Revelation of John 8

Watake peao tonkaake ale

Mo hande Sipisipi Ma꞉na꞉ Ikikima꞉ mo watake peao ale kelepea꞉ dina꞉ta꞉ oli hepeni nane nate leke awa homeke tukikina꞉ no la꞉pa pea꞉me. Kutupa mo Koda꞉na꞉ leke popelekena꞉ hala꞉ watake hata꞉ enisolomanu pa꞉ta꞉ watake hata꞉ bu kanake halea꞉me. Enisolo ma꞉nda꞉ta꞉ koloma꞉ wepiki totopo piki ale yanko hala꞉ kanake miniki mo oloda wia꞉ alena꞉ a꞉pa haya꞉me. Ipiki pa꞉ta꞉ta꞉ mo Koda꞉na꞉ wanda꞉halina꞉ yenimanu ame̱le̱ totopo piki alemanu wopu apa꞉taena꞉yeke halea꞉me. Koto ale manuta꞉ mo kini seana꞉ puki tikitiki ula꞉ koloma꞉ wepiki olodana꞉ yankena꞉yeke pia꞉me. Mo totopopiki ale yankea꞉ ekina꞉ lumuta꞉ Koda꞉na꞉ wanda꞉halina꞉ yeni taapu mo Koda꞉na꞉ puki tikitiki hala꞉ enisolona꞉ kiki pa꞉ta꞉ yama꞉ a꞉meiya pea꞉me. Kutupa mo enisoloma꞉ mo totopo piki ale pamba꞉la꞉ kanake mea mo olodana꞉ talo haya꞉ ti mea apa꞉tao do kenkena꞉ wekila꞉ holaeya꞉me. Kutu pia꞉ tomona꞉ta꞉ a꞉ta꞉ a꞉ta꞉piki tutu make tutu tieke make ti tekele make yu momeni make pia꞉me.

Bu kanake lita꞉la꞉ ekimanu

Koto kone mo watake hata꞉ bu kanake miniki haeme watake hata꞉ enisolo manuma꞉ mo bu kanakemanu luekema꞉ tikitiki yao hao yapememe.

Titina꞉ enisoloma꞉ ipika꞉ bu kanake lia꞉ dina꞉ta꞉ ya hapeke pita꞉ ti uleke apa꞉taake we ikali anekema꞉ do̱u̱ hao oni kenkena꞉ lopea꞉me. Kutu pieketa꞉ mo kenketa꞉ tepo tekilipa homeke ma꞉nda꞉ta꞉ tima꞉ to paeya꞉me. Kutupa mo timanu tonka꞉na꞉ tepo tekilipa homeke ma꞉nda꞉ta꞉ tima꞉ to paeya꞉me. Koto tupa꞉ mo ambu paeyao siki ta꞉ta꞉ paeya꞉me.

Kutupa mo yaapo peao enisoloma꞉ ipika꞉ bu kanake lia꞉me. Pote tieke hombeleke ti talo talo hake nono piki ala꞉ta꞉ ma꞉nda꞉ oni dawala pa꞉ta꞉ holaeya꞉me. Mo dawala tepo tekilipa homeke ma꞉nda꞉ta꞉ we au lolo yapea꞉me. Mo dawala pa꞉ta꞉ pila꞉ alemanu tepo tekilipa homeke ma꞉nda꞉ta꞉ homea꞉me. Kutupa kawaso make homeke hau kone pea hoeyaeya꞉me.

10 Kutupa mo tepo peao enisoloma꞉ ipika꞉ bu kanake lia꞉me. Kutu pieketa꞉ mo talo talo hake dosima꞉ handeke hombulanka꞉ tieke ya nanema꞉ lopa꞉niao mo ikali yopula꞉ ekimanu make opa꞉la꞉ ekimanu make tepo tekilipa homeke ma꞉nda꞉ manda lopea꞉me. 11 Mo hombulanka꞉na꞉ bikita꞉ Teto pa꞉la꞉ekie. Kutupa mo ikali manuta꞉ tepo tekilipa homeke ma꞉nda꞉ta꞉ teto pia꞉me. Mandane wanda꞉halita꞉ koto ikali no hao homememe. Pa ekipeke mo ikalita꞉ teto pitolo hata꞉ pia꞉me.

12 Kutupa mo tonkopu enisoloma꞉ ipika꞉ bu kanake lia꞉me. Kutu pieketa꞉ nate make kaisepo make hombulanka꞉manu make tepo tekilipa homeke ma꞉nda꞉ manuta꞉ lu tondo peaya꞉eki yaalo ika꞉ pa̱a̱ peaasa꞉ ekita꞉ tepo tekilipa homeke ma꞉nda꞉ta꞉ alupaememe. Kutupa mo natepata꞉ tepo tekilipa homeke ma꞉nda꞉ pa꞉ta꞉ta꞉ pa̱a̱ na pia꞉me. Timba꞉ ala꞉eki make homeke hau kone pia꞉me.

13 Kutupa handoa꞉pate oli ya pa꞉ta꞉ a̱e̱ya̱ ida tieke anekema꞉ alota꞉ A꞉pee. A꞉pee. Mo mandane enisolo tepoma꞉ ika꞉ bu kanake lia꞉ka꞉na꞉ta꞉ do kenkena꞉ haleme wanda꞉halita꞉ ekipiki tanda tieke piki ka꞉nda꞉manu milimikipe.

Copyright information for `SSX