Revelation of John 4

Hepeni nane biki mina꞉liaaso yeiya꞉ laasemeeki

Koto natena꞉ kone ya nane oli hepeni pota꞉ lomba꞉pa wia꞉eki handoa꞉me. Kutupa mo hande amba꞉ I̱ pa꞉ta꞉ pi la kia꞉ bu kanakema꞉ handeke pi ho̱la̱꞉makema꞉ alota꞉ Do pate epoe laa Kutupa doeki hoki nane pulu pa꞉la꞉eki waluekema꞉ loa꞉me lea꞉me. Koto kone mo Sipitidima꞉ I̱ pa꞉ta꞉ e pokea꞉me. Oli hepeni naneta꞉ mo kilu tumbao pila꞉ kini seana꞉ ma꞉nda꞉ manda pitia꞉me. Ipika꞉ leke popeleketa꞉ yenki tieke yeke toopimanu dia꞉sepa make kanilianima꞉ make leke yale yale pita꞉la꞉ ekima꞉ handea꞉me. Kutupa mo emulolidi toopina꞉ au leke ka꞉la꞉da꞉peiya mo kilu tumbao pila꞉eki popei yao wiekeeki handoa꞉me. Mo hande kini sea popei yaota꞉ mandane hali tieke homekena꞉ tonkopu kini seamanu wia꞉me. Moeki manuna꞉ta꞉ mo hali tieke homekena꞉ tonkopu you haliweki hake piki dau yamaata꞉ koloma꞉ wepiki handeteke hala꞉ haliwekina꞉ you aka꞉manu pambaememe. Mo kini sea pa꞉ta꞉ yama꞉ta꞉ ti tekelemanu make a꞉ta꞉ a꞉ta꞉ piki tutu make mo tutu tieke lita꞉la꞉eki make yapea꞉me. Mo kini seana꞉ puki tikitikita꞉ watake hata꞉ ola꞉pakemanu talo haya꞉me. Kotota꞉ mo Koda꞉na꞉ watake hata꞉ sipitidimanu ya꞉me. Kutupa mo kini seana꞉ puki nane ombuta꞉ kalasima꞉ handeke ala꞉ta꞉ ma꞉nda꞉ na taleke hama꞉ tieke wia꞉eki handoa꞉me.

Mo kini seana꞉ nepoko nina꞉ta꞉ pa deto hao hala꞉ tonkopu alemanu ika꞉ puki nane make hoki nane paeyao lekema꞉ tumbiki ale manuma꞉ popei yao wia꞉me.
Titina꞉ ekita꞉ mo bosikasi tieke biki laeonoma꞉ handea꞉me. Yaapo peao ekita꞉ mo kao hali ekima꞉ handea꞉me. Tepo peao ekita꞉ halina꞉ leke popeleke haya꞉me. Tonko peao ekita꞉ bitutu laa pomina꞉la꞉ uda tiekema꞉ handea꞉me. Mo deto hala꞉ alemanu homeke homekema꞉ta꞉ watake hata꞉ popake haememe. Kutupa ika꞉ loketa꞉ oto nane make hama꞉ nane make lekema꞉ tumbulu bao wia꞉me. Ikana꞉ma꞉ peliolo da ka꞉la꞉polo tombo na wiki lo haleme emelita꞉ dupa

Tekehali Aneke Koda꞉ta꞉ yako piki yako piki yako piki Koda꞉o.
Amba꞉ make haya꞉ ame make hala꞉ wetepena꞉ make halo pa꞉la꞉ halie laa lo halememe.
Mo deto haleme tonkopu ale manuma꞉ta꞉ mo kini seana꞉ pila꞉ hoto paeyao pa hao halo pa꞉la꞉ hali pa꞉ta꞉ pa̱a̱ peaasa꞉eki yeiya꞉ laasa꞉eki keiyae ala꞉eki pa꞉ta꞉ emelimanu lo halememe. Kutupu haleme dina꞉ta꞉ 10 mo hali tieke homekena꞉ tonkopu you haliwekita꞉ mo kini seana꞉ pila꞉ hoto paeyao pa hao halo pa꞉la꞉ hali pa꞉ta꞉ panda꞉puniao lopaata꞉ yeiya꞉ lo halememe. Ika꞉ you aka꞉manu mo kini seana꞉ puki tikitiki lopaaso dupa lo halememe.

11 Nika꞉ Tekehali Koda꞉o. Neke pa꞉ta꞉ta꞉ pa̱a̱ pa꞉la꞉eki make yeiya꞉ laasa꞉eki make honkopu make ana꞉na꞉ mea꞉peke ya꞉la꞉me.
Pa ekipeke nakana꞉ma꞉ ala꞉ta꞉ ala꞉ta꞉ paeyao wa꞉peleme. Kutupa naka꞉ hone pi ekima꞉ta꞉ ika꞉ hapekeeki make da꞉ta꞉la꞉eki make hala꞉me laa lo halememe.
Copyright information for `SSX