ma꞉ ala꞉ta꞉ ala꞉ta꞉ paeyao panakeeki wepitolome lea꞉me. Ipikana꞉ma꞉ I̱ pa꞉ta꞉ dupa alota꞉ Do ekita꞉ laaniae. Pa ekipeke do pi manuta꞉ ota꞉eki ya꞉la꞉ ekina꞉ make ota꞉ hone tu lapeke ya꞉la꞉ pie lea꞉me. Kutupa ombu alota꞉ Ameta꞉ pu paela꞉me. I̱ta꞉ titina꞉ make sale nane makee. Kini pitolo make paeyaaso makee. Ma꞉nda꞉ epita꞉ ikali na꞉na꞉ma꞉ homea꞉ka꞉na꞉ta꞉ I̱ma꞉ mo opa꞉la꞉ da꞉taasa꞉ ikalita꞉ na hambeke pa nena꞉ waleke halueke. Ma꞉nda꞉ epima꞉ a꞉nda꞉ peaa bepolaasa꞉ hali haya꞉ka꞉na꞉ta꞉ I̱ pa꞉ta꞉ doeki mina꞉e. I̱ta꞉ ipika꞉ Koda꞉ halueke. Kutupa ipikita꞉ yaka weki au lalueke. Pate hone pamboneke tapake make ba꞉sa꞉ piteleme tapake make ata꞉ka꞉ peaaseme tapake make honema꞉ kone hali lu homaaseme tapake make pake nalo loke apa꞉taaseme tapake make ti̱o̱ hau pu haleme tapake make toopi ti wepia ula꞉ ale pa꞉ta꞉ yeni pu haleme tapake make mo yayapiki pi lo haleme tapake make paeyaota꞉ ika꞉ hala꞉peke ya꞉la꞉ ekita꞉ oni ti uleke kiake make titipupiki lanka꞉ ma꞉nda꞉ biki solopa bu lo hala꞉ pa꞉ta꞉e. Koto hau pita꞉la꞉ ekita꞉ mo yaapo peao homa꞉la꞉ekie.

Panake Diutuseleme

Mo hande paeyaaso watake hata꞉ ke handa꞉la꞉eki manuma꞉ tumbulu baake kawaso miniki haeme hande watake hata꞉ enisolo homekema꞉ I̱ pa꞉ta꞉ a꞉pa alota꞉ I̱ma꞉ mo hande Sipisipi Ma꞉na꞉ Ikikina꞉ ma꞉la꞉ wanda꞉ walono epoe lea꞉me. 10 Mo Sipitidima꞉ I̱ tukiki pa꞉ta꞉ e pokolo hata꞉ mo enisoloma꞉ I̱ta꞉ ota꞉ oli pote tieke tumikina꞉ mea tia pea꞉me. Ipikana꞉ma꞉ mo panake Diutuseleme hande yakopiki daoni oli hepeni nane Koda꞉ pa꞉ta꞉ yama꞉ hao holopolo epea꞉eki I̱ pa꞉ta꞉ walea꞉me. 11 Mo daonita꞉ Koda꞉na꞉ pa̱a̱ piti pa̱a̱ putia ipulu hata꞉ dia꞉sepa leke toopi seliapoma꞉ handa ala꞉ta꞉ ma꞉nda꞉ na ta̱leke kalasima꞉ handeekeme. 12 Mo daonita꞉ hokulupiki pape tiekema꞉ popei yao pota꞉ kaketa꞉ paeyao kiki yaapona꞉ ankena꞉ yaapo lombaya꞉me. Mo pota꞉ kake yalaota꞉ kiki yaapona꞉ ankena꞉ yaapo enisoloma꞉ handeteke haememe. Mo pota꞉ kake manuna꞉ yalaota꞉ mo Isulai wanda꞉halina꞉ kiki yaapona꞉ ankena꞉ yaapo tapakena꞉ biki laeya꞉me. 13 Mo nepokomanu yalaota꞉ pota꞉kake tepo lo lombaya꞉me. Nate opa꞉la꞉ naneta꞉ pota꞉ kake tepo lombaya꞉me. Nepoko yaapo nane make pota꞉ kake tepo tepo lo lombaya꞉me. Oni nate pamba꞉la꞉ nane make pota꞉ kake tepo lombaya꞉me. 14 Mo daonina꞉ papeta꞉ kiki yaapona꞉ ankena꞉ yaapo pinki nonopiki toopi oto tiekena꞉ noko peekeme. Koto toopi manuna꞉ta꞉ mo Sipisipi Ma꞉na꞉ Ikikina꞉ aposolo hali kiki yaapona꞉ ankena꞉ yaapona꞉ biki laeya꞉me.

15 Mo I̱ pa꞉ta꞉ pi la kia꞉ enisolota꞉ mo daoni make ipika꞉ pota꞉ kakemanu make ipika꞉ pape pa꞉la꞉eki make paeyao tombo muluekema꞉ mo koloma꞉ wepiki tombo mina꞉la꞉ tolo miniki haya꞉me. 16 Mo daonina꞉ petipeke maka make mo hokulu maka make ota꞉ homeke make pa꞉la꞉me. Mo enisoloma꞉ ipika꞉ tombo mina꞉la꞉ doloma꞉ mo daonina꞉ tombo mia꞉me. Mo daonita꞉ 2 daosenina꞉ 400 kilomida ota꞉ hokulu pea make petipeke ya꞉la꞉eki make olina꞉ hokulu pa꞉la꞉eki make homeke hau kone piekeme. 17 Kutupa mo enisoloma꞉ ombu mo daonina꞉ pape polopala꞉eki tombo mia꞉pate ota꞉ 60 mida mia꞉me. Mo tombo mina꞉la꞉ alena꞉ hokulu piki ekita꞉ ota꞉ ana꞉na꞉ kone tombo mia꞉me.

18 Mo papeta꞉ dia꞉sepa leke toopima꞉ wepiekeme. Kutupa mo daonita꞉ koloma꞉ handa ala꞉ta꞉ ma꞉nda꞉ na ta̱leke kalasima꞉ handea꞉me. 19 Mo daonina꞉ papena꞉ pinki toopi manuna꞉ta꞉ ane mone seliapopiki toopi manuma꞉ popei yao ota꞉ lu liaeyekeme. Titina꞉ toopi pinkita꞉ biki dia꞉sepa yekeme. Yaapo peao toopi pinkina꞉ bikita꞉ sa꞉paeya yekeme. Tepo peao ekina꞉ bikita꞉ a꞉keidi yekeme. Tonko peao ekita꞉ ambuma꞉ handeke au leke toopi biki emulolidi yekeme. 20 Yunki peao ekina꞉ bikita꞉ onkisi yekeme. Yunki mindiki hata꞉ peao ekina꞉ bikita꞉ kaniliani yekeme. Watake hata꞉ peao ekita꞉ hamipiki toopi biki kotisalaedi yekeme. Ketepo peao ekina꞉ bikita꞉ betili yekeme. No̱i̱ peao ekina꞉ bikita꞉ topa꞉si yekeme. Kiki yaapo peao ekina꞉ bikita꞉ kotisapoteisi yekeme. Kiki yaapona꞉ ankena꞉ homeke peao ekina꞉ bikita꞉ dieisini yekeme. Kiki yaapona꞉ ankena꞉ yaapo peao ekina꞉ bikita꞉ a꞉metisi yekeme. 21 Mo kiki yaapona꞉ ankena꞉ yaapo pota꞉ kake manuta꞉ kiki yaapona꞉ ankena꞉ yaapo sekete hapekemanu yekeme. Mo pota꞉ kake manuna꞉ yalaota꞉ mo sekete hapekema꞉ wepuma꞉ wepuma꞉ piekeme. Mo daonina꞉ pota꞉ta꞉ aleta꞉ ma꞉nda꞉ na taleke kalasima꞉ handeke koloma꞉ pilaeyekeme.

22 I̱ma꞉ta꞉ mo daoni pa꞉ta꞉ta꞉ tembolo da na handoa꞉me. Pa ekipeke mo Aneke Tekehali Koda꞉ pita꞉ mo hande Sipisipi Ma꞉na꞉ Ikiki yaapota꞉ mo tembolo da yekeme. 23 Mo daonina꞉ta꞉ nate o kaisepo ma꞉nda꞉ pa̱a̱ pealuekema꞉ opa꞉peke na ya꞉me. Pa ekipeke mo Koda꞉na꞉ au la꞉la꞉ pa̱a̱ta꞉ koto pa꞉ta꞉ pa̱a̱ pu hala꞉me. Kutupa mo daonina꞉ ola꞉paketa꞉ mo Sipisipi Ma꞉na꞉ Ikiki ya꞉me. 24 Koto kenke wanda꞉halita꞉ mo daonina꞉ pa̱a̱na꞉ pomilimikie. Kutupa mo kenkena꞉ kini manuma꞉ta꞉ ika꞉ hamoko ale manuta꞉ ipiki pa꞉ta꞉ mea ipilimikie. 25 Mo daonina꞉ pota꞉ kake manuta꞉ nate paeyao pa lomba꞉pa wilieke. Ota꞉ na pokilieke. Pa ekipeke koto pa꞉ta꞉ta꞉ timba꞉ ala꞉eki ota꞉ dia꞉ya꞉lieke. 26 Mo kenkena꞉ aneke make hamoko ale paeyaota꞉ mo daoni pa꞉ta꞉ mea ipilimikie. 27 Pate mo ha̱i̱ piki ala꞉ta꞉ ma꞉nda꞉ koto daoni pa꞉ta꞉ na honda꞉ pambilieke. Koto tupa꞉ kone ma꞉nda꞉ epima꞉ yaala꞉piki haumanu pu o yayapiki pi lo hala꞉ some make na honda꞉ pambilieke. Mo Sipisipi Ma꞉na꞉ Ikiki ipika꞉ da꞉ta꞉la꞉ tapakena꞉ biki ula꞉ bukana꞉ biki laala꞉ wanda꞉hali homeke koto daoni pa꞉ta꞉ honda꞉ pambilimikie.

Copyright information for `SSX